سبق سِکھن دی لوڑ اے۔۔۔
مدثر اقبال بٹ
اج دو خبراں بڑیاںاہم نیں۔پہلی تے حکومت نال ٹی ایل پی دے کامیاب مذاکرات تے دوجی گل آزاد صحافت دی اے جیہدے اُتے بوہت سارے سوالات اُٹھ رہے نیں۔۔۔۔۔کچھ دن پہلے جدوں سعد رضوی ہوراں دی گرفتاری ہوئی تے میں اوہدوں وی ایہو گل کیتی سی کہ حکومت بیشتر فیصلے سوچیوںسمجھیوں بغیر کردی اے۔پہلاں اپنی نالائقی نال کھلارا کھلار کے سوچدی اے کہ ہُن ایہنوں سمیٹنا کیویں اے؟
حکومت توں ٹی ایل پی تے تحفظ ناموس رسالت ﷺوالے معاملے اُتے وی اپنی نا اہلی دا کھلارا سمیٹیا نہیں گیا۔
فیرایس دوران ہنگامیاں داجو طوفان اُٹھیا،قتل و غارت ہوئی،ایہناں حالاتاں نوں وی حکومت نے بڑی ای نالائقی نال ہینڈل کیتا۔ایہہ معاملہ احسن طریقے نال وی نپٹایا جا سکدا سی پر حکومت چونکہ ایڈونچر پسند واقع ہوئی اے،ایس کر کے اخیر تیکر انتظار کیتا گیاتے جدوں تک حالات پوری طرح وِگڑ نہیں گئے عقل نال مشورے نوں حرام سمجھیا گیا۔
خان صاحب ہوراں وی خطاب وچ ایہنی عجلت دا مظاہرہ کیتا کہ جیویں اوہ ٹی وی اُتے آکے گل نہ کردے تے خورے کیہ ہو جانا سی۔ جیہڑیاں گلاں اونھاں کیتیاں،اوہ ای سب کچھ اونھاں دے حکومتی ترجمان وی تے کر ای رہے سن۔ میرے جیہے،جیہڑے اونھاں دے ہمدرد نیں تے بہی خواہ نیں،اوہ ہمیشہ ایہو ای چائوہندے نیں کہ وڈے خاں ہوریں تقریر نہ ای کریا کرن۔ کیوں کہ اونھاں جد وی خطاب فرمایا کوئی اجیہی گل ضرور کیتی،جنھوں اونھاں دے مخالفاں چھج پا کے چھٹیا۔بہرحال جو ہوئیا،اوہ نہیں سی ہونا چاہی دا،جے ہُن ہو گیا اے تے آیندہ اجیہی حکمت عملی اپنائی جائے کہ فیر دوبارہ نہ ہووے۔
ٹی ایل پی ہووے یا کوئی دوجی جماعت،اونھوں وی خیال کرنا چاہیدا اے کہ بھئی آقا ئے دوعالم دی عظمت دی گل کردیاں اجیہیاں حرکتا ں نہیں کرنیاں چاہیدیاں جنھاں دا مُل لوکائی نوں تارنا پوے۔اج ٹی ایل پی نال معاہدہ ہونا بھاویں چنگی گل اے،پر اوہناں دی اشک شوئی کون کرے گا جیہڑے جانوں گئے،جیہڑے عمر بھر لئی اپاہج ہوگئے۔جنھاں دی عمر بھر دی کمائی نوں اگ لاکے ساڑھ دتا گیا،جنھاں دے کاروبار تباہ کیتے گئے۔اونھاں نوں ہرجانہ کون دے گا؟
میرا سوال اے کہ جد حکومت تے ٹی ایل پی وچکار مذاکرات ہورہے سن تے اوس ویلے اوس ماڑے بندیدا کوئی ترجمان کیوں نہیں سی جیہڑا ایس ہجوم یا حکومت دی نالائقی ہتھوں برباد ہوئیا۔۔۔۔کوئی وی نہیں سی،اوس ماڑے دا کوئی،کدے وی والی وارث نہیں ہوئیا۔ ایہناں مفاداں دیاں کھیڈاں وچ اوس دا مفاد ہمیشہ ای گواچیا رہیا۔
بہرحال ناموس رسالت ﷺاُتے ساڈے ماں باپ،بال بچے مال متاع،سب قربان،پر خدارا ایس عظیم مقصد نوں اپنے سیاسی عزائم لئی نہ ورتو۔عشق رسولﷺ داناں لے کے لوکاں دے جذبات نال نہ کھیڈو،دین داری نوں دنیا داری بنائو گے تے رب تے رب دے رسول دے سامنے کیہ منہ لے کے جاو گے؟۔۔۔۔۔
ایس دوران جیہڑا دوجا معاملہ سامنے آیا اوہ آزاد صحافت دا گل گھٹنا سی۔اِک بنھے پورے ملک وچ اگ لگی ہوئی سی تے دوجے پاسے ساڈی حکومت دے افلاطونی مشیر نیشنل میڈیا اُتے پابندی لاکے لوکائی نوں سچ جانن دے حق توں محروم رکھ رہے سن۔میں دعوے نال آکھنا واں کہ جس بد بخت نے وی میڈیا اُتے پابندی دی گل کیتی اوہ ریاست دا سکا نہیں سی۔اوس بد بخت نے ملک دشمناں نوں سوشل میڈیا اُتے چوٹھے پروپیگنڈے دا موقع دتا۔اوہ حکومت دے نال نال پوری قوم دا مجرم اے،اونھوں گلمیوں پھڑ کے اوہدے توں وی ایس سازش دا حساب لینا ضروری اے۔
میڈیا دے بلیک آئوٹ نے اجہیا تماشا لایا،جنھیں ہر شخص نوں پریشان کرن دے نال نال حکومت نوں گالہاں کڈھن دا موقع تے تحریک دتی،تے سچی گل وی ایہو ای اے کہ زیادہ لوکاں حکومت نوں گالہاں کڈھ کے ای دل دی ہواڑ کڈی۔بہرحال ایہہ معاملہ وقتی طور اُتے تے حل ہوگیا اے پر اجے بہت سارے مسائل نیں،جیہڑے حکومت توں عقل دے استعمال دا تقاضا کر رہے نیں۔حکومت دے نال نال ٹی ایل پی نوں وی سوچنا پوے گا کہ اونھے ہُن کیہڑے پاسے جانا ایں۔جے عملی سیاست کرنی اے تے فیر سیاسی سوچ وی بالغ کرنی پئے گی۔رسالت معاب ﷺدی عظمت دا جھنڈا چُکنا اے تے فیر اونھاں دے احکامات دے مطابق اپنے کارکناں دی تربیت وی کرن دا فرض نبھاونا پئے گا۔نرے جذبات ہی کافی نہیں،ایہناں ای نہیں کہ اپنے بھراواں دی ملکیت نوں اگاں لا دیو،پلس والیاں نوں مارو یا سڑکاں اُتے زنانیاں تے بالاں نوں ذلیل کروتے فیر ایس عمل نوںتحفظ ِ ناموس رسالتﷺ دی تحریک دا ناں دے دیو؟
نہیں بیلیو اِنج نہیں۔۔تہانوں سیاسی سوچ تے شعور نال اوہ عمل اپناونا پوے گا جیہڑا سیدنا ابو بکرو تے جناب ِعمردا سی،اوہ تربیت تے سوچ جیہڑی شیر خدا مولا علی ؑ نے دتی۔قوت دے اظہار دے نال نال شعور تے علم وی ضروری اے۔اپنے کارکنا ںدی اخلاقی،علمی تے سیاسی تربیت دے نال نال لوکائی دی سیوا دا سبق وی دیو۔
بہرحال مینوں اونھاں لوکاں نال ہمدردی وی اے تے دکھ وی، جیہڑے حکومتی نالائقی تے مشتعل ہجوم دے ہتھوں پریشان ہوئے،اوہ لوک جیہڑے بھن توڑ کرن والیاں توں وڈے تے سچے عاشق رسول ﷺسن۔
بہرحال جو ہوئیا سو ہوئیا۔ہن دونواں دِھراں نوں خلوص نیت نال اوس عظیم مقصد،یعنی ناموس ِ رسالت لئی بندے دے پُتراں ہار،اوہ ذمے داری نبھاونی پوے گی جیہڑی ہر مسلمان اُتے فرض اے۔فرانس،ناروے یا ڈنمارک سنے کوئی وی ملک ہووے اونھوں ایہہ باور کروایا جاوے کہ ساڈے لئی اپنے آقا دی ناموس توں ودھ کجھ نہیں۔سارے اسلامی ملک اکٹھے ہوکیناموس رسالت دا جھنڈا چکن، جیہڑا اس جھنڈے دی چھاویں نہ آوے،اوس لعنتی دا بائیکاٹ سارے مسلمان کردین تے ویکھو فیر فرانس کتھے کھلوتا اے تے یورپ کتھے جاندا اے۔
لوڑ اے تے بس فرقیاں دے رولے توں اگے نکل کے اتحاد امت دی سوچ نوں رہنما کرن دی۔سعودی عرب،ترکی،ایران،انڈونیشیا، ملیشیا سنے سارے ملک اک تھاویں کھلو کے نعرہ رسالت لاون گے تیگستاخاں دی ماں نہ مر جاوے تے کہنا۔اللہ سانھوں اکٹھے ہون تے ایس ایمانی تقاضے نوں پوریاں کرن دی توفیق عطا فرمائے۔۔۔۔
ایہدے نال نال میں ابصار عالم اُتے ہوئے حملے دی وی مذمت کردا ہاں۔حکومت خورے کیوں آزاد میڈیا دی اہمیت توں غافل ہوکے
اپنے پیراں اُتے کواڑی مار رہی اے۔رب تعالیٰ حکومت نوں چنگے دی توفیق دے نال نال سانھوں سچا مسلمان بنن دی ہمت دیوے۔
