سیکولر بھارت دا اصل چہرہ ننگا

لکھت:شاہد ندیم احمد

بھارت مودی سرکار دے اقدامات دی وجہ توں اج واضح طور تے اک اجہی ریاست دی حیثیت اختیار کر چکیا اے، جتھے تعصب، تنگ نظر، مذہبی تفریق تے انتہا پسندی دی نویں تریخ لکھی جا رہی اے۔ مودی سرکار نے مسلم دشمن شہریت قنون پارلیمنٹ دے دوہاں ایواناں دے بعد صدر مملکت ولوں وی منظور کر لیا اے جہدے تحت پاکستان، بنگلہ دیش تے افغانستان توں ترک وطن کرکے 31دسمبر 2014ء توں پہلاں بھارت اپڑن والے ہندو، عیسائی، سکھ، پارسی ، بودھ تے جین مت دے منن والیاں نوں بھارتی شہریت دتی جاوے گی، پر مسلمان ایس فہرست توں باہر رہن گے۔ عوام ایس متعصبانہ قنون دے خلاف اٹھ کھڑے ہوئے نیں،بھارت دی کئی ریاستاں وچ تعصب تے مبنی قنون دے خلاف پُرتشدد احتجاج جاری اے۔ مغربی بنگال، مشرقی پنجاب، کیرالا، مدھیا پردیش، چھتیس گڑھ دیاں حکومتاں نے متنازعہ قنون نوں اپنی ریاستاں وچ نافذ نہ کرن دا اعلان کر دتا اے۔ احتجاج تے ہنگامیاں دا دائرہ نئی دہلی سنے ملک دے شمال مشرقی علاقیاں تک وسیع ہو چکیا اے تے مسلسل پھیل رہیا اے۔ کشمیریاں دے حق خود ارادی تے ڈاکہ پان دے بعد شہریت دا ایہ فرقہ پرستانہ قنون مسلماناں دے نال امتیازی سلوک دی اک بدترین مثال تے بھارت دے سیکولر غیر جانبدارانہ کردار دے خاتمے دا حتمی اعلان اے۔
درحقیقت بھارت اپنے حکمراناں دے انتہا پسندانہ رویے دی وجہ توں ٹُٹ بھج ول گامزن اے،مودی سرکار اپنے جنون وچ ہر حد توں لنگھ رہی اے۔ گجرات وچ مسلماناں دے قتل عام دی بنیاد تے وزیراعظم بنن والے مودی تے ایہناں دے ساتھیاں نے پہلے مقبوضہ کشمیر دی خصوصی حیثیت دا خاتمہ کیتا جہدے بعد توں کشمیر وچ ہون والے احتجاج نوں دبان لئی مسلسل لاک ڈاؤن جاری اے۔ مقبوضہ کشمیر دا پوری دنیا نال مواصلاتی رابطہ منقطع اے، کوئی دن نہیں جاندا کہ مقبوضہ کشمیر وچ شہادتاں نہ ہوندیاں ہون، کشمیریاں دے گھراں تے چھاپے نہ پیندے ہون تے نوجوان تے کمسن کشمیری بالاں نوں حراستی مراکز وچ لے جا کے بہیمانہ تشدد دا نشانہ بنایا جاندا ہووے، کشمیری عورتاں دی عصمت دری نوں سرکاری سطح تے بطور تشدد استعمال کیتا جا رہیا اے۔ مقبوضہ کشمیر دا المیہ عالمی بے حسی دی نذر تے ہے سی، ہن بھارتی پارلیمنٹ نے ترمیمی شہریتی بل منظور کر لیا اے جہدے تحت شمال مشرقی ریاستاں وچ رہن والے مسلماناں نوں ایہناں دی بھارتی شہریت توں محروم کیتا جا سکے گا جد کہ بیرون ملک توں آن والے ہندوواں تے بدھ مت دے پیروؤں نوں بھارتی سہرت دتی جا سکے گی۔
دراصل ایہ قنون اک قومیت دے فلسفہ نوں ظاہر کردا اے ، یعنی بھارت وچ رہن والا صرف ہندو مذہب والا ای ہووے گا، پر ہندوستان دی تریخ ایہدی نفی کردی اے۔ ایس بل دے خلاف بھارت دی شمال مشرقی ریاستاں وچ زبردست ہنگامے پھٹ پئے نیں، ایہدے باوجود مودی تے اوہدی انتہا پسند بھارتیہ جنتا پارٹی بڑے ڈھیٹ پنے نال ایہدے تے ڈٹی ہوئی اے۔ صرف مذہب دی بنیاد تے شہریت توں محروم کرن دی ابتدا اسرائیل نے کیتی سی۔ ایہدے بعد کجھ انج ای میانمار دی حکومت نے کیتا تے سرکاری فوج نے نہ صرف روہنگیا مسلماناں دا قتل عام کیتا، سگوں وڈے پیمانے تے ایہناں حراستی مراکز وچ قید کرکے ایہناں دی زمیناں تے دوجے املاک تے قبضہ کر لیا گیا۔ سرکاری نسل کشی دے بعد روہنگیا چوکھی تعداد وچ ہجرت کرن تے مجبور ہوئے تے ہن اوہ بنگلہ دیش وچ شدید کسمپرسی دی زندگی گزار رہے نیں، اجہی ای کجھ صورتحال چین دے جنوبی صوبے سنکیانگ وچ اے، جتھے صرف مذہب دی بنیاد تے مسلماناں دے خلاف اقدامات جاری نیں تے ایہناں نوں اجتماعی حراستی مراکز وچ قید کرکے مذہب تبدیل کرن تے جبری طور تے مجبور کیتا جا رہیا اے۔
دنیا ولوں اجہے مظالم تے کوئی موثر عملی قدم نہ چُکن تے مناسب ردعمل نہ ہون تے ہن بھارت وی ایسے راہ تے چل پیا اے۔ مقبوضہ کشمیر وچ مسلماناں نوں تے ایہناں دے مذہب دی بنیاد تے ظلم و ستم دا نشانہ بنایا ای جا رہیا سی، پر ہن ایہ سلسلہ پورے بھارت وچ پھیلا دتا گیا اے۔ مودی سرکار کھلے عام کہہ رہے نیں کہ سپین دی طرح بھارت توں وی مسلماناں دا ناں و نشان مٹا دتا جاوے گا، بھارتی مسلمان مذہب تبدیل کرکے ہندو ہو جان یا فیر ایہناں نوں ملک بدر کر دتا جاوے گا۔ بھارت وچ کروڑاں بندے ایس ویلے شہریت توں محروم ہون دے خطرے نال دوچار نیں، مقبوضہ کشمیر دا ایناں وڈا خطہ جیل وچ تبدیل کیتا جا چکیا اے جتھے کشمیر ی اپنے بنیادی شہری حقوق توں محروم نیں، پر پوری دنیا وچ ایہدے تے موت دی خاموشی طاری اے، کدھریوں وی کوئی خاص عملی ردعمل ساہمنے نہیں آیا اے۔ ایہدے تے جے کدھریوں کوئی نحیف توں آواز بلند ہوئی وی اے تے ایس طرح کہ بھارت دے ایس عمل دا بغور جائزہ لے رہے نیں۔ موجودہ بھارتی حکمراناں نوں انتہا پسندانہ پالیسیاں توں باز رکھن لئی صرف نصیحتاں تے کمزور ردعمل کافی نہیں، اقلیتاں دے حقوق دا تحفظ اقوام متحدہ دے قوانین دے تحت پوری عالمی برادری دی ذمہ داری اے، ایہدے لئی وکھو وکھ ملکاں دے خلاف حسب ضرور سخت اقدامات کرن دی بہت ساری مثالاں اقوام متحدہ دی تریخ وچ موجود نیں۔ مقبوضہ کشمیر تے ایہدے بعد پورے بھارت نوں مسلماناں لئی ہنیر نگری بنان توں مودی سرکار نوں روکن لئی عالمی برادری ولوں موثر مداخلت ضروری اے، جد کہ انج نہ ہون دی صورت وچ بھارت دی داخلی بدامنی ودھ کے نہ صرف علاقائی، سگوں عالمی سطح تے خطرناک نتائج دا سبب بن سکدی اے۔
پاکستان نے سفارتی سطح تے جتھے ایس معاملے تے اپنا مذمتی ردعمل ظاہر کیتا، اوتھے وزیراعظم عمران خان نے وی ایہنوں دوطرفہ معاہدیاں دی خلاف ورزی قرار دتا اے۔ ایہ سیکولر بھارت دا اصل چہرہ اے جہدے توں نقاب اتر رہیا اے، دنیا ویکھ رہی اے کہ سب توں وڈی جمہوریت دے دعویدار انسانی حقوق دی پامالی وچ کیویں پیش پیش نیں۔ نریندر مودی تے ایہناں دے ساتھیاں نوں وی ایس حقیقت دا ادراک ہونا چاہیدا اے کہ وقت دا پہیہ الٹا نہیں گھمدا تے تریخ نوں پچھے نہیں دھرویا جا سکدا، ایس لئی بھارت وچ صدیاں پرانے ہندو راج دی واپسی ناممکن اے جہدا خواب ویکھ رہے آں۔ بھارت دے سوا ارب باشندیاں دی بھلائی ایہدے وچ اے کہ مسلماناں سنے ساریاں اقلیتاں نوں اوہ سارے انسانی تے جمہوری حقوق حاصل ہون جہناں دا حقدار اکثریت نوں سمجھیا جاندا اے، انج نہ کیتا گیا تے داخلی خلفشار دی وجہ توں بھارت مودی سرکار دے ہتھون ٹُٹ بھن دا شکار ہو کے تریخ دا حصہ بن جاوے گا۔