سچی خوشی چیزاں نال نہیں جُڑی

جمشید اقبال

ساڈا اک دوست اے جیہڑا کجھ مہینیاں بعد فون کر کے بڑے رازدارانہ انداز وچ دسدا اے کہ فلانے دوست ایہ خرید لیا اے، فلانے نے اوہ خرید لیا اے، تے فلانے نے اوہ۔ میں اوس دوست دا ایہ حسد نامہ سن کے اوہدا شکریہ ادا کرناں۔ فیر اگلے فون تک اک لمی خاموشی۔ کل فیر اوہدا فون آیا، کچھ ہور دوستاں دا اوس مینوں دسیا ایس واری میں آکھیا “دسن لئی بہت شکریہ، میں اوہناں دوستاں نوں فون کر کے اوہناں نوں مبارکباد دا فون کر دیاں گا تے اوہناں دی مزید ترقی لئی نیک خواہشات دا اظہار وی کر دیاں گا”۔
ایہ سن کے اوہنوں ایس قسم دی چُپ لگی جیس توں مینوں صاف پتا چل گیا کہ اگے توں اوہ مینوں اینے رازدارانہ طریقے نال مشترکہ دوستاں بارے حسدنامہ نشر نہیں کرے گا۔ ایہ اک یاد رکھ جوگ گل اے کہ ایہ دنیا کوئی شاپنگ مال یا سپرسٹور نہیں جیس وچ تسی صرف خریداری اک لمی لسٹ لے کے اندر آئے او۔ جیہڑے لوکی ایس دنیا نوں اک شاپنگ مال سمجھدے نیں، اوہ ایس وچ خریداری کرن یا نہ کرن، اوہ کدی وی خوش نہیں رہ سکدے، کیوں جے سچی خوشی چیزاں نال نہیں جڑی۔