“اپوزیشن احتجاج تے یو ٹرن”

پی ڈی ایم دے اتحاد وچ شمولیت دے دوران تے اتحاد توں وکھرا ہو کے دونواں صورتاں وچ پیپلز پارٹی نے فائدہ چکیا اے

اکرم عامر

حکومت مخالف اپوزیشن اتھاد پی ڈیم دے سربراہ مولانا فضل الرحمان نے اک وار فیر باقی بچ جان والی پی ڈی ایم دے ذریعے حکومت ڈیگن تے کپتان نوں گھر گھلن لئی احتجاجی تحریک دا اعلان کردے ہوئے ملک دے مختلف شہراں وچ احتجاجی مظاہریاں دے شیڈول دا اعلان کر دتا اے تے نال ایہہ وی کہیا اے کہ حکومت ڈیگن تے کپتان نوں گھر گھلن تیکر پی ڈی ایم چین نال نہیں بیٹھے گی۔ مولانا فضل الرحمان ایس نوعیت دے بیان جولائی 2018 جدوں پی ٹی آئی نوں الیکشن وچ برتری حاصل ہوئی سی ایس دن توں دیندے آ رہے نیں حکومت نوں ڈیگن تے کپتان نوں گھر گھلن لئی ای اپوزیشن جماعتاں نے مولانا فضل الرحمان دی قیادت وچ پی ڈی ایم دے ناں توں اتحاد بنایا سی جیہڑا ہجے تیکر قائم اے پر پی ڈی ایم دی دو اتحادی جماعتاں پاکستان پیپلز پارٹی تے پاکستان عوامی نیشنل پارٹی اپوزیشن اتحاد توں الگ ہو چکی اے پر اپوزیشن اتحاد توں الگ ہون والی دونواں جماعتاں ہن وی پی ٹی آئی دی حکومت تے کپتان دے بظاہر خلاف تے حقیقی اپوزیشن ہون دی دعوے دار نیں، ہجے ایس گل دا عندیہ کھلنا باقی اے کہ سینٹ دے ایوان وچ حکومت دے سینٹرز نے اپوزیشن لیڈر یوسف رضا گیلانی دی حمایت کیوں کیتی؟ جے حکومتی سینٹرز انج نہ کردے تے مسلم لیگ ن دے اعظم نذیر تارڑ ایڈووکیٹ جیہڑے حالیہ الیکشن وچ پہلی وار سینٹرز منتخب ہوئے سن سینٹ وچ اپوزیشن لیڈر ہوندے، ہجے ایہہ عندیہ وی کھلنا باقی اے کہ یوسف رضا گیلانی نوں سینٹ وچ لیڈر آف دی اپوزیشن بنان دے پس پردہ حقائق کیہ نین؟ تے ایس حوالے نال حکومت تے اپوزیشن وچ کیہ ڈیل ہوئی؟ کیوں جے پیپلز پارٹی تے اے این پی تے ہن وی حکومت مخالف اپوزیشن ہون دی دعویدار نیں۔
پر ایتھے ایہہ گل واضح اے کہ پی ڈی ایم دے اتحاد وچ شمولیت دے دوران تے اتحاد توں الگ ہو کے دونواں صورتاں وچ پیپلز پارٹی نے فائدہ چکیا اے تے نہ صرف اپنے دو سینٹرز اضافی بنوائے بلکہ سینٹ دے مقتدر ایوان دا اپوزیشن لیڈر وی بڑی حکمت عملی نال پیپلزپارٹی نے اپنی جماعت دا بنوا لیا تے فیر پی ڈی ایم نوں کک کرا دتی۔ پی ڈی ایم دے اتحاد وچ شامل اپوزیشن جماعتاں ہن پیپلز پارٹی دے لائے زخم چٹ رہی اے تے مولانا فضل الرحمان ایہہ کہہ رہے نیں کہ پیپلز پارٹی تے اے این پی دی قیادت معافی منگ لین تے ایہناں نوں پی ڈی ایم وچ دوبارہ شامل کرن اُتے غور کیتا جا سکدا اے جد کہ دوجے پاسے ایسے طرح دا بیان پیپلز پارٹی دی قیادت ولوں دتا گیا اے کہ مولانا فضل الرحمان پیپلز پارٹی نوں نوٹس دین اُتے معافی منگن، سو ایس طرح پیپلز پارٹی تے پی ڈی ایم دی قیادت وچ لفظی گولہ باری جاری اے پر شاید پی ڈی ایم دے سربراہ مولانا فضل الرحمان بھولے بادشاہ نیں تے اوہ ایہہ گل بھُل چکے نیں کہ پی ڈی ایم نوں کھوکھلا کرن تے احتجاجی تحریک نوں ناکام یا موخر کران وچ پیپلز پارٹی دا بلواسطہ یا بلاواسطہ کردار رہیا اے۔ جدوں پی ڈی ایم دا اتحاد زوراں اُتے سی تے مولانا فضل الرحمان نے ضمنی الیکشن تے سینٹ الیکشن دے بائیکاٹ دا اعلان کیتا سی تے پیپلز پارٹی ای اوہ جماعت سی جس نے سب توں پہلے مولانا فضل الرحمان دے بیانیہ دی مخالفت کیتی تے کہیا سی کہ اسیں حکومت ل ئی کوئی محاذ خواہ اوہ ضمنی الیکشن ہون یا سینٹ الیکشن دا میدان کھلا نہیں چھڈا گے۔ پیپلز پارٹی دے ایس بیان دے بعد پی ڈی ایم دے سربراہ مولانا فضل الرحمان تے مسلم لیگ ن تے اپوزیشن اتحاد وچ شامل دیگر جماعتاں دی قیادت نوں ضمنی الیکشن تے سینٹ الیکشن دے بیانیہ اُتے یوٹرن لینا پیا سی۔
پی ڈی ایم نے اپوزیشن ارکان اسمبلی دے مشترکہ استعفےٰ پی ڈی ایم دے پلیٹ فارم توں دین دا اعلان کیتا تے حکومت دے چھکے چھٹ گئے سن تے کپتان اپنی وزارت عظمیٰ دے دوران پہلی وار پریشان ہوئے کہ اچانک پیپلز پارٹی دی قیادت نے سب توں پہلے پی ڈی ایم سربراہ دے بیانیہ دی مخالفت کیتی تے کہیا سی کہ پیپلز پارٹی کسے وی صورت وچ سینٹ الیکشن لڑے گی فیر پوری قوم نے ویکھیا کہ پیپلز پارٹی نے نہ صرف سینٹ الیکشن لڑیا بلکہ اپنی عددی تعداد نال سینٹرز دی دو نشتاں وی زیادہ جتیاں تے سینٹ وچ اپوزیشن لیڈر وی اپنا بنوالیا۔ ایس دوران مولانا فضل الرحمان نے 26 مارچ نوں اسلام آباد وچ لانگ مارچ دا اعلان کر رکھیا سی کہ پیپلز پارٹی نے سب توں پہلے اعلان کیتا کہ لانگ مارچ لئی موسم تے ملکی حالات ساز گار نہیں۔ جس دے بعد پی ڈی ایم نوں اسلام آباد لانگ مارچ اُتے وی یوٹرن لینا پیا سی تے مولانا فضل الرحمان نے لانگ مارچ موخر کر دتا سی۔ یاد رہوے کہ مسلم لیگ ن دے آخری دور وچ جدوں کپتان نے 126 دن دا لمبا دھرنا دتا تے اپوزیشن جماعتاں نے مسلم لیگ ن دی حکومت ڈیگن دی کوشش کیتی تے آصف علی زرداری اوہ کھلاڑی سن جنہاں نے اپوزیشن وچ ہون دے باوجود نواز شریف دی ڈگدی حکومت نوں سہارا دتا، ایسے بنا اُتے مسلم لیگ ن دی حکومت نے اپنے پنج سال پورے کیتے جد کہ ہن پی ڈی ایم وچ پیپلز پارٹی تے عوامی نیشنل پارٹی شامل نہیں تے مولانا فضل الرحمان نے اک وار فیر وڈا اعلان کیتا اے کہ پی ڈی ایم جولائی دے پہلے ہفتے توں ملک گیر احتجاجی مظاہریاں دا سلسلہ سوات توں شروع کرے گی۔ سیاسی ذرائع کہندے نیں کہ مولانا فضل الرحمان نوں ایس اعلان اُتے وی یوٹرن لینا پئے گا کیوں جے اپوزیشن جماعتاں وچ سردست اینی سکت نہیں کہ اوہ حکومت دے خلاف احتجاجی مظاہرے تے لانگ مارچ کر سکن کیوں جے حکومت بنوان تے ڈیگن والی بیورو کریسی ہجے پی ٹی آئی دا مکمل ساتھ دے رہی اے۔ وگڑدے حالات دے باوجود بیورو کریسی ولوں سب اچھا دی رپورٹ دتی جا رہی اے۔
سیاسی ذرائع کہندے نیں کہ پی ڈی ایم دے احتجاجی مظاہریاں دے جواب وچ پی ٹی آئی دے حامی شخصیات، وفاقی و صوبائی حکومتاں وی کپتان دی حمایت وچ جلسے تے جلوس کڈن دا پروگرام مرتب کر رہیاں نیں تاکہ اپوزیشن دے احتجاجی مظاہریاں دا توڑ کیتا جا سکدا۔ ایس لئی پی ٹی آئی دا سیاسی ونگ پلاننگ کر رہیا اے۔ ذرائع ایہہ وی کہندے نیں کہ حکومت نے جس طرح پیپلز پارٹی نوں پی ڈی ایم توں وکھرا کیتا اے۔ ایسے طرح حکومت مسلم لیگ ن نوں وی مولانا فضل الرحمان توں دور کرن وچ کامیاب ہو جائے گی۔ ایس لئی ایس گل دا کوئی امکان نہیں کہ پی ڈی ایم جولائی وچ لانگ مارچ یا مظاہرے کرے۔ تاں سیاست وچ کوئی گل حرف آخر نہیں ہوندی۔ آن والے گرمیاں دے دناں دا سیاسی ماحول وی گرم ہو سکدا اے۔ پر ایس سلسلے وچ کجھ وی کہنا قبل از وقت اے؟ ایہہ ویلا ای دسے گا کہ پی ڈی ایم احتجاجی مظاہریاں وچ کامیاب ہوندی اے یا حکومت پی ڈی ایم دا شیرازہ بکھیرن وچ کامیاب ہوندی اے ایس لئی قارئین نوں ویلے دا انتظار کرنا ہوئے گا۔