’’شالا اوتھے وی پنجاب ہووے‘‘

لکھت:مطلوب وڑائچ

شوکت علی مرحوم نال میری پہلی ملاقات اج توں تقریباً تن دہائی پہلاں اوس ویلے ہوئی جدوں میں دھونکل موڑ تے مریدکے جان لئی کھلوتا سی۔ جتھے میرے دوست طاہر تے صادق اعجاز چیمہ میرا انتظار کر رہے سن کہ اک دم میں اک دم چھوٹے جہے دھماکے دی آواز سنی تے میں کیہ ویکھنا واں کہ اک کار تے ٹریکٹر ٹرالی دی ٹکر ہو گئی اے میں وی دوجے لوکاں وانگوں حادثے ول نس کے گیا۔ زخمیاں نوں کار چوں کڈھیا تے اک لمے والاں والا بندہ وی اوہناں وچ شامل سی۔ خیر اساں معمولی زخمی ہون والے لوکاں نوں نیڑے اک دکان دی منجی تے بٹھایا۔ سانوں محسوس ہویا کہ ایمبولینس سدن دی لوڑ نہیں۔ زخمیاں وچوں لمے والاں والے نے دسیا کہ اوہ مشہور فوک گلوکار شوکت علی اے۔ شوکت علی دا ناں سن دے ای ساڈے ذہن وچ 1965ء دی جنگ دے جنگی ترانے گونجن لگ پئے۔
ساتھیو‘ مجاہدو‘ جاگ اٹھا ہے سارا وطن
اساں شوکت علی تے اوہدے ساتھیاں دی جو ممکن خدمت سی اوہ کیتی تے جاندے جاندے اوہ مینوں اپنا ٹیلی فون نمبر دے گئے۔ ایہ شوکت علی نال میری پہلی حادثاتی ملاقات سی فیر اوہدے بعد وکھووکھ موقعے تے ساڈی ملاقات ہوندی رہی۔ میری مرحوم شوکت علی نال سوئٹزرلینڈ‘ یورپ تے امریکہ وچ وی ملاقات ہوندی رہی۔ بعد وچ کیوں جے اوہ وی جوہرٹائون وچ رہندے سن تے میں وی جوہرٹائون لہور وچ رہندا سی۔ ایس لئی ساڈی اکثر ملاقات ہوندی رہندی۔ فیر اوہناں نے اپنی دھی دے ویاہ تے مینوں تے جہانگیر بدر (مرحوم) نوں خاص طور تے سدیا۔ ہن وی اوہناں دے پُتر جو کینیڈا وچ رہندے نیں اوہناں نال اکثر ملاقات ہوندی رہندی اے۔
دوستو! ایہ تے شوکت علی (مرحوم) نال میرے ذاتی تعلقات دی داستان سی۔ اسیں ہن شوکت علی دی ملی خدمات تے نظر مارنے آں۔ شوکت علی اوہ اکلا فوک فنکار سی جو اپنی دھرتی ماں نال عشق دی حد تک پیار کردا سی۔ اوہنوں پنجاب دے کلچر‘ ثقافت‘ شاعری تے فوک میوزک نال ایناں لگائو سی کہ اوہنے لکھاں تے کروڑاں دی پیش کش ٹھکرا کے پنجاب دے میلے ٹھیلیاں وچ پنجابی رنگ جمان دی ہمیشہ کوشش کیتی۔ سانجھے پنجاب وچ شوکت علی ورگا کوئی فنکار نہ تے پیدا ہویا اے تے کوئی ایہدی تھاں لوے ایہدے لئی صدیاں چاہیدیاں نیں۔ میں ایہناں دیہاڑیاں کیوں جے کینیڈا دے شہر برہمپٹن تے وینکوور وچ آباد سکھاں نوں ملدا جلدا رہنا واں جس وی سکھ بھائی نال ملاقات ہووے اوہ سب توں پہلاں شوکت علی دا ضرور پچھدے نیں۔ پنجابی ادب وچ شوکت علی دی ذاتی شاعری دا وی اک بہت وڈا حصہ شامل اے پر ہیر وارث شاہ‘ بلھے شاہ تے بابا فرید دے کلام نوں جس طرح شوکت علی نے گایا ایہدی مثال نہیں ملدی۔ پنجابی ثقافت نال ایناں پیار کرن والا ایہ فنکار اپنی زندگی دے آخری دیہاڑیاں وچ جہڑیاں اوکڑاں دا شکار رہیا ایہناں توں اکھ پھیرنا کسے وی پنجابی لئی ممکن نہیں۔ فیر حکومت سندھ نے شوکت علی نوں علاج لئی سندھ بلوایا تے اوہدا علاج معالجہ جاری رکھیا پر پنجاب وچ کسے نوں ایہ توفیق نہ ہوئی کہ اوہ اپنے ہیرو تے لوک سماج دے بے تاج بادشاہ نوں زندگی دی راہواں وچ درپیش آن والیاں اوکڑاں ونڈ سکے۔ جدوں مینوں ایہناں حالات دی خبر ہوئی تے اپنی پارٹی دی مرکزی قیادت احمد رضا وٹو‘ میاں محمد آصف‘ پروفیسر طارق جٹالہ تے بابا نجمی اگے درخواست کیتی کہ اوہ شوکت علی دے کول جا کے اوہدی عیادت کرن تے شوکت علی نوں دسن کہ پورا پنجاب دل و جان نال اوہدے نال اے۔ پنجاب نیشنل پارٹی دی مرکزی قیادت نے شوکت علی مرحوم نوں ایہ دسن وچ کوئی کسر نہ چھڈی کہ پورا پنجاب شوکت علی لئی دعاگو اے۔ شوکت علی دی پنجاب نال محبت وی کسے تعارف دی محتاج نہیں خاص طور تے جدوں اوہناں نے ایہ خوبصورت شعر گایا۔
کوئی پھل گلاب ہووے
ربا تیرے کول آواں
شالا اوتھے وی پنجاب ہووے
شوکت علی مرحوم پنجابی زبان‘ ثقافت تے رسم و رواج دی ماڑتا تے بڑے دکھی سن۔ اوہناں نوں دوجے پنجابی فنکاراں نال وی گلا سی کہ اوہ پنجابی دی ترقی لئی اپنا کردار ادا کیوں نہیں کردے۔ میری مرحوم شوکت علی نال آخری ملاقات وچ اوہناں دی ایہ خواہش کہ مینوں پنجاب نیشنل پارٹی دی ہر میٹنگ تے اجلاس وچ سدیا جاوے پر اجل نے اجازت نہ دتی۔ ہن پنجاب نیشنل پارٹی دی مرکزی قیادت نے شوکت علی نوں قومی ہیرو دا درجہ دین دا مطالبہ کیتا اے تے پنجاب نیشنل پارٹی حکومت پاکستان توں وی مطالبہ کردی اے کہ سانجھے پنجاب دے ایس عظیم ہیرو دی زندگی بارے چیزاں نوں قومی درجہ دتا جاوے۔ لہور دی کسے معروف سڑک نوں شوکت علی دے ناں نال منسوب کیتا جاوے تے شوکت علی ورگے عظیم فنکار دی خدمات دے بدلے اوہناں دا مزار سرکاری نگرانی وچ تعمیر کروایا جاوے تے اوہنوں قومی پنجابی ورثے دا درجہ دتا جاوے۔ جو قوماں اپنے اسلاف تے اپنے ہیرو نوں بھل جاندیاں نیں اوہناں نوں تریخ دے ورقیاں وچ لبھنا اوکھا ہو جاندا اے۔ پنجاب نیشنل پارٹی نے احمد رضا وٹو‘ مدثراقبال بٹ‘ بابا نجمی‘ میاں محمد آصف تے پروفیسر طارق جٹالہ دی زیرنگرانی اک کمیٹی دا اعلان کیتا اے جو شوکت علی دے مزار دی تعمیر یقینی بناوے گی۔ جیوے پنجاب‘ جیوے شوکت علی‘ جیوے پنجابی سماج‘ جیوے پاکستان۔٭٭