پنجاب ہائوس وچ پروفیسر ڈاکٹرجنید اکرم لئی ہِرکھ اِکٹھ

پنجابی سیوک، ماہنامہ ’’پنجابی‘‘ دے مدیر تے بزمِ فقیر دے آگو لئی اِکٹھ دا پربندھ پنجابی یونین ولوں کیتا گیا

رپورٹ: قیصر عباس گردیزی

پنجابی یونین دے پربندھ ہیٹھ پنجاب ہائوس لہور وچ اپنی پوری حیاتی ماں بولی پنجابی دے ناں کرن والے ماہنامہ’’ پنجابی‘‘ دے مدیر، جنید اکرم لئی ہِرکھ اِکٹھ ہویا جیہدے وچ پنجابی زبان، ادب تے صحافت نال وابستہ اہم شخصیات نے رَلت کیتی۔

شرکاء نے ایس اِکٹھ وچ پروفیسر جنید اکرم نال گزارے ہوئے ویلے نوں یاد کردیاں اوہناں دی حیاتی دے کجھ اجہے پہلوواں اُتے روشنی پائی جہدے نال اوہناں دی زندہ دلی تے پنجابی زبان نال محبت واضح ہوئی۔صدر پنجابی میڈیا گروپ ندیم رضا آکھیا کہ پروفیسر جنید اکرم نے مادری زبان لئی کم کرن والیاں وچ سبھ توں مشکل کم ’’تحقیق‘‘ اپنے ذمے لیا۔

چیئرمین پنجابی میڈیا گروپ مدثر اقبال بٹ تقریر کرن ویلے اوہناں نال اپنی محبت پاروں آبدیدہ ہو گئے تے آکھیا میرے الفاظ میرا ساتھ نہیں دے رہے کہ میں جنید اکرم جہی درویش ہستی لئی کجھ کہہ سکاں۔ڈاکٹر جنید اکرم دے وڈے بھرا تےہیڈ انفوٹینمنٹ دنیا میڈیا گروپ سہیل احمد(عزیزی) دا کہنا سی کہ اوہناں دے وچھوڑے توں بعد ساہنوں اندازہ ہویا کہ مادری زبان دے کیہڑے انمول ہیرے توں اسیں جدا ہو گئے۔دوجے مقررین وچ معروف شاعر بابا نجمی، ڈی جی پِلاک ڈاکٹر صغریٰ صدف، ڈائریکٹر پنجاب کالج جہلم نوید ملک، چیئرمین سٹینڈرڈ گروپ آف کالجز پروفیسر امان اللہ، ابرار احمد، پروفیسر کلیان سنگھ کلیان، ڈائریکٹر پنجابی کھوج گڑھ اقبال قیصر، شاعر ویر سپاہی، جنید اکرم دے قریبی ساتھی ماہنامہ پکھیرو دے چیف ایڈیٹر اشرف سہیل، چیف ایڈیٹر روزنامہ لوکائی پروفیسر جمیل احمد پال تے مذہبی سکالر طارق شریف زادہ شامل سن۔میزبانی دے فرائض حافظ ممتاز ملک ہوراں انجام دِتے۔تقریب دے اختتام تے شرکاء نے مرحوم دے درجات دی بلندی لئی خصوصی دعا وی کیتی جہدے بعد افطاری دا بندوبست کیتا گیا۔