گرو تے چیلا لالچی ،دونوں دائو دائی

ڈاکٹر رزاق شاہد

انج تے پی ڈی ایم دی تحریک شروع توں ای اتار چڑھائو دی شکار رہی۔ پر پچھلے اجلاس دی ہنگامہ خیزی کجھ زیادہ رہی جنہے اک پاسے اوہدے مستقبل بارے شک شبھے ودھائے تے دوجے پاسے آپس دے گلے شکویاں دی گونج دور تک سنائی دتی۔ خاص کر مریم نواز دے آصف زرداری نال گلے دی بازگشت اجے تک آ رہی اے۔ جدوں زرداری نے لانگ مارچ نوں نوازشریف دی واپسی نال مشروط کردے ہوئے مشورہ دتا کہ جے جنگ لڑنی اے تے پاکستان واپس آنا ہووے گا۔ لڑنا اے تے ساریاں نوں جیل جانا ہووے گا ایہدے تے مریم دا جواب قابل توجہ سی کہ نوازشریف نوں نیب دی حراست وچ مارے جان دا ڈر اے‘ زرداری اوہناں دی زندگی دی ضمانت دین تے اوہ واپس آ سکدے نیں۔ ایہ بازگشت اینی شدید سی کہ ایہدے وچ مولانا دے گلے شکوے دب گئے کیوں جے پی ڈی ایم دے فلاپ ہون دا جناں نقصان مولانا نوں ہووے گا شاید کسے نوں نہیں ہووے گا۔ اجلاس دے بعد میڈیا نال گل بات وچ مولانا دے اندر دا کرب اوہناں دے لہجے توں واضح سی۔ اوہناں دا چہرہ دل دی کیفیت دی چغلی کھا رہیا سی۔ اوہناں میڈیا نال گل بات وچ اختصار توں کم لیا تے مختصر لفظاں وچ چھبی مارچ دے لانگ مارچ دے التواء دا اعلان جس بے دلی نال کیتا اوہدے توں چنگی طرح اندازہ ہو جانا چاہیدا اے کہ اجلاس وچ گلے شکویاں دا ماحول کناں گرم ہووے گا؟ کہ پی ڈی ایم دے وجود تے سوال اٹھن لگے۔ مولانا دی باڈی لینگوئج وی دلی کرب دی گواہ سی۔
ایہدے وچ کوئی شک نہیں کہ مولانا نے جس تندہی توں تحریک نوں لیڈ کیتا ایہ اوہناں دا ای خاصا اے نہیں تے بلاول زرداری یاں مریم نواز دے وَس دی گل نہیں سی۔ پی پی تے ن لیگ نال ہمدردی رکھن والے صحافی ایہناں دوہاں نوں بھٹو تے نوازشریف توں وڈا لیڈر ثابت کرن لئی اڈی چوٹی دا زور لاندے نیں۔ حقیقت دا پتہ ایہناں نوں وی اے کہ ایہناں دوہاں نوں اجے سیاست دے دائو بیچ سکھن لئی ویلا چاہیدا اے۔ ایہ مولانا دا ای کمال اے کہ مشرق و مغرب دا بعد رکھن والی پارٹیاں نوں اک پلیٹ فارم تے لیا کھڑا کیتا اوہ جہڑے اک دوجے دا وجود تک برداشت کرن نوں تیار نہیں سن جہدا گلا آصف زرداری نے کیتا وی کہ اوہناں نے 14 ورھے جیل کٹی۔ ایہ سارے اک پلیٹ فارم تے بظاہر اکٹھے تے وکھائی دتے پر ہن اندرونی اختلافات کھل کے سامنے آ گئے۔ خاص طور تے جدوں جلسے جلوساں نال گل نہ بنی تے پی ڈی ایم دیاں اکثر جماعتاں استعفیاں دا آپشن استعمال کرن نوں بے تاب نظر آئیاں۔ استعفیٰ آپشن پی ڈی ایم دی خام خیالی سی جہدے تے حالیہ اجلاس وچ وی زرداری نے اپنا موقف دہرایا کہ استعفیاں نال پی ڈی ایم کمزور ہووے گی تے حکمراناں نوں تقویت ملے گی۔ گل ٹھیک اے‘ پی ڈی ایم استعفیٰ آپشن نال حکومت گران وچ کدی کامیاب نہیں ہو سکدی۔ اپوزیشن دے کول اکو آئینی راہ اے تے اوہ اے ان ہائوس تبدیلی‘ حقیقت ایہہ وے کہ اپوزیشن دے کول جے اک فیصد چانس وی ہوندا تے پی ٹی آئی نوں کدی حکومت نہ بنان دتی جاندی۔ کسے وی اتحادی نوں توڑ کے مطلوبہ کثریت حاصل ہو سکدی اے پر متبادل کون ہووے گا؟ وڈا سوال ایہہ وے دوہاں وڈیاں جماعتاں اندر توں نہیں چاہندیاں کہ کوئی دوجا حکومت بناوے سگوں کہاوت دے مطابق گرو تے چیلا لالچی‘ دوویں دائو دائی‘ دوویں اک دوجے نوں نیواں وکھان دے چکر وچ نیں۔ بدقسمتی نال دوہاں جماعتاں دی تریجے درجے تک دی قیادت نیب دے شکنجے وچ اے ایس توں ودھ کے نوازشریف اپنے یاں دھی تے زرداری بلاول توں اڈ کسے نوں حکمران نہیں ویکھنا چاہندے۔ پی ٹی آئی دے اندر اقتدار دی منتقلی نہ تے سوکھی اے تے نہ ای دوہاں جماعتاں نوں قابل قبول اے۔
تن مارچ نوں سینٹ انتخاب وچ آصف زرداری ولوں یوسف رضا نوں میدان وچ اتارنا‘ ایسے ان ہائوس تبدیلی ول پیش رفت سی۔ پر زرداری نے وی یوسف رضا گیلانی نوں ہروا کے جتن توں ودھ مفادات حاصل کر لئے نیں جہناں نوں آن والا وقت ثابت کرے گا۔ پی پی ولوں مسترد ووٹاں بارے بار بار ایہ وضاحت کہ نشان سیکرٹری سینٹ توں پچھ کے لائے گئے سن توں ظاہر ہوندا اے کہ ایہ مسترد ووٹ پی پی دے ای سن۔ ظاہر اے ایہناں نوں ضائع کرن دا پیغام سوائے زرداری دے کون دے سکدا اے۔ زرداری دا یوسف رضا دے جتن وچ فائدہ سی یاں ہارن وچ؟ ایہ وقت دسے گا پر حکومت نوں اپوزیشن تے اسٹیبلشمنٹ ولوں پیغام دتا گیا اے کہ حکومتی اتحادیاں سنے آپ پی ٹی آئی وچ وکن والیاں دی کمی نہیں‘ نویں سلیکٹڈ تے ایکشن ری پلے ممکن ہو سکدا اے۔ اپنا قبلہ ٹھیک کر لوو۔٭٭

اپنا تبصرہ گھلو