دردِ ڈسکہ

لكهت:صوفیہ بیدار

پی ڈی ایم دے گھٹ ہوندے بخار وچ ’’دردڈسکہ‘‘ نے فیر ٹیکا لا دتا مولانا فضل الرحمن نے اعلان کیتا اے ’’کوئی روک سکے تے روک لوے‘ میں تے اپنے ساجن دے… معاف کرنا اچکزئی کے ساتھ چلا رے‘‘ عید دے بعد ایس لئی کہیا کہ پاکستان وچ سارے کم عید توں پہلاں یاں عید دے بعد رکھے جاندے نیں۔ پردیسی عید توں پہلاں آئوندے نیں۔ ویاہ تے سارے عید نال مشروط نیں میں اج تک کوئی کوئی ایسا ویاہ نہیں ویکھیا جہدے وچ عید توں پہلاں یاں عید دے بعد دی تریخ نہ ہووے۔
شاعری تے تصوف دے مضمون وی مسافرت نال مربوط نیں ’’میں وی جھوک رانجھن دی جانا نال میرے کوئی چلے‘‘ چلی رے چلی رے میں تو دیس پیا کے چلی رے‘ لتا نے وی گھٹ نہیں گایا ’’جس پتھ پہ چلا اس پتھ پہ مجھے ساتھ تو آنے دے‘‘ پر ایہ سارے راہ اختیار دی منزل ول ای جاندے نیں جہدے تے سارے نسدے چلے جاندے نیں۔ ساڈے ایتھے ایس منزل نوں اسلام آباد کہندے نیں جہدے توں ودھ بور تھاں میں تے اپنی حیاتی وچ نہیں ویکھی اسیں میلے ٹھیلے والے لہوریئے اسلام آباد دی خشک بے رنگ غیرمطلق سرد مہر فضا وچ جاندے ای گھبرا جاندے نیں۔ ’’اختیار‘‘ واقعی سرد مہر ہوندا اے بے اختیاری دی پالکی وی جتھے جا کے جم جاندی اے۔ اسلام آباد دی بااختیار دفتری فضاواں وچ جو کمی اے اوہ راوی دے ’’کنڈھے‘‘ رہندے لہور وچ پوری ہوندی اے۔ آخر دل نے ایہو نتیجہ کڈھیا سی تے اسیں اسلام آباد توں واپس دوڑ لائی۔ جواز ایہ سی کہ ایہ شہر نہیں… تے فیر شہر کیہو جہے ہوندے نیں سوال کیتا گیا… اساں کہیا شہر تے دریاواں دے کنڈھے ہوندے نیں ساڈا ایتھے ساہ نہیں نکلدا‘ پر جہناں نوں ساہ جعلی اختیار وچ آئوندا اے اوہ ایہ گل کیہ سمجھن گے اوہناں نوں تے ایس گل دی وی سمجھ نہیں آوے گی کہ سردیاں دیاں راتاں وچ گلیاں وچ سیٹی وجاندے خالی جیب منڈیاں نوں کیہ مزا آئوندا اے جو ساری زندگی رشوت نال بھرے بھڑولیاں وچ نہیں ملدا۔
عمران خان دے چاہن والیاں تے سانوں اعتراض نہیں اوہناں دے اپنے محبوب لیڈر لئی کوئی دلیل نہ لبھن اُتے اے ایناں عشق اے تے دلیل وی محنت کرکے لبھ لینی چاہیدی اے۔ گالھاں تے سب توں سوکھا تے سستا طریقہ اے جہناں نوں سچ مچ عمران نال محبت اے محنت کرکے ادب معاشرے فوک تے عقل نال دلیلاں دین اینی گل تے خان صاحب وی سمجھن لگ پئے نیں اوہناں نوں بطور کھڈاری ہمیشہ پسند کیتا اے پر کل نوں اوہ گانے دی ضد کرن تے خان صاحبان اوہناں نوں صرف خان لان نال ایہدی اجازت نہیں دین گے چنگا بندا ہور ہوندا اے تے چنگا سرجن تے اسیں کدی وی اپنا اپریشن صرف نیکی دے نعرے لان والے اوہناں نوں کوالیفائیڈ ڈاکٹر توں نہیں کران گے اعلیٰ سرجن بھاویں اوہ زبان دا بھیڑا ای ہووے اوہدے سامنے پھٹ رکھاں گے۔ فارسی دی کہاوت اے ’’ہر کسے راگا رکاختند‘‘ ہر کوئی اپنے کم لئی بنیا اے اسیں کیوں جے کرپٹ قوم آں ساڈی ونڈو خراب ہو چکی اے کوئی سدھی گل ساڈی سمجھ وچ نہیں آئوندی ایس لئی سانوں ساڈے خدوخال دے مطابق اقتصادیات کرن والا آڑھتی ٹائپ بندا چاہیدا اے اساں انگریزی کیہ کرنی اے نوازشریف نے چٹ پڑھ لئی تے کیہ ہویا او ہاک اجہی قوم دے نمائندہ نیں جتھے سارے بوٹی چلا کے پاس ہوندے نیں۔ رقعے ’’بوٹیاں‘‘ چٹاں تے ہر چھت‘ ہر گلی وچ چلدیاں نیں اسیں کوئی ٹرمپ ورگے ایڈیٹ توں ڈرنے آں اوہنوں کہڑی ساڈی زبان آئوندی اے یاں اوہ سکھنا چاہندا اے جنیاں وی کمیاں نیں ساڈے ایتھے اعتماد دی کمی نہیں ہونی چاہیدی ایہ نہیں ہو سکدا کہ اسیں تے چولاں ماریئے تے ساڈا منتخب کردہ لیڈر سینٹ ہووے بس سسٹم نوں سمجھن والا ہونا چاہیدا اے انج میں سوچنی آں کہ جے میں اک دو دن لئی پی ٹی آئی وچ ٹر جاواں تے خان صاحب دے حق وچ باقاعدہ پندراں ویہہ ٹھوس دلیلاں گھڑ سکنی آں پر اوہناں دے چاہن والے بس گالھاں تے گزارا کردے نیں۔ میں گالھاں دین والے توں ودھ بے بس انسان کدی نہیں ویکھیا۔ خالی ذہن‘ خالی ہتھ‘ کنگلا تے بے کار دلیل توں عاری کاش خان صاحب اجہی حمایت توں دستبردار ہو جان جو زہر قاتل اے‘ دھبہ اے۔
نوشین افتخار دے سوا لکھ ووٹاں دے ’’شگن‘‘ نے شفافیت دے انج ای بھرم کھول دتے ہن دھاندلی کہوو یاں دھاندلا (بقول خان صاحب) ٹرک تے چڑھن دی لوڑ نہیں ہوندی چھکا واپس منہ تے لگدا اے اک ای کریڈٹ لین والے شفافیت دے علمبرداراں دے رخ روشن تے‘ جس طرح پوری قوم نے طے کر لیا اے کہ اسیں گھٹ عمر آں تے سامنے والا بڈھا‘ ایس طرح خان صاحب نے وژن دتا کہ اسیں شفاف آں صرف باقی سب کرپٹ‘ کرپشن دا لفظ ایناں دہرایا کہ ہلکے ذہن والیاں دی واحد دلیل بن گیا جدوں پچھن کہڑی کرپشن تے دلیل توں پلا چھڑاندے نس جاندے نیں۔ بس کرپشن… بھئی پھڑ لوو… کمزور مقدمے کیوں بناندے او‘ میرٹ توں ہٹ کے فیصلہ ساز تعیناتی کیوں کردے او‘ مقدمے نبیڑو‘ سزاواں دیو تے ختم کرو … اداسی بار بار لکھدے رہن نال اداسی Creat نہیں ہو جاندی کرپشن دا راگ الاپن نال پراپیگنڈا دے تقاضے پورے ہوندے نیں صرف دلیل دے نہیں… تے ہن ’’دردِ ڈسکہ‘‘ شفاف لوکاں دے ’’گٹیاں‘‘ وچ درد بن کے بہہ جاوے گا ہمیشہ دی دلیل بن کے۔٭٭