پنجاب دے پانیاں دے مسلے

احمد رضا وٹو

پنجاب دے پانیاں دے مسلے پنجابی سیاستدان کیوں نہیں چھیڑدے. لائٹ انداز وچ “جے راوی وچ پانی کوئی نہیں تے اپنی کہانی کوئی نہیں” راوی تے پانیاں تے جو ڈکیتی ماری گئی اوس ول سِدھا سِدھا اشارہ اے. گل صرف راوی دی نہیں پنجاب دے ستلج تے بیاس وی سندھ طاس معاہدے دے تحت انڈیا نوں ویچ دِتے گئے ایہ سوچے بناں کہ پنجاب دی ذراعت تے پنجابی حیاتی کِتھوں پانی لوے گی. دریا سُکے تے لوکاں انہے واہ زمین دے تھلے دا پانی مُکا دتا.. لہور شہر دے تھلے پانی نہ ہوون دے برابر اے تے باقی پنجاب دا پانی وی کدھرے تِن چار سو فٹ تھلے جا کے لبھدا اے. دو دہائیاں بعد پنجاب وچ پانی دا وڈا کال اے.. فوجیاں, حکومتاں, اپوزیشناں تے عدالتاں دا اس پاسے دھیان نہیں. ڈیماں دے ناں تے لوکاں نوں ہر چوتھے سال لُٹ لیا جاندا اے پر پورا پنجاب بارشاں دا پانی سانبھن جوگا وی نہیں. کون روک ریا اے پانی دا حل لبھن توں کون پنجاب نوں تباہی دے آخری کنڈھے تے لئے کے آیا اے یا 1947 دے قتلام وانگوں ایہدا وی کوئی ذمے دار نہیں!!!! ؟