’’وفا کیسی؟‘‘

لگدا اے ملک وچ کوئی حکومت سرے توں ہے ای نہیں ہر پاسے اپوزیشن اے

آصف عنایت

وطن عزیز دی سرزمین تے عوام نے جیہڑے عجائبات، تماشے، عبرتاں ، بہروپیے، سانحے ویکھے نیں شاید ای کسے قوم نے ویکھے ہون تے کرہ ارض اُتے کوئی دوجی قوم ہوئے جیہڑی ایس قدر رہزناں نوں نجات دہندہ تے رہبر سمجھدی رہی ہوئے۔ ساڈے سارے فیصلیاں تے اقدامات دا انجام ہمیشہ آن والا وقت دسدا اے جد کہ حتمی فیصلہ مورخ بلکہ غیر ملکی مورخ ای کردا اے۔
شخصیات ، گروہ، ادارے سب دے سب صرف چلدے لمحے دی فکر تے سوچ وچ مبتلا رہندے نیں۔ حماقتاں دا بوجھ ودھ جائے تے فیر وقت دی کروٹ سب کجھ الٹا کر کے رکھ دیندی اے۔ پہلے وی اپنے قارئین نال شیئر کر چکیا واں پنجاب اسمبلی دی 100 ویں سالگرہ سی ملک وچ ضیابت دا دور فرعونیت دی تاریخ نوں شرمندہ کر رہیا سی، ضیاء الحق نے پنجاب اسمبلی وچ تقریر کردے ہوئے کہیا کہ ملک وچ 20 ہزار انج دے لوک جیلاں وچ بند نیں جنہاں اُتے کوئی مقدمہ نہیں، گویا غیر رجسٹرڈ سیاسی مقدمیاں دے علاوہ ہور کنہے جیلاں وچ بند ہون گے؟ ایم آر ڈی موجود سی میں گوجرانوالہ وچ ینگ لائرز آرگنائزیشن دا صدر تے ایم آر ڈی دا کنویئر سی جد کہ مرکزی کنویئر جناب پرویز صالح سن جیہڑے درجناں وار جیلاں تے شاہی قلعہ کٹ چکے سن۔ میرے سینئر غیر سیاسی درویش صفت شخصیت جناب خواجہ جاوید ایڈووکیٹ سن۔ جنہاں نے اک مقدمہ قتل یاد دلوایا جس وچ لہور تے شیخوپورہ توں وی نامور وکلا استغاثہ دی پیروی کر رہے سن۔ اک گواہ اُتے جرح لہور توں مقرر کردہ وکیل سن جنہاں نے کرنا سی۔ اصل وچ ایس گواہ نوں ثابت کرنا سی کہ ایہہ کنجر اے کوئی معتبر گواہ نہیں۔ مدعی پارٹی نے ایس دے خلاف لہور دی ہیرا منڈی وچ دکان، تھانے وچ درج مقدمات، کنجراں نال رشتہ داریاں تے بوہت ساری دستاویزی ریکارڈ اکٹھا کیتا ہویا سی ۔ اوہ گواہ شکل توں ای مفت بھر پہلوان وکھائی دیندا سی۔ جدوں گواہ نوں آواز ہوئی تے چودھری سدھا جا کے کٹہرے وچ گواہ دے طور اُتے کھڑا ہو گیا۔ وکیل صاحب نے جرح دے آغاز توں پہلے گواہ نوں مخاطب کردے ہوئے پچھیا کہ جناب دا ناں گواہ نے جواب دتا چودھری دریام عرف پہلوان (ایہہ یاد رہوے کہ ایس گواہ نوں ناقابل بھروسہ ثابت کرن لئی کنجرثابت کرنا سی) وکیل صاحب نے اگلا سوال ایہہ کیتا کہ قوم تے نال ای دہرایا جناب دی ذات یا قوم قبیلہ ہن ایہہ اوہ مقا م سی کہ مدعی مقدمہ دے وکلاء، مدعی و ملزم پارٹیاں دے ساتھی سب چوکنے ہو گئے۔ چودھری وریام نے بڑے اطمینان نال جواب دتا کنجر عدالت وچ سناٹا مزید گہرا ہو گیا وکیل صاحب نوں اپنے کناں اُتے یقین نہ آیا کہ جو اسیں ثابت کرنا چاہ رہے سی خود ای کنج بول دتا۔ جج صاحب وی ششدررہ گئے وکیل صاحب نے دوبارہ ایہو سوال دہرایا تے ایس نے کہیا کنجر فیر کہن سنن نوں کجھ نہ رہیا وکیل صاحب نے اپنا بریف سمیٹیا تے مڑ کے خواجہ صاحب ول مدد طلب نظراں نال ویکھیا تے جرح دا آغاز جناب خواجہ جاوید نے کیتا وکلاء وکلاء توں نہیں بلکہ گواہ توں بے بس ہو گئے مینوں اگلے دن وزیراعظم جناب عمران دی لائیو کال نوٹنکی دی وجہ نال بوہت کجھ یاد آ گیا (موجودہ حکومت ضیاء تے مشرف دے ادوار دا تسلسل اے) جس وچ اوہناں نے فرمایا: لوک سمجھدے سن اک مہینے وچ حالات ٹھیک کراں گا (موصوف دا ای وعدہ سی ) چینی اُتے سٹہ کھیڈ کے 600 ارب روپئے مافیاز دے اکائونٹس وچ چلے گئے موجودہ مہنگائی نوں زیادہ نہ سمجھو، وینز ویلا تے دیگر ملکاں نوں ویکھو (موصوف سدھی طرح کہن کہ قبرستان ویکھ لیا کرو صبر آ جائے گا) کوئی ایہہ نہیں کہندا کہ حکومت نے کیہ چنگا کیتا، پہلی وار روپیہ اُتے گیا (کنہا اُتے گیا اے تھلے تے 12 توں 15 روپئے دے حساب نال آندا رہیا اے) صبر کرو، مہنگائی کنٹرول کر لاں گے، (اینا صبر تے لوک موت اُتے وی نہیں کردے ہون گے) عدلیہ ساتھ نہیں دیوے گی تے کرپشن نال نہیں لڑ سکدے ( گویا احتساب بیورو دے بعد عدلیہ دے اختیارات وی چاہیدے نیں) ایہہ سب مل کے کہہ رہے نیں عمران نوں فارغ کرو، ایہو تبدیلی اے (ایہو تے قوم دا مطالبہ اے)۔
لوکاں نوں امید سی اک مہینے وچ حالات ٹھیک کر دیواں گا، تبدیلی لئی انقلاب فرانس تے خمینی انقلاب وچ گردناں اتاریاں گئیاں، جمہوریت وچ تبدیلی وچ وقت لگدا اے روز جہاد دا عزم لے کے دفتر توں نکلنا واں (موصوف بھُل گئے سن کہ پارلیمانی جمہوری نظام وچ چنے گئے نیں، انقلاب نظریہ دی بنیاد اُتے پوری قوم ساتھ ہوئے تے حقیقی لیڈر شپ لیایا کردی اے سلیکٹڈ نہیں تے اک مہینے وچ حالات ٹھیک کرن دا وعدہ وی موصوف دا سی البتہ جدوں دے ظل سبحانی آئے عوام روزانہ ہر لمحہ دی بنیاد اُتے زندہ رہن لئی جہاد کر رہے نیں۔ ایمرجنسی وچ بھارت توں چینی خریدن اُتے صرف غور کیتا (غور ای کر سکنے آں فیصلہ تے کدھرے ہور ہوندا اے) ارباں دی چینی چوری کرن والیاں اُتے پھُل سٹے جاندے نیں (صلح دی کوشش کیتی گئی پر ناکامی اُتے ایف آئی اے حرکت وچ لیائی گئی) بیورو کریسی دے پرانے حکمراناں نال رابطے نیں ( جد کہ پرانے حکمراناں دی اکثریت کابینہ وچ شامل اے) خاتون شہری نے مطالبہ کیتا کہ مہنگائی نوں کنٹرول کرو یا فیر گھبران دی اجازت دیو۔ ( موصوف مسکرا دتے)
دوجے پاسے اپوزیشن وچ اک عذر مچیا ہویا اے ، جہانگیر ترین نویں انٹر ی اے کجھ پتہ نہیں چلدا اگے توں چکیا اے کہ پچھلے توں، تاحال سائیڈ توں چکیا ہویا اے جدھر گل بن گئی دوجے پاسے پارلیمنٹ دا عالم ایہہ وے کہ کیہ کدی ’’عریانی، فحاشی زدہ، شرابی معاشروں‘‘ نے ساڈے (نیک کاراں) جہے عدالتی فیصلے، آئینی حدود توں تجاوز کردی ہوئی طاقتاں، ادارے تے مداخلتاں ویکھیاں نیں۔ حیران واں کہ فوج دی تضحیک روکن لئی قانون سازیاں کرنیاں پئے گئیاں جد کہ ادارہ تے درکنار فرد دی تضحیک تے توہین دا قانون تے پہلے ای موجود اے۔ اول تے 100 فیصد لوک فوج دا بطور ادارہ احترام کردے نیں پر جے آئینی حدود دی پاسداری نہ کیتی جائے تے فیر ایس دا تذکرہ یا ایس اُتے تجزیہ تبصرہ تضحیک نہیں ہوئے گا جے کسے نوں دو سال قید ہو جائے تے اوہ جیل وچ ہر لمحہ اوہ ای عمل دہراندا جائے تے فیر کیہ جیل وچ ایس دے دو سال نوں آئندہ کنہے دو سال نال ضرباں دتیاں جان گیاں۔
وزیراعظم کہندے نیں قرضے ودھ رہے نیں، ن لیگ توں 15 ہزار ارب زیادہ واپس کیتا جد کہ مفتاح اسماعیل کہندے نیں اک روپیہ قرض واپس نہیں کیتا، آئی ایم ایف دی رپورٹ اے، پاکستان اُتے بیرونی قرضیاں تے واجبات دا مجموعی حجم 90 ارب 12 کروڑ اے پاکستانی معاشی صورت حال وڈے خطرے نال دوچار ہو سکدی اے۔ میرے مطابق حکومت ن لیگ فوبیا توں باہر نہیں آئی۔ لگدا اے ملک وچ کوئی حکومت سرے توں ہے ای نہیں ہر پاسے اپوزیشن اے۔ کابینہ وچ وی تے اپوزیشن وچ وی۔ میں کہنا واں عوام دی زبوں حالی دا کسے نوں خیال نہیں۔ عوام دے مقدمے دا ہر گواہ ہر وکیل ہر جج جیہڑا دعویٰ کردا ہویا نظر آندا اے عمل ایس دے برعکس اے۔ بس بیورو کریسی اے جس دے 24 گھنٹے کرپشن دا کاروبار چلے دے وارے نیارے نیں۔بقول جالب:
آج بھی ہر بلاول ہے دیس کا مقروض
پائوں ننگے ہیں بے نظیروں کے
جد کہ عوام دی سٹیک ہولڈرز دے نال وابستگی انج اے:
تو مجھے بھول گیا ہو تو پتا بتلا دوں؟
کبھی فتراک میں تیرے کوئی پٹخچیر بھی تھا
حالانکہ بقول غالب ایہہ کہہ کے جان چھڑا لینا چاہیدا اے
وفا کیسی کہاں کا عشق جب سر پھوڑنا ٹھہرا
تو پھر اے سنگ دل تیرا ہی سنگ آستاں کیوں ہو