ایہنوں کہندے نیں تذلیل توں مزہ لینا
پنجاب، سندھ تے کے پی کے وچ ہون والے ضمنی الیکشن واضح ثبوت نیں کہ اک کروڑ ملازمتاں تے
50 لکھ گھر دین دیاں گلاں دا لوک مزاق اڑاندے تے گھبران دی اجازت منگن دیاں گلاں کردے نیں
تحریر حمیداللہ بھٹی
این اے 75 توں نوشین افتخار دی جت اندازیاں دے برعکس نہیں البتہ اسجد ملہی جے فتح مند ہوندے تے ایہہ اچھنبے دی گل ہوندی وجہ ساری بدنامیاں تے الزامات دے باوجود ایتھے ظاہرے شاہ دے خاندان نوں مقبولیت حاصل اے۔ ایس توں علاوہ مسلم لیگ ن دا ٹکٹ ایس حلقے وچ کامیابی دی کلید سمجھیا جاندا اے مرن والے دے خاندان توں روایات دے مطابق اونج وی ہمدردی دی لہر پیدا ہوندی اے جے مرحوم خاندان دی دھی یا کوئی ہور خاتون کسے دے دروازے اُتے چلی جائے تے لوک احترام کردے نیں تے خالی نہیں گھلدے 19 فروری نوں وزیرآباد تے ڈسکہ وچ مشرقی روایات دا مظاہرہ جابجا ویکھن نوں ملیا مرحوم خانداناں دی دو خواتین نوں ٹکٹ دے کے مسلم لیگ ن نے سیاسی مہارت دا مظاہرہ کیتا پر حکومت دے نشے وچ پی ٹی آئی ادراک نہ کر سکی تے بدامنی نوں ہوا دے کے پریزائڈنگ افسراں توں نتیجے تبدیل کرائے پر 10 اپریل نوں پولنگ عمل پرامن بنان لئی الیکشن کمیشن نے سکیورٹی دے سخت اقدامات کیتے دفعہ 144 اُتے مکمل عمل کرایا گیا تے اسلحہ دی نمائش کرن والیاں نوں رینجرز نے بلاتفریق گرفتار کیتا جس دی وجہ نال نہ صرف آزادانہ مرضی نال ووٹ پان دی فضا بنی بلکہ حکومت دے خوف و ہراس دا وی خاتمہ ہو گیا جس دی بنا اُتے ڈسکہ ضمنی انتخاب نوں صاف شفاف کہن وچ کوئی امر مانع نہیں۔
سمجھدار لئی اشارہ کافی ہوندا اے پر نہ سمجھ نقصان چُک کے وی سبق حاصل نہیں کردا ڈسکہ دے ضمنی الیکشن وچ حکمران جماعت نے وی ناسمجھی دا ثبوت دتا حالانکہ ایہہ نشست کم و بیش دو دہائیاں توں مسلم لیگ ن دے کول اے ایس معمولی جہی عقل و فہم دے مالک نوں وی ادراک اے ک ایتھے کسے ہور جماعت دے ٹکٹ دی کوئی اہمیت نہیں فیر وی عثمان ڈار جہے لوکاں ولوں زندگی و موت دا مسلہ بنانا سمجھ توں بالاتر اے۔ ایس توں پہلاں ڈی سی او ڈی پی او دے نال مل کے دھاندلی کیتی گئی تے کئی چنگے ڈویژنل افسراں نوں عہدیاں توں ہٹان دا باعث بنے فیر عدالتاں وچ خوار ہون دی راہ اپنائی گئی جدوں کدھرے گل نہ بنی تے کُشتوں دے پُشتے لگان دے اُچے دعوے کیتے گئے سچ پچھو تے ایہہ سیاست نہیں کیوں جے سیاست وچ بروقت چنگے فیصلے کیتے جاندے نیں جدوں کھڑی ٹرین وچ سوار ہو نہیں سکے تے روانگی دے بعد پچھے نسن دا کیہ تُک اے؟ پر حکمران جماعت نے ڈسکہ الیکشن وچ کجھ انج دے ای رویے دا مظاہرہ کیتا اے۔ ارے بھئی حکومت تہاڈے کول اے جے تسیں چاہندے تے وسائل نوں استعمال وچ لیا کے علاقے دے مسائل حل کردے تے لوکاں دے دلاں وچ تھاں بناندے پر حاصل وقت گنوا کے جت دے تصوراتی قلعے تعمیر کرنا تعجب اے عیاں حقیقت تے ایہہ وے کہ 2018 دے عام انتخابات وچ جدوں عمران خان دی مقبولیت جوبن اُتے سی پورے ضلع سیالکوٹ توں پی ٹی آئی دا کوئی امیدوار وی کامیاب نہیں ہو سکیا تے مسلم لیگ ن دے امیدواراں دے حصے وچ کامیابی آئی یا فیر اک صوبائی نشست اُتے مسلم لیگ ق دے امیدوار بائو رضوان جت گئے جنہوں اک وار جتھوں سُبکی ہوئے تے اوہ دوجی وار احتیاط کردا اے پر پی ٹی آئی نے شاید صمیم قلب توں حماقتاں دُہران دا عزم کر رکھیا اے شاید ایہنوں ای کہندے نیں تزلیل توں لُطف کشید کرنا۔
عمران خان دے ساتھی خود پسندی دا شکار نیں ایہناں نوں زعم اے کہ اوہ پورے ملک وچ مقبول نیں پر سوشل میڈیا اُتے بہہ کے پوسٹاں لان تے فیر مخالفاں لئی لتے لین نوں مقبولیت نہیں کہہ سکدے عثمان ڈار جہے لوکاں نوں بار ہا تجربہ ہو چکیا فیر وی تزلیل توں لطف کشید کرن توں باز نہیں آندے۔ ملک دے سارے طبقات ہوشربا مہنگائی نال بلبلا رہے نیں کاروبار بند ہو رہے نیں۔ بے روزگاری خوفناک حد تیکر ودھ گئی اے۔ رہی سہی کسر کرونا نے کڈ دتی اے عام لوک تے اینے تنگ نیں کہ اوہ بھُک و افلاس نال مرن دی بجائے کرونا نال مرن نوں آسان سمجھن لگے نیں پر لگدا اے حکمراناں نوں ایس گل دی کوئی پرواہ نہیں ایہناں نوں حریفاں نوں چور تے ڈاکو کہنا تے مرغوب اے پر عام بندے دے مسائل حل کرن وچ کوئی دلچسپی نہیں ادھی مدت اقتدار لنگھ چکی اے ایس لئی ہن کجھ کارگزاری وکھانا ہوئے گی نہیں تے یقین کر لین چاہے حکمران تزلیل نال جنہا مرضی لطف کشید کردے رہن آن والے عام انتخابات وچ کسے پاسے توں چاہے حمایت ملی پی ٹی آئی لئی حالات چنگے نہیں ہون گے عین ممکن اے آئندہ عام انتخابات دے بعد پنجاب وچ پی پی دی موجودہ پوزیشن اُتے پی ٹی آئی نظر آئے۔
سیالکوٹ وچ فردوس عاشق اعوان دے سوا پی ٹی آئی دے کول کوئی معروف چہرہ نہیں اسجد ملہی وچ چاہے لکھ خوبیاں ہون پر ایہناں دی اک خامی سب اُتے حاوی اے کہ اوہ عوامی نہیں بلکہ خاکمانہ مزاج رکھدے نیں ایہناں نوں عام بندے نال ملدے ہوئے کراہیت محسوس ہوندی اے۔ کرونا توں اینے خوفزدہ نیں کہ الیکشن دے باوجود لوکاں نال ملن توں گریزاں رہندے نیں چاہے اوہناں نے بظاہر وڈے دل دا مظاہرہ کردے ہوئے سیدہ نوشین افتخار نوں کامیابی اُتے مبارکباد دتی پر اپنی شکست تسلیم کرن توں اجتناب کیتا اے تے انتظامیہ سنے الیکشن کمیشن نوں ہدف تنقید بنایا اے پر ایہناں دا ہر ساتھی شکست لئی تیار نظر آیا ایس اُتے شکست دے آثار ای سن کہ اسجد ملہی نے امیدوار ہو کے وی اپنا ووٹ کاسٹ نہیں کیتا بلکہ اک توں ودھ وار ووٹ دے بارے ساتھیاں ولوں یاد کران اُتے وی ایہناں دا مختصر جواب ایہو سی کہ بڑا وقت اے ووٹ کاسٹ کر لیندے آں ایس دا مطلب اے کہ ذہنی طور اُتے ہزاراں دی شکست لئی اوہ وی تیار سن ایسے لئی ووٹ کاسٹ کرن دی بجائے دیگر امور اُتے توجہ دتی تے اطوار تے رویہ متوقع شکست دا عکاس نہیں تے ہور کیہ اے؟
بادی النظر وچ پی ڈی ایم دے غبارے توں ہوا نکل چکی حالانکہ اپوزیشن اتحاد نوں جنہی عوامی پذیرائی ملی ایس نال حکومت خاصی دبائو وچ آ چکی سی تے گل تیکر نہ کرن دے روادار سلسلہ جنبانی قائم کرن لئی ذرائع تلاش کرن لگے کہ مسلم لیگ ن تے پی پی نے اپ نے اپنے مفاد اُتے پی ڈی ایم نوں قربان کر دتا پر یاد رکھن والی گل ایہہ وے کہ عوام اپوزیشن بیانیہ قبول کر چکی اے تے حکومتی بیانیہ بے اثر ہو چکیا اے پنجاب، سندھ تے کے پی کے وچ ہون والے ضمنی الیکشن واضح ثبوت نیں کہ اک کروڑ ملازمتاں تے 50 لکھ گھر دین دیاں گلاں دا لوک مزاق اڑاندے تے گھبران دی اجازت منگن دیاں گلاں کردے نیں فیر وی حکمران جماعت نوں ملک دی مقبول ترین جماعت ہون دا زعم اے۔ عجیب گل اے ایہہ تے انج ای اے کہ
’’جانے نہ جانے گل ہی نہ جانے باغ تو سارا جانے ہے ‘‘ شاید بار بار تزلیل کران وچ حکمراناں نوں اینا مزہ آن لگیا اے کہ ایہناں نوں ہور کجھ چنگا ای نہیں لگدا۔
