کرن وقار دی وفات نے ادبی حلقیاں نوں سوگوار کر دِتا

ذبیح اللہ بلگن

معروف شاعرہ و کالم نگار محترمہ کرن وقار کرونا پاروں انتقال کر گئیاں ۔ ایہہ خبر ادبی تے صحافی حلقیاں وچ انتہائی افسوس تے رنج نال سنی گئی۔ کرن وقار بنیادی طور اُتے اوکاڑہ دی رہن والیاں سن تاں شادی دے بعد اوہ صوبائی دارالحکومت لہور منتقل ہو گئیاں سن۔ کرن وقار دی اصل پہچان ایہناں دا شاعرہ ہونا سی پر اوہ شاعری دے نال نال باقاعدگی نال کالم وی لکھیا کردیاں سن۔ کرن وقار دی وفات توں پہلاں ایہناں دے نکے بھرا زوہیب نثار تے ایہناں دی والدہ وی کرونا پاروں وفات پا گئے سن۔ کرن وقار دی وفات اُتے پورے ملک توں شاعراں، ادیباں تے صحافیاں دی بڑی تعداد نے گہرے دکھ تے رنج دا اظہار کیتا اے۔ کرن وقار تے ایہناں دے بھرا زوہیب نثار 31 مارچ نوں تشویشناک حالت وچ وچ ڈی ایچ کیو ہسپتال اوکا ڑہ وچ داخل ہوئے سن تاں اوتھے ناکافی سہولتاں ہون پاروں ایہناں نوں لہور دے اک پرائیویٹ ہسپتال وچ منتقل ہونا پیا جتھے کرن 10 اپریل تیکر داخل رہیاں تاں جانبر نہ ہو سکیاں۔ ایس دوران ایہناں دے نکے بھرا زوہیب وی خالق حقیقی نال جا ملے۔
اگرچہ ایس ویلے کرونا جہیا مہلک مرض پورے ملک نوں بُری طرح اپنی لپیٹ وچ لے چکیا اے تے ایس نال متاثرہ مریضاں دی تعداد وچ بدستور وادھا ہو رہیا اے تاں ایہہ سوال اپنی تھاں اپنی اہمیت دا حامل اے کہ حکومت نے ایس مہلک مرض توں متاثرہ مریضاں دی سہولتاں لئی کیہ اقدامات کیتے نیں؟ اوکاڑہ دے ضلعی ہسپتال وچ کرونا دے مریضاں لئی کیتے جان والے اقدامات دا پول کرن وقار نے اپنی آخری فیس بک پوسٹ اُتے کھول دتا سی جس وچ اوہ کہہ رہیاں سن کہ ’’میں تے میرا بھرا اوکاڑہ ہسپتال وچ زیر علاج آں پر ایتھے آکسیجن اے تے نہ کوئی دیگر موثر انتظامات، مینوں دسیا جائے کہ کرونا دے علاج لئی کیہڑا ہسپتال بہتر اے؟‘‘ایس صورتحال اُتے معروف صحافی تے اینکر جناب حامد میر وی اپنی ٹویٹ وچ توجہ دلوا چکے نیں۔ حامد میر نے اپنے ٹویٹر پیغام وچ کہیا اے کہ کرن وقار جے ہسپتال وچ داخل ہو کے وی پچھ رہی اے کہ کرونا دے علاج لئی کیہڑا ہسپتال بہتر اے تے ایس دا واضح مطلب ایہہ وے کہ اوہ اوتھے ہون والے علاج توں مطمئن نہیں سی۔ ایس طرح دیگر ادیباں تے شاعراں نوں حکومت نال گلہ اے کہ حکومت نے ایہناں دا علاج باقاعدہ طریقے نال نہیں کیتا۔ معروف گلوکار جواد احمد ایس حوالے نال خاصے اضطراب دا شکار نیں۔ اوہناں نے کرن وقار دی وفات اُتے جتھے دکھ دا اظہار کیتا اے اوتھے ڈسٹرکٹ ہسپتال اوکاڑہ دی انتظامیہ نوں وی کوسیا اے کہ اوہ کرن وقار دا موثر علاج کرن وچ ناکام رہے نیں۔ کرن وقار پچھلے کافی عرصے توں لہور وچ مقیم سن تے لہور وچ منعقد ہون والی ادبی تقریباں وچ باقاعدگی نال شریک ہوندیاں سن۔ اوہناں نے بوہت گھٹ عرصے وچ ادبی حلقیاں وچ اپنا اک خاص مقام حاصل کر لیا سی۔

ایہناں دی شاعری اصل وچ اک روایتی عورت دی نمائندگی کردی سی۔ اوہناں نے خواتین دے مقائل نوں اپنی شاعری تے کالماں وچ اجاگر کیتا تے مقتدرہ نوں ایہناں دے حل ول توجہ دلوائی۔ اک موقعے اُتے اوہناں نے کہیا سی …
کوئی خنجر میرے سینے میں اتارا جائے
ہجر کی موت نہ مجھ کو ابھی مارا جائے
کرن وقار پاکستان ادبی فورم دی سیکرٹری جنرل سن۔ راقم ایسے فورم دا چیئر مین سی۔ راقم نے تے کرن وقار نے پاکستان ادبی فورم دے پلیٹ فارم توں متعدد ادبی سرگرمیاں انجام دتیاں۔ کرن وقار نوں ادبی حلقیاں وچ اک خاص احترام حاصل سی۔ اوہناں نے کدی اپنی عفت و عزت اُتے سمجھوتہ نہیں کیتا اوہ ایس قدر باوقار طریقے نال پروگراماں وچ شریک ہوندیاں کہ کج نگاہ تے اونج ای اک پاسے نوں ہو لیندے۔ کرن وقار نے پاکستان ادبی فورم دے پلیٹ فارم اُتے پورے ملک دے شاعراں تے ادیباں نوں اکٹھا کر رکھیا سی۔ بلکہ اوہ شعرا جیہڑے پاکستان توں باہر دیار غیر وچ مقیم سن ایہناں نوں ای اک انج دا پلیٹ فارم مہیا کیتا جتھے اوہ اپنی اواز عوام تیکر اپڑا سکدے سن۔ ایس وچ کوئی شک نہیں کہ کرن وقار دی ناگہانی وفات نال اردو تے پنجابی ادب وچ اک خلا پیدا ہو گیا اے جیہڑا صدیاں تیکر پُر نہ ہو سکے گا۔اگرچہ کرن اک خوبصورت دھی آئمہ دی ماں سن تاں ایس دے باوجود اوہناں نے مقدور بھر کوشش کیتی کہ اوہ ادبی سرگرمیاں وچ کسے نہ کسے طور شریک ہوندیاں رہن۔ کرن وقار محض اک بہترین شاعرہ کالم نگار ای نہیں سن بلکہ اوہ اک آئیڈیل ماں وی سن۔ اپنی دھی آئمہ دی پرورش اُتے ایہناں دی خاص توجہ سی اوہ آئمہ نوں مکمل وقت دیندیاں بلکہ اوہناں نے ایہنوں کدی اپنے آپ توں وکھرا نہیں کیتا سی۔ اوہ اپنی دھی نال جنوں دی حد تیکر پیار کردیاں سن۔ کہیا کردیاں سن جیہڑی محرومیاں میں ویکھیاں نیں اوہ میں اپنی دھی نوں کسے طور نہ ویکھن دیواں گی۔

کرن وقار نے اصلاح معاشرہ وچ اک نمایاں کردار ادا کیتا۔ اوہناں نے ایس اہم کم لئی سوشل میڈیا توں وی مدد لئی۔ اوہ اپنی پوسٹاں دے ذریعے اصلاح معاشرہ دی جدوجہد کر رہیاں سن۔ اوہناں نے ہمیشہ محبت ونڈی تے شفقت تقسیم کیتی۔ شاید ایسے لئی اوہناں نے کہیا سی کہ :
کوئی کوئل کہاں پر کوکتی ہے
سنائی دیتا ہے لہجہ کرن کا
ادبی حلقیاں وچ ایہناں دی پذیرائی دی وڈی وجہ ایہناں دی عاجزی و انکساری سی۔ اوہناں نے کدی اپنے آپ نوں برتر نہیں سمجھیا سی بلکہ ہمیشہ خود نوں طالب علم دے طور اُتے متعارف کروایا۔ کوئی ادبی پروگرام منعقد کرنا ہوندا تے ادب دے وڈے وڈے ناں ایہناں دی اک اواز اُتے چلے آندے سن۔ اصل وچ اوہ انج دیاں ای سن، کدی کسے نال خفا نہ ہوندیاں سن بلکہ مسکرا کے گل ٹال دتا کردیاں سن۔ اوہ صحیح معنیاں وچ اک روائتی پاکستانی تے مسلمان خاتون سن۔ موبائل فون اُتے پہریاں قرآن پاک دی تلاوت سننا ایہناں دا معمول سی۔ کہیا کردیاں سن ’’مینوں نہیں پتہ لوک کیوں کہندے نیں کہ ایہناں نوں رات نوں نیند نہیں آندی، میں تے رات نوں سورہ رحمان دی تلاوت سننی آں تے اوہ مکمل ہون توں پہلاں ای مینوں نیند آ جاندی اے۔ ‘‘
کرن وقار بوہت رحم دل تے شفقت کرن والیاں سن اپنے آس پڑوس دا خاص خیال رکھدیاں سن۔ گلی دے سکیورٹی گارڈز نوں اپنے گھر توں کھانا بنا کے گھلیا کردیاں سن کہیا کردیاں سن ایہہ اللہ دی مخلوق اے ساڈی حفاظت کردے نیں جد کہ ایہناں دی تنخواہواں بوہت گھٹ ہوندیاں نیں۔ معروف اداکار جناب راشد محمود کرن وقار نوں اپنی دھی کہیا کردے سی۔ ایسے طرح کرن وی راشد صاحب نال اک باپ وانگوں پیش آندیاں سن۔ پنجابی میڈیا دا وڈا ناں جناب مدثر اقبال بٹ نال کرن وقار دا خاص احترام دا رشتہ سی۔

مدثر اقبال بٹ وی کرن نوں ہمیشہ دھی کہیا کردے سن۔ کرن نے اپنی مختصر زندگی وچ بوہت خوبصورت رشتے کما لئے سن۔ کرن نال محبت کرن والے جا بجا پھیلے نیں ایس دی وجہ ایہہ وے کہ کرن وقار سب نال بے لوث محبت کردیاں سن تے ہمیشہ خیر خواہی دا رویہ رکھدیاں سن۔ اگرچہ کرن وقار دی زندگی وچ بوہت ساری محرومیاں سن تاں اوہناں نے کدی ایہناں محرومیاں نوں اپنی تخلیقی صلاحیتاں نوں کند کرن دا موقع نہیں دتا بلکہ اوہ حالات دی سختی دا دیدہ دلیری نال مقابلہ کردے ہوئے اگے ودھن دی قائل سن۔ کرن اپنے آپ نال گل کر کے دل دا بوجھ ہلکا کر لیا کردیاں سن۔ ایسے طرح اوہناں نے اک وار کہیا…
تیرے لوٹ آنے پہ بھی کم نہیں ہونگے شائد
درد جو تم نے دیے سب بڑے گہرے نکلے