فارن رشتے

ایتھے گرین کارڈ حاصل کرن توں بعد منُڈے اپنی سیٹزن بیویاں نوں طلاقاں دے کے پاکستان وچ جا کے چھوٹی عمر دی کُڑیاں نال ویاہ کردے نیں

فاطمہ جہاں

رُکھی سُکھی کھا فریدا تے ٹھنڈا پانی پی
ویکھ پرائی چوپڑی، نہ ترساویں جی
حیاتی کدی وی سوکھی نئیں ہندی، تے انسان وچ وی اگے ودن دی اگ ہمیشہ بلدی رہندی اے۔ اوہ وی چاہندا اے کہ اوہدے کول ہر طرح دیاں آسائشاں ہون۔ اوہ وی ملک ملک دی سیر کرے، وَد پیسہ کماوے تے دنیا تے راج کرے۔ راج نہ کرے کم از کم دولت تے شہرت حاصل ضرور کرے۔۔ ایس واسطے او وڈے وڈے رسک لیندا اے۔انسان جدوں ایس دنیا وچ اَکھ کھولدا اے تے اپنے آلے دوالے وسن والیاں نوں ویکھ کے بڑا کجھ سکھدا اے۔ ہر اک اپنے آپ نوں کامیاب لوکاں دی صف وچ کھڑا ویکھنا چاہندا اے۔ ساڈے معاشرے وچ وی 70 دی دہائی توں پہلے باہر جا کے کمان والیاں دی تعداد نہ ہون دے برابر سی۔پر جیویں جیویں لوکاں نوں موقع ملدا گیا تے اوہناں نے باہر دے مُلکاں دا رُخ کرنا شروع کر دتا۔ جاپان، امریکہ، کینیڈا، انگلینڈ، جرمنی، یورپ اوہناں نے کوئی ملک نہیں چھڈیا جھتے جا کے آباد ہونا شروع کیتا بلکہ ویاہ شادیاں وی کیتیاں۔ دھوکے دتے وی تے دھوکے کھادے وی۔اج وی ملک دے نوجوان ایہی چاہندے نیں کہ اوہناں دا باہر دے ملک وچ ویاہ ہو جائے تے اوہ پکے ہو جان۔ کمان دے ود موقعے ملن۔ تے پردیس وچ جیہڑے پاکستانی وسدے نیں اوہ ای اپنے بچیاں دے رشتے پاکستان وچ کرنا چاہندے نیں تاکہ ساری عمر اوہ اوہناں نوں احسان دے تھلے رکھ سکن۔ پر اے صرف کسے حد تک ای رشتے کامیاب ہوندے نیں۔ اوہناں دے مزاج آپس وچ نہیں ملدے۔ ایتھوں دے مرد خاص طور تے ایتھے وی ویاہ کر لیندے نیں تے بعد وچوں فیر پاکستان وچ جا کے ضرور ویاہ کردے نیں تاکہ اوتھے اپنی امریکہ دی کمائی وکھا سکن تے پاکستان جا کے اپنا گھر وی بنا لیندے نیں کہ جے امریکہ وچ کامیاب نہ ہو سکن تے پاکستان وچ اوہناں کول بیوی وی ہووے۔ جیہڑی ساری عمر اوہناں دی کمائی وی سانبھے تے معاشرے وچ وکھاوی سکن۔ کئی اوہناں نوں ویاہ کے امریکہ لے آندے نیں تے فیر اوہ جندوں ایتھے آندیاں نیں تے اوہناں نوں پتہ لگدا اے کہ ایہناں نے ایتھے وی گرین کارڈ لئی ویاہ کیتا سی۔ تے اوہ ای نال ای چلدیاں پیاں نیں۔ ایتھوں دی بیوی اوہناں دی گل نہیں مندی اوہ گوری، کالی ، سپینش کوئی وی ہووے، پر گھر فیر پاکستان وچ جا کے کسے پاکستانی کُڑی نال کردے نیں۔
پاکستانی منڈیاں، کُڑیاں نے باہر جانا کیوں شروع کیتا۔ اپنی جان ایس لئی خطرے وچ پائی تاکہ اوہ وی وڈیاں وڈیاں کوٹھیاں پاکستان وچ پا سکن۔ اگے ود سکن۔ اے معاشی ناہمواری دن بدن ودھدی گئی تے باہر جا کے سیٹ ہون والیاں دا جنون حداں نوں چھون لگ پیا۔ ایس سلسلے وچ کنے ای نوجوان اپنی جان توں ہتھ دھو بیٹھے۔ پر ایہناں حادثیاں نے وی پاکستانی پیڑھی وچ کوئی بدلائو نہیں لیاندا۔ اج وی باہر جان والیاں دی تعداد وچ کوئی کمی نہیں آئی۔
بلکہ باہر جان دے لالچ نے ایس حد تیکر انہا کر دتا اے کہ بغیر کسے پرکھ پڑچول دے ماں پیو اپنیاں بچیاں دے رشتے کردیندے نیں تے فیر عام طور تے منفی نتائج بھُگتنے پیندے نیں۔ طلاقاں دی شرح ودھ گئی اے۔ لوکی فراڈ دا شکار رہندے نیں۔ ایتھے گرین کارڈ حاصل کرن توں بعد منُڈے اپنی سیٹزن بیویاں نوں طلاقاں دے کے پاکستان وچ جا کے چھوٹی عمر دی کُڑیاں نال ویاہ کردے نیں تے ایس مکُروہ فعل وچ اوہناں دے ماں پیو وی برابر دے شریک نیں۔ دوجے پاسے ایتھوں پاکستان وچوں کُڑیاں ویاہ کے کھڑدے نیں جد اوہناں توں دل بھر جاندا اے تے فیر باہر دے ملکاں دیاں گوریاں نال ویاہ کر لیندے نیں۔ جے کسے طریقے نال ویاہ نہیں کر سکدے تے ہر پاکستانی مرد نہیں کم از کم ایتھے کوئی نہ کوئی کُڑی اپنے کول رکھی ہُندی اے۔جد گوریاں توں دل بھرجاندا اے تے فیر نواں شکار کرن لئی پاکستان دا رُخ کردے نیں۔ ایہہ لوکی ہر اک نال جھوٹ بولدے نیں۔ ایناں جھوٹ بولدے نیں کہ جھوٹ ای سچائی بن جاندا اے۔
سب توں پہلے والدین نوں ایہہ پتہ کرنا چاہیدا اے کہ گرین کارڈ یا سٹیزن والے ایتھے کوئی امیر نہیں ہُندے تے اوہ ای لوک زیادہ تر دھوکا دیندے نیں۔ ایتھے ویاہ وچ بڑے دھوکے تے فراڈ نیں جدوں رشتہ کرو پوری پُچھ پرتیت کر کے کرو۔ دیس تے پردیس وچ کُجھ وی بُرا نہیں ہندا گل تے صرف بھروسے تے اخلاقیات دی اے۔ اک دوجے نوں سمجھن دی اے۔ سانوں فراڈاں توں بچنا چاہیدا اے تاکہ معاشرہ فساد تے وگاڑ ول نہ جاوے۔ اج دے دور وچ موبائل تے رشتیاں دے App بن گئے نیں۔ ایس لالچ دا ایہہ اتر ہویا اے کہ اک اک کُڑی، منڈے دے کئی کئی ویاہ ہو رہے نیں تے پیدا ہون والیاں بچیاں دا بیڑا غرق ہو گیا اے تے اج کئی منڈے تے کُڑیاں اپنے اپنے چھڈے ہوئے بالاں نوں ملن والی سوشل سکیورٹی نال اوہناں دی پرورش کرن تے مجبور نیں۔ پر دیس تے بندے نوں رول دیندا اے، خدارا ہوش دے ، ناخن، لوئو تے برباد ہون توں بچو۔