’’جیسے میرے سرکارﷺ ہیں ویسا نہیں کوئی‘‘

عتیق انور راجہ

پچھلے دناں اک بیٹھک وچ گفتگو ہو رہی سی کہ پچھلی دو تن صدیاں توں فرقہ بندی دا انج دا تناور درخت مسلم معاشرے وچ کھڑا ہو چکیا اے۔جے اسیں اج ایس درخت دے زہریلے اثرات ختم ہ وندے ہوندے 50-60 سال لگ جان گے۔ سانوں ایہہ نقطہ سمجھن دی لوڑ اے کہ دنیا وچ جنہاں ملکاں دی معیشت تگڑی اے ایہناں ای دی گل سنی منی تے قبول کیتی جاندی اے۔ اللہ نے مسلماناں نوں قرآن وچ دنیا وچ غور و فکر دی دعوت دتی اے اغیارنت نویں سائنسی ایجادات کر رہے نیں۔ دنیا وچ لوکاں دی خوراک نوں بہتر بنان لئی انقلابی اقدامات کیتے جا رہے نیں۔ پچھلے دناں اک سید صاحب نال فون اُتے گل ہو رہی سی اوہ کہن لگے کہ اسیں ہر حال وچ رسول ﷺ دے دسے رستے اُتے چلن دی کوشش کردے نیں۔ میں سید جی نال عرض کیتا کہ صاحب کدھرے مل بیٹھے نیں تے ایس اُتے گل بات کردے نیں۔ جیہڑی گلاںوچوں سید زادے توں کہنی سی ایہناں نوں ایس معتبر اخبار وچ ای لکھ دینا واں شاید کسے طرف توں کوئی مدلل جواب آ جائے۔ اک عام مسلمان سرکار دے اسوئہ اُتے عمل کردا نظر ضرور آندا اے۔ اک عام مسلمان محنت مزدور کردا اے، تجارت کردا اے، اپنے رشتہ داراں، اقارب دے حقوق ادا کردا اے۔ خیرات و صدقات دا اہتمام کردا اے۔ اپنے بالاں نوں چنگی تعلیم دلوان لئی ڈبل شفٹاں وچ کم کردا اے۔ بھیناں دی شادی لئی قرضے لیندا اے۔ وطن دے دفاع لئی محاذ جنگ اُتے جا کھڑا ہوندا اے۔ یعنی اک عام مسلمان نماز روزہ، حج زکوٰۃ دے نال نال جہاد لئی وی تیار کردا اے۔ ست اٹھ لکھ دی تعداد وچ پاک فوج دے جیہڑے جوان ملکی سرحداں دا تحفظ کر رہے نیں۔ ایہناں وچوں اکثریت دا تعلق عام مسلماناں توں ای تے ہے۔
نبی کریم ﷺ دی مبارک زندگی غزوات وچ لنگھی سی۔ آخری وقت وچ وی گھر دی میں اُتے نو تلواراں لٹک رہیاں سن۔ حضرت محمد ﷺ نے جنگاں وی لڑیاں، خندق وی کھودی، جنگ وچ زخم وی کھادے تے پیٹ اُتے پتھر وی بنھے۔ شاہ جی تہانوں ویکھ کے تے نہیں لگدا کہ آپ نے دو دن وی فاقہ کیتا ہوئے گا۔ آپ نال ہتھ ملاندے ہوئے بالکل احساس نہیں ہوندا کہ آپ نے کدی مشقت کیتی ہوئے گی۔ جے سرکار نال محبت سچی اے تے سرکار جہے اعمال دی کوشش کرو۔ آخری گل ایہو کہواں گا کہ نبیؐ دا ذکر خود رب کریم نے بلند کیتا اے بقول شاعر ’’جیسے میرے سرکار ہیں ویسا نہیں کوئی‘‘ملک نوں مستقل امن دا گہوارہ بنائے رکھن لئی ضروری اے کہ ساڈی حکومت ہر محلے، قصبے تے شہر وچ دانشوراں، شاعراں، ادیباں، تےسکالرز نوں ملا کے انج دے تھنک ٹینک بنائے۔ جنہاں دا مقصد عام لوکاں دی ذہن سازی لئی بہترین مشورے دیندے ہوئے ملک نوں اک اسلامی فلاحی ریاست بنانا ہوئے۔