’’نیا پاکستان اپارٹمنٹس‘‘غریب دے خواب نوں ملی تعبیر

جاوید یونس

اپنے گھر دی خواہش ہر انسان دی ہوندی اے بھانویں اوہ امیر ہوئے یا غریب تاں جے اوہ اپنے خاندان دے نال باعزت طریقے نال اپنی زندگی لنگھا سکے۔ شروع شروع وچ انسان نے اپنے آپ نوں موسماں دی شدت، ہنیری، طوفان، بارش، گرمی و سردی توں محفوظ رکھن لئی غاراں وچ پناہ لئی۔ جویں جویں انسان وچ شعور آئوندا گیا ایس دے رہن سہن دے طریقہ کار وچ تبدیلی آنا شروع ہو گئی۔ غاراں دی تھاں جھونپڑیاں نے لئی فیر جھونپڑیاں توں نکل کے کچے مکان وچ رہنا شروع کر دتا۔ ہن کچے گھراں دی تھاں پکے مکاناں نے لے لئی اے۔ اج دے جدید دور وچ امیراں دے گھر ویکھ کے عقل دنگ رہ جاندی اے پر غریب بندا گھٹ آمدنی دی وجہ نال اَج وی اپنے گھر دی خواہش نال کرائے دے مکاناں وچ رہن اُتے مجبور اے۔ ماضی وچ کئی حکومتاں آئیاں تے غریب بندے نوں اپنے گھر دا جھانسہ دے کے اوہناں دی جمع پونجی توں محروم کر دِتا۔ پاکستان تحریک انصاف دی حکومت نے عام بندے دے زخماں اُتے مرہم رکھیا تے وزیراعظم پاکستان عمران خان نے غریب تے متوسط طبقے لئی 50 لکھ گھر بنائون دا اعلان کیتا تاکہ محروم طبقے دے اپنے گھر دے خواب نوں عملی تعبیر دِتی جائے۔ وزیراعلیٰ پنجاب سردار عثمان بزدار نے وزیراعظم دے ویژن نوں عملی جامہ پہناندے ہوئے لہور وچ موضع بلوکی وچ ایل ڈی اے سٹی نیا پاکستان اپارٹمنٹس دی نینہہ رکھی اے۔ انشاء اللہ اوہ ویلا دور نہیں جدوں عام بندا وی اپنے گھر دا مالک ہوئے گا۔
وزیراعلیٰ پنجاب سردار عثمان بزدار نے موضع بلوکی وچ ایل ڈی اے سٹی نیا پاکستان اپارٹمنٹس دے سنگ بنیاد دے موقعے اُتے اک جملے وچ اپوزیشن دی سیاست دا نچوڑ پیش کر دتا اے۔ سنگ بنیاد رکھدے ہوئے اپنے خطاب وچ وزیراعلیٰ نے کہیا کہ ’’ماضی دے حکمران مزدور لئی گلاں تے اپنے لئے محلات بنائوندے سن‘‘۔ بلاشبہ ماضی وچ حکمراناں نے عوام نوں اَکھراں دے ہیر پھیر نال صرف دھوکہ ِدتا کوئی روٹی، کپڑا، تے مکان دا سبز باغ وکھاندا رہیاکسے نے کاغذاں وچ عوام لئی ’’اپنا مکان‘‘ دا نعرہ لایا تے ہُن اِنج دے ای مالی سکینڈلاں پاروں راہ فرار اختیار کیتے ہوئے نیں۔ ایہہ جمہوریت تے عوام دے ناں اُتے عوام دے نال بوہت وڈا دھوکہ سی۔ ماضی دے حکمراناں دے برعکس تحریک انصاف دے سربراہ عمران خان نے عوام نال وعدہ کیتا سی کہ اوہ ایہناں دے اپنی چھت دے خواب نوں عملی تعبیر دین گے تے ماضی دے حکمراناں ولوں ملکی معیشت نوں قرضیاں تے بحراناں وچ چھڈ کے جان دے باوجود وزیراعظم عمران خان تے ایہناں دی ٹیم اپنے ایس دعوے نوں پورا کرن لئی عملی پیش رفت کر رہی اے۔
وزیراعلیٰ پنجاب عثمان بزدار نوں ایس حوالے نال اولیت دا اعزاز وی ملیا اے۔ سو،اوہناں نے لہور دے علاوہ بلوکی وچ ایل ڈی اے سٹی اپارٹمنٹس دے سنگ بنیاد دی تقریب وچ خطاب دے دوران عوام دا حوصلہ ودھان والی بوہت ساری گلاں کیتیاں۔ اوہناں دا کہنا سی کہ اوہ عوام نال اپنے گھر دی چھت دین دا وعدہ پورا کر رہے نیں تے ایہہ سلسلہ وقت دے نال نال ودھدا چلا جائے گا۔ اوہناں نے درست کہیا کہ غریب بندے لئی اپنے گھر دی خواہش دی شدت دا کوئی اندازہ نہیں کر سکدا۔ موجودہ دور وچ ایہہ محض خواب بن کے رہ گیا اے۔وزیراعظم عمران خان ایس خواب دی تعبیر دے رہے نیں۔ وزیراعلیٰ پنجاب عثمان بزدار نے غریب، مزدور، نکے ملازم تے عام دکاندار لئی اپنے گھر دا ویژن دِتا تے لہور ڈویلپمنٹ اتھارٹی نوں ہدایت کیتی کہ اوہ ایس پراجیکٹ نوں اپنی پہلی ترجیح بنائے۔ اوہناں دی نگرانی وچ ایس منصوبے اُتے وزیراعظم دی ہدایت دی روشنی وچ سب توں پہلے عملدرآمد دا اعزاز صوبہ پنجاب نوں حاصل ہو رہیا اے۔ ہزاراں اپارٹمنٹس تے صرف لہور دے رِنگ روڈ بلوکی انٹرچینج دے کول شروع کیتے گئے نیں،ایس منصوبے دا حصہ نیں جنہاں وچوں چار ہزار پہلے فیز وچ شامل نیں تے اوہناں لئی عوام توں درخواستاں وی طلب کر لئیاںگئیاں نیں۔ عوام دی سہولت لئی صرف 10 فیصد ڈائون پے منٹ تے باقی اینی آسان قسطاں نیں جنہا کوئی ماہانہ کرایہ دے رہیا ہوئے۔ پورے ملک وچ اِنج دی ای سکیماں نوں عملی شکل دین لئی کم جاری اے۔ حکومت دی سنجیدگی دا اندازہ ایس گل توں لایا جا سکدا اے کہ حکومت پنجاب ہائوسنگ اینڈ ٹائون پلاننگ ایجنسی نوں اک ارب فراہم کر چکی اے جس نال مائیکرو فناسنگ کرن والی این جی اوز دے ذریعے گھر بنان لئی 10 لکھ روپئے تیکر قرض دتا جائے گا۔ وزیراعلیٰ عثمان بزدار نے عوام نوں اپنی چھت فراہم کرن دے حوالے نال اپنی جماعت دے وعدے دی تکمیل دی تفصیلات دسی اے اوتھے بجا طور اُتے ماضی دے حکمراناں تے اپنی حکومت دی سوچ دا فرق وی بیان کیتا۔
وزیراعظم پاکستان عمران خان نے تقریب نال خطاب کردے ہوئے حکومت پنجاب، وزیراعلیٰ،وزراء تے مختلف اداریاں نوں خراج تحسین پیش کردے ہوئے کہیا کہ اج اسیں جس مقام اُتے اپڑے آں ایس لئی کافی کم کیتا اے۔ ’’فورکلوژر‘‘ قانون دی منظوری وچ دو سال لگے نیں ایس لئی عدلیہ دا شکریہ ادا کرنا واں جے اوہ مدد نہ کردی تے ایہہ قانون منظور نہ ہوندا۔ کئی سالاں توں ایہہ قانون زیر التواء سی۔ ایس قانون دی منظوری توں بعد بنک ہُن مورگیج دی سہولت دے رہے نیں۔ پاکستان وچ کل آبادی دے 0.2 فیصد حصے نوں مورگیج دی سہولت دِتی جا رہی سی جد کہ مغرب، امریکہ تے دیگر ملکاں وچ ایہہ شرح 80 فیصد توں ودھ اے۔ اوہناں نے کہیا کہ لہور ڈویلپمنٹ اتھارٹی نے خود کار نظام متعارف کرا کے اہم قدم چکیا اے۔ کاروبار وچ آسانیاں لیان لئی ایہہ اقدا م ضروری اے۔ ملک وچ سیمنٹ دی فروخت حالیہ دناں وچ ریکارڈ ساز رہی۔ ایس دا مطلب اے کہ تعمیراتی شعبہ اگے ودھنا شروع ہو چکیا اے۔ تعمیراتی شعبے نال 30 صنعتاں وی جڑیاں ہوئیاں نیں ایس نال شرح نمو وچ وادھا، روزگار دے موقعے تے ملکی دولت وچ وادھا ہوندا اے۔ اللہ تعالیٰ دے فضل و کرم نال وزیراعظم دا 50 لکھ گھراں دا ویژن عملی شکل اختیار کر رہیا اے تے ایہہ ایس وعدے دی تکمیل ول واضح قدم اے۔
ایل ڈی اے تے پاکستان ہائوسنگ ڈویلپمنٹ اتھارٹی دی سانجھ نال موضوع بلوکی لہور وچ ایل ڈی اے سٹی ہائوسنگ سکیم وچ 35 ہزار اپارٹمنٹس بنائے جان گے۔ پہلے فیز وچ 4 ہزار فلیٹ دی تعمیر دے منصوبے دا سنگ بنیاد رکھیا گیا اے۔ اپنی چھت دی خواہش رکھن والے صرف ڈیڑھ سال دی گھٹ مدت وچ اپنے گھر دے مالک ہون گے۔ 2 ہزار اپارٹمنٹس نیا پاکستان ہائوسنگ اتھارٹی دے ذریعے عام شہریاں تے 2 ہزار اپارٹمنٹس حکومت پاکستان، حکومت پنجاب تے ایل ڈی اے دے 50 ہزار توں گھٹ تنخواہ والے ملازماں نوں دِتے جان گے۔ ایس پراجیکٹ نوں جے عوام دوست پراجیکٹ قرار دتا جائے تے غلط نہیں ہوئے گا۔ محض 10 فیصد ڈائون پے منٹ ادا کرنا ہوئے گی۔ 5 سال توں 20 سال تیکر دی مدت وچ قسطاں اداکیتیاں جان گیاں جو کرائے جنی رقم ماہانہ قسط دے طور اُتے ادا کر کے کوئی وی بندا گھر دا مالک بن سکے گا۔ ایل ڈی اے سٹی ہائوسنگ سکیم دا معیار کسے وی اعلیٰ نجی سکیم توں گھٹ نہیں ہوئے گا۔ ایتھے بجلی دا نظام انڈر گرائونڈ ہوئے گا۔ 330 کنال اُتے پارک تے نہر دے دونواں پاسے وی پارک بنائے جان گے۔ مسجد، ماڈل قبرستان، سپورٹس کمپلیکس بنن گے تے بلائنڈ یعنی سپیشل لوکاں لئی کرکٹ سٹیڈیم وی بنے گا۔ لہور ڈویلپمنٹ اتھارٹی اپارٹمنٹس بنن دے بعد وی عمارتاں تے انفرانسٹر کچر دی دیکھ بھال دی ذمہ داری ادا کرے گی۔ صرف ایہو نہیں بلکہ پورے پنجاب وچ گھٹ آمدن والے لوکاں نوں گھر فراہم کرن لئی ہورہائوسنگ پراجیکٹس اُتے وی کم جاری اے۔ پیری اربن لوکاسٹ ہائوسنگ پراجیکٹ دے تحت صوبہ دی ساری تحصیلاں وچ 133 تھاواں دی نشاندہی کیتی گئی اے۔ پہلے مرحلے وچ پنجاب دی 32 تحصلیاں وچ گھٹ آمدن والے لوکاں لئی 10 ہزار توں ودھ گھر بنائے جا رہے نیں جتھے لکھاں روپئے مالیت دی 3 مرلہ اراضی صرف 30 ہزار روپئے وچ دتی گئی اے تے حکومت پاکستان ہر گھر لئی 3 لکھ روپئے سبسڈی تے گھٹ سود اُتے قرضہ فراہم کرے گی۔ ایس طرح 14 لکھ روپئے مالیت دا گھر صرف 11 لکھ روپئے وچ 10 سال وچ 10 ہزار روپئے ماہانہ قسط اُتے ملے گا۔ صوبائی کابینہ ایس پراجیکٹ لئی انفراسٹرکچر وغیرہ بنان لئی 3 ارب روپئے دی منظوری دے چکی اے۔ وزیراعلیٰ عثمان بزدار نے کہیا کہ حکومت پنجاب ہائوسنگ اینڈ ٹائون پلاننگ ایجنسی (PHATA) نوں اک ارب روپئے فراہم کر چکی اے جس نال مائیکروفنانسنگ کرن والی این جی اوز دے ذریعے گھر بنائون لئی 10 لکھ روپئے تیکر قرض دتا جائے گا۔ اوہ لوک جیہڑے انتہائی محدود آمدنی وچ وی اپنے گھر،اپنی چھت دا سوچ کے آہ بھر کے رہ جاندے سن۔ انشاء اللہ جلدی اپنے گھر دے مالک ہون گے۔ میرا پاکستان میرا گھر اِنج دا ویژن اے جس دے تحت نہ صرف لکھاں خاندان اپنے گھر دے خواب نوں پورا کر سکن گے بلکہ لکھاں ہنر منداں لئی روزگار دے موقعے وی پیدا ہون گے تے متعلقہ صنعتاں وی فروغ پان گیاں۔ میں پورے اعتماد دے نال ایہہ گل کہہ سکنا واں کہ اسیں اپنے وعدے دی تکمیل وَل پیڈے پیر ودھا چکے آں۔ انشاء اللہ ہر وعدہ نبھاواں گے تے حقیقی ترقی و خوشحالی لیاواں گے۔ تقریب وچ وزراء، ارکان اسمبلی، متعلقہ حکام تے ہور لوک شریک سن۔
نیا پاکستان اپارٹمنٹس دی نمایاں خصوصیت ایہہ وے کہ بلاکس وچ 60 فیصد توں ودھ تھاں سڑکاں، گرین بیلٹس، پارکس تے فٹ پاتھ لئی رکھی گئی اے۔ ایتھے دے مکیناں نوں شہر دے دُوجے علاقیاں وچ آن جان لئی ماس ٹرانزٹ سسٹم تیکر آسان رسائی ہوئے گی۔ ایسے طرح شہریاں نوں صحت مندانہ سرگرمیاں دی سہولتاں فراہم کرن لئی کمیونٹی، جم تے ہیلتھ فٹنس کلب تعمیر کیتے جان گے۔ ایس دے علاوہ گڈیاں پارک کرن لئی ہر اپارٹمنٹ لئی علیحدہ پارکنگ سسٹم ہوئے گا۔ مکیناں دی سہولت لئی کمرشل ایریا وی بنایا جائے گا تاں جے ایہناں نوں اشیاء ضروریہ دی خریداری لئی دوجے علاقیاں دا رُخ نہ کرنا پئے جد کہ ڈویلپڈ ایریا وچ نکے کاروبار لئی سہولتاں میسر ہون گیاں۔ ایتھے دے مکیناں نوں تعلیم تے علاج معالجہ دی سہولتاں دی فراہمی لئی ڈسپنسریاں تے کمیونٹی سکول بنائے جان گے۔ ایس دی سب توں وڈی خوبی ایہہ ہوئے گی کہ ایتھے بجلی دا نظام زیر زمین ہوئے گا جیہڑا ایس ہائوسنگ سٹی دی خوبصورتی وچ وادھا کرے گی۔ سب توں اہم ایہہ کہ بارشی پانی ذخیرہ کرن لئی واٹر ٹینکس تعمیر کیتے جان گے تے ایس پانی نوں مختلف مقاصد لئی استعمال وچ لیایا جا سکے گا۔ ایسے طرح ایہناں اپارٹمنٹس دی تعمیر نوں قابل عمل منصوبہ بنان لئی قابل عمل فنانشل ماڈل دی منظوری وی دتی گئی اے۔ ایہہ پراجیکٹ بغیر نفع/ نقصان دی بنیاد اُتے شروع کیتا گیا اے۔ اک اپارٹمنٹ دی قیمت تقریباً 27 لکھ روپئے ہوئے گی تے ایس دی بکنگ صرف 10 فیصد ڈائون پے منٹ اُتے کروائی جا سکے گی۔ اپارٹمنٹ دی باقی قیمت دی ادائیگی قسطاں وچ جمع کرائی جا سکے گی۔ اپارٹمنٹ دا قبضہ صرف ڈیڑھ سال دی مختصر مدت وچ الاٹی نوں دے دتا جائے گا۔ لوکاں دی سہولت لئی قسطاں دی ادائیگی قبضہ ملن توں بعد شروع ہوئے گی۔ اپارٹمنٹس دی الاٹمنٹ بذریعہ کمپیوٹرائزڈ قرعہ اندازی کیتی جائے گی۔ قرعہ اندازی وچ کامیاب ہون والیاں نوں بنک آف پنجاب یا ایس دے مقررہ کردہ بنک توں لیٹر آف کمفرٹ حاصل کرنا ہوئے گا۔
لہور ڈویلپمنٹ اتھارٹی دے وائس چیئر مین ایس ایم عمران نے ایل ڈی اے سٹی نیا پاکستان اپارٹمنٹس منصوبے دے سنگ بنیاد رکھن دی تقریب دے موقعے اُتے کہیا کہ ایہہ اک اِنج دا عظیم الشان منصوبہ اے جس دا خواب وزیراعظم پاکستان عمران خان نے الیکشن توں پہلے ویکھیا سی تے ایس دی عملی تعبیر ساہنوں ساریاں نوں نظر آ رہی اے۔ عمران خان نے سانوں خواب ویکھنا وی سکھایا تے خواب دی تکمیل کرنا وی سکھایا۔ وزیراعظم پاکستان عمران خان نے ایل ڈی اے سٹی نیا پاکستان اپارٹمنٹس منصوبے دا سنگ بنیاد رکھ دتا اے جس اُتے اسیں ایہناں دے تے وزیراعلیٰ پنجاب سردار عثمان بزدار دے ڈھونگے منوں مشکور آں۔
وزیراعظم پاکستان عمران خان تے وزیراعلیٰ پنجاب سردار عثمان بزدار نے سرگودھا وچ پرائم منسٹر افورڈ ایبل ہائوسنگ پراجیکٹ دا سنگ بنیاد رکھ دتا اے۔ پرائم منسٹر افورڈ ایبل ہائوسنگ پراجیکٹ دے تحت 133 مقامات اُتے تن تن مرلے دے گھر بنائے جان گے پہلے فیز وچ پنجاب دے مختلف شہراں وچ 32 مقامات اُتے 10 ہزار گھر بنائے جان گے۔ پرائم منسٹر افورڈ ایبل ہائوسنگ پراجیکٹ دے تحت ہر گھر دی مجموعی لاگت 14 لکھ روپئے اے۔ وزیراعلیٰ پنجاب سردار عثمان بزدار نے کہیا کہ ’’اپنا گھر اپنی چھت‘‘ وعدے دی تکمیل ول ٹھوس قدم ودھا چکے آں۔ لکھاں خاندان اپنے گھر دے خواب دی تعبیر ویکھ سکن گے۔