کئی ویکھے نیں نویں ورھے

لکھت:لبنیٰ صفدر

بچپن توں کئی ورھیاں تک بھاویں میں وی دوجیاں وانگوں نویں ورھے نوں جی آیاں نوں کہندی رہی تے دوست احباب نوں جواباً نویں ورھے دی مبارکباداں وی دتیاں۔ کئی واری سوچدی آں تے عجیب جیہا احساس ہوندا اے کیہ تسیں لوکاں نے وی میری طرح محسوس کیتا کہ نویں ورھے وچ آخر کیہ نواں ہون والا اے؟ اوہی خوبصورت چارے موسم ہون گے، اوہی خوشی تے غم دا ملیا جلیا امتزاج ہووے گا، کجھ کھٹی میٹھی یاداں ہون گیاں، زندگی نوں تسیں ایسے جدوجہد تے تگ و دو نال گزارن دی کوشش کررہے ہوو گے، ہاں بھاویں ہر آن والے ورھے وچ زندگی گزارن دی مشقت پہلاں توں زیادہ ودھ چکی ہوندی اے۔ مہنگائی تے اخراجات زیادہ ہو چکے ہوندے نیں، ایہدے علاوہ آخر نواں کیہ اے؟ آخر ہر دسمبر دی آخری تریخ نوں بے بسی، محرومی تے مہنگائی نوں آخری دن کیویں سمجھ لیا جاندا اے تے ہر یکم جنوری دا استقبال انج کیتا جاندا اے جیویں پچھلے سارے دکھ آخری تریخ دے نال آخری ثابت ہون گے تے نویں تریخ خوشیاں دی نویں تریخ رقم کرن جا رہی اے، میری دعا اے کہ انج ای ہووے کہ ہر یکم جنوری ہر اک لئی بے پناہ خوشیاں لے کے آئے پر ایہ مثبت وچ تے ہے پر کسے حد تک حقیقت توں دور اے، خوشی تے غم ہر انسان دی حیاتی وچ آندے جاندے رہندے نیں دھپ چھاں دے موسم چلدے رہندے نیں۔ اللہ تعالیٰ نے انسان نوں اینی لچک دتی اے کہ اوہ دکھاں دا مقابلہ کر سکدا اے تے زندگی ایہناں دو کھٹے میٹھے موسماں دے نال ای رواں دواں رہندی اے ایس لئی خوشیاں دی تمنا ضرور کرنی چاہیدی اے پر نال ای نال مسئلیاں تے کٹھنائیاں دا مقابلہ کرن دی ہمت تے طاقت وی ہونی چاہیدی اے، رات دے بارہ وجے اچانک اسیں ھڑبڑا کے اٹھ بیٹھے، آتش بازیاں، بندوقاں تے گولیاں چلن دی اینی آوازاں سن کہ کن پئی آواز سنائی نہ دیندی۔ کجھ چر بعد جدوں حواس ذرا برقرار ہوئے تے سمجھ وچ آیا کہ نویں ورھے نوں کجھ من چلے تے لاابالی ہر فکر و فہم توں آزاد ویلکم کہہ رے نیں۔ نوجوان طبقہ زیادہ ای پرجوش نظر آندا اے۔ سمجھ توں بالاتر اے کہ اینی خوشی تے پرجوش ہون دی وجہ کیہ اے؟
کیہ اسیں اپنا محاسبہ کر لیا کہ پرانے ورھے وچ آخر اسیں کہڑے کارناے سرانجام دے دتے نیں جہناں تے اسیں تے ساڈا معاشرہ فخر محسوس کر سکیے۔ اسیں بحیثیت انسان اپنے فرائض کس حد تک سرانجام دتے، کہنوں کہنوں ساڈی ذات توں فائدہ اپڑیا تے اللہ نے جے ایناں قیمتی ویلا ساریاں نعمتاں تے آسائشاں دے نال سانوں دتا تے اسیں آخر ایہدا کس حد تک فائدہ چکیا۔ حضرت علی دا قول اے کہ اپنا ہر دن انج گزارو جیویں ایہ تہاڈا آخری دن ہووے۔ پر اسیں تے عمرِ خضر دی تمنا لئے بیٹھے آں تے ہن جد کہ نویں ورھے نوں اینے ولوے تے جوش نال جی آیاں نوں آکھیا جا رہیا اے تے ذرا رک کے کجھ اک لوکاں توں سوال تے کرو کہ آخر اوہ آن والے ورھے وچ کیہ کرن دا ارادہ رکھدے نیں۔ اجہے کہڑے گول تے اچیومنٹس نیں جہڑے اوہ حاصل کر پان گے یاں فیر اکثریت دی طرح معمول دے روز و شب گزار کے فیر توں اک ہور ورھے دی آمد دا انتظار کرن گے۔ غور کرو تے اپنے اپنے گریبان وچ ویکھن دا حوصلہ کرو تے انصاف نال سوچو تے یقینا سانوں لنگھے ہوئے ورھے دے کئی واقعات اے اپنے اعمال تے صرف ندامت ای نصیب ہووے گی۔ اسیں یکم محرم دے حساب نال اپنے روز و شب دی ترتیب کدی نہیں بنائی تے نواں سال اودوں بنایئے یاں یکم محرم نوں، سوال تے فیر وی اوہی اے جہدا اُتے تذکرہ کر چکی آں کہ آخر نویں ورھے وچ نواں کیہ ہون جا رہیا اے۔ اللہ نے جہڑی مہلت دتی تے جہڑے دن اسیں اللہ ولوں اپنے لئی بے پناہ خوشیاں تے نعمتاں نوں سمیٹیا دراصل اوہی ساڈا سب توں اہم تے خوبصورت دن اے۔ سانوں اللہ پاک توں خوبصورت دناں دی دعاواں کرنی چاہیدیاں نیں جہڑیاں سانوں ہر ورھے نصیب ہون۔اوہدیاں نعمتاں دا شکر کرنا چاہیدا اے جو ہر ورھے دے ہر دن وچ ساڈے تے فرض اے۔ ایس ورھے تے زیادہ خوش ہوند ی لوڑ وی نہیں کہ تسیں عوام تے مہنگائی دے حملے تیز تر کردے جا رہے او تہاڈے لوکاں دی زندگی نوں ہور مشکل بنان دی پوری تیاریاں عروج تے نیں، فلم تے کدوں دی شروع ہو چکی اے ہن کلائمیکس تے اپڑن والی اے۔
تفصیلات دے مطابق اوگرا نے پٹرولیم مصنوعات وچ 3روپے 10پیسے فی لیٹر وادھے دی سمری وزارت خزانہ نوں گھل دتی اوگرا نے پٹرول دی قیمت وچ 2روپے 61پیسے ودھا کے 3روپے 60پیسے فی لٹر وادھا کر دتا اے۔ ایہدے علاوہ ہائی سپیڈ ڈیزل تے لائٹ ڈیزل دیاں قیمتاں وی ودھا دتیاں گئیاں۔مٹی دا تیل مہنگا ہو گیا سبزی تے پھلاں دیاں قیمتاں اجے وی آسمان نال گلاں کر رہیاں نیں۔ ٹیکس تے ٹیکس لاگو کیتے جا رہے نیں۔ ایہ اے تہاڈے لئی نویں ورھے دا اک نکا جیہا تحفہ، مزید لئی ہور انتظار کرو تے جے ایہناں سب تے خوشیاں منانا بن دا اے تے فیر ہور جوش و خروش نال مناؤ۔ نہ بالاں دا ریپ روکیا جا سکے گا، نہ مہنگائی دا جن بوتل وچ بند ہو سکدا اے۔ نہ منشیات فروشی نوں ختم کر سکاں گے، نہ بھکاریاں دا قلع قمع ہووے گا۔ اوہی سیاستدان، اوہی چہرے ، اوہی گلاں اوہی وعدے ہون گے۔ فیر آخر نویں سال نویں پاکستان وچ نواں کیہ ہووے گا۔ میں تے سمجھ نہیں آ رہیا۔ یاد آیا نویں شیلٹر ہوم تے نویں لنگر خانے کھولے جا رہے نیں۔ قوم دی دم توڑدی خود داری نوں مکمل قتل کر دین تے لکھاں سلام،
تو نیا ہے تودکھا صبح نئی شام نئی
ورنہ اِن آنکھوں نے دیکھے ہیں نئے سال کئی