حالیہ توڑ پھوڑ تے اسلامی تعلیمات
تحریر حمیداللہ بھٹی
جیہڑے بس اینے سارے مسلمان نیں کہ ایہناں دا کلمہ، نماز، روزہ، زکوٰۃ تے حج اُتے یقین اے کسے اُتے ہتھ چُکن دی ایس لئی ہمت نہیں کردے مبادا روزِ محشر باز پُرس گزرنا پئے حادثے وچ ہوئے کسے زخمی نوں ویکھ کے جنہاں دا دل بھر آندا اے پولیس ہوئے یا کوئی ہور ادارہ سب دا دل نال احترام کردے نیں کیوں جے کوئی قانون دے نفاذ دا باعث اے تے کجھ دفاع وطن دے ذمہ دار نیں سفر دے دوران کسے ایمبولینس نوں ویکھ کے فوری رستہ دین دی کوشش کردے نیں تاں جے کسے مریض نوں لیجاندے ہوئے دیر نہ ہو جائے کوئی بُرا بھلا کہوے تے جواب دین دی بجائے چُپ ہو جاندے نیں کوئی زیادہ چیخے یا چلائے یا تضحیک نال پیش آئے تے وی جواب وچ اخلاق توں ڈگے کلمات ادا نہیں کردے، علمائے دین نال بس اینا دریافت کرنا اے کہ اینی ڈھیراں خامیاں دے باوجود وی اوہ مسلمان ہین یا …؟
اسلام دی نویں تشریح تے ایہہ وے کہ فرانس یا کوئی ہور ملک گستاخانہ حرکت کرے تے ملک وچ گھرائو جلائو شروع کر دتا جائے ڈنڈے دے زور اُتے زبردستی دکاناں بند کرائیاں جان تے جے کوئی قسمت دا مارا پولیس اہلکار ہتھے چڑھ جائے تے روی وانگوں دھنک دتا جائے ایمبولینس چاہے کسے مریض نوں ہسپتال ای کیوں نہ لے کے جا رہی ہوئے نہ صرف رستہ روکنا اے بلکہ توڑ پھوڑ کر کے ملیدہ بنانا اے۔ ایس دوران مریض مردا اے تے مر جائے قطعی پرواہ نہیں کرنی جے کوئی گڈی جویں کہ کار، بس یا چنگی چی سڑک اُتے آ جائے تے توڑ پھوڑ دے بعد اگ لانا وی گستاخانہ خاکیاں اُتے غصے دے اظہار لئی ضروری اے۔ رستے بند کرنا تے بالکل نہیں بھُلنا کیوں جے چاہے دنیا دا کوئی ملک گستاخی کرے سزا ہم وطناں نوں دینی اے۔ سڑکاں اُتے لاقانونیت دا ہر رنگ نمایاں ہونا چاہیدا اے ہر مجبور و بے بس دا خون بہان نال مسلمانی کنفرم ہوندی اے تے ایہہ سب کجھ ایس ہستی دے پیروکار کردے نیں جس دا فرمان ؑ اے کہ رستے وچ پیا معمولی کنکر چُکنا وی نیکی اے تے کالی کملی والے آخری نبی ﷺ نوں طائف والے پتھر مار مار کے لہولہار کر دیندے نیں پر رحمت العالمین ؑ دے لباں توں بدعا نہیں ہدایت دی دعا ای نکلدی اے۔ پیارے آقا دی ناموس اُتے جان سنے ہر رشتہ قربان کرن اُتے تے ہر مسلمان وانگوں میرا وی پختہ یقین اے پر زندگی وچ اج تیکر کسے بندے دی جان لین دی سوچ تیکر ذہن وچ کدی پیدا نہیں ہو سکی ہن پتہ نہیں میں مسلمانی دے کس درجے اُتے آں پچھنا ایہہ وے کہ میں کنج دا مسلمان واں…؟
خاتم النبین ؐ دی شان وچ کسے وی قسم دی گستاخی ہر مسلمان لئی ناقابل برداشت اے چہ جائے کہ کوئی خاکے بنان دی ناپاک جسارت کرے انج کرن والا چاہے کنہا ای طاقتور ملک ہوئے مسلماناں نوں خوفزدہ نہیں کر سکدا پر ست سمندر پار ہون والی غلیط حرکت دے جواب وچ اپنے ای ملک دی املاک نذر آتش کرن نوں میرا دل نہیں من دا تے ہاں اک ہور سوال پچھنا اے کہ کیہ دنیا وچ صرف اسیں ای مسلمان آں ہور کوئی مسلمان نہیں جے پاکستان دے علاوہ وی کئی اسلامی ملک نیں تے اوتھے لوک ساڈی طرح احتجاج کیوں نہیں کردے اوہ اپنے ملک وچ دنگا و فساد پھیلان توں کیوں گریز کردے نیں، کیہ اوہ مکمل مسلمان نہیں؟ جیہڑے پیارے نبی ؐ دے ناں اُتے نہ تے اپنی حکومتاں نوں بلیک میل کردے نیں، نہ دھرنے دیندے نیں تے نہ ای اداریاں نوں گالیاں دیندے نیں، کنج دے مسلمان نیں جے وطن عزیز دے حالات دی نظر نال موازنہ کراں تے مینوں تے ادھے ادھورے ای مسلمان محسوس ہوندے نیں۔ خدارا کسے دے کول مدلل جواب ہوئے تے مینوں وی قائل کرے کیوں جے عجیب مسلمان واں جیہڑا وطن وچ لگی اگ ویکھ کے پریشان واں تے قانون نافذ کرن والے اداریاں دے اہلکاراں نوں زخمی ویکھ کے افسردہ واں میں آخر سفاک و سنگدل کیوں نہیں بن سکیا کدھرے انج تے نہیں کہ کامل مسلمان بنن لئی کسے جتھے وچ شامل ہو کے تربیت حاصل کرنی ضروری اے۔ جے ضروری اے تے کیہڑا جتھا بہتر رہوے گا گڈیاں دی توڑ پھوڑ کرن والا، کولاں نوں زخمی کرن والا، تاجراں اُتے بہادری دی دھاک بٹھان والا یا سڑکاں بند کر کے ایمبولینس تے مریضاں لئی رستے بند کر کے نعرہ بازی کرن والا۔ پچھنا ایہہ وے کہ چنگا مسلمان بنن لئی کیہڑے جتھے دی تربیت تے کتھے حملے ضروری نیں؟
ساڈے مزا ج دے چوہدری نوں نال والے پنڈ دے چوہدری نال نفرت ہو گئی ایس نے مخالف نوں سزا دین لئی پنڈ والیاں نوں گولہ بارود اکٹھا کرن دا حکم دتا جدوں کافی گولہ بارود جمع ہو گیا تے اگ لا دتی جس نال ادھا پنڈ سڑ گیا جس وچ چوہدری دا اپنا مکان وی تباہ ہو گیا زخمی چوہدری بمشکل تباہ شدہ ڈھانچے توں نکلیا تے بولیا ساڈا پنڈ وی ادھا تباہ ہو گیا اے اندازہ کرو نال والے پنڈ دا کنہا نقصان ہویا ہوئے گا پچھنا ایہہ وے کہ ساڈا وی کجھ انج دا ای طرز عمل نہیں جیہڑا اپنا ملک تباہ کر کے سمجھدے نیں کہ مخالفاں نوں سزا مل رہی اے۔
وطن عزیز وچ لگی اگ نال گستاخانہ خاکے بنان والیاں دا کنہا نقصان ہویا اے اوہ تے ڈر کے تائب ہوئے نیں یا نہیں ویکھو پورا ملک سڑ رہیا اے خوف دی فضا اے لوک سہمے سہمے نیں ہن وی کافر ملک نہیں ڈردے تے مزید کیہ کرنا چاہیدا اے کسے عالم دین دے کول کوئی مزید بہتر منصوبہ ہے تے دسے تے ایہہ وی پچھنا اے کہ ملک وچ اگ لان والیاں دے کول ایس دا کوئی جواب ہے کہ فرانس جہے کافر ملک توں لیا ارباں ڈالر دا قرض کنج واپس کرنا اے تے جنہاں دے عزیز و اقارب فرانس وچ مقیم نیں کیہ اوہناں نے فرانس چھڈ دتا اے؟ ساڈے جذبات ویکھ کے فرانس نے ایف اے ٹی ایف توں پاکستان دا ناں نہیں نکلن دتا اوہ ساڈی خالی بڑھکاں تے جذباتی نعریاں دا جواب ساڈے دشمن نوں رافیل طیارے و دیگر جنگی سامان دے کے مضبوط توں مضبوط تر بنان دی صورت وچ دے رہیا اے تے اپنے ملک وچ آباد مسلماناں دے خلاف مزید پابندیاں لان لئی قانون سازی وچ مصروف اے پچھنا ایہہ وے کہ ملک دے کس کس حصے وچ مزید کنیاں اگاں لائیے تے کنہے ہم وطن مار دیئے تاں جے بھارت نوں اسلحہ دین تے مسلماناں دے خلاف مزید سخت قانون بنان توںفرانس باز رہوے۔
مینوں ایہہ تسلیم کرن وچ عار نہیں کہ میں کوئی عالم دین نہیں نہ ای میرا کوئی مدرسہ اے، جتھے میں حصول علم لئی آن والیاں نوں صبح و شام پیٹ سکاں نہ ای مینوں ہجرے دی کوئی انج دی آڑ میسر اے جتھے حرارت ایمانی دے اظہار دے طور اُتے طلبا و طالبات نال چھیڑ چھاڑ کرن دے موقعے میسر نیں میں تے اک سادا جہیا مسلمان واں جنہوں اپنے پیارے نبی ؐ دے دسے ہوئے رستے تے سنت نال پیار اے اسلام اک مکمل ضابطہ حیات اے جس وچ کسے نوں ایذرسانی دی اجازت نہیں کسے گورے نوں کالے اُتے تے عربی نوں عجمی اُتے فوقیت نہیں فوقیت ہے تے بس تقویٰ پرہیزگاری دی بنا اُتے۔ میں دو دن توں قرآن و حدیث توں فساد دی اجازت تلاش کرن دی کوشش کیتی اے پر ناکام واں تے کئی تھاں تے فساد فی الارض دی ممانعت پڑھن نوں ملی اے۔ سورہ بقرہ دی آیتاں وچ ارشاد باری تعالیٰ اے تے جدوں کہیا جائے ایہناں نوں کہ ’’مت فساد پھیلائو زمین میں ‘‘ تے آکھدے نیں ’’ہم ہی تو سنوارنے والے ہیں‘‘ ہوشیار بے شک اوہ ای فسادی نیں پر سمجھدے نہیں۔ بس ہن مینوں کسے توں کجھ پچھنا نہیں۔ مینوں میرے سوالاں دا جواب مل گیا اے۔
