تن ورھے قید تے ڈھیر سارے لِتر
لکھت:ایثار رانا
اسیں تے سنیا سی ماواں سب دی سانجھی ہوندیاں نیں پر ہن احساس ہویا سیاست وچ پیو وی سانجھا ہوندا اے۔ جمہوریت دے استحکام لئی ضروری اے کہ پھڈیاں توں بچیا جاوے گھٹ توں گھٹ سیاسی جماعتاں ایناں تے سمجھ گئیاں نیں۔ میرے توں ودھ خوشی اپنے وڈے میاں صاحب اُتے اے جہناں نے ووٹ نوں اک واری فیر عزت دتی، جمہوریت دی شاہراہ دی ہرنکر تے اک یوٹرن ضرور آندا اے۔ ایہ وکھری گل اے کہ ساڈے خان صاحب دے سفر وچ یوٹرن زیادہ ای آندے نیں۔ سنتا سنگھ رات نوں قبرستان موٹرسائیکل چلاندا رہیا۔ صبح اپنے دوست نوں بولیا یار رات سڑک تے بہت سپیڈ بریکر سی۔ سیاست دے ہنیرے وچ بھلا کجھ نظر آندا اے۔ اقتدار تے انج ای انھا کر دیندا اے۔ فیر سپیڈ بریکر کیہ تے یوٹرن کیہ۔ انج وی نچنا تے گھنڈ وی کڈھنا ممکن نہیں۔ تسیں ویکھو گے آرمی ایکٹ وچ ترمیم دی منظوری دے بعد خان صاحب شیر توں ببر شیر بن جان گے۔ ترمیم تے حریم نے تے سب نوں اک حمام وچ اکٹھا کر دتا بندہ حریم توں بچ سکدا اے ترمیم توں نہیں۔ اسیں تے شروع توں رولا پا رہے آں ساڈی سیاسی جماعتاں تے سیاسی قیادت اک پیج تے رہنا پسند کردیاں نیں۔ بس اک پیج تے کدی کسے دا ناں پہلاں آ جاندا اے کدی کسے دا۔ جہدا ناں اُتے آ جاوے اوہ بلھے دی ہوا وچ چہچہاندے پکاردا اے پھائی پھائی زور دی جد کہ تھلے رہ جان والے کھیڈاں گے نہ کھڈاواں گے وچ پھسوڑی پاواں گے، ذوق تے شوق نال گنگناندے نیں۔ سنتا سنگھ نوں بزرگ ملے، بولے بول کیہ منگدا، سنتا بولیا دولت، بزرگ نے پہاڑ ول انگلی کیتی اوہ سونے دا بن گیا۔ سنتا سنگھ بزرگ دے پچھے پچھے اوہ بولے ہن ہور کیہ چاہنا اے۔ سنتا بولیا ہور سونا، اوہناں نے آلے دوالے دے پہاڑاں تے انگلی کیتی سب سونے دے بن گئے۔ بزرگ چل پئے سنتا سنگھ فیر پچھے پچھے اوہ غصے نال بولے ہن کیہ چاہنا اے۔ سنتا سنگھ بولیا تہاڈی انگل۔ قناعت ساڈے مزاج دا حصہ اے نہ ساڈی قیادت دے ایہو وجہ اے کہ اسیں اپنے آلے دوالے کھلریاں نعمتاں نوں چھڈ کے انگل دی کھوج وچ رہنے آں۔ قیادت دے آلے دوالے سونے ورگی عزت ، سونے ورگی شہرت سونے ورگی عظمت سونے ورگے کارکن ہوندے نیں پر اوہ ہمیشہ انگل دی کھوج وچ لور لور پھردے کھبے سجے ہو جاندے نیں تے فیر ویلا پیندا اے تے سونا ملدا اے تے نہ انگل۔ ساڈے خان صاحب بہت خوش قسمت نیں سونے ورگی کابینہ ملی اے اک توں اک وڈا سونے دا پہاڑ اے۔ ساڈے میاں صاحب تے خیر آلو گوشت دے شوقین ہے ای سن وزیراعظم عمران خان وی ترمیم دے علاوہ آلو فیر گوشت دے حوالے نال میاں صاحب دے نال اک پیج تے نیں۔ ایہناں دا ایہ گلہ بجا اے جو اوہناں نے اسد عمر نوں کیتا کہ اینے مزیدار آلو گوشت تے وزیراعظم ہاؤس وچ وی نہیں پکدا، ساڈی اپنے محبوب قائد توں التماس اے کہ اوہ ایس ملک دا نظام تے نصیب تے نہ بدل سکے برائے کرم وزیراعظم ہاؤس دا باورچی ضرور بدل دین جو خالص سچے تے کھرے سرکاری مال توں وی چنگا آلو گوشت نہ پکا سکیا۔
میرے سب توں پیارے فواد چوہدری اج کل بہت دھیمے انداز وچ سلجھیاں سلجھیاں گلاں کر رہے نیں، پر ایہناں دیاں گلاں دے وچوں وچ مطلب تے غور کرو تے سمجھ آندی اے کہ اوہ ایس نظام نوں بچان لئی دراصل بچ موڑ توں کہہ رے نیں، کیہ فائدہ انقلاب دے چکر وچ تہاڈے کن تھلے وج جاوے۔ عقلمند نوں اشارہ تے فواد چوہدری دی حکمت بھری گلاں دا سہارا کافی، سواری اپنے سامان دی آپ حفاظت کرے تے چنگا اے۔ سنتا سنگھ دی محبوبہ بولیاںتسیں میرے نال محبت کردے او تے میری پرواہ کیوں نہیں کردے، سنتا سنگھ بولیا پاگل محبت کرن والے کسے دی پرواہ نہیں کردے۔ میرا یقین اے کہ ساڈی قیادت ساڈے توں سنتاسنگھ نال گھٹ محبت نہیں کردی۔ میں اپنی زندگی وچ اینی مہنگائی بے برکتی نہیں ویکھی۔ کدی اک سو روپے کئی ہزار لگدے سن۔ ہن تے شادی تے ہزار دی سلامی دیندیاں بندہ ایویں شرمندہ شرمندہ محسوس کردا اے۔ ہزار سلامی دیندے لاڑے نوں انج نیویں نظر نال لفافہ پھڑاندا اے ، جیویں اوہدا کانا ہووے۔ دادا جی بنتا سنگھ توں بولے پترا کدی اسیں دس روپے لے کے جانے ساں تے دکان توں شاپراں وچ سامان بھر لیانے ساں، بنتا سنگھ بولیا باپو ہن مشکل اے، دکاناں تے سی سی ٹی وی کیمرے لگ گئے نیں۔ روپیہ انج ٹکا ٹوکری ہووے گا کدی سوچیا نہیں سی۔ پر ایہ تہاڈے توں درخواست اے وزیراعظم دی گلاں تے نہ جاؤ اسیں گھبرانا وی اے تے شرمانا وی نہیں اے۔
تیجی عالمی جنگ اپنے بوہے تے دستک دے رہی اے۔ مینوں لگدا اے ایہ چن گرہن صرف تے صرف مسلماناں تے بھاری ہووے گا۔ دنیا تے ایس ویلے انتہا پسنداں دی حکومت اے امریکہ اسرائیل ، روس، انڈیا، بنگلہ دیش، سعودی عرب، شام، مصر، افغانستان سب تھاواں اک خاص مائنڈ سیٹ دی حکومت اے تے ساڈی تے ہر گڈی تے لکھیا ہوندا اے ضد نہ کر سوہنیا اسیں تے آپ بہت ضدی آں۔ بیت المقدس اسرائیل دا مستقل حصہ ہو چکیا۔ سری نگر کشمیر بھارت ہڑپ کر چکیا، لگدا اے کہ ہن ایران یاں پاکستان دی واری اے۔ مصر تباہ، لیبیا تباہ، شام تباہ، افغانستان تباہ، ہن تباہی کسے ہور بوہے تک دستک دے رہی اے۔ مائیک پومپیو نے ایسے انداز وچ جنرل باجوہ نوں فون کیتا ہووے جیویں کولن پال نے مشرف نوں کیتا سی۔ اصل امتحان ساڈی قیادت دا ہن اے کہ اوہ وارا گیسنٹ ٹیرر دے ناں تے جاری خونی ڈرامے وچ ہزاراں مظلوماں دی قربانی دے بعد ایس دھرتی نوں کیویں بچاندے نیں۔ ساڈی فوجی امداد دی بحالی دسدی اے کہ امریکہ نوں اک واری فیر ساڈے موڈے تے بندوق رکھن دی لوڑ اے نہیں تاں اسیں اوہدے پھوپھی دے پتر تے نہیں، نہ ڈونلڈ ٹرمپ دا مواخذہ ہوندا نہ دنیا اک نویں جنگ دے دہانے تے اپڑدی۔ بنتا سنگھ نے محبوبہ نوں چوری کرکے سونے دا ہار دتا، اوہ بولی سردار جی ایہدی قیمت کیہ اے۔ بنتا سنگھ بولیا تن ورھے قید تے ڈھیر سارے لِتر۔ خدارا سانوں اجیہا سونے دا ہار نہیں چاہیدا خدا خدا کرکے ملک وچ کجھ امن بحال ہویا اے ، ساڈی سیاسی و عسکری قیادت نوں اپنی ساری توجہ ایس پاسے مرکوز کرنی ہووے گی، امریکہ روس یورپ دے اسلحہ ساز کارخانیاں وچ ایناں اسلحہ تیار پیا اے ایہنوں استعمال ہونا اے۔ کھرباں ڈالر دا اسلحہ وکنا ضروری اے دو تن لکھ لوک تے اوہ وی مسلمان جے مر جان تے کوئی حرج نہیں، نواں اسلحہ وی بن جاوے ہور لوک وی پیدا ہو جان گے۔
