ایس بدعنوانی دا حساب کون لوے گا؟
سابق ڈی سی سیالکوٹ بلال حیدر دا احتساب ، کمشنر گوجرانوالہ تے نیب تحقیقات کروان
محمد آصف بھلی
سارے ڈپٹی کمشنرز دے بارے وچ تے میری ایہہ رائے نہیں پر کجھ ڈپٹی کمشنر انج دے ہوندے نیں جیہڑے خود نوں عقلِ کُل سمجھدے نیں۔ ایہناں نوں ایہہ غرور لاحق ہوندا اے کہ جس طرح ایہناں دے عہدے وچ بے پناہ اختیارات نیں ایسے طرح ایہناں دی عقل وی بحرِز خار اے۔ انج دا ای اک بوہت زیادہ عقلمند ڈی سی بلال حیدر سیالکوٹ وچ تقریباً دو سال پہلے موجود سی۔ ایس نے اک عدد ٹورسٹ بس سیالکوٹ دے اہم مقامات وکھان لئی تیار کروائی تے ایس دو منزل بس دے ناں اُتے سیالکوٹ دے کھُلے دِل والے صنعت کاراں توں لکھاں روپئے دے عطیات وصول کیتے۔ مجموعی طور اُتے ایہہ رقم تن چار کروڑ روپئے توں گھٹ نہیں ہوئے گی۔ جدوں ایس ٹورسٹ بس سروس دا آغاز کیتا گیا تے ایہنوں حکومت پنجاب دا اک اہم سنگ میل قرار دتا گیا ۔ ایہہ بس صرف کجھ مہینے سیالکوٹ دی سڑکاں اُتے ویکھی گئی تے فیر ایس ناکام ترین منصوبے دی نذر کروڑاں روپئے کرن دے بعد کسے نوں علم وی نہیں ہویا کہ حکومت پنجاب دا اوہ اہم سنگ میل کدھر غائب ہو گیا۔ بلال حیدر سابق ڈپٹی کمشنر سیالکوٹ نوں سیالکوٹ ٹورسٹ بس سروس دے ناں توں صنعت کاراں نے جیہڑے کروڑاں روپئے دے فنڈز دِتے سن ایس دا کوئی آڈٹ وی اَج تیکر نہیں ہویا کہ ایہہ پتہ چل سکے کنہےفنڈز خرد برد ہوئے تے فیر اک ناکام ترین منصوبہ شروع کرن توں پہلے عقل نال کم کیوں نہیں لیا گیا۔ ممکن اے جس ملک وچ ارباں روپئے دی کرپشن دے مجرم کسے سزا دے ڈر دے بغیر آزاد پھر رہے ہون۔ اوتھے کجھ کروڑ دی بدعنوانی نوں جرم ای نہ سمجھیا جاندا ہوئے۔ جے ساڈا ایہو طرز ِفکر رہیا تے فیر سنگین ترین بدعنوانیاں نوں وی سرکاری افسر اپنا حق سمجھ لین گے۔ اج میں نواز شریف ہاکی سٹیڈیم پسرور روڈ سیالکوٹ گیا تے اوتھے ٹورسٹ بس سروس سیالکوٹ دی اکلوتی بس نوں کھلوتیاںویکھیا۔ ایس بس نوں اک وڈے کپڑے نال کجیا گیا اے۔ انج محسوس ہوندا سی کہ سیالکوٹ ٹورسٹ بس سروس دی موت دے اعلان دے بعد بس نوں کفن پا دِتا گیا اے۔ ہُن ایس بس وچ کوئی سوار نہیں ہوئے گا۔ شاید ایس بس سروس دی منصوبہ سازی ای صنعت کاراں توں لئےگئے عطیات وچ مالی خرد برد لئی کیتی گئی سی۔ جے ٹورسٹ بس سروس سیالکوٹ وچ کوئی مالی واردات نہیں ہوئی فیر وی بلال حیدر سابق ڈپٹی کمشنر سیالکوٹ توں ایہہ پچھ گچھ تے باز پرس ضروری ہونی چاہیدی اے کہ اک یقینی طور اُتے ناکام ہو جان والے منصوبے لئی سیالکوٹ دے صنعت کاراں توں تِن چار کروڑ روپئے دے فنڈز کیوں لئے گئے۔ ایس منصوبے اُتے جے کوئی سرکاری فنڈز وی استعما ل کیتے گئے نیں تے ایس دی وی تحقیق ہونی چاہیدی اے۔ ایس ویلے گوجرانوالہ ڈویژن دے کمشنر ذوالفقار گھمن سیالکوٹ دی دھرتی دے ای سپوت نیں۔ ایہناں دی شہرت وی اک ایماندار افسر دی اے۔ امید اے اوہ ٹورسٹ بس سروس سیالکوٹ دے ناکام ترین منصوبے اُتے کروڑاں روپئے دے فنڈز ضائع کرن والیاں دے خلاف ضرور کاروائی کرن گے۔ نیب نوں وی ٹورسٹ بس سروس سیالکوٹ دے ناں اُتے کیتے گئے غبن دی ضرور تحقیق کروانی چاہیدی اے۔
بلال حیدر جدوں ڈی سی سیالکوٹ سن تے اوہ کئی سرکاری افسراں نوں ایہہ دھمکی دیندے سن کہ میں تہاڈا معاملہ نیب نوں بھجوا دیواں گا۔ میرا خیال اے کہ ٹورسٹ بس سروس سیالکوٹ وچ کیتی گئی مالی خیانت دی تحقیق جے نیب کرے تے ایس اُتے بلال حیدر نوں وی کوئی اعتراض نہیں ہوئے گا۔ آخر کسے انٹی کرپشن دے ادارے نے ایس معاملے دی تحقیق تے کرنی اے کسے نے تے کروڑاں روپئے ضائع کرن دا حساب لینا اے۔
