عوام کیہ کرے ،کتھے جاوے…؟
لكهت:ڈاکٹر اختر شمار
کجھ مہینے دی غیرحاضری مگروں قارئین نال رابطہ ہو رہیا اے۔ ایس عرصے وچ کناں ای پانی پلاں دے تھلیوں رڑھ گیا‘ پر ساڈے حالات انج دے انج ای نیں۔ وباء دی تریجی لہر نے لوکاں دا جینا عذاب بنا دتا اے ہن تے حال ایہہ وے کہ عوام حکومتی تدبیراں تے وی کن نہیں دھردی‘ رینجر تے فوج شہراں وچ موجود ہون دے باوجود وی لوک نہ سماجی فاصلے دا خیال رکھ رہے نیں تے نہ ای ماسک دا استعمال مناسب طریقے نال کیتا جا رہیا اے۔ ماہ رمضان وچ دکاندار تے تاجر حضرات وی ’’عید‘‘ بنان دی فکر وچ دبلے ہوئی جا رہے نیں ایہو تے اک مہینہ اوہناں لئی منافع خوری تے پورے ورھے دیاں روٹیاں اکٹھیاں کرن دا ہوندا اے۔ رمضان المبارک دیاں برکتاں نال‘ گھٹیا تے خراب مال وی وک جاندا اے ہور تے ہور گلیاں سڑیاں سبزیاں تے پھل وغیرہ وی دونے ریٹاں تے وِک جاندے نیں۔ پکوڑیاں سموتیاں دے بناں پاکستانی روزہ افطار ای نہیں کر سکدے ایس لئی ایہناں شیواں وچ باسی سبزیاں آلو‘ پالک بطور خاص استعمال وچ لیائیاں جاندیاں نیں۔ زندگی دی ضرورت دا ہر سامان کئی گنا ودھ مُل دے نال ویچیا جاندا اے انج جیویں سارے منافع خوراں دی چاندی ایسے مہینے وچ ای ہوندی اے۔
رمضان بازاراں تے عید بازاراں وچ رش ویکھن والا ہوندا اے‘ اجہے حالات وچ وی ’’کرونا ایس او پیز‘‘ دا خیال کیویں رکھیا جا سکدا اے؟ حکومت نے سخت اقدامات دا فیصلہ کیتا اے تے مکمل لاک ڈائون کرنا چاہندی اے تے عید دے نیڑے تے وڈے بازار‘ شاپنگ مال تے ٹرانسپورٹ تک بند کیتی جا رہے نیں۔ ایس اعلان دا اک نقصان ایہہ وے کہ عید دی شاپنگ لئی پہلے ای بازاراں وچ رش لگ گیا اے۔ پنجاب وچ کرونا دا جندو سر چڑھ کے بول رہیا اے پر لوک احتیاط کرن نوں تیار ای نہیں۔ اگلے دن اک سر پھریا تے مذاق دے انداز وچ کہہ رہیا سی کہ پاکستانی مسلمان جے ایہ اعلان سنن کہ کل قیامت آن والی اے تے اوسے ویلے تسبیحاں تے جائے نماز مصلے دوگنا مہنگے ہو جان۔
حکومت دی رٹ دا حال ایہہ وے کہ کسے تھاں کوئی حکم منن نوں تیار نہیں۔ عمران خان اک ہیرو کھڈاری سی اوہناں دا رعب اک سیاستدان دا بالکل وی نہیں۔ صحافی ہون یاں دوجے ادارے تے اوہناں دے افسران عمران خان نوں ’’ایزی‘‘ لیندے نیں تے پنجاب وچ تے ایس توں وی برا حال اے کہ اک بالکل اجنبی جیہا شریف بندا وزیراعلیٰ اے اوہدی گل ساڈی ’’افسرشاہی‘‘ کیویں سن سکدی اے۔ ایتھے پنجاب وچ تے اک بارعب تے سنجیدہ مدبر شخصیت دی لوڑ سی ایس لئی اجے تک وزیراعلیٰ دی شخصیت سازی دا کم جاری اے تے اوہ تربیت حاصل کر رہے نیں۔ ایہدا نقصان ایہ ہویا کہ پنجاب دی گورننس دا کوئی پرسان حال نہیں۔ اُتوں اوہناں دے مشیر وی عجیب بنائے ہوئے نیں۔ اگلے دن سیالکوٹ دے رمضان بازار دا دورا کرن والی بھاری بھر کم سیاستدان فردوس عاشق اعوان نے اک نوجوان اسسٹنٹ کمشنر نوں بازار وچ ای جھاڑ پلا دتی‘ مشیروزیراعلیٰ دا رویہ بڑا نامناسب سی اے سی دی کوتاہی وی سی تے تحمل نال وکھرا ہو کے سمجھایا جا سکدا سی پر اوہناں نے تے اے سی تعینات کرن والے نوں وی نہ چھڈیا… ہو سکدا اے مشیر صاحبہ نوں وی اوسے بندے نے تعینات کیتا ہووے۔ سربزم تے بچہ وی جھڑکاں برداشت نہیں کردا اوہ تے اک شہر دی اے سی سن۔ دسیا گیا اے کہ اے سی بڑی باصلاحیت افسران وچ شامل ہوندیاں نیں۔ مشیرصاحبہ نے سربازار اوہناں نال توہین آمیز سلوک کیتا آفرین اے کہ خاتون افسر چپ کے وکھریاں ہو گئیاں‘ ہن سوشل میڈیا تے مشیرصاحبہ دی دھول اڑدی جا رہی اے واللہ اعلم بالصواب۔
ایہ ٹھیک اے کہ ساڈے ایتھے بیوروکریسی اپنے آپ نوں ناخدا سمجھدی اے پر سارے افسران اکوجہے نہیں ہوندے۔ ساڈے بیوروکریٹس وچ نویں بھرتی ہون والے افسران بھاویں اوہ مرد ہون یاں عورتاں‘ پرانے افسراں توں چنگے نیں۔ فردوس عاشق ایس ویلے نہ تے منتخب ممبر اسمبلی نیں نہ سینٹ د ا کوئی عہدہ اوہناں کول اے‘ اوہناں نوں پتہ نہیں کہڑیاں خوبیاں پاروں کسے نہ کسے طرح کوئی عہدہ دے دتا جاندا اے اک تے وزیراعلیٰ پنجاب اُتوں اوہناں دی مشیر فردوس عاشق اعوان… جیویں اک کریلا دوجا نیم چڑھا… اجہے حالات وچ لوکاں دا کوئی پرسان حال نہیں۔ ٹریفک دا نظام ہووے یاں بازاراں وچ مہنگائی دا طوفان تے ’’وبائی کہرام‘‘ مرنا صرف غریب نوں ای پیندا اے۔ خالص چیزاں کدھرے نہیں ملدیاں۔ گل کوئی وی ہووے سکول کالج فوراً بند کر دتے جاندے نیں بازاراں‘ غلہ منڈیاں تے بس اڈیاں‘ ریلوے سٹیشناں تے رش اوسے طرح اے۔ نزلہ صرف سکولاں کالجاں تے ڈگدا اے۔ شفقت محمود ہر دوجے دن سکول بند کرن دے اعلان لئی تیار رہندے نیں۔ ایہ رحمتاں دا مہینہ اے تے مہنگائی نوں نتھ پان والا کوئی وزیر نہیں۔ عوام کتھے جاوے؟۔٭٭
