عوامی نمائندے VS عوامی نوکر

عتیق انور راجہ

سیالکوٹ وچ رونما ہون والے ایس واقع نے ایہہ ثابت کر دتا کہ حکومتی ترجمان تے عوامی نمائندہ ہون وچ کیہ فرق ہوندا اے

سیالکوٹ وچ کجھ دن پہلے محترمہ فردوش عاشق اعوان تے اے سی سونیا صدف دے وچکار کجھ تلخ جملیاں دا تبادلہ کیہ ہویا۔ ہر کوئی ایہناں نوں ای لے کے گلاں کیتے جا رہیا اے۔ اونج تے ایہہ اک ثابت شدہ حقیقت اے کہ میرے ملک وچ بیورو کریٹس بوہت تگڑے واقع ہوئے نیں۔ ایس دی بوہت ساری وجوہات بیان کیتیاں جاندیاں نیں تے بوہت ساری وجوہات بیان کیتیاں جا سکدیاں نیں پر میں سمجھنا واں جدوں تیکر میرے ملک دے سیاست دان اپنا قبلہ درست نہیں کردے اودوں تیکر جج جرنیل تے بیورو کریٹس اُگے گل کرن نال کجھ حاصل نہیں ہوئے گا۔ہن محترمہ فردوس عاشق اعوان صاحبہ نوں ای لے لوئو بار بار سیاسی پارٹیاں بدلن تے سیاسی پارٹیاں دی ترجمان بنن دا اثر ایہہ ہویا اے کہ محترمہ فردوس عاشق صاحبہ اپنے علاقے وچ عوامی نمائندگی دے حق توں محروم ہو چکیاں نیں یعنی جدوں عوام نے اپنے ووٹ نال ایہناں نوں پارلیمنٹ لئی سلیکٹ کرنا سی ایس ویلے ایہناں دے سیاسی فیصلیاں توں اختلاف دا حق استعمال کردے ہوئے عوام نے ایہناں نوں ریجیکٹف کر دتا۔ ہن ہونا تے ایہہ چاہیدا سی کہ محترمہ اپنی ہار دے اسباب تلاش کردی تے علاقے وچ لوکاں دے نال چنگے تعلقات پروان چڑھان دی کوشش کردیاں تاکہ اگلے انتخابات وچ ایہناں نوں فیر توں عوامی نمائندگی دا سرٹیفکیٹ مل جاندا۔ پر اینا صبر کون کرے؟ محترمہ اپنے تعلقات تے مخالف سیاسی جماعتاں دے خلاف سخت الفاظ دے استعمال نال مرکزی حکومت دی ترجمانی حاصل کرن وچ کامیاب ہو گئیاں۔پتہ نہیں کس سوچ دے تحت، کس دے کہن اُتے کس دی تجویز اُتے مرکزی حکومت دی ترجمانی دے حق توں محروم ہون توں بعد ایہناں نوں پنجاب حکومت دا ترجمان مقرر کر دتا گیا۔ سیالکوٹ وچ رونما ہون والے ایس واقع نے ایہہ ثابت کر دتا کہ حکومتی ترجمان تے عوامی نمائندہ ہون وچ کیہ فرق ہوندا اے تے دوجے پاسے عوامی نوکر یعنی ساڈی سول سرونٹ اے سی صاحبہ نے وی ایہہ ثابت کر وکھایا اے کہ بیورو کریٹ کیہ ہوندا اے۔ محترمہ فردوس عاشق صاحبہ دے الفاظ ایہناں دا لہجہ تے ایہناں دا انداز گرچہ مناسب نہیں سی پر اوہ جس مسئلے اُتے گل کر رہیاں سن اوہ توجہ دے لائق اے۔ ساڈے کول ڈپٹی کمشنر، اسسٹنٹ کمشنرز نوں انج دی مراعات حاصل نیں کہ ہن اوہ خود نوں عوامی نوکر بلکل وی نہیں خیال کردے۔ میرے شہر دی گل کریئے تے ایتھے ہر نویں تعینات ہون والے سول سرونٹ دے دفترملاقاتیاں دا ہجوم لگیا رہندا اے۔ دوجیاں دی کیہ گل کراں میرا اک بوہت ای چنگا ساتھی کسے وی نویں افسر دی تعیناتی توں بعد مینوں نال لے کے افسر دے نال تصویر بنان چل پیندا اے۔ ایہناںسول سرونٹاں نال گل بات ہوندی تے ایہناں نوں جانن دا کجھ موقع مل جاندا اے۔ کجھ دے نال دل مل جاندا اے تے بار بار ملن دا سلسلہ چل پیندا اے پر کجھ نال مل کے لگدا اے کہ کیوں اسیں ایتھے آئے سی کجھ نال گل کر کے ایہہ لگدا اے کہ بھاری مراعات لگژری گڈیاں تے سیاست داناں دی نااہلی دی وجہ نال ساڈے سول سرونٹ خود نوں عوامی نوکر سمجھن دی بجائے کسے دوجے سیارے توں آئی مخلوق سمجھدے نیں۔ سانوں نہیں پتہ کہ جس ویلے فردوس میم رمضان بازار دے دورے اُتے تشریف لے گئیاں سن ایس ویلے اے سی میم کیہ کر رہیاں سن پر اسیں ایہہ ضرور ویکھیا کہ اے سی میم نے ترجمان پنجاب حکومت نوں بلکل ای ’’ہولا ‘‘ لیندے ہوئے ایہناں نوں نظر انداز کیتا تے بڑی رعونت نال بازار توں نکل گئیاں۔ ہن جنہے منہ اینیاں گلاں۔ کجھ لوکاں دی ہمدردیاں اے سی صاحبہ دے نال نیں تے کجھ دے خیال وچ فردوس عاشق اعوان صاحبہ دیاں گلاں قابل غور نیں۔ سابقہ دور وچ وزیراعلیٰ پنجاب شہباز شریف بوہت ساری تھاواں اُتے عوامی نوکراں دی کارکردگی ویکھن لئی اچانک اپڑ جایا کردے سن۔ اوہ جدوں وی کسے دورے اُتے جایا کردے سن تے رسماً عادتا ً ضرورتاً اک دو عوامی نوکراں دی چھٹی وی کروا دتا کردے سن۔ شہباز شریف بارے کجھ وی کہیا جائے پر اک گل اے کہ اوہ ان تھک بندہ سی۔ اک بہترین منتظم۔ اوہناں نے پتہ نہیں کنہے ای بیورو کریٹس نوں گھر گھلیا سی پر مجال اے کدی کدھروں کوئی اواز بلند ہوئی اے کوئی ایہناں دے اگے سر چُک سکیا ہوئے پر موجودہ حکومت وچ ساڈے وزیراعلیٰ عثمان بزدار صاحب دی عادت بلکل شہباز شریف توں الٹ اے اونج تے بزدار صاحب اینے سادے تے معصوم نہیں جنہا ایہناں دے مخالفین تے چاہن والے بیان کردے نیں پر بزدار صاحب اپنے پیش رو وانگوں عوامی مقامات اُتے جان توں کتراندے نیں یا میرے خیال وچ ایہناں دے اپنے لوک ایہناں نوں انج کرن توں آپ ای منع کر دیندے نیں۔ چلو ہن موضع ول آنے آں۔ ایس وچ کوئی شک نہیں کہ سول سرونٹس بوہت سخت امتحان پاس کرن تے انٹرویو دین دے بعد ملک و قوم دی انتظامی ذمہ داریاں ادا کرن لئی تعینات ہوندے نیں۔ ایہناں دی تعلیم ایہناں دی قابلیت اُتے شک نہیں کیتا جا سکدا پر سول سرونٹ بن دے ویلے ایس ادارے وچ ایہناں دی تربیت کس انداز وچ ہو رہی اے ایہہ ویکھن دی شے اے کہ دوران تربیت سول سرونٹس نوں عوام نال چنگا برتائو بارے کجھ پڑھایا جاندا اے، دوران تربیت سول سرونٹس نوں عوامی مسائل حل کرن تے عوامی مجبوریاں سمجھن دا کوئی نسخہ دسیا جاندا اے یا فیر ایہناں نوں انگریز دے طریقے دے مطابق عوام نوں حکومت دے تابع رکھن دی ای تربیت دتی جاندی اے جس شان نال، جس اکڑ نال، جس انداز نال ساڈی اے سی میڈم رمضان بازار توں روانہ ہوئیاں ایہنوں ویکھدے ہوئے اسیں کہہ سکنے آں کہ ساڈے بیوروکریٹس دے تربیتی ادارے اُتے کم کرن دی لوڑ اے۔
صاحبو! قابل غور گل تے ایہہ وے کہ میرے ملک اُتے عوامی ووٹ نال تن وار حکومت کرن والے میاں محمد نواز شریف جے اپنے بالاں نوں ایسے ملک دا شہری بنائے رکھدے میں کہنا ایہہ چاہنا واں کہ ملک دے منتخب وزیراعظم دی اولاد جے ملک وچ ای کاروبار کردے جے نواز شریف صاحب پلیٹ لیس دے ناں اُتے ملکی جیل توں رہائی حاصل نہ کردے تے یقینی طور اُتے ایہناں دا سیاسی قد ودھدا۔ مینوں حیرت ہوندی اے کہ جس ملک نے ساڈے لوکاں نوں عزت دتی جس ملک نے ساڈے لوکاں نوں طاقت دتی اوہ اپنے اختیارات دے بل بوتے اُتے اپنی اولاد نوں اپنی جائز ناجائز دولت نال دوجے ملکاں وچ کاروبار شروع کروا دیندے نیں اج ساڈے ملک وچ جے جج جرنیل تے بیورو کریٹ بوہت تگڑے بیان کیتے جاندے نیں تے ایس دی وڈی وجہ ایہہ وے کہ ساڈے زیادہ تر سیاست دان بزدل، موقع پرست، اقربا پرور، چور، بدکردار، منافع خور، دیہاڑی باز تے پیسے دے پجاری نیں جس دن ساڈے سیاست دان باکردار، باشعور تے صحیح معنیاں وچ عوامی نمائندگی کرنا شروع ہو گئے ایسے دن توں اوہ دلیر ہو جان گے ایسے دن توں ایہناں دی عزت ہونا شروع ہو جائے گی ایس دن توں سارے ادارے ایہناں دی گل نوں دل نال منن لگن گے تے ایس دن توں عوامی مسائل وچ کمی آنا شروع ہو جائے گی۔ مینوں حیرت ہوندی اے کہ پچھلے کئی سالاں توں پنجاب حکومت رمضان بازاراں دے ناں اُتے کروڑاں ارباں دا خرچہ کردی اے پر عوام نوں اوتھوں دو نمبر مال ای ملن دی خبر آندی اے۔ میری تجویز اے کہ ہر سال رمضان بازاراں دے ناں اُتے خرچ کرن دے بجائے جے سرکار روزمرہ استعمال دی شیواں اُتے لگے اپنے ٹیکس اک مہینے لئی ختم کر دتا کرے یا کسے سکیم دے تحت گھٹ آمدنی والیاں تے سفید پوش لوکاں دی مالی مدد کر دتا کرے تے ایہہ کم رمضان بازاراں وچ سرمایہ کاری کرن توں کدھرے بہتر ہو سکدا اے۔