ّّّّّّّّّسیاسی دنگل تے ماڑے لوک
لکھت: طاھر وزیر آبادی
حکومت ہووے تے بھا ویں اپوزیشن۔ایناں سیا سی آ گوواں دے شعور دی موت ہو چکی اے ایہ لوک آپسی مخالفت دی جنگ وچ کجھ ایس طراں انھے ہو جاندے نیں کہ عوام دا کوئی ذکر ای باقی نہیں رہ جاندا۔عوامی مسئلیاں ول نہ حکمران دھیان دیندے نیں تے نہ ہی اپوزیشن نوں عوام دا کوئی خیال رہ جاندا اے ۔۔ اک دوجے نوں مندا کہہ کے گالھاں کڈ ھن والے ایہ سیاسی لوک دوجے سال اک دوجے نوں جپھیاں پا رہے ہوندے نیں۔نون لیگ تے پیپلز پارٹی دی تازہ مثال تہاڈے سامنے اے۔کل اک دوجے اُتے چکڑ سُٹ کے نعرے لارہے سن نالے سڑکاں اُتے دھرون دی گل سرِ عام کر رہے سن۔ویکھو اج ایہناں دوہناں دا کرتب ویکھو۔ایہ مکا ری تے مفاد پرستی نہیں تے ہور کیہ اے ؟؟؟اج دی حکمران پارٹی دا وی ایہو وطیرہ نظر آ رہیااے ۔آ وے وی کیوں نہ ؟ حکمران پارٹی وچ وی نوں لیگ تے پیپلز پارٹی وچوں نکلے کاریگرشامل نیں ۔وزیرِ اعظم عمران خاں بارے آکھیا جاندا اے کہ اوہ مخلص، ایماندار تے کھری سوچ ر کھن و الا انسان اے ۔ایہ گل تے اسی من لینے آں کہ عمران خان بہت نیک انسان اے۔ فیر دسو باقی دی ٹیم بارے کیہ خیال اے ؟؟؟اُچے اُ چے بیاناں تے ریا ست مدینہ دی مثال دیون نال کجھ نہیں بندا ، اج لوڑ اے یہر طراں دی سیاسی مخا لفت بھُل کے بیروز گاری دا مڑھ ڈکن دی ۔اج لور اے کیتے وعدیاں نوں پورا کرن دی ۔ حکومت توں منگھیائی وچ پھسے ماڑیاں نوں کڈھن دی امید سی جد کہ سب کجھ اُلٹ ہو گیا اے۔ حکومتی وزیر اپنا پنا کم کرن دی بجائے سیاسی مخالفاں دے لِیڑے پاڑن ٹُرے نظری آوندے نیں۔صبح ، دوپہر تے شام سبھے وزیر مشیر سیاسی بیانبازی وچ رِجھے رہندے نیں ۔فیر بھلا اوہ اپنی ذمہ داریاں کیہڑے ویلے پوری کر دے نیں ـ؟؟؟ سبزیاں ، پھل فروٹ تے ہور دُوجا اناج عوام دی پہنچ توں ڈھیڑ اُ چا ہو چُکیا اے۔عام شہری دی آْمدنی توں دونا خر چہ خود کُشیاں دی راہ ہموار کر رہیا اے۔ گھرا ں دے چُلھے ھُنڈے تے دھیاں دے وال چِٹے ہو رہے نیں۔اجہیاں سوچاں تے مصیبتاں وچ گواچے ماڑے لوک ایس گندی سیاست دے ظلمی وطیرے ہتھوں مر دے جا رہے نیں ۔جد کہ حکومتی ذمہ داران ہَسدے کھیڈدے تے موج میلہ کر دے و کھالی دیندے نیں ۔کسے اک نوں وی عوام دی کوئی فکر اے نہ ا ی کوئی خیال۔۔۔ لنگے ہر دورو چ ماڑا ہور ماڑا تے تگڑا ہور تگڑا ہوندا رہیا تے ایہو ریت اج وی جاری اے۔اپوزیشن نال لڑ دے رہنا کوئی کمال نہیں ۔کمال تے ایہ سی کہ عا م شہریاں نوں دُ کھاں دے مسلسل عذاب و چوں کڈ ھیا جاوے ۔ طا قتور نوں اپنی طاقت اُتے تکبر کرن دی بجائے رب دی رضا مطا بق ہی خرچ کرنا چاہی دا اے۔دریائے دجلہ کنارے بھُکھے کُتے دی گل کرن والیو ، حضرت عمر فاروقؓ دیاں مثالاں اُتے عمل دی لوڑ اے۔چنگیاں چنگیاں گلاں کیتیاں کن نہیں پھبدا چنگے عمل کیتیا ں رب دے بندے راضی ہوندے نیں ۔وزیر اعظم عمران خا ں جی دھیان دیو ماڑے لوک مسلسل عذا ب وچ نیں ۔ اُوہناں دی کوئی چِیک تہاڈے تیک نہیں اپڑ رہی ؟؟؟کدھرے انج نہ ہووے کہ ماڑیا ں دا رونا ہاواں بن کے امبراں تے نہ اپڑ جاون۔ کسی وی انسان کول دنیاوی طاقت سدا نہیں رہندی ۔جھاتی مار کے ویکھو ۔میاں محمد نواز شریف تن واری ایس ملک دے وزیرِ اعظم رہ چُکے نیں۔آصف علی زرداری پاکستان دے صدر رہ چُکے نیں ۔ اج بابے دیاں تے کل چاچے دیاں ۔سدا بادشاہی سوہنے رب دی۔ وزیر اعظم عمران خاں اپنے وزیر اں مشیراں دا قِبلہ درست کرن تاں بہت کجھ بہتر ہو سکدا ے ۔ورنہ فضول جہیاں سیاسی لڑا ئیاں وچ نقصان صرف عوام دا ہی ہو رہیا اے۔ سیاست دان تے پہلاں ای سرمایہ دار، جاگیر دار تے وڈیرے لوک نیں ۔رُل تے غریب ہی رہے نیں ۔خاں صاحب اپنے لئی دعاواں دا پر بندھ کرو۔ آئے روز بجلی ، گیس وغیرہ دے مُل ودھدے جا رہے نیں، پٹرول ہر ہفتے مہنگا ہو رہیا اے۔ماڑے لوکاں وچ آٹا ، چاول ،گھیو تے دال خریدن دی ہمت باقی نہیں رہی۔ پاکستان نوں ریاستِ مدینہ ضروربنائو پر ماڑے لوکاں توں دو وقت دی روٹی توں دور نہ کرو۔
