پیٹ نہ پئیاں روٹیاں تے سبھےگلاں کھوٹیاں

لکھت: طاہر وزیر آبادی

اُچے وعدیاں تے سنہری کاریاں نال لوکائی دیاں ہمدردیاں سمیٹن والیاں نوں تخت نصیب ہوئیاں ڈیڈھ ورھا بیت گیا پر حکمراناں اجے تائیں عملی طور تے ککھ وی نہ کیتا۔ہوائی وعدےہوا ہو گئے۔تے سنہری کارے لوہا ہو کے رہ گئے۔ اقتدار دی اُچی پینگھ ہر دوجا ہلارا صرف وزیراں تے مشیراں دا مقدر ہو گیا۔پکے مکاناں دا وعدہ عا رضی کچے شیلٹر ہوماں دی بے ترتیبی وچ گواچ گیا۔ایسے ہی طراں دے کئی ہور پروگراماں دے وعدے ہر دوجے دیہاڑے کیتے جا رہے نیں ۔بڈھیاں لئی بالاں لئی تے کدی نوجواناں لئی وکھو وکھ پروگراماں دا اعلان وزیر اعظم دیاں مبارکاں نا ل کیتا جا رہیا اے۔ایسے طراں دے سہولتی پروگراماں دے اعلان لنگیاں حکومتاں وی ڈھیر کیتے۔
تے ہر پروگرام دے ثمرات سیاسی کوٹھیاں بنگلیاں تے پلازیاں تیک ہی محدود رہے۔
ویلے دی سرکار پہلیاں سرکاراں نالوں کئی ہتھ اگے نکلی۔ روزانہ دے حساب نا ل ہر شے دا مُل ودھ رہیا اے۔ نکے نکے کاروبار، دوکاندار یاں تے کارخانے ٹھپ ہوندے جا رہے نیں تے بیروزگاری نے ماڑے مہانتراں نوں خودکُشیاں تے مجبور کر چھڈیا اے۔دو وقت دی روٹی وی مزدور لوکاں دے نصیب چوں نکلدی جا رہی اے۔اُتوں وزیر اعظم ہر ہفتے اپنے وزیرا ں مشیراں نوں کٹھیاں کر کے مبارک باداں دے رہے ہوندے نیں۔رب جانے ایہہ مبارکباداں کہڑی گل توں ونڈیاں جا رہیاں نیں ؟؟؟عام شہریاں دے کاروبار تباہ تے حیاتی تنگ ہو رہی اے فیر وزیراں نوں مبارک باداں کیوں دتیاں جا رہیاں نیں؟ کدھرے ایہ مبا رکباداں عوام نوں دکھاں دے بیڑھ وچ سُٹن دیاں تے نہیں؟؟؟- سیانے کہندے نیں، پیٹ نہ پئیاں روٹیاں تے سبھےگلاں کھوٹیاں ــــــ—-
سیاسی چوراں ،ڈاکواں تے لُٹیریاں توں لُٹیا قومی خزانہ واپس لین دے سبھے وعدے ٹھُس ہو گئے۔ بقول وزیر ِاعظم دو مرکزی ڈاکو میاں
محمد نواز شریف تے آصف علی زرداری متھے گئے فیر اپوزیشن دے درجناں سیاسی آگوواں نوں قیدی بنایا گیا ۔ افسوس انجدا کوئی مبارکبادی
اعلان سامنے نہیںآیا کہ ایہنے ارب روپے سیاسی لُٹیریاں توں وصول کیتے گئے ۔ فیر ہولی ہولی سبھے لیڈر اآزاد وی ہو ندے جا رہے نیں ۔
میاںمحمد نواز شریف لندن تےآصف علی زرداری بلاول ہائوس کراچی جا بیٹھے نیں۔ ایس طراں حکمراناں اپنا ڈیڈھ سال تجربیاں وچ گوا چھڈیا–اج ملک دا ہر دو جا شعبہ اپنے اپنے مسئلیاں دے حل لئی دیس دیاں وکھو وکھ سڑکاں اُتے احتجاجی وکھالے کر رہیا اے۔بیمار لوک
ہسپتالاں وچ تے احتجاجی سڑکاں اُتے کھجل ہو رہے نیں۔
پورا سچ ایہ اے کہ عمران خاں وزیر ِ اعظم نیں۔لوکا ں عمران خاںنوں اپنا نجات دہندہ سمجھدیاں انھے واہ ووٹاں پائیاں ۔ لوکا ئی دیا ںآساں تے اُمیداں دا مرکز عمران خاں بن گئے ۔عمران خاں کدی وی کرپٹ نہیں ہو سکدے۔ایس گل تے چوکھے لوکاں نوں پک اے ۔جد کہ
اوہناں دے وزیراں مشیراں اُتوں لوکاں دا یقین مُکدا جا رہیا اے۔عمران خاںدی ذات اُتے کسے نوں کوئی شک نہیں پر کیہ فیدا جے عام شہریاں دے دکھ تھوک دے حساب نال ودھدے جا رہے نیں۔ اج لوک روندے نیں تے اکھاں چوں اتھرو نہیں بلکہ لہو چوندا اے۔
بجلی،گیس تے پٹرول دا مُل لوکائی دے وس چوں باہر ہوندا جا رہیا اے۔ ہر ہفتے پٹرول ،گیس تے بجلی دا مُل ودھائی جانا کتھوں دی دانش مندی اے؟؟سرمایہ دار تے جاگیر دار طبقے نوں کوئی فرق نہیں پیندا تے نہ ہی حکومتی آگوواں نوں کوئی دکھ اپڑھدا اے۔ما ڑے تے غریب لوک ہی جا رہے نہیں۔جہدا اِتبار کیتا اوسے ڈنگ ماریا۔۔۔
موجودہ سرکار نوں سوچنا پوے گا کہ پنڈ آباد رہوے گا تے چوہدر وی قائم رہوے گی تے جے پنڈ ہی اُجڑ گیا تے تہاڈی چوہدر وی دفن ہو جاوے گی۔جویں کِویں ہُن عام شہریاں توں منگھیائی دا بھار چُک لو۔ہُن تے ماڑے مہانتراںلئی زندہ رہنا وی ڈاہڈا اوکھا ہو گیا اے ۔
اج ماڑے لوک چیکاں وی مارن تے آوازگلے چوں باہر نہیں نکلدی۔ خان صاحب ہُن چوکھی توجہ دی لوڑ اے۔اجے ویلا تہاڈے ہتھ وچ اے۔ اپنے وزیراں مشیراں دا قبلہ درست کرو ۔ایناں نوں مبارک باد عوام دیون تاں گل پھبدی اے۔تسی ہر چوتھے دیہاڑے
مبارکاں دیندے چنگے نہیں لگدے۔مزا تاں اے کہ عوام خوش ہو کے مبارکاں دیون۔
؎ بھکھ دی ڈاہڈی جنگ وے خاناں لوکی ہو گئے تنگ وے خا ناں