جناب وزیراعظم …فخر نہیں فکر کرو!

تحریک انصاف دے 25سال مکمل ہون اُپر عمران خان دی تقریر تے حقیقت

اشرف سہیل

وزیراعظم عمران خان نے پاکستان تحریک انصاف دے 25 ویں یوم تاسیس اُتے 25 اپریل نوں جاری کردہ اک پیغام وچ اپنی حکومت دی ڈھائی سالہ کارکردگی اُتے فخر دا اظہار کیتا اے۔ اپنے پیغام وچ وزیراعظم نے اپنی سیاسی جدوجہد دے نشیب و فراز نوں تفصیل نال بیان کیتا۔ طاقتور نوں قانون دے تھلے لیان، عدل و انصاف دے یکساں اطلاق تے بدعنوانی دے خاتمے نوں اپنا سیاسی نصب العین قرار دِتا۔ وزیراعظم نے ایس گل دا اعتراف وی کیتا کہ اک ویلے وچ ایہناں دے نال نہ ہون دے برابر لوک سن، فیر مینار پاکستان دے مشہور جلسہ عام نے ایہناں نوں ویکھدے ای ویکھدے سیاست دے عروج تیکر اپڑا دتا۔ ایس سیاسی مقبولیت دے نتیجے وچ ملک دے سارے ’’الیکٹبلز‘‘ تحریک انصاف وچ شامل ہو گئے، 2018 دا الیکشن آیا تے اقتدار دا ہما عمران خان دے سر اُتے آ ن بیٹھیا۔
وزیراعظم نوں اقتدار وچ آئے 33 مہینے ہو چکے نیں، مطلب ایہہ کہ 60 مہینے دی دستیاب مدتِ اقتدار وچوں ایہناں کول 27 مہینے دا وقت بچیا اے۔دوجے لفظاں وچ ایہہ کہ وزیراعظم نے سیاست وچ آن توں بعد 22 سال تیکر جس مقصد لئی جدوجہد کیتی ایہناں نوں عملی جامہ پہنان لئی صرف 27 مہینے باقی نیں۔ اقتدار دے پہلے 33 مہینیاں وچ جو ہویا اوہ وزیراعظم دے حامی تے مخالفین ساریاں دے اگے وے۔ ڈھائی سال دی ایس مدت وچ عدل، انصاف، قانون دی بلاتفریق، بالادستی، غربت، بے روزگاری، جہالت وچ کمی تے سماجی بے چینی نوں دور کرن لئی ہون والی ’’پیش رفت ‘‘ توں ہر کوئی آگاہ اے۔ ایس ڈھائی سالہ عرصہ اقتدار وچ حکومت دا سیاسی لب و لہجہ کنج دا رہیا۔ بدعنوانی وچ سر توں پیراں تیکر لتھڑے مافیاز نوں نشان عبرت بنان لئی کیہ کیتا گیا۔ عام بندے توں ملن والی سیاسی حمایت نوں برقرار رکھن تے ایس وچ وادھے دی کوششاں وی کسے توں لُکیاں نہیں، تے … ایہہ گل وی کسے توں لُکی نہیں کہ عمران خان نے مسلسل 22 سال دی سیاسی ریاضت دے بعد جنہاں سیاسی عناصر دی بدعنوانی، اقربا پروری، بددیانتی تے نالائقی نوں ثابت کر کے ایہناں نوں عوام دی نظر وچ بے وقعت کر دِتا سی، اج اوہ فیر توں عوامی حمایت حاصل کر رہے نیں تے ممکنہ طور اُتے طاقت دے ایواناں تیکر رسائی دے ذریعے حکومت دی بقا لئی خطرہ بنے ہوئے نیں۔
اک انج دا وزیراعظم جس دی نک تھلے کدی کسے وی حکومت دی کارکردگی نہیں آ سکی جو پٹرولیم مصنوعات دیاں قیمتاں وچ وادھے نال بجلی دے بلاں تے محصولات دے نظام وچ موجود خرابیاں نوں براہ راست سربراہ حکومت یعنی وزیراعظم دی نالائقی قرار دین جہی حق پرستانہ گل کردا رہیا ہوئے۔ جس نے اقتدار وچ آن دےپہلے ای سال محصولات نوں 8 ہزار ارب روپئے تیکر اپڑان دا پَکّا ارادہ ظاہر کیتا ہوئے۔ جیہڑا طاقتور نوں قانون دے تھلے تے غریب نوں معاشی و سماجی زندگی وچ اُتے لیان جہی عظیم سوچ رکھدا ہوئے۔ سیاسی حوالے نال آئین دے تقدس، پارلیمان دی بالادستی ، عدلیہ دے احترام ، انسانی حقوق دے تحفظ تے اظہار رائے دی آزادی جہے اعلیٰ آدرشاں دا دل توں قائل ہوئے۔ انج دے سیاسی رہنما، سماجی دانشور تے وزیراعظم دا اپنی حکومت دے مذکورہ کارنامیاں اُتے فخر دا اظہار صاحبان فراست تے دور عام فہم دے مالک لئی وی حیرانی دا باعث ہوئے گا۔
حقیقت وی ایہواے کہ تحریک انصاف دی حکومت نے پہلے ڈھائی سال وچ جو وی کیتا گھٹ توں گھٹ ایس اُتے فخر ہر گز نہیں کیتا جا سکدا۔ سچ تے ایہہ وے کہ ہیلتھ کارڈ ہوئے یا کسان کارڈ، ڈالر دی قیمت وچ کمی ہوئے یا فیر کرنٹ اکائونٹ خسارے دا خاتمہ، بیرون ملک توں ترسیلات زر وچ وادھا یا زرمبادلہ ذخائر دی تسلی بخش حالت، ایہناں دے ثمرات عام بندے تیکر اپڑن تیکر کجھ قابل فخر نہیں ہوئے گا۔ ملک وچ سیاسی کشمکش جس سمت ول ودھ رہی اے حکومت اُتے جس قسم دے الزامات عائد کیتے جا رہے نیں، عدل و انصاف دے نظام ول انگلیاں چُکیاں جا رہیاں نیں، جمہوری اداریاں دی کارکردگی اک پاسے الیکشن کمیشن جہے آئینی ادارے نال کدی اپوزیشن تے کدی حکومت دا تصادم، انج دے حقائق نیں کہ ایہناں اُتے فخر کیتا جا سکے؟؟؟
وزیراعظم عمران خان وانگوں سدھے تے دو ٹوک انداز وچ گل کیتی جائے تے ایہناں نوں اپنی کارگزاری اُتے فخر دے بجائے فکر دی لوڑ اے۔ ایہناں نوں فکر مند ہونا چاہیدا اے کہ ’’الیکٹبلز‘‘ دی بیساکھی اُتے عدل و انصاف دا نظام قائم نہیں ہو سکے گا۔ ایہہ گل دی وی فکر ہونی چاہیدی اے کہ ایہناں دی اپنی جماعت دے منتخب ارکان اُچھل کود دے ذریعے ایہناں ای دے اقتدار و سیاسی طاقت دے توازن نوں درہم برہم کر رہے نیں۔ ایہہ بدنظمی ایس قدر شدید اے کہ وزیراعظم نوں اپنے کجھ فیصلیاں اُتے پچھتاوا ہو رہیا اے تے ایہناں ولوں اسمبلیاں تیکر برخاست کرن دیاں دھمکیاں ساہمنے آ رہیاں نیں۔ وزیراعظم نوں ڈسکہ تے کراچی دے ضمنی انتخابات دے نتیجے اُتے وی فکر کرن دی لوڑ اے۔ کراچی وچ تے ووٹرز دا ٹرن آئوٹ دس رہیا اے کہ عام بندا سیاسی جماعتاں دی حرکات، سرگرمیاں تے بیکار دی بیان بازیاں توں متنفر ہوندا جا رہیا اے۔ اوہ سیاسی حمام وچ موجود ننگیاں نوں ووٹ دی عزت نال نوازن اُتے آمادہ نہیں ہو رہیا۔ منتخب و جمہوری حکومت دے سربراہ تے سیاسی میدان دے انقلابی کھلاڑی ہون دی حیثیت نال وزیراعظم عام بندے دی ایس مایوسی اُتے فخر کر سکدے نیں؟؟؟
فکر مندی دی گل ایہہ وی اے کہ عملی سیاست دے 25 سال مکمل ہون توں بعد وی وزیراعظم اپنے جہے 25 رہنما وی میدان وچ نہیں اتار سکے۔ عام بندا کل وانگوں اَج وی مہنگائی، بے روزگاری، غربت، جہالت تے ناانصافی دے چنگل وچ پھسیا ہویا اے۔ ریاست مدینہ دی طرز اُتے سیاسی و سماجی مساوات، عدل و انصاف دا یکساں نظام تے سب لئی ترقی دے اک جہے موقعے پیدا نہیں ہو سکے۔ تبدیلی دا سونامی عام زندگی وچ اک لائن مین ، کلرک، پولیس اہلکار دی سوچ نال رشوت دے حصول دی تڑپ نوں ختم نہیں کر سکیا، ہاں اِنج ضرور ہویا اے کہ خوامخواہ دے انقلابی نعریاں نے رشوت دے ریٹ ودھا دتے نیں۔ قومی خزانے توں عام بندے دی جیب تیکر مافیا دی لُٹ مار دھڑلے نال جاری اے۔ کمزور بدستور قانون دے تھلے تے طاقتور قانون دی گرفت توں باہر اے۔
جناب وزیراعظم … صورتحال ہر گز انج دی نہیں کہ ایس اُتے فخر دا اظہار کیتا جائے، ایس توں پہلے کہ فکر دا موقع وی ہتھ توں نکل جائے سیاسی اُفق توں سماجی سطح تیکر ایہناں تبدیلیاں اُتے توجہ دیو جہناں دی توقع پاکستان دے ہر باشعور شہری نے تہاڈے نال وابستہ کر رکھی اے۔
وزیراعظم صاحب! تہانوں ایس لئی وی فکر مندی دا رستہ اختیار کرنا چاہیدا اے کہ ایس دی وجہ نال عام بندا تہاڈے اُتے فخر کر سکے۔