چپ ای چنگی اے

لكهت:سعد اللہ شاہ

خیال کچھ بھی نہیں ہے خیال کیا کچھ ہے
ملال ہونے لگے تو ملال کیا کچھ ہے
سوال کچھ بھی نہیں ہے اگر جواب نہ ہو
جواب ملنے لگے تو سوال کیا کچھ ہے
کہن دا مطلب ایہہ وے کہ چپ ای چنگی اے کجھ سوالاں دا جواب نہیں ہوندا تے کجھ جواب وی سوال ہوندے نیں۔ تسیں ویکھدے نہیں کہ سیاستداناں نوں اقتدار وچ آ کے اوہناں سوالاں دے جواب دینے پیندے نیں جو اوہناں نے اودوں اٹھائے سن جدوں اوہ اپوزیشن وچ سن۔ اپوزیشن وچ ہوندے ہوئے کھون لئی کجھ نہیں ہوندا تے حکومت وچ آ کے ساریاں دانائیاں تے تدبر شخصیت وچ آ جاندا اے۔ جدوں میں لکھ رہیا واں تے کھڑکی دے اوس پاسے بارش ہو رہی اے۔ پودیاں دا سبز رنگ دھل کے چمکن لگ پیا اے سوچنا واں کہ بندے دا گریہ وی تے ایسے طرح باطن نوں شفاف کردا ہووے گا۔ گل تے اوس کیفیت وچ جان دی اے۔ اخبار دی سرخی ویکھ کے کجھ اطمینان محسوس ہویا کہ وزیراعظم نے فرمایا حکومت دا اصل کم لوکاں دی خدمت اے۔ پونے تن ورھیاں اندر ایہ احساس ہونا چھوٹی گل نہیں۔ ایتھوں تک تے اسیں اوہناں توں متفق آں کہ کسے طرح لوکاں دا بھلا ہووے پر درمیان وچ اوہ پی ڈی ایم نوں چھیڑ دیندے نیں کہ طاقتور قنون توں بچن لئی پی ڈی ایم ورگا اتحاد بنا لیندا اے۔ گل بالکل ٹھیک اے سامنے دی مثال جہانگیر ترین دی اے ایہدے تے یقینا تسیں کھلوتے آں تے بڑی گل اے کہ حق تے ڈٹ جانا وی چاہیدا اے۔ ایتھوں کردار بن دے نیں۔ تسیں ٹھیک کہندے او کہ قنون تے ساریاں لئی اے فائز عیسیٰ وی تے بھگت رہے نیں۔ اکثر تے ایہو ویکھن وچ آیا اے کہ جو وی آیا اوہ اپنے ولوں کدی نہیں آیا۔ شہزاداحمد دا شعر یاد آ گیا:
اب نبھانی ہی پڑے گی دوستی جیسی بھی ہے
آپ جیسے بھی ہیں نیت آپ کی جیسی بھی ہے
پتہ نہیں اسیں تعمیر ول کیوں نہیں آ رہے۔ کسے تھاں وی حکومت تے اپوزیشن نیڑے آئوندی نظر نہیں آئوندی۔ جے آئوندی اے تے کجھ ہور دور ٹر جاندی اے۔ نفرتاں گھٹ نہیں رہیاں تسیں موجودہ جُتیاں دا معاملہ ای لے لوو کہ میں پہلے وی عرض کر چکیا واں کہ شاہد خاقان عباسی نے کوئی شائستہ گل نہیں کیتی۔ ہن ایہدے تے اسدقیصر دا نوٹس دینا کہ عباسی صاحب ست دیہاڑیاں اندر معافی منگو گل نوں ہور ودھاوے گا معذرت کرن وچ کوئی حرج نہیں پر دوجے شاید اوہناں نوں ڈٹ جان دا مشورہ دین اکبرالٰہ آبادی نے وی تے ایہو کہیا سی کہ:
بوٹ ڈاسن نے بنایا اور میں نے مضمون لکھا
شہر میں مضمون نہ پھیلا اور جوتا چل گیا
فیاض الحسن چوہان فرماندے نیں کہ شاہد خاقان عباسی نے سیاسی اقدار دیاں دھجیاں اڑا دتیاں۔ نال ای اوہناں نے ایہ وی فرما دتاکہ پیپلزپارٹی نے اجلاس وچ شمولیت نہ کر کے اپنے منہ تے کالک ملی اے۔ تبصرے دی لوڑ نہیں کہ میں کجھ ہور گل کرنا چاہنا واں۔ محترمہ فردوس عاشق اعوان نوں داد دینا چاہواں گا کہ اقبال ڈے تے اوہناں نے بڑا ای زبردست بیان جاری کیتا کہ پی ٹی آئی فکراقبال دیاں امنگاں تے فلسفے دی ترجمان اے تے فیر کہیا کہ اقبال دے فلسفہ خودی نوں عمران نے عملی تعبیر دتی۔ خیر باقی گلاں تے اک پاسے ایہ بلاول کہڑے انداز وچ کہہ رہے نیں کہ عمران خان مہنگائی مافیا دے سرپرست نیں۔ اوہ ضد چھڈن استعفیٰ دے کے گھر جان۔ ایہ تے سراسر زیادتی دی گل اے مہنگائی تے بھٹو دے زمانے وچ وی ہوئی سی تے اوہناں دیاں تقریراں اج وی سنیاں جا سکدیاں نیں۔ اصل وچ اسیں مہنگائی محسوس کر لئی اے۔ سانوں وی کوشش کرنی چاہیدی اے کہ اپنے اندر برداشت دی عادت پائیے۔ ہن کھنڈ سستی دستیاب ہون لگی اے تے ہائیکورٹ دا بیان آ گیا اے کہ 15 روپیے دے پچھے قوم نوں بھکاری بنا دتا۔ لائناں نہیں لگنیاں چاہیدیاں تسیں یقین کرو تاجر بڑے ظالم نیں۔ نوازشریف دے دور وچ جدوں شہبازشریف نے تن سو روپیے دا آٹے دا تھیلا ٹرکاں وچ لد کے غریباں لئی دتا تے تاجراں نے مزدور ہائر کر لئے جو لائناں وچ کھلو کے اوہناں دے تھیلے لیاندے سن۔ مینوں ایہدے توں شامل واجا دی اصطلاح یاد آ گئی۔ تہانوں دسدا جاواں کہ ایہ شامل واجا کیہ ہوندا اے جناب ایہ واجے والے شادی والیاں توں تے تن ہزار فی واجے والا لیندے نیں پر اپنی نفری وچ دیہاڑی دار وی شامل کر لیندے نیں کہ ہزار روپیے تے مزدور لیا تے اپنی ٹیم وچ شامل کر لیا کہ بس واجے نوں منہ لا کے رکھنا اے وجانا نہیں‘ وجان گے باقی جو اصل نیں۔ ایسے طرح حکومت وی کئی شامل واجیاں وچ نفری پوری کردے نیں۔ حکومتاں وی انج ای لوکاں نوں ابلائج کردیاں نیں تے لمیاں لمیاں تنخواہواں دیندیاں نیں۔ اوہ صرف لک آفٹر کردے نیں۔
دشت کی پیاس بڑھانے کے لئے آئے تھے
ابر بھی آگ لگانے کے لئے آئے تھے
میرے پیارے دوستو! نکی جہی گل اپنی مصروفیت دے حوالے نال ایہ کہ رمضان المبارک تہاڈی طرح میں وی گزار رہیا واں۔ پہلی واری خیال آیا کہ تراویح دا اصل مقصد تے ایہہ وے کہ گھروں قرآن پاک ترجمے نال پڑھ کے جائو۔ میں تہانوں اپنے تجربے وچ شریک کرنا چاہنا واںکہ مینوں تے بڑا فائدہ ہویا اے اک تے میں ڈاکٹر ناصرقریشی‘ غلام عباس جلوی‘ افتخار منہاس تے عبدالغفور دے نال رَل کے عربی کلاس شروع کیتی حمید حسین صاحب سانوں عربی دی پچھان کروا رہے نیں حالاں کہ اسیں عمر دے اوس حصے وچ اپڑ گئے آں جتھے یاد گھٹ ہوندا اے تے وِسردا زیادہ اے۔ چہرے یاد رہتے ہیں اور نام بھول جاتے ہیں۔ دوجی میری خوش قسمتی کہ میں اک مسجد حسان بن ثابت منتخب کیتی کہ اوتھے قاری حبیب اللہ قرآن سنا رہے نیں اوہ عالم دین تے مفسر قرآن نیں تلاوت ہولی ہولی تے سمجھ کے کردے نیں کئی واری تے اوہ ایناں کھو جاندے نیں کہ اوہناں تے رقت طاری ہو جاندی اے۔ اک اک لفظ موتیاں وانگوں ادا ہو رہیا ہوندا اے۔ بس اک کوشش اے کہ کائنات دی سب توں وڈی کتاب دی تفہیم ہو جاوے۔ ایہ گل بڑی دیر دے بعد سمجھ وچ آئی۔ واقعی اصل تے ایہو اے نہیں تے عمر تے ایویں ای لنگھ جاندی اے بس۔٭