سینئر صحافی جناب ضیا شاہددی وفات داسانحہ

لكهت:پروفیسر حکیم شفیق کھوکھر

رمضان المبارک دی آمد توں پہلاں ای ملک دے نامور صحافی روزنامہ خبریں گروپ دے چیف ایگزیکٹو جناب ضیاء شاہد وفات پا گئے نیں۔ اوہ شدید بیماری دی وجہ نال شیخ زید ہسپتال لہور وچ زیر علاج سن۔ جتھے اوہ خالق حقیقی نال جا ملے۔ مرحوم نوں ہزاراں سوگواراں دی موجودگی وچ سپرد خاک کر دتا گیا ۔مرحوم دی وفات دی خبر سن دے ای پورے ملک دے سیاسی تے صحافتی حلقیاں وچ سوگ دی لہر دوڑ گئی۔ صدر پاکستان ، وزیراعظم تے ملک دی مقتدر ہستیاں، صحافیاں سیاستداناں، ادیباں نے ایہناں دی وفات اُتے گہرے دکھ دا اظہار کیتا اے۔ واقعی اوہ ایس دے حقدار وی نیں۔ اوہناں نے اپنی زندگی علم و ادب تے صحافت دی خدمت کیتی اے تے ملک وچ صحافت دا معیار قائم کیتا اے۔ اوہناں نے مشرق دے عنائیت اللہ مرحوم دی طرح اردو صحافت نوں اتوار میگزین تے ادبی تے لیبر فلمی تے سیاسی صفحات دے روپ وچ جیہڑا نواں انداز معیار دتا اوہ ایہناں دی یاد نوں لوکاں دے دلاں وچ باقی رکھے گا۔
میرا ایہناں نال تعارف تے کافی پہلے ہو گیا سی جدوں میں روزنامہ مغربی پاکستان لہور لئی رپورٹنگ کردا سی تے اوہ اپنا جریدہ ’’کہانی ‘‘ شائع کردے سن فیر جدوں میں 1977 وچ روزنامہ نوائے وقت لہور وچ بطور سب ایڈیٹر کم شروع کیتا تے جناب ضیاء شاہد نے وی روزنامہ نوائے وقت وچ بطور انچارج میگزین ذمہ داریاں سنبھالیاں۔ اوہناں نے مینوں وی کالم لکھن دی ترغیب دتی جس اُتے میں ’’طنز و مزاح‘‘ دے عنوان توں کالم شروع کیتا۔ ایہناں دناں جنرل ضیاء الحق نے مارشل لایا سی۔ ایہناں دناں ادارہ نوائے وقت لہور دی طرفوں میری ڈیوٹی اخبار نوں سینسر کران اُتے وی لائی گئی۔ ایہناں دناں جدوں انفارمیشن ڈیپارٹمنٹ والیاں نوں ٹیلی فون والیاں توں شکایت ہوئی تے اوہناں نے میرے توں مدد منگی میں ایس اُتے اک کالم لکھیا جس اُتے محکمہ ٹیلی فون دے ٹیلی فون نوں خراب کرنا فوجی ضابطہ دے تحت تخریبی کاروائی قرار دے دتا گیا۔ ایہہ کم جناب ضیاء شاہد دی حوصلہ افزائی تے جناب عارف نظامی دی پشت پناہی دے بغیر نا ممکن سی۔
1984ء وچ میرے گجرات آ جان دے بعد وی میرا ایہناں نال تعلق قائم رہیا۔ جدوں اوہناں نے میرے گوانڈھ وچ موجود خشنود علی خان دے گھر وچ اپنے نویں اخبار لئی پلاننگ کیتی تے مینوں وی ایہناں نال ملاقات دا موقع ملدا۔ فیر جدوں اوہناں نے لہور توں روزنامہ پاکستان دا اجرا کیتا تے اوہناں نے میرے کہن اُتے ندیم منظور سلہری نوں گجرات وچ نمائندہ خصوصی مقرر کیتا۔ جیہڑا میرا شاگرد سی تے گجرات وچ ایس نے صحافت نوں میرے مشوریاں دے مطابق چلایا۔ فیر جدوں اوہناں نے روزنامہ خبریں جاری کیتا تے گجرات توں نمائندے دا انتخاب میرے مشورے نال کیتا۔ایس توں علاوہ وی اوہ میری عزت کردے سن تے میری رائے دا احترام کردے سن۔
جدوں میں گجرات توں ترک مقام کر کے لہور وچ سکونت اختیار کیتی تے اوہناں نے مینوں اپنے اخبار وچ کم کرن دی دعوت دتی پر سرکاری ملازمت دی وجہ نال میں معذرت کر لئی جنہوں اوہناں نے قبول کر لیا۔ اوہناں نے لہور دے اک بے باک صحافی شوکت حسین شوکت نوں ایہناں دے بڑھاپے وچ جیہڑا احترام دتا ایس نے شوکت حسین شوکت نوں از سر نو جوان بنا دتا سی۔ اوہ ایس دا اظہار اکثر میرے نال کردے رہندے سن۔ اپنے گجرات وچ قیام دے دوران مینوں انتخابات دے دوران بطور پریزائیڈنگ افسر ذمہ داریاں ادا کرنیاں پیندیاں سن۔ ایس دوران اکثر لوک آ کے دھمکان دی کوشش کردے۔ اک وار اک بندے نے آ کے کہیا کہ میں ضلع شیخوپورہ توں روزنامہ ’’خبریں‘‘ دا چیف رپورٹر واں میرے کہن اُتے اک بندے نوں بغیر شناختی کارڈ دے ووٹ پان دیو میں کہیا کیہ تسیں ایس دی جناب ضیاء شاہد توں اجازت لے لئی اے کیوں نے اوہناں نے ای مینوں انج دے غلط کم کرن توں منع کر رکھیا اے۔ ایسے طرح اک پولنگ اسٹیشن اُتے اک ووٹر نے کہیا کہ میں امریکہ توں آیا واں پر اپنا شناختی کارڈ بھُل آیا واں مینوں ووٹ پان دیو نہیں تے تسیں پریشان ہوئو گے کیوں جے میرے حکمراناں نال گہرے مراسم نیں۔ میں ایہنوں کہیا کہ کیہ تسیں پسند کرو گے کہ تہاڈی ایہہ گل کل دے اخبار وچ جناب ضیا شاہد دے کالم وچ شائع ہوئے؟ ایس اُتے اوہ اوتھوں کھسک گیا۔
اک وار میرے اک افسر نے کہیا کہ تسیں میرا ناجائز کم نہ کیتا تے میں تہاڈی اے۔ سی۔ آر۔ خراب کر دیواں گا۔ میں کہیا شوق نال کر دیو۔ میں ایس ملازمت نوں چھڈ کے جناب ضیاء شاہد دے کول چلا جاواں گا۔ ایس دے بعد پورے پنجاب وچ تسیں کتھے ملازمت کر سکو گے اوہ تھاں لبھو۔ اینا کہنا سی کہ ایس نے میری خراب لکھی ہوئی رپورٹ آپ ای درست کر دتی۔
میں کئی دناں توں ایس انتظار وچ سی کہ علامہ عبدالستار عاصم آن گے تے اسیں جا کے ضیاء شاہد صاحب نال ملاقات کراں گے تے اپنی نعتاں دی کتاب ’’محبت کا سفر ‘‘ ایہناں دی خدمت وچ پیش کر کے ایہناںتوں داد تے ایہناں دی رائے لواں گا۔ پر افسوس ایہہ کم نہ ہو سکیا۔ ایس دی اک وجہ لہور وچ ودھدی ہوئی کرونا دی لہر تے ایہناں دی بیماری سی۔ ہن اللہ تعالیٰ نال دعا اے کہ اوہ مرحوم نوں اپنے جوار رحمت وچ تھاں دیوے ایہناں دے درجات بلند کرے ایہناں دے پسماندگان نوں صبر جمیل عطا فرمان۔ آمین۔ ثم آمین