ذاتی لڑائیاں

ارشاد بھٹی

جے گل ایہ وے کہ زرداری صاحب نے پی ڈی ایم نوں استعمال کیتا‘ اپنا مطلب کڈھیا تے سائیڈ تے ہو گئے تے ایہ کوئی نویں گل اے‘ ساڈی سیاستدا وطیرہ ای اک دوجے دا استعمال‘ بینظیر بھٹو اک پاسے نوازشریف نال میثاق جمہوریت کر رہیاں سن جد کہ دوجے پاسے صدر مشرف نال دبئی وچ خفیہ ملاقاتاں تے این آر او‘ نوازشریف اک پاسے بینظیر بھٹو نال رَل کے جمہوریت مضبوط کر رہے سن جد کہ دوجے پاسے اوہ اپنے غیرملکی دوستاں دی مدد نال صدر مشرف نال رابطے وچ سن۔ واپس آن دی ڈیلاں فرما رہے سن ایہ تے اک مثال‘ نہیں تے دوہاں پارٹیاں نے بتیری واری اک دوجے نوں استعمال کیتا‘ جے گل ایہہ وے کہ زرداری صاحب ایہناں لمحیاں وچ جدوں نوازشریف اشتہاری ہو کے لندن وچ اودوں اوہناں نوں چھڈ کے اک سائیڈ تے ہو گئے۔ ایہناں مشکل لمحیاں وچ زرداری صاحب نوں نوازشریف دا ساتھ دینا چاہیدا سی‘ تے ایہ کوئی نویں گل اے زرداری صاحب نے جدوں جنرل راحیل شریف نوں مخاطب کرکے اٹ نال اٹ وجان والی تقریر کیتی۔ اودوں وزیراعظم نوازشریف نے اگلے دیہاڑے اوہناں نال طے شدہ ملاقات کینسل کرکے سارے رابطے منقطع کر لئے تے زرداری صاحب نوں 18 مہینے باہر رہنا پیا‘ گل اگے ودھان توں پہلاں اک گل واضح کردا جاواں کہ اجے تک جو کجھ ہویا یاں جو کجھ ہووے گا حیران نہیں ہونا ایہو ہونا سی۔
ایہو ہوندا آیا اے‘ ایہ کوئی اصولی لوکاں دے اصولاں دی جنگ نہیں کہ پریشان ہویا جاوے۔ جدوں اک پاسے بھٹو دی پیداوارتے دوجے پاسے ضیاء دی رہند کھوہند مطلب قاتل‘ مقتول پارٹیاں دا ایکا ہووے‘ اگ پانی دا ملاپ ہووے‘ ذاتی مفادات دا اکٹھ ہووے تے جہدا داء لگے گا اوہ لاوے گا‘ ہن جے زرداری صاحب پی ڈی ایم وچ رہ کے یاں نکل کے کیساں توں جان چھڑوان دے چکر وچ‘ سندھ بچان دے چکر وچ‘ کسے ڈیل‘ ڈھیل دے چکر وچ‘ تے ایہ کوئی نویں گل‘ ساڈی سیاست وچ کون اے جنہے ایہ نہیں کیتا۔ مسلم لیگ ایہو کجھ نہیں کردی رہی‘ اعتزاز احسن نوں کیوں بلاول بھٹو نوں ایہ نصیحت کرنی پئی کہ ہائوس آف شریف توں محتاط رہنا‘ جدوں سیٹی وجدی اے تے ایہ غایب ہو جاندے نیں۔ جے گل ایہہ وے کہ پیپلزپارٹی لانگ مارچ‘ دھرنے وچ دل و جان نال ساتھ نہیں دے رہی‘ اوہ استعفے دین توں ہچکچا رہی اے تے ایہ کوئی نویں گل اے‘ یاد کرو جدوں طاہر القادری‘ عمران خان سڑکاں تے سن۔ لانگ مارچ‘ دھرنے‘ سول نافرمانی‘ لاک ڈائون ہورہے سن اودوں نوازشریف دے نال مولانا صاحب تے پیپلزپارٹی پارلیمنٹ دا سانجھا اجلاس سجائی بیٹھے سن اودوں مسلم لیگ‘ جے یو آئی‘ پی پی سارے عمران خان نوں دعوتاں دے رہے سن۔ آئو پارلیمنٹ وچ بہہ کے سارے مسئلے حل کریئے۔ ایتھے سارے طے کردے نیں‘ پیپلزپارٹی اج وی اوہو کجھ کہہ رہی اے جو کل کہہ رہی سی کہ آئو اپنیاں ساریاں لڑائیاں پارلیمنٹ وچ لڑنے آں‘ اج کیوں جے نوازشریف‘ مولانا پارلیمنٹ وچ سٹیک ہولڈر نہیں ایس لئی اج اوہ دمادم مست قلندر دے حق وچ‘ نہیں تے ایہو مولانا صاحب سن جو کہندے سن کہ دھرنے‘ لانگ مارچ‘ مطلب سڑکاں تے آ کے حکومت نوں گھر گھلنا بغاوت دے مترادف‘ جے گل ایہہ وے کہ زرداری صاحب عین موقعے تے سویلین بالادستی‘ ووٹ نوں عزت دیو‘ جمہوریت دی جنگ توں منہ پھیر گئے تے ایہ سراسر غلط‘ جدوں بھٹو ضیا دا اکٹھ ہووے‘ مولانا صاحب‘ اچکزئی صاحب اک چھت تھلے ہون‘ مولانا صاحب اے این پی اک اتحاد وچ ہون‘ مسلم لیگ اکٹھے بیٹھے ہون تے سمجھ جائو ایہ کوئی نظریاتی‘ اصولی‘ اخلاقی کھیڈ نہیں‘ سارے سرواویل گیم‘ تریخ دسے بی بی‘ میاں میثاق جمہوریت ہووے‘ زرداری صاحب دا رائے ونڈ جا کے 50 ڈشاں دا کھانا ہووے‘ شہبازشریف دی بلاول ہائوس تے حاضری ہووے‘ مریم نواز دا لاڑکانہ جانا ہووے‘ مریم‘ بلاول ملاقاتاں ہون‘ سب کجھ عارضی‘ سب کجھ فرضی‘ سب کجھ وقتی تے سارا کجھ اپنے واسطے۔
ہن آ جائو زرداری صاحب دی اوس تقریر تے‘ جہدے بعد پی پی‘ مولانا صاحب دی نظر وچ غیرجمہوری ہو گئی۔ کیہ زرداری صاحب نے غلط کہیا کہ نوازشریف صاحب‘ اسحاق ڈار دے نال آئو تے انقلاب نوں لیڈ کرو‘ کیہ غلط کہیا کہ میاں صاحب واپس آئو اسیں استعفے تہاڈے کول جمع کروانے آں۔ میں جنگ لئی تیار آں‘ آخری ساہ تک جدوجہد کراں گا پر میاں صاحب تسیں تشریف لیائو‘ جے ایس واری جیل جانا پیا تے سارے رَل کے جیل جاواں گے‘ کیہ نوازشریف نوں بلانا غلط‘ کیہ اخلاقی‘ قنونی‘ سیاسی طور تے نوازشریف دا وطن واپس آنا نہیں بن دا‘ اخلاقی طور تے ویکھو تے نوازشریف لندن علاج کروان گئے سن اوہ اوتھے سیاستاں کرن نہیں سن گئے۔ اوہناں دے کول اٹھ ہفتیاں دی مہلت سی‘ ڈیڑھ ورھا ہو گیا‘ اک دن ہسپتال وچ داخل ہوئے نہ باقاعدہ علاج‘ اخلاقی طور تے ہن اوہناں نوں واپس آنا چاہیدا اے۔ قنونی طور تے ویکھو تے اوہناں دی مدت ضمانت ختم ہو گئی‘ اوہ اشتہاری ہو چکے‘ عدالتاں سد رہیاں‘ اوہناں نوں واپس آنا چاہیدا اے سیاسی طور تے ویکھو تے جدوں جنگ جمہوریت دی لڑنی‘ جدوں معاملہ سویلین بالادستی دا‘ جدوں گل ووٹ نوں عزت دیو‘ جدوں لیانا انقلاب ہووے اودوں لندن وچ بیٹھن دی بجائے واپس آنا بن دا اے۔ ہن اک پاسے مریم نواز کہن نوازشریف قائد‘ رہبر‘ امام خمینی‘ دوجے پاسے واپس آن دا کہیا جاوے تے مریم نواز بولن‘ نوازشریف دی جان نوں نیب توں خطرہ‘ زرداری صاحب جان دی گارنٹی دین۔ اصل گل ایہہ وے ہر کوئی اپنے چکر وچ‘ کوئی سیاسی مخالفت نوں ذاتی دشمنی بنا کے میدان وچ‘ کوئی اپنے آپ نوں بچا رہیا اے‘ کوئی جو کجھ کول اوہنوں بچا رہیا اے‘ کوئی کھیڈاں گے نہ کھیڈن دیاں گے تے تلیا ہویا اے۔ سب کجھ کجھ ذاتاں دے دوالے گھم رہیا اے‘ ساریاں لڑائیاں‘ سارا جنگ وجدل کجھ ذاتاں دی وجہ نال‘ اوہناں کجھ ذاتاں نوں اج ریلیف مل جاوے ایہ اج سکون وچ آجان‘ سب ٹھیک ہو جاوے‘ ایہ کرونے‘ ایہ ٹڈی دل‘ ایہ اپنی اوہناں ذاتی لڑائیاں وچ تباہ کر گئے پاکستان نوں‘ کجھ باقی نہ رہیا‘ قرضے‘ مہنگائی‘ بیروزگاری‘ غربت‘ ہر ادارہ زمین بوس‘ حکومت نہ اپوزیشن‘ پارلیمنٹ نہ سینٹ‘ نظام انصاف تباہ‘ قوم نوں دو ویلے دی روٹی دے لالے پئے ہوئے نیں۔
قوم بجلی‘ گیس دے بل سامنے رکھے رو رہی اے۔ ہسپتالاں‘ سکولاں‘ تھانیاں وچ چھتر کھا رہی اے جد کہ بے حس ارباں‘ کھرباں پتی بونی قیادت ذاتی لڑائیاں لڑ رہی اے سارے ملکاں وچ جائیداداں بنا کے‘ اپنی اولاداں سیٹ کرکے سانوں ایہ جونکاں چمڑیاں ہوئیاں نیں‘ ساڈا لہو چوس رہیاں نیں تے دکھ دی گل ایہہ وے کہ قوم بڑے مزے نال خون چسوا رہی اے۔(بشکریہ جنگ)

اپنا تبصرہ گھلو