جناب اک پھیرا میترانوالی دا وی لائو…

لكهت:مطلوب وڑائچ

میرے آبائی قصبہ میترانوالی دی کل آبادی 25 گھراں تے مشتمل اے تے ایتھے مسجداں‘ امام بارگاہواں تے درجن بھر مدرسیاں سنے عبادت گاہواں دی مجموعی گنتی پینتی دے نیڑے اے غرض کہ ہر مسلک دی بھرویں نمائندگی موجود اے۔ قصبے دا مرکزی بازار تقریباً دو کلومیٹر لماں اے تے ہر دکان یاں کاروباری ادارے دے فرنٹ کائونٹر تے برائے عطیہ دے کیس بکس پئے نظر آئوندے نیں۔ اک سروے موجب صرف قصبے دے اندر سو توں ودھ کل وقتی تعویذ‘ دھاگہ تے دم درود کرن والے جعلی عامل ہر ویلے سرگرم عمل نیں۔ قصبے وچ میلیاں‘ ٹھیلیاں تے عرساں دا سیزن وی ایس توں وکھرا اے۔ سادہ لوح پنڈ دے رہن والیاں نوں مذہب دے ناں تے ڈرا دھمکا کے اوہناں دی جمع پونجی تے زمین و جائیداد ہتھیان دا اک نہ رکن والا سلسلہ جاری اے۔ مسجداں دے منتظمین کجھ ورھیاں وچ صاحب حیثیت بنے نظر آئوندے نیں۔
دوستو! رمضان المبارک دا مبارک مہینہ جاری اے تے اتفاق نال مینوں ایس مبارک مہینے دے پہلے عشرے دے کجھ دیہاڑے آبائی قصبے وچ گزارن دی سعادت نصیب ہوئی۔ سویرے دو وجے سحری دا سائرن وجنا شروع ہو جاندا اے۔ سحری دے بعد رمضان دی وجہ نال کھان پین والیاں شیواں ویچن والے خوانچاں فروش سرگرم ہو جاندے نیں جہڑے آلو‘ ٹماٹر‘ گوبھی دیاں آوازاں لانا شروع کر دیندے نیں۔
دوستو! ایہدے وچ کوئی شک نہیں کہ اسیں مذہبی تے ثقافتی طور تے اک بھرویں تریخ رکھنے آں۔ بچپن وچ اسیں سحری ویلے ڈھول دے نال صوفیانہ کلام گاندے ہوئے لوکاں نوں سحری لئی جگان دا رواج ویکھیا اے تے افطاری دے ویلے صرف پنڈ دی اک جامع مسجد توں نوبت وجائی جاندی سی بعد وچ اوہدی تھاں الیکٹرانک سائرن نے لے لئی پر ایہ اوہ دور سی جدوں عام انسان دے کول گھڑی وی نہیں سی ہوندی حالاں کہ گھراں وچ وال کلاک گھٹ وی گھٹ ہوندے سن۔ صرف محلے دی جامع مسجد وچ کلاک لگا ہوندا سی جہنوں ویکھ کے موذن سحری تے افطاری دا ویلا دسدا سی تے پچھلے چوداں سو ورھیاں توں پورے عالم اسلام وچ ایہو طریقہ اپنایا جاندا رہیا پر پچھلے پنجاہ ورھیاں توں جدوں کلاک تے گھڑی دا استعمال عام ہویا تے اج حالات ایس طرح نیں کہ تقریباً ہر بندے دے کول اوہدے اپنے موبائل فون وچ ڈیجیٹل اذان فیڈ اے تے اوہدے نال الارم وی۔
دوستو! ایہو لائوڈر سپیکر اے جہنوں کجھ عشرے پہلے تک حرام قرار دتا جاندا رہیا۔ ہن مریضاں دا خیال نہ رکھنا تے اچی آواز وچ لائوڈ سپیکر دے استعمال نے عام انسان نوں وی ذہنی مریض بنا دتا اے۔ میں ذاتی دلچسپی تے تجزیے لئی اک سروے دا پربندھ کیتا جتھے میرے علم وچ ایہ گل آئی کہ قصبہ دے سترفیصد رہائشی ہیپاٹائٹس بی تے سی توں علاوہ شوگر تے کڈنی تے ٹی بی دے موذی مرض وچ مبتلا نیں۔ پنجی ہزار دی آبادی وچ اک وی کوالیفائیڈ ایم بی بی ایس معالج نہیں۔ عطائیاں دی بھرمار اے جو غریباں دا ماس وی نوچ رہے نیں تے بیان کردہ حالات و واقعات وچ پاکستان دے سب توں ودھ ریونیو دین والے ضلع سیالکوٹ تے تحصیل ڈسکہ جتھے بیروزگاری دی شرح صفر فیصد اے پر علاقے دے مکین کس عذاب چوں گزر رہے نیں ایہدا ا ندازا مقامی ڈی سی نوں شاید نہیں۔ امن و امان‘ چوری چکاری‘ قتل و غارت‘ لٹ مار تے ڈکیتیاں عروج تے نیں۔ مقامی ایس ایچ او تھانہ بمبانوالہ شاید گھوڑے ویچ کے ستے رہندے نیں۔ پولیس دا موبائل گشت نہ ہون دے برابر اے اُتوں مذہبی شدت پسندی تے کرونا ایس او پیز تے عملدرآمد دی شرح دوفیصد توں ودھ نہیں۔ ایہدے وچ کوئی شک نہیں کہ وزیراعظم عمران خان دیاں پالیسیاں مملکت نوں اپنے پیراں تے کھڑا کرن لئی سن پر اوہناں دے نال موجود ٹیم اوہناںدی مرضی دے مطابق پرفارم کرن توں عاری اے۔ میری وزیراعلیٰ پنجاب عثمان بزدار اگے گزارش اے کہ اوہ تھوڑا جیہا وقت کڈھ کے کدی ڈسکہ تے میترانوالی دا وی چکر لا لین شاید ایسے وجہ نال تھانہ بمبانوالہ دا ایس ایچ او جاگ جاوے۔ ہن تے میں بس ایناں ای کہواں گا کہ میرے دوست شعیب بن عزیز دے بقول:
میرے میترانوالی پر بھی اِک نظر کر
تیرا مکہ رہے آباد مولا