پِلاک ولوں’’مدح رحمۃ للعالمین ﷺ ‘‘ البم ریلیز

یس البم وچاستاد حامد علی خان، ترنم ناز، عارف لوہار، انور رفیع، شبنم مجید، خلیل حیدر، حنا نصراللہ، عمران شوکت علی،ثمینہ ملک، تحسین سکینہ، شبانہ عباس تے علی عباس ہوراں بارگاہ رسالتﷺ وچ عقیدت دے پھُل پیش کیتے

رپورٹ: علی قیصر شاہ

پنجاب انسٹیٹیوٹ آف لینگویج آرٹ اینڈ کلچر، محکمہ اطلاعات وثقافت پنجاب نے رمضان المبارک دے بابرکت مہینے دی مناسبت نال ’’مدح رحمۃ للعالمین صلی اللہ علیہ و آلہٖ وسلم‘‘ دے ناں توں اک نعتیہ البم ریلیز کیتا اے۔ ایس البم وچ ملک دے نامور گلوکاراں نے بارگاہ نبوی ﷺ وچ گلہائے عقیدت پیش کیتے نیں۔ ثنائے ختمِ رُسُل صلی اللہ علیہ وآلہٖ وسلم پیش کرن والیاں وچ استاد حامد علی خان ، ترنم ناز، عارف لوہار، انور رفیع، شبنم مجید، خلیل حیدر، حنا نصراللہ، عمران شوکت علی، ثمینہ ملک، تحسین سکینہ، شبانہ عباس تے علی عباس شامل نیں۔

وزیراعلیٰ پنجاب سردار عثمان احمد خان بزدار نے ایس موقعے اُتے اپنے خصوصی پیغام وچ کہیا اے کہ شان رحمۃ للعالمین ﷺ ساڈے ایمان دا حصہ اے جس دا مقصد نفرت، حسد، تعصب تے تفریق دی دُھپ وچ سڑدی دنیا نوں تعلیمات نیوی ﷺ دی رحمتاں بھری ٹھنڈی ٹھنڈی چھاں نال روشناس کرانا اے۔ ایس ہدیہ نعت دے ذریعے دنیا نوں ایہہ باور کران دی کوشش کیتی گئی اے کہ ساڈے پیارے نبی ﷺ پوری کائنات لئی رحمت نیں اوہ انسانیت دے احترام تے وقار دے داعی نیں تے ایہناں اُتے اترن والا دین انسان دی سلامتی تے فلاح دا ضامن اے۔
ڈی جی پلاک ڈاکٹر صغرا صدف نے کہیا کہ رمضان المبارک دے بابرکت مہینے وچ ایس نعتیہ البم دا اجراء کر کے بے حد روحانی خوشی ملی اے۔ پلاک ہمیشہ معاشرے وچ امن خیر تے سلامتی لئی کوشاں رہوے گا۔ پلاک ولوں ریلیز ہون والے نعتیہ البم وچ شامل نعتاں نوں پلاک لوک سٹوڈیو، پلاک تے ایف ایم 95، پنجاب رنگ دے سوشل میڈیا نیٹ ورک دے ذریعے عوام تیکر اپڑان دا عمدہ بندوبست وی کیتا گیا اے۔