آخری میدان کتھے لگے گا؟
لكهت:اشرف شریف
سامنے دا منظر ایہہ وے کہ حکومت الیکشن کمیشن تے عدم اعتماد ظاہر کر رہی اے۔ الیکشن کمیشن کہہ رہیا اے کہ حکومتی عہدیداراں‘ سکیورٹی اداریاں تے سیاسی نمائندیاں نے ڈسکہ الیکشن جہڑا پہلاں ہویا سی دوران ضابطہ اخلاق دی خلاف ورزی کیتی۔ اک جھگڑا ایہہ وے کہ مریم نواز دیاں دھمکیاں دے زیراثر لیگی کارکن شہباز گل تے حملہ آور ہوئے تے فیر شہباز گل نے پریس کانفرنس وچ مریم نواز نوں کھریاں کھریاں سنائیاں۔ تریجا منظر ایہہ وے کہ چیئرمین سینٹ دے الیکشن تے اپوزیشن دا ردعمل تقسیم ہو چکیا اے۔ پیپلزپارٹی نے یوسف رضا گیلانی نوں منتخب کران لئی جہڑا ٹل لایا اوہدے نال پارٹی تے پارٹی قیادت بارے نویں ووٹراں وچ منفی تاثر پھیلیا۔ بلاول بھٹو نوں جدید جمہوری اخلاقیات تے تعلیم یافتہ طبقے لئی اک امید بنا کے پیش کیتا جاندا رہیا اے۔ اک نامناسب جوڑتوڑ دی سرپرستی تے فیر اوہدا دفاع کرن تے بلاول دا نہیں سگوں آصف علی زرداری دا اثر نمایاں ہویا اے۔ پیپلزپارٹی نے بہرحال چیئرمین سینٹ دے انتخاب وچ اپنی شکایت دے باوجود موجودہ جمہوری تسلسل نوں برقرار رکھن دا اشارا دتا اے۔ حکومتی وزیر شبلی فراز تے فواد چوہدری نے کجھ دیہاڑ پہلاں اک پریس کانفرنس وچ اپوزیشن نوں اصلاحات لیان لئی مذاکرات دی پیش کش کیتی اے۔ اجہی پیش کش پریس کانفرنس دی بجائے سلیقے نال پارٹی رابطے ورت کے اپڑائی جاندی اے ایس لئی حکومتی سنجیدگی دا اوس ویلے پتہ لگے گا جدوں اجہے رابطیاں دا سلسلہ شروع ہووے گا۔
اجے تے تاثر ایہو ای اے کہ اٹھارویں ترمیم توں علاوہ پیپلزپارٹی ملک وچ اصلاحات لئی پی ٹی آئی نال گل بات تے تیار ہو سکدی اے۔ پیپلزپارٹی کہڑیاں شرطاں تے ایس پیش کش نوں قبول کردی اے ایہ اندازا لانا ویلے توں پہلاں ممکن نہیں بس ایناں کہیا جا سکدا اے کہ پارٹی نوں ن لیگ تے پی ٹی آئی ولوں کجھ ایریاز وچ بیک وقت اپنے آپ نوں مستحکم کرن دا موقع ملن دا امکان پیدا ہویا اے ہن ایس موقعے نوں پچھانیا نہ گیا تے سمجھو اگلے کئی عشرے ایہ ہتھ نہیں آ سکے گا۔ پیپلزپارٹی نے اپنے ردعمل تے پرامن سیاسی تے نظام دے دائرے وچ رکھن دا فیصلہ کر رکھیا اے۔ اصل وچ ایہو اوہ راہ اے جہڑا اوہنوں اقتدار دی امید دوا رہیا اے۔ ایس حکمت عملی نال ن لیگ دی پرتشدد تے غیرجمہوری سوچ دا کنڈا ہور وی سنگین وکھائی دیندا اے۔ ورھیاں بعد سہی پاکستان کھپے تے پاکستان نہ کھپے دی گل کیویں نویں پہلو نال سامنے آئی۔ مسلم لیگ ن حکومتی اداریاں تے بیرونی رابطیاں لئی وکھرے وکھرے گروپ بنائے نیں۔ نویں حکمت عملی ایہہ وے کہ کجھ اراکین پارلیمنٹ اداریاں دے حوالے نال اجہے بیان جاری کرن جو اشتعال انگیزی دے زمرے وچ آئوندے ہون بیانات دا دہرا فائدہ چکن دی کوشش کیتی جاوے گی۔ قنون لاگو کرن والے ادارے کاروائی کرن یاں حکومت کوئی قدم چکے تے اوہنوں سیاسی انتقام تے سیاسی آزادی دے خلاف مہم دا حصہ بنایا جاوے گا۔ کاروائی نہ کرن تے اپنی جمہوری جدوجہد دا بینر لایا جاوے گا۔
مسلم لیگ ن سیاسی لڑائی نوں نوازشریف خاندان دی ااسٹیبلشمنٹ نال لڑائی دی شکل دے رہی اے۔ پچھلے دیہاڑیاں مریم تے حمزہ شہباز دے وچکار کجھ تیز جملیاں دا تبادلہ ہویا اے۔ بعد وچ حمزہ نے زیرحراست والد نال دو گھنٹے ملاقات کیتی تے پارٹی دی مجموعی سیاست دے نال نال مریم نواز نال اختلاف رائے تے وی شہبازشریف دی رہنمائی منگی۔ مریم نواز دے تنظیم سازی لئی مشہور اک ساتھی نے بلاول بھٹو نوں طنزاً اسٹیبلشمنٹ دے نیوٹرل ہون دے بیان تے جو کجھ کہیا اوہنوں مریم دی مایوسی نال جوڑیا جا رہیا اے پر ایہنوں کوئی سنجیدہ اختلاف نہیں قرار دتا جا سکدا کیوں جے مریم ایس ویلے کسے وی تنکے دا سہارا لین نوں تیار نیں جو اوہناں نوں تے اوہناں دے والد نوں اقتدار واپس دوا سکے۔ پیپلزپارٹی دی جمہوری پچھان نوں مسلم لیگ (ن) ورت رہی اے۔ مسلم لیگ ن نوں دوجا موڈھا مولانا فضل الرحمن نے دے رکھیا اے۔ ہر جماعت دوجی دی لوڑ اے۔ پیپلزپارٹی دی لوڑ پنجاب وچ وڑنا اے۔ یوسف گیلانی دی حمایت تے اگلے عام انتخابات وچ کجھ سیٹاں تے پی پی امیدوار دے مقابل ن لیگ دے امیدوار کھڑا نہ کرن دا وعدہ اوس عہد و پیمان دی خبر دیندا اے۔ لندن وچ مسلم لیگی قیادت پوری طرح سرگرم ہو چکی اے۔ اک اطلاع موجب پچھلے کجھ مہینے دوران پاکستان توں لندن جان والے بہت سارے سرکاری افسراں دی مسلم لیگ ن دی قیادت نال ملاقات کرائی گئی اے۔ کجھ ملاقاتاں نوازشریف تے باقی اسحاق ڈار نوازشریف دے پُتراں تے علی ڈار نال ہوئیاں نیں۔ حیرت دی گل ایہہ وے کہ ملاقاتاں کرن والیاں وچ وفاقی تے صوبائی ایڈیشنل سیکرٹری تے جوائنٹ سیکرٹری عہدے دے افسر تے کجھ پولیس سروس دے لوگ شامل نیں۔ایہ لوک ملاقاتاں کیوں کر رہے نیں تے ایہناں دے پچھے کیہ منصوبہ روبہ عمل اے ایہ اجے پتہ نہیں۔ ساڈے اک دوست دس رہے سن کہ کجھ دیہاڑ پہلاں حسین حقانی کجھ دوجے بندیاں دے نال نوازشریف نوں ملے نیں۔ حسین حقانی نوازشریف دے معاون خصوصی رہ چکے نیں۔ نوازشریف نوں چھڈ کے جدوں اوہ بینظیر بھٹو دے نال ملے تے اسلام آباد وچ اوہناں نال دو ملاقاتاں ہوئیاں۔ چوکس تے بڑے شاطر نیں۔ ایہو وجہ اے کہ امریکہ وچ پاکستان دے سفیر بنے تے فیر میموگیٹ پاروں وطن واپس نہ آئے۔ حسین حقانی جمہوریت پاکستان وچ فوج دے جمہوریت مخالف منصوبیاں‘ انسانی حقوق تے عالمی اسٹیبلشمنٹ نوں کجھ جانکاری دا چورن ویچدے نیں۔ اوہناں نوں بی جے پی حکومت دے نیڑے سمجھے جان والے حلقے بھارت وچ بلاندے نیں۔ حسین حقانی امریکی اسٹیبلشمنٹ وچ جان پچھان بنا چکے نیں۔ وزیراعظم عمران خان تے صدر جوبائیڈن دے وچکا ربراہ راست رابطے اجے مضبوط نہیں ایہدی کوئی سٹرٹیجک وجہ ہووے گی پر حسین حقانی اپنی فیس دے بدلے امریکہ وچ نوازشریف لئی لابنگ کرن دا ارادہ رکھدے نیں۔ آخری میدان کتھے لگے گا ویکھنے آں۔٭٭
