شیخ دین محمد پبلک لائبریری شیرانوالہ باغ نوں قبضہ گیراں توں بچایا جائے

عتیق انور راجہ

سین گجر دا فون آیا راجہ صاحب کدھر او، تسیں کسے سیاسی راہنما نال ملنا اے۔ میں عرض کیتا جناب میں تے ہر ویلے آپ دے نال ای رہنا واں پر سیاسی راہنمائواں نال ملن دا مینوں کجھ خاص شوق نہیں۔ تسیں جس نال چاہو ملدے رہو پر مینوں نہیں ملنا کسے نال۔ میں عرض کردا چلاں کہ مینوں سیاست نال بوہت دلچسپی اے تے میرا خواب اے کہ ملک وچ سیاست دان اینے میچور ہو جان کہ کسے صورت سی ساڈے عوامی نمائندیاں نوں وطن چھڈن تے جیلاں دی سیر نوں نہ جانا پئے۔ ایس حوالے نال بوہت کجھ لکھیا اے تے بوہت کجھ لکھیا جا سکدا اے پر ایتھے اینا ای کہواں گا کہ جدوں ساڈے سیاست دان پارلیمنٹ نوں عزت دین گے تے ایہناں دی قدر خود بخود ودھ جائے گی یعنی ہر مسئلے اُتے ایسے فورم اُتے گل کرن۔ خیر یٰسین گجر نال ملاقات ہوئی تے اوہناں نے دسیا کہ رضوان اسلم بٹ دے سیکرٹری سبحان سعید بٹ نال خواجہ شجاع اللہ صاحب دی اک بوہت اہم ملاقات لیپاری ہوٹل وچ منعقد ہوئی اے جس وچ خواجہ شجاع اللہ صاحب نے عوامی نمائندے نال عوامی مسئلیاں نوں حل کرن نوں کہیا کہ خواجہ شجاع اللہ دے بارے وچ شہر دے اکثر لوک ایہہ جان دے نیں کہ خواجہ صاحب ہر طرح دا سیاسی شعور رکھن دے باوجود سیاست وچ دلچسپی بوہت گھٹ لیندے نظر آندے نیں پر خواجہ صاحب دا کمال ایہہ وے کہ اوہ بوہت سارے تعلیمی اداریاں، ہسپتالاں، پولیس تے دارالامان جہے اداریاں نال مسلسل تعاون دا سلسلہ جاری رکھدے نیں۔ خواجہ شجاع اللہ صاحب دی اک گل جیہڑی مینوں چنگی لگدی اے اوہ ایہہ کہ خواجہ صاحب اج دے دور وچ کتاباں خریددے نیں تے فیر پارسل بنابنا کے دوستاں تے اداریاں نوں گھلدے رہندے نیں۔ کتاباں دا ذکر چلیا تے ایتھے دسدا چلاں کہ مینوں کسے کم نال چار پنج مہینے پہلے شیرانوالہ باغ شیخ دین محمد پبلک لائبریری جان دا اتفاق ہویا سی، لائبریری دی حالت زار ویکھ اسیں اوتھے مسلسل ادبی بیٹھکاں دا اہتمام کیتا تے فیر خواجہ شجاع اللہ صاحب دے مالی تعاون نال چھتاں دی صفائی، پرنالیاں دی مرمت تے قریب 20 سال بعد لائبریری دی عمارت نوں رنگ وی کروایا جا چکیا اے۔ ( ہن جد کہ لائبریری دی حالت بوہت بہتر ہو چکی اے تے سنن وچ آیا اے کہ کوئی بندہ حکومتی لوکاں نال مل کے ایس لائبریری اُتے قبضہ کرن دی کوشش وچ اے) خواجہ صاحب نال ساڈی اکثر ملاقاتاں رہندیاں نیں تے ساڈی ہر ملاقات وچ گل بات دا حاصل ایہو ہوندا اے کہ شیری مسائل نوں کنج کم کروایا جا سکدا اے۔ کدی اسیں کسے انتظامی نمائندے نال جا ملنے آں تے کدی اسیں کسے کالم دی صورت وچ حکام دی توجہ مسائل ول دلوان دی کوشش کرنے آں۔ یٰسین گجر نے دسیا کہ دوران ملاقات خواجہ صاحب نے دسیا کہ شہر دے وڈے قبرستان دی حالت زار اُتے توجہ دین دی بوہت لوڑ اے۔ وڈے قبرستان وچ صفائی تے روشنی دا انتظام نہ ہون نال شہریاں نوں اکثر پریشانی دا ساہمنا کرنا پیندا اے۔ ایس توں بعد شیر دے دل شیرانوالہ باغ و چ خواتین پارک وچ لگے جھولیاں دے بارے وی فکر دا اظہار کیتا گیا۔ شہر دے مرکز وچ شیرانوالہ باغ شہریاں لئی اک نعمت توں گھٹ نہیں ۔ اکثر دن نوں تے شام دے ویلے خواتین بچے پارک وچ سیر نوں آ جاندے نیں پر کجھ انتظامیہ دی لاپروائی تے کجھ عوام دی عدم دلچسپی نال اوتھے لگے جھولے استعمال دے قابل نہیں رہے۔ ایہناں جھولیاں دی مرمت یا نویں جھولیاں دی تنصیب اینا وڈا خرچے والا کم نہیں بس لوڑ اے تے اینی کہ عوامی نمائندے ایس پاسے تھوڑی دل نال توجہ دین دی کوشش کرن۔ شیرانوالہ باغ دے نال وگن والے بڑے نالے دی گل کریئے تے انج محسوس ہوندا اے کہ جویں سالاں توں ایس نالے دی صفائی نہیں کروائی گئی۔ جدوں بارش ہوندی اے نالے دا گندہ پانی سڑکاں اُتے اُبلن لگدا اے تے شہریاں لئی پریشانی دا سبب بن جاندا اے۔
صاحبو! اج مینوں اک مدت بعد سکول وچ جمہوریت دے بارے پڑھے بنیادی نقاط یاد آ رہے نیں۔ مینوں یاد اے کہ سکول دی کسے کتاب وچ لکھیا سی جمہوریت دا مطلب اے عوام دی نمائندہ حکومت جس دا مقصد عوامی فلاح دے کم کرنا ہوئے پر جویں جویں عقل و شعور دے رستے اُتے سفر کیتا ایہہ نقطہ متضاد صورت وچ سامنے آندا چلا گیا۔ یعنی اسیں ویکھیا کہ بے شک جمہوری نمائندے عوامی ووٹ نال ای اقتدار نشیں ہوندے رہے، پر ستم ظریفی ایہہ رہی کہ منتخب ہون دے بعد اوہناں نے اپنے تے عوام دے وچکار اینے فاصلے پیدا کر لئے کہ انج لگن لگیا کہ جویں ساڈے سیاسی قائدین ساڈے وچوں بلکل وی نہیں۔ کسے اک سیاسی پارٹی دی گل نہیں بلکہ جس جس نے اپنی پارٹی کھڑی کیتی اوہ اپنی پارٹی دا مختار کل بن بیٹھا۔ ایہناں پارٹی راہنمائواں نے عوام تے اک پاسے اپنے سیاسی نمائندیاں نوں وی ملاقات لئی وقت دین توں انکار کر دتا۔ عوامی مسائل دے ناں اُتے ساڈے سیاست داناں نے پوری دنیا دے ملکاں وچ مال و دولت دے انبار لا لئے۔ اپنا کاروبار اپنی اولاد دوجے ملکاں منتقل کر دتی تے خود صرف ساڈے اُتے حکومت کرن تے مزید مال و دولت دے حصول لئی ساڈی راہنمائی لئی سبز باغ وکھان دا سلسلہ جاری رکھیا۔ کہندے نیں ویلا بدل جاندا اے تے کجھ انج ای ایہناں سیاست داناں دے نال وی ہویا تے ویلا بدل گیا۔تیجی قوت دی صورت پی ٹی آئی جماعت ساہمنے آئی تے لوکاں نے ایس امید دے نال خان صاحب نوں ووٹ دتے کہ چلو کسے نویں بندے نوں ازما کے ویکھ لیندے آں۔ مینوں یاد اے پچھلے سال وزیراعلیٰ ہائوس وچ جناب عثمان بزدار نال کالمنگاراں دی اک میٹنگ وچ ملک دے اک سینئر کالم نگار نے میرے توں پچھیا سی راجہ صاحب گوجرانوالہ وچ پی ٹی آئی دا کیہ مستقبل اے میں فوری جواب دتا کہ جے ہجے الیکشن ہون تے دو تن سیٹاں دے علاوہ نون لیگ فیر بازی لے جا سکدی اے۔ ایس دی وجہ؟ وجہ ایہہ وے کہ جناب گوجرانوالہ وچ پی ٹی آئی نے جنہاں لوکاں نوں نمائندہ بنایا ہویا اے ایہناں وچوں اکثریت عوام نال صرف الیکشن دے دناں ای ملدی اے باقی ویلا ایہناں نال عوام دا رابطہ ہونا ناممکن جہی گل اے ۔ فیر ایس سینئر کالم نگار نے میرے توں پچھیا ایہہ رضوان اسلم بٹ خود نوں عوامی ایم پی اے لکھدا اے ایس دے بارے کیہ خبراں نیں؟ رضوان اسلم بٹ نال میری کوئی ملاقات نہیں پر ایس دے بارے کہیا جاندا اے کہ ایہہ بندہ روز سویرے اپنی بیٹھک وچ بیٹھ دا اے۔ عوام نال ملدا اے کسے بندے دا کوئی کم ہوئے ایس دے نال ٹُر پیندا اے۔ عوامی مسئلیاںنوں حل کروان لئی ہر ویلے متحرک رہندا اے۔ ہن ویکھنے آں کہ خواجہ شجاع اللہ صاحب دے کہن اُتے کدوں تیکر شہر دے مذکورہ مسائل حل کروان دی کوشش کیتی جاندی اے۔ رضوان اسلم بٹ اک متحرک سیاسی راہنما اے کیوں جے ایہناں دی رہائش شہر دے مرکز وچ اے۔ شیرانوالہ باغ دے نیڑے توں ایہناں دا گزر اکثر ہوندا ہوئے گا اسیں امید کر سکنے آں کہ اوہ تھوڑی توجہ نال نہ صرف باغ دے مسئلے حل کروان گے بلکہ باغ وچ موجود لائبری دا دورہ کر کے ایہنوں قابضین توں بچاندے ہوئے خواجہ شجاع اللہ جہے عوامی بندے دے زیر سایہ کروان دی وی کوشش کرن گے تاں جے شہر دا قیمتی ورثہ باقی رہوے تے ایس دی دیکھ بھال بہتر توں بہترین انداز وچ ہوندی رہوے۔ سابق ڈپٹی کمشنر سہیل اشرف دی کوششاں نال شیرانوالہ باغ دے ساہمنے ای باغ فرحت بنایا گیا سی۔ اک دو وار شام دے ویلے اوتھے جان دا اتفاق ہویا تے احساس ہویا کہ اوتھے اک پاسے روشنی دا معقول انتظام نہ ہون دی وجہ نال شام دے سائے ڈھلدے ای نشئی آ جاندے نیں جس دے نتیجے وچ فیمیلز باغ ول آن توں کتراندیاں نیں۔ تے دوجے پاسے باغ دے باہر ٹیکسی سٹینڈ بن چکیا اے ، جے عوامی ایم پی اے صاحب تھوڑی کوشش کرن تے باغ وچ روشنی دا بہتر انتظام، باغ دے باہر توں ٹیکسی سٹینڈ دا خاتمہ تے باغ وچوں کسے ملٹی نیشنل کمپنی دے اشتراک نال اک کینٹین بنوا دیو جس دے ذمہ دار باغ دی صفائی ستھرائی تے دیکھ بھال ہوئے تے عوامی ایم پی اے ولوں باغ فرحت گوجرانوالہ دے شہریاں لئی اک نعمت ثابت ہو سکدا اے۔ اسیں شاعر تے کالم نگار امید اُتے جینے آں ساڈا کم لوکاں دی امید جوان رکھنا ہوندا اے ۔ ساڈا کم مسلیاں ول توجہ دلوانا ہوندا اے ہن ویکھنا ایہہ وے کہ رضوان اسلم بٹ صاحب شیخ دین محمد پبلک لائبریری شیرانوالہ باغ تے باغ فرحت دا دورہ کدوں کردے نیں تے کدوں ایہہ خوشخبری سناندے نیں کہ شیخ دین محمد پبلک لائبریری دی کمیٹی دا سربراہ خواجہ شجاع اللہ صاحب یا ایہناں جہیا کتاب دوست بندہ بن دا اے۔