کنٹرول لاین تے پاک فوج

لکھت:بلال مدثربٹ

بھارتی حکومت نے کنٹرول لاین دی خلاف ورزیاں دا ریکارڈ قائم کر لیا اک ورھے وچ کئی سو واری خلاف ورزیاں کرکے عالمی قنون تے عالمی امن دا منہ چڑایا۔ اقوام متحدہ وی چپ رہی تے وڈے ملک وی کجھ نہ کر سکے۔ اگست وچ بھارت نے پاکستان دے شہری علاقے وچ ممنوعہ کلسٹر بمب وی سٹے جہدے تے جنیوا کنونشن دی کھلی خلاف ورزی تے پاکستان نے بھارت دا مکروہ چہرہ دنیا بھر وچ ننگا کر دتا۔ چین‘ ملائیشیا‘ بوسنیا سنے کئی ملکاں دے سفیراں نوں کلسٹر بمباں دی نمائش وی وکھائی گئی اوہناں نوں کشمیر دے متعلقہ حصے وکھائے گئے جتھے بھارت کہندا اے کہ ساڈے کوئی کیمپ موجود نیں ایہناں سارے سفیراں نے وی بھارتی جھوٹ دا بھانڈا بھن دے ہوئے اوتھے کسے وی قسم دے تربیتی کیمپاں دی موجودگی دی ردیا کیتی۔
اوہناں آکھیا کہ شہری علاقیاں تے کلسٹر بمباں دی بارش بڑا گھٹیا عمل اے عالمی اداریاں نوں ایہدا نوٹس لینا چاہیدا اے پر عالمی ادارے کیوں نوٹس لین‘ اوہناں دے کول وقت نہیں یاں فیر انسانیت دی کمی اے ایہناں دی انصاف دوستی کجھ علاقیاں لئی مخصوص اے اوتھے کجھ وی ہووے تے اوہ چیک پیندے نیں پر کشمیر تے پاکستان وچ کجھ وی ہووے اوہ چپ رہنا پسند کردے نیں ملک دے دفاع دا فریضہ پاک فوج تے اوہدے سربراہ جنرل قمرجاوید باجوہ‘ ساڈی فضائیہ تے بحریہ نے خوب نبھایا اے۔ ایسے لئی تے بھارت نوں سرحد پار کرن دی جرأت نہیں ہوئی ساڈی فضائیہ نے اوہدے اک تربیت یافتہ پائلٹ ابھی نندن نوں وی حراست وچ لے لیا سی جہدے بعد اوتھے رونا دھونا پے گیا تے نریندر مودی نے ایہدی رہائی لئی امریکہ نال رجوع کیتا۔ ہن کجھ چیدہ چیدہ واقعات پڑھنے آں۔
یکم جنوری 2019ء نوں ورھے دے پہلے دن بھارتی فوج نے کنٹرول لاین تے شہری علاقیاں وچ فائرنگ کرکے اک خاتون نوں شہید تے 9شہری زخمی کر دتے۔ پاک فوج نے باغ سیکٹر وچ جسوسی دی غرض نال وڑدیاں ای ڈرون دے پرخچے اڑا دتے۔ ایسے دیہاڑے بھارتی فوج نے اک ڈرون جسوسی دی غرض نال دو جنوری نوں گھلیا جہنوں پاک فوج نے ستووال سیکٹر وچ وڑدیاں ای تھلے سٹ دتا۔ پاکستان ہن تک تن بھارتی جسوس ڈرونز ڈھا چکیا اے تن جنوری امرییک صدر ٹرمپ نے مصالحت دی گل کیتی پر درمیان وچ افغانستان دے تعلقات دا وی تڑکا لا دتا۔ اوہناں آکھیا کہ پاکستان دی نویں قیادت نال ملاقات دا منتظر آں پر اوہناں نے وی بھارتی جارحیت بارے فون تے گل نہیں کیتی۔
چار جنوری نوں پاک فوج نے اک سو کلومیٹر تک دشمن نوں نشانہ بنان والا ملٹی پل لانچ سسٹم دی مدد نال فائر کرن والا جدید ترین راکٹ تیار کر لیا جہدے نال مودی سرکار دی صفاں وچ کھلبلی پے گئی تے اوہ ایٹمی حملے دیاں دھمکیاں دین تے اتر آیا۔ ایس لئی اوہنے ست جنوری نوں فیر کنٹرول لاین تے فائرنگ کیتی جہدے نال اک شہری شہید تے اک خاتون زخمی ہوئے سانوں فیر جواب دینا پیا‘ بھارتی فوج دیاں موتاں تے جس بھارتی میڈیا وچ رولا پے گیا معاملے تے ہر طرح نال غور لئی اٹھ جنوری نوں کور کمانڈر کانفرنس سد لئی گئی جہدے وچ علاقائی امن لئی سارے پربندھاں دی حمایت کیتی گئی پر نال ای ایس گل دا وی اعلان کیتا گیا کہ فوج دشمن نوں منہ بھن جواب دین لئی تیار اے۔ ملکی فضاواں دا دفاع مضبوط بنان لئی دس جنوری نوں ایئرڈیفنس سسٹم دا کامیاب تجربہ کیتا گیا ایہدے نال وی بھارت دی پریشانی وچ وادھا ہویا۔
نریندر مودی دی مرضی تے بھارت نے سارے سفارتی آداب کنڈ پچھے سٹدے ہوئے پاکستانی سفارتکار نوں 13جنوری نوں کجھ گھنٹے حبس بے جا وچ رکھن تے سادہ کاغذ تے دستخط کروان مگروں چھڈ دتا۔ پاکستان نے ویانا کنونشن دی ایس کھلی خلاف ورزی تے ڈاڈھا احتجاج کیتا۔ پاک فوج نے 24 جنوری نوں فیر زمین توں زمین وچ مار کرن والے میزائل نصر دا کامیاب تجربہ کیتا ایہ بھارت دے ہوائی اڈیاں تے ٹینکاں نوں تباہ کرن دی صلاحیت رکھدا اے۔ ایسے لئی بھارت نے کجھ وقت لئی سرحدی خلاف ورزیاں وچ کمی کر دتی۔ اپنی افغانستان دے نال سرحد نوں محفوظ کرن لئی فوج نے 27 جنوری نوں پاک افغان سرحد تے 900کلومیٹر لمی واڑ مکمل کر لئی۔ ایہدی تکمیل وچ کئی رکاوٹاں دا سامنا کرنا پیا کئی واری سرحد پار توں ات گرداں نے حملہ کیتا پر فوجی جواناں نے کمال ہمت دا مظاہرہ کردے ہوئے ایس سرحد نوں محفوظ بنان والی واڑ مکمل کر ای لئی۔
10فروری: جنرل (ر) راحیل شریف دی قیادت وچ اسلامی فوجی اتحاد دے وفد دا پہلا دورہ پاکستان‘ دو دن قیام دوران اوہناں نے اہم ملاقاتاں کیتیاں۔
20فروری: دو افسراں دا کورٹ مارشل ہویا‘ اسد درانی دی پنشن تے ساری مراعات واپس لے لئیاں گئیاں۔ 26فروری نوں وزیر خارجہ شاہ محمود قریشی دا چین تے دوجے سفیراں نال رابطہ بھارتی جارحیت دے خلاف سارے حقائق بارے دسیا بھارت دی بزدلانہ حرکت تے پوری قوم سیسہ پلائی کندھ بن گئی۔ 27فروری نوں پاکستان نے اپنی حدود وچ وڑن دی کوشش کرن والے دو بھارتی جنگی جہاز ڈھا سٹے پائلٹ ابھی نندن پھڑیا گیا‘ بھارتی جہاز سٹن والا حسن صدیقی قوم دا ہیرو بن کے ابھریا‘ اگلے دیہاڑے ابھی نندن نوں چھڈ دتا گیا۔ بھارتی پائلٹ ابھی نندن دی رہائی تے نوبل انعام عمران دے ناں ٹاپ ٹرینڈ بن گیا۔ پاکستان نے بھارت نوں دعوت دین تے او آئی سی دے اجلاس وچ شرکت کرن توں معذرت کر لئی۔ بھارتی جارحیت تے اسلامی سربراہواں وچ چنتا دی لہر دوڑ گئی پاکستان نے وی بھارت جان والی ٹرین معطل کر دتی۔
پاکستان بھارت دے مسافر طیاریاں لئی وی فضائی حدود بند کر دتی مقامی فلائٹ اپریشن وی کجھ ہفتیاں لئی معطل کر دتے گئے پنجاب‘ سندھ تے خیبرپختونخوا دے ہسپتالاں وچ ایمرجنسی لا دتی گئی۔ پاک آرمی زندہ باد ٹاپ ٹرینڈ بن گیا۔ امریکہ تے ایران نے ثالثی دی پیش کش کر دتی سینما ایسوسی ایشن نے بھارتی فلماں دا بائیکاٹ کر دتا۔ صوبائی اسمبلیاں تے قومی اسمبلی وچ بھارتی جارحیت دے خلاف قرارداد منظور۔
28فروری: پاکستان تے بھارت وچکار کشیدگی چھیتی ختم ہو جاوے گی ترکی دے صدر طیب اردگان تے امارات دے صدر دا عمران خان نال رابطہ‘ سعودی وزیر خارجہ محمد بن سلمان دا خصوصی پیغام لے کے پاکستان اپڑ گئے امریکی صدر ٹرمپ دے بعد اقوام متحدہ نے وی ثالثی دی پیش کش کر دتی۔ بھارتی گولہ باری نال پاکستانی سرحد دے اندر چار بندے شہید ہو گئے پاکستان دی جوابی فائرنگ نال بھارت نوں چوکھا نقصان ہویا۔
5مارچ: پاک بھارت صورتحال تے سینٹ نے ان کیمرہ بریفنگ دا مطالبہ کیتا۔
6مارچ: خطے وچ کھچاء گھٹ کرن لئی مسئلہ کشمیر دا حل بڑا ضروری اے پاک فوج دے ترجمان نے دنیا بھر نوں امن دا پیغام دتا۔
7مارچ: سانوں کوئی دھمکا یاں ڈرا نہیں سکدا کوئی جھکا نہیں سکدا بھارتی ات گردی تے جارحیت خلاف اپک فوج دے سربراہ قمر جاوید باجوہ نے ڈٹ جان دا اعلان ر دتا۔
11مارچ: پاکستان نے بھارت نوں سمجھوتہ ایکسپریس وچ ہندو ات گرداں ولوں 67مسلماناں نوں جیوندا ساڑن بارے نویں ثبوت پیش کر دتے بھارت ایس کیس تے سرے توں کوئی کاروائی نہیں کرنا چاہندا ایسے لئی 14مارچ نوں سارے ملزماں نوں چھڈ کے اپنا ساتھی ہون دا ثبوت دے دتا۔
21مارچ: او آئی سی وچ اسلاموفوبیا دے خلاف 15 مارچ نوں یوم یکجہتی منان دا اعلان کر دتا۔
24مارچ َ: بھارتی میڈیا نے پاکستان وچ دو ہندو کڑیاں دے جھوٹے اغوا دا شوشا چھڈ دتا آنجہانی وزیر خارجہ سشما سورج نے وی کئی ٹویٹر پیغام گھلے وزیراعظم پاکستان نے مبینہ اغوا دی پن چھان دا حکم دے دتا پر بعد وچ پتہ لگا کہ دوہاں کڑیاں نے قبول اسلام دے بعد شادی کر لئی سی۔ نومسلم بھیناں نے تحفظ لئی اسلام آباد ہائیکورٹ نا ل رجوع کر لیا رینا تے روغینہ نے آکھیا کہ خوشی نال اسلام قبول کیتا ساڈے تے کوئی دبائو نہیں۔
2 اپریل: کنٹرول لاین تے بھارتی فوج دی بمباری تن جوان شہید پاکستانی فوج دی فائرنگ نال ست بھارتی مارے گئے۔
6اپریل: سندھ وچ رینجرز دے قیام دی مدت وچ تن مہینے دی توسیع کر دتی گئی۔
7اپریل: وفاقی وزیر شاہ محمود قریشی نے سولاں توں ویہہ اپریل تک بھارتی حملے دا ڈر ظاہر کرکے قومی سیاست وچ بھچال پیدا کر دتا۔ اوہناں آکھیا کہ بھارت عالمی امن لئی خطرہ بن چکیا اے سلامتی کونسل دے منتخب ارکان نوں وی بھارتی جارحیت بارے دسیا گیا۔
3مئی: آرمی چیف جنرل قمر جاوید باجوہ نے آکھیا کہ دشمن نوں کسے وی محاذ تے ہران دی صلاحیت رکھنے آں۔ 24مئی نوں آرمی چیف نے فیر آکھیا کہ جنگ کسے دے لابھ وچ نہیں پر جے جنگ مڑھی گئی ت یدشمن نوں ہران دی صلاحیت رکھنے آں۔
25مئی: فوج خرچیاں وچ کمی تے راضی ہو گئی۔ اعلیٰ افسراں نے تنخواہواں وچ وادھا نہ لین دی پیش کش کر دتی۔ یکم جون نوں عمران خان نے کشمیریاں تے ظلم بند کروان لئی اسلامی ملکاں توں مدد دی اپیل کر دتی پر کجھ اسلامی ملک ایس معاملے وچ زبانی جمع خرچ توں اگے نہیں ودھ سکے۔
15جون: لیفٹیننٹ جنرل فیض حمید آئی ایس آئی دے سربراہ مقرر ہو گئے عاصم منیر کور کمانڈر گوجرانوالہ‘ عامر عباسی جی ایچ کیو وچ کوارٹر ماسٹر جنرل معظم اعجاز انجینئرنگ چیف تے شاہد شمشاد مرزا کواڈجوٹینٹ جنرل بنا دتا گیا۔
22جولائی: امریکی صدر ٹرمپ نے مسئلہ کشمیر تے اک واری فیر ثالثی دی پیش کش کر دتی بھارت دے انکار تے ثالثی دا معاملہ اگے نہ چل سکیا۔
3اگست: اقوام متحدہ دی سلامتی کونسل نے پاکستان تے چین دی درخواست تے لیاندے گئے سلامتی کونسل دے خصوصی اجلاس وچ مقبوضہ کشمیر وچ بھارتی خبر تے گہری چنتا دا اظہار کیتا اک گھنٹہ دس منٹ جاری رہن والے اجلاس وچ ایس بارے ہور کاروائی کرن لئی اگلے اجلاس دے ایجنڈے وچ شامل کر لیا گیا۔
13ستمبر: مقبوضہ کشمیر وچ بھارتی قبضے دے خلاف آزادکشمیر وچ غم و غصے دی لہر دوڑ گئی لوکاں نے سرحد پار کرن دی دھمکی دے دتی جہدے تے عمران خان نوں درمیان وچ آنا پیا۔
25ستمبر: آزادکشمیر دے کئی شہراں وچ زلزلہ‘ 38 بندے موئے تے 579 زخمی ہوئے۔ آرمی چیف جنرل قمر جاوید باجوہ نے متاثرہ علاقیاں دا دورہ کردے ہوئے فوج نوں ہر ممکن مدد کرن دی ہدایت دتی۔
29ستمبر: امریکہ توں کامیاب دورے مگروں تے جنرل اسمبلی وچ مسئلہ کشمیر نوں پوری طاقت نال اٹھان دے بعد عمران خان وطن واپس اپڑ گئے ویلکم ہوم پرائم منسٹر ٹویٹر تے ٹاپ ٹرینڈ بن گیا۔
20اکتوبر: بھارتی فوج دی سول علاقیاں تے بمباری دے جواب وچ پاکستان نے 9بھارتی فوجی مار دتے۔
22اکتوبر: پاکستان وچ کنٹرول لاین تے شہری علاقیاں وچ بھارتی فوج دی وحشیانہ بمباری تے تربیتی مرکز دا پول کھولن لئی چین تے یورپی ملکاں سنے غیرملکی سفیراں نوں آزادکشمیر دا دورہ کروایا گیا۔ چین‘ ملائیشیا تے دوجے ملکاں دے سفیراں نے سول علاقیاں وچ بھارتی بمباری دی مذمت کیتی۔
27اکتوبر: بھارتی مظالم دے خلاف وزیراعلیٰ پنجاب عثمان بزدار نے دس لکھ بندیاں دی دستخطی مہم شروع کروا دتی آپ وی دستخط کیتے۔
22نومبر: مقبوضہ کشمیر دے مظالم خلاف امریکی کانگریس دی رشیدہ طلیب نے بل پیش کر دتا جہدے تے بھارتی حکام نے اوہناں دے خلاف علم بغاوت چک لیا امریکی سب کمیٹی نے وی کشمیر وچ مظالم تے تن واری زیربحث آئے تے ارکان کانگریس نے امریکی حکومت نوں بھارت وچ انسانی حقوق دی خلاف ورزیاں روکن لئی رابطے کرن دا مشورہ دتا۔ مقبوضہ کشمیر تے افغانستان دے معاملے تے امریکی صدر ٹرمپ دا عمران خا ن نوں فون اک واری فیر دوہاں ملکا ںدے راضی ہون دی صورت وچ ثالثی کروان دی پیش کش‘ افغانستان وچ قیام امن لئی وی مدد منگی تے پاکستان دے تعاون دا شکریہ ادا کیتا۔
26نومبر: پاک فوج وچ اہم عہدیاں تے تقرریاں جنرل ساحر مرزا چیف آف جنرل سٹاف مقرر‘ لیفٹیننٹ جنرل ذکی منج ڈائریکٹر جنرل ایس پی ڈی بن گئے‘ لیفٹیننٹ جنرل شاہین مظہر کور کمانڈر منگلا بن گئے۔
2دسمبر: پاک فوج نے سانجھیاں مشقاں کیتیاں۔ آرمی چیف تے ایئرچیف نے ایف سولہ جہازاں وچ بہہ کے جنگی مشقاں دا معائنہ کیتا جہدے توں سانوں ساریاں نوں احساس ہو گیا کہ ملک دا دفاع مضبوط ہتھاں وچ اے۔