’’میری چیچی دا چھلا ‘‘
ایثار رانا
سیاست تے انقلاب وچ اک فرق آر یا پار دا ہوندا اے، سیاست وچ آر پار نہیں ہوندی ایس لئی بلاول بھٹو دی پارٹی نے موقعے توں فائدہ چک لیا تے ایہو پاکستان دی سیاست دا حسن اے۔ ہن تے مسلم لیگ ن چلاندی پھردی اے۔ ’’ میری چیچی دا چھلا ماہی لاہ لیا، گھر جا کے شکایت لاواں گی‘‘۔ تے بھیا تسیں چیچی پھڑائی ای کیوں سی۔ بقول پنڈی بوائے دے آصف زرداری نال ہتھ ملا کے ویکھنا پیندا اے کہ انگلیاں پوریاں نیں۔ ہن تسیں چیچی پھڑائی اے تے چیچی نہ وٹو تے گھر جا کے شکایت لان دا وی کوئی فائدہ نہیں۔ گھر والے کیہڑا اپنا دامن بچا کے بیٹھے نیں۔ نجانے بلاول بھٹو مسلم لیگ نوں مشورے دے رہے نیں یا ایہناں دا توا لا رہے نیں۔ کہندے نیں ٹھنڈا پانی پیو، کدی کہندے نیں ساڈی کامیابی مسلم لیگ ن نوں ہضم نہیں ہو رہی۔ بھیا ہضم ایس لئی نہیں ہو رہی کہ تسیں ایہناں دے 81 ووٹاں دی سیڑھی بنائی تے ’’من ڈولے میرا تن ڈولے ‘‘ گا ندے سینٹ وچ اپڑے۔ ایہو سین تہاڈے نال ہوندا تے ویکھدا ’’کون سی کاسوری کون سا ہاجمولا‘‘ تہاڈے اندرونی نظام دی بروقت ٹیسٹنگ کردا۔ دھوکہ دہی تے موقع پرستی، پیپلز پارٹی دا مزاج تے نہیں سی، حیرت اے تسیں ذوالفقار علی بھٹو شہید دے فلسفہ دا ای کریام کرم کر دتا۔ بی بی شہید دے نال تے ایہناں دے قاتل تلاش نہ کر کے تسیں پہلے ای کھلواڑ کر چکے۔ بہرحال ایہہ مننا پئے گا کہ جے موقع پرستی وچ مسلم لیگ ن سیر اے تے پیپلز پارٹی سوا سیر اے۔ اسیں تے کدوں توں پی ڈی ایم مرحوم دی ہٹ ویڈیوز وچ بلاول دی مسکراہٹ توں سمجھ گئے ساں کہ اوہ مریم نوں ویکھ کے دل ای دل وچ گنگنا رہے نیں کہ ’’چل چلیئے دنیا دی اس نکڑے‘‘۔ توں ایس نکرے تے میں اس نکرے۔ ڈاکٹر نے سنتا سنگھ نوں کہیا کہ تہاڈی بیوی فقط 10-15 دن دی مہمان اے۔ سنتا سنگھ اتھرو صاف کردے ہوئے بولیا ڈاکٹر جتھے 25 سال برداشت کیتا ایہہ دن وی برداشت کر لاں گے۔ میرے ہونہار بلاول تے مریم ہن واری اے میثاق جمہوریت دے اصل مذا ق جمہوریت بنان دی۔ کڈو ہن دونویں اپنی اپنی جیباں توں ماضی دے گندے انڈے تے مارو اک دوجے نوں۔ کاش تسیں سنتا سنگھ وانگوں برداشت پیدا کر لیندے۔ میں وار وار کہنا واں کہ جمہوریت نوں جنہا نقصان پیپلز پارٹی تے مسلم لیگ دی رقابت نے اپڑایا اینا تے ضیاء الحق تے مشرف نے نہیں اپڑایا۔ تسیں سو وار اک پلیٹ فارم اُتے اکٹھے ہو جائو تہاڈے بیک گرائونڈ وچ اک ای گانا چل رہیا ہوندا اے۔
’’ساڈا چڑیاں دا چنبہ وے بابل اساں اڈ جانا‘‘
(گو مریم بی بی غالب دا ایہہ شعر گنگناتی ہوں گی)
کاوے کاوے سخت جانی ہائے تنہائی نہ پوچھ
صبح کرناشام کالانا ہے جوئے شیر کا
نوٹ ایتھے کاوے کاوے توں اوہ ای مراد اے جیہڑا چچا غالب دے دماغ وچ سی۔ تسیں جے ایہنوں دوجا کاوے کاوے سمجھ رہے او تے جسٹس (ر) عظمت سعید ناراض ہو سکدے نیں کیوں جے ایہہ براڈ شیٹ والا کھیڈ ہن قوم دی جان چھڈے نہ چھڈے ایس نال وابستہ ہر کردار نوں رول کے رکھ دیوے گا۔ ایہہ کاوے موسووی پٹواری دا منڈا اے جیہڑا سب نوں دوروں دوروں اکھیاں مارے گا۔ ساڈے جہیا پاکستانی تے ایہہ ہے نہیں کہ عدالت دے قابو نہ آئے تے نیت جپھا مار دے کاوے کاوے نے تے رپورٹ نوں ای مسترد کر کے آوے دا آوا ای وگاڑ دتا تے ایہنوں عدالتی تاریخ اُتے اک دھبہ قرار دتا اے۔ تے ایس ویلے اسیں ایہناں دی آڑ وچ اپنے دل دی ریجھ پوری کر رہے آں کہ پاکستانی انصاف پیدائش توں لے کے اج تیکر بس مصلحتاں دی تان پر تاتاتھیا کردی رہی اے ۔
کاش ساڈے عدالتی نظام وچ کانیلس، بھگوان داس تے دراب پیٹل ہمیشہ موجود رہندے۔ بہرحال ہن براڈ شیٹ ایشو نوں کھڈے لائن لانا ممکن نہیں۔ ددھ دا ددھ تے پانی دا پانی ہونا چاہیدا اے۔ بنتا سنگھ بھنگ گھونٹ رہیا سی۔ سنتا سنگھ بولیا دنیا چن اُتے اپڑ گئی تے توں بھنگ گھوٹ رہیا ایں، بنتا بولیا ہن اک گلاس پی لاں میں اوس چن تے اپڑ جاں گا۔ اسیں 20 کروڑ بنتے بھنگ پیٹے چن دے چکور آں۔ ورنہ قومی خزانے اُتے اینا وڈا ڈاکا پیا۔ رضیہ غنڈیاں وچ پھسی رہی تے ہر اک نے حصہ بتدرجثہ رج کھادا تے جنہاں دے خون پسینے دی کمائی ایہہ دولت سی اوہ بھکے مردے رہے۔ وعدیاں، نعریاں، دعویاں تے خواباں دی بھنگ پی کے ایہہ لیڈر توں چھلادے جانشانی تیری مہربانی کہندے رہے۔ ایہناں دی جدوں وی واری آئی کدھرے نہ کدھرے توں گھگو رو پیندا۔ کیوں نہ آئین وچ ترمیم کر دین خزانہ تے غریب دی عزت طاقتوراں نوں لٹن دا حق ہوئے گا تے جس دی واری ہوئے گی اوہ رج کے واری لوے گا۔
ساڈی قسمت وچ بس لیٹس ای رہ گئیاں نیں، کدی بلیک لسٹ، کدی گرے لسٹ تے کدی ریڈ لسٹ، غریب دی جورو سب دی بھابھی ہوندی اے۔ سانوں تے لگدا اے پوری دنیا نوں سانو بھابھی دا عالمی ایوارڈ دے دیندا چاہیدا اے۔ ہن ایہناں لندن دے کالے دل والے گوریاں نوں ویکھو ڈگے کھوتی توں نیں تے غصہ پاکستان اُتے کڈ رہے نیں۔ کووڈ 19 دی تیجی لہر گھلی وی آپ برطانیہ نے تے سفری پابندی وی ساڈے اُتے لا دتی۔ بھارت، جرمنی، فرانس حتیٰ کہ بنگلہ دیش وچ کورونا دی شدت ساڈے توں کدھرے زیادہ اے پر ریڈ لسٹ ساڈے مقدر وچ آئی۔ مجال اے ایس اُتے بطور نمائندہ قوم حکومت نے ذرا وی احتجاج دی چوں چاں کیتی ہوئے۔ شاید ساڈا یقین اے کہ جس طرح پاکستان نوں لُٹن والیاں، گالیاں دین والیاں نوں برطانیہ اپنی گود وچ گرائپ واٹر پلاندا اے کل نوں سانوں وی گود وچ لے سکدا اے۔ ٹھیک اے بھیا تسیں سب اپنے کل دی فکر رکھو ایس قوم دا کیہ ؟ نہ ایس دا کل سی نہ اج اے تے نہ آن والا کل۔ ایہہ تے بس ایندھن اے طاقتوراں دی بھٹی دا۔
