عوام دے تعاون وچ مسئلیاں دا حل

ملک دی مہنگائی دا ایہناں اعلیٰ عہدیداراں دے باورچی خانے اُتے اثر کیوں نہیں
پیندا کیوں عوام نوں ای اپنی چار روٹیاں دے ٹکڑے ونڈ کے کھانے پیندے نیں

‘رابعہ رحمن

ساڈا نکا جہیا گھر ہوندا اے ایس دی صفائی ستھرائی دے نال نال سانوں بجلی دا ضرورت دے مطابق استعمال تے پانی دے استعمال وچ وی احتیاط ورتدے نیں تاکہ گھر دے بجٹ اُتے بوجھ نہ پئے تے بلاوجہ بجلی یا پانی تے گیس دے استعمال نال ہزاراں دا بل دین دی بجائے اوہ پیسہ بالاں دی تعلیم و تربیت تے صحت و خوراک دے معاملے وچ استعمال کیتا جائے تے ساڈے بھائی، پتراں تے شوہر دی خون پسینے دی کمائی ضائع ہون توں بچ جائے یقینا ہر گھر دے سمجھدار لوک انج دا ای کردے نیں، تے ایتھے سوال ایہہ اٹھدا اے کہ کیہ ملک ایہناں اعلیٰ عہدیداراں دا گھر نہیں ہوندا، ایس ملک دا ہر نظام ایہناں دے فیصلیاں دے مطابق ایہناں دی پالیسیاں نوں مدنظر رکھدے ہوئے ایہناں دے سیرو سیاحت ایہناں دے اخراجات، ایہناں دے باہر دے دورے ایہناں دی چار میل دی مسافت اُتے گڈیاں دا گارڈز دا پروٹو کول تے لمبی قطاراں، ایہناں دے وڈے وڈے بھوت، بنگلیاں دی بے وجہ دی آرائش ، کیہ ایہہ ملک توں محبت تے ایمانداری دا شاخسانہ ، کیہ افلاس، بھوک ، بیماری، پسماندگی، تعلیمی سہولت دے محروم بجلی دے جھٹکیاں تے مہنگائی دی کھپت لئی عوام دا انتخاب کیتا جاندا اے، کیوں اک اعلیٰ عہدیدار سیاستدان وی ایسے طرح سردیاں دے موسم وچ ہنیری راتاں سڑک اُتے لگے ہوئے بنچ اُتے پھٹے ہوئے کمبل وچ نہیں گزار سکدا، گل برابری دی اے گل عہدیاں دی نہیں، گل انسانیت تے انسان دی اے، دولت تے خاندانی جاہ وحشمت دی نہیں، جے کراچی وچ جوہڑ دا پانی غریب دے بچے پی کے جی رہے نیں تے کیوں بلاول حمزہ، سراج الحق ، فاروق ستار تے ایس توں ودھ کے پارلیمنٹ دے عہدیداراں ، اسمبلیاں دے ناکارہ لوکاں لئی مختلف کمپنیاں دی بند بوتلاں کھولی جاندیاں نیں۔
ملک دی مہنگائی دا ایہناں دے باورچی خانے اُتے اثر کیوں نہیں پیندا کیوں عوام نوں ای اپنی چار روٹیاں دے ٹکڑے ونڈ کے کھانے پیندے نیں۔ ملک دے نگہبانو، کدی اپنی اکھاں توں اقتدار دے نشہ والی عینک اتار کے تے ویکھو، اپنے لئے نہ سہی ایس حلف لئی جیہڑا تسیں کرسیاں جیتن دے بعد چکدے او، گردناں دے سریاں نوں کڈ لوئو تے تہاڈی گردناں ذرا جھکاں تے تسیں ویکھ لوئو کہ 11 سالہ بچہ جدوں کسے افسر دے جُتے پالش کردا اے تے کنہی خواہشاں نوں ماردا چلیا جاندا اےجدوں اک مزدور اپنے بچے دی دوائی لئی چوری کردا اے تے کنہا نادم تے شرمسار ہوندا اے (تسیں لوک تے شرمسار وی نہیں ہوندے) ملک دی سلامتی تے عزت دا علم ہمیشہ ملک دے سیاستداناں دے ہاتھ وچ ای ہوندا اے پر ساڈے سیاستداناں نے بم ڈیگیا تے بے چارے عوام اُتے مہنگائی دا زور تے پٹرول، ڈیزل دی قیمتاں وچ اچانک وادھا اک سوالیہ نشان اے۔
تسیں لوک عوام نوں اعتماد وچ لوئو ایہناں نوں صحیح صورتحال دسو ایہناں نال اپیل کرو، عوام تہاڈے نال نہ صرف تعاون کرن نوں تیار نیں بلکہ اوہ تے اینے اعلیٰ ظرف نیں کہ اپنے ملک نوں بچان لئی اپنا مال و اسباب تہاڈے حوالے کر دین پر ایہناں نوں یقین تے دلوائو کہ ایہناں دے خون پسینے دی کمائی نال ڈیم ای بنے گا ، بجلی اوی پیدا ہوئے گی، مہنگائی ختم ہوئے گی، صحت تے تعلیم اک ای معیار اُتے سب نوں فراہم کیتی جائے گی تے ایس وچ ایہناں حکومتی خرکاراں دے اپنے خاندان وی شامل ہون گے کسے نوں ایس دے حق توں ودھ مراعات نہیں دتی جان گیاں۔
ملک دے بوہت سارے فیصلے جیہڑے صرف پارلیمنٹ وچ ہونے چاہیدے نیں اوہ کدھرے ہور توں کیوں ہوندے نیں کیہ پارلیمنٹرین نااہل نیں جے انج اے تے فیر عوام کس اُتے اعتبار کرن،’’ جس کا کام اسی کو ساجے‘‘دے مصداق کم کرنا چاہیدا اے۔ رمضان المبارک شروع ہون والا اے، مہنگائی دا منہ زور گھوڑا وی بے لگام ہو گیا اے۔ ایس لئی حکومت بوہت سارے اقدامات کر رہی اے سہولت بازار، اتوار بازار، رمضان بازار مختلف علاقیاں وچ لائے جا رہے نیں تے ایہناں دے متعلقہ ذمہ داران گاہے، بگاہے دورے کر کے ایہناں بازاراں نوں حتمی شکل دے رہے نیں تے نال نال ای کرونا وائرس دے ایس او پیز اُتے عملدرآمد نوں یقینی بنان لئی مختلف منصوبہ بندیاں کیتیاں جا رہیاں نیں پر اک گل یاد رکھنی چاہیدی اے کہ عوام دے تعاون دے بغیر 100 فیصد کامیابی حاصل نہیں ہو سکدی۔
معاملات ہمیشہ اودوں گھمبیر ہوندے نیں جدوں ا تفاق رائے دے نال نہ چلیا جائے حکومت نوں سمجھنا چاہیدا اے کہ عوام اپنی ساری مجبوریاں تے مسائل دے باوجود حکومت نال تعاون کرن نوں تیار اے پر ایس صورت وچ جیہڑا اعلیٰ عہدیداران دے گھراں وچ دستر خوان وچھے گا اوہ ای دستر خوان عوام دے گھراں وچ وی وچھے گا۔