بانی انقلاب اسلامی ،سید روح اللہ الموسوی خمینی ؒ اک تاریخ سازشخصیت

اوہناںمظلوم و محروم قوماں نوں سامراجی طاقتاں نال جہاد و مقابلے دا جذبہ تے حوصلہ عطا کیتا

شبیر احمد شگری

امام خمینی )رح(دا ناں ذہن وچ آندے ای اک انج دے سیاسی تے انقلابی بندے دی تصویر اَکھاں وچ مجسم ہو جاندی اے جس نے کسے وی طاغوتی قوت دے اَگے سر جھکانا تے دور اسلام و قرآن دی الٰہی راہ توں انحراف رکھن والی کسے وی گل اُتے سمجھوتا کرنا کدی پسند نہ کیتا ہوئے جس دے انقلابی بیاناں تے آتشیں تقریراں توں ظلم و استبداد دے خرمن خاکسترد تے جبر و استحصال دے فرعونی ایوان و یران و تباہ ہو جاندے ہون جس دی حریت و بیداری دے نعریاں نے دنیا دیسبھے مظلوم و محروم قوماں نوں سامراجی طاقتاں نال جہاد و مقابلے دا جذبہ تے حوصلہ عطا کر دتا ہوئے جس نے مردہ دلاں تے دماغاں وچ آزادی و خودمختاری دی تڑپ تے ہمت بخشی ہوئے۔

اک انج دا اسلامی لیڈر جس نے خدا اُتے توکل نبی رحمت دی تعلیمات اُتے یقین تے اہلبیت عصمت و طہارت دے پیغامات اُتے اعتماد کردے ہوئے صفحہ ہستی دے سارے ڈکٹیٹراں دے کناں وچ موت دی گھنٹی وجا دتی۔ مرجع وقت، اعلم دوراں، فقیہ، مجاہد، فلسفی، سیاستداں، عارف، عاشق یا شاعر، خطیب تے مقرر جہے سارے کمالات امام خمینیؒ وچ بیک وقت جمع ہو گئے سن اوہ سب کجھ سن پر خود نوں کسے وی خطاب و القاب دا اسیر نہیں کیتا، اوہ ایس نورانی سفر نوں طے کردے ویلے کسے وی منزل وچ کدی نہیں ٹھٹکے تے کدی نہیں گھبرائے ہر میدان دے شہسوار ثابت ہوئے۔
امام خمینیؒ دی عمر دے آخری ورھیاں دے پیغامات تے خطابات سابقہ ادوار دے بیانات توں مختلف نیں جیہڑے اپنی تھاں امام ؒ دی دور اندیشی تے اپنے بعد وچ آن والے زمانے متعلق ذمہ داریاں دے احساس دی غمازی کردے نیں امامؒ نوں احساس ہو رہیا سی کہ اوہ ایس دنیا توں جان والے نیں، لہٰذا آخری دناں وچ آپ ؒ دی کوشش سی کہ اسلامی جمہوری نظام تے عالمی اسلامی انقلاب دی ترجیحات نوں ایہناں ای امنگاں، اغراض و مقاصد تے اقدار دے ڈھانچے اُتے استوار تے تشریح کرن جنہاں دے حصول لئی اسلامی تحریک دا مُڈھ بَنھیا گیا سی۔
امام خمینیؒ نے اپنے وصال توں کجھ ورہے پہلے ایہناں ای محرکات دے تحت تفصیل نال اپنا سیاسی وصیت نامہ لکھیا، حضرت امام خمینی رحمتہ اللہ علیہ نے مشن، نصب العین، نظریات تے اوہ ساری گلاں جیہڑی لوکاں تیکر اپڑائیاں سن سب کجھ اپڑا دتا سی تے عملی میدان وچ وی اپنی ساری ہستی تے پورا وجود الٰہی اہداف و مقاصد دی تکمیل لئی وقف کر دتا سی۔
امام خمینی ؒ نے مرزا محمد ثقفی تہرانی دی صاحبزادی نال عقد کیتا ایہناں توں دو صاحبزادے آقائی حاج سید مصطفی تے حاج سید احمد پیدا ہوئے تے ایہناں دی تن صاحبزادیاں پیدا ہوئیاں۔ امام خمینی ؒ ہوراں متعدد علوم معقول و منقول ، فقہ و اصول، فلسفہ و عرفان وچ جیہڑا درجہ حاصل کیتا اوہ ایس دور دے علماء وچ بوہت گھٹ پایا جاندا اے۔ ایہو وجہ اے کہ امام خمینی ؒ نے کتب فلسفہ دی تدریس دا آغاز کیتا اوہ چاہندے سن جیہڑے لوک فلسفہ نوں سمجھنا چاہندے نیں اوہ ایس وچ ڈوب کے ابھرن کیوں جے فلسفہ دا علم جے عبوری سطح تیکر حاصل کیتا جائے تے بہک جان دا امکانات زیادہ ہو جاندے نیں جیہڑے لوک ایس وچ راسخ ہو جاندے نیں اوہ حقیقت پا لیندے نیں۔

امام خمینی ؒاپنے علم تے تقویٰ دی وجہ نال اینے مقبول سن کہ قم تے امام خمینیؒ دی شخصیت لازم و ملزوم ہو کے رہ گئی سی۔ اوہناں نے نوجوانی وچ صرف 27 سال دی عمر وچ اک کتاب اہل عرفان لئی لکھی جس دا ناں ’’مصباح الہدایہ ‘‘ رکھیا۔ فیر اوہناں نے ماہ رمضان المبارک دی نسبتنال ’’دعا سحر ماہ رمضان ‘‘ اُتے حاشیہ لکھیا جیہڑا اہل علم دی تشنگی نوں دور کردا اے۔
اہل ایران امام خمینیؒ دے علم و عرفان توں اینے متاثر سن کہ جیہڑا وی امام خمینی ؒ دے علم تے عرفان دی کسے محفل یا مجلس وچ شریک ہو جاندا اوہ ایہناں دا گرویدہ ہو جاندا۔ امام خمینی ؒ دے پیروکاراں وچ وادھا ہوندا رہیا ایتھوں تیکر کہ آپ دے شاگرداں دے علاوہ اک وڈی تعداد آپ دی عقیدت مند ہوندی چلی گئی۔
امام خمینی ؒدا اک رمضان المبارک وچ اٹھایا ہویا اک ہور وڈا تے مثالی قدم مظلومین دی حمایت اے۔ انقلاب اسلامی دے بانی تے رہبر امت مسلمہ آیت اللہ امام خمینیؒ صرف ایران دے ای لیڈر نہیں سن بلکہ اوہناں نے اپنی مدبرانہ تے مدلل سوچ تے دور اندیشی پاروں امت مسلمہ دے مسائل دے دیرپا حل لئی قابل عمل تجویزاں دتیاں تے انج دے اقدامات کیتے جیہڑے اج وی امت لئی مشعل راہ تے روشنی دی امید نیں۔ امام خمینیؒ دا اک تاریخ ساز تے ہمیشہ یاد رکھیا جان والا کارنامہ ’’عالمی یوم القدس‘‘ منان دا اعلان کرنا اے۔ اصل وچ امام خمینیؒ نے یوم القدس منان دا اعلان فلسطینی بھراواں دی غریب الوطنی، مظلومیت تے تکلیفاں نوں ویکھدے ہوئے استعماری طاقتاں دے خلاف عملاً قیام کرن دے احکامات جاری کرن اُتے کیتا۔ امام خمینیؒ نے اپنی دور اندیشی نال فلسطینیاں دے حقوق دی جنگ نوں جاری و ساری رکھن تے کامیابی نال ہمکنار کرن لئی رمضان المبارک دے آخری جمعہ جمعۃ الوداع نوں یوم القدس قرار دتا۔ رمضان المبارک وچ سارے مسلمان جہاد بالنفس دے عمل توں لنگھدے نیں انج جہاد بالعمل دی ترویج دینا، ایس اُتے خود وی عمل کرنا تے دوجیاں نوں وی کروانا امام خمینیؒ نوں عالمی سطح دا لیڈر بنا دیندا اے جس دا دل امت مسلمہ لئی دھڑکدا اے جیہڑا امت دے دائمی امن و سکون لئی ہمہ وقت کوشاں اے۔

4جون 1989 نوں اوہ اپنے آپ نوں اوس عزیز ہستی نال ملاقات دے وصال لئی تیار کر رہے سن کہ جس دی رضا و خوشنودی حاصل کرن لئی اپنی پوری عمر مبارک صرف کر دتی سی تے ایہناں دی ذات دی بلندی ایس عظیم ہستی دے حضور دے علاوہ کسے وی طاقت دے ساہمنے خم نہیں ہوئی تے ایہناں دی اکھاں نے ایس محبوب ذات دے سوا کسے ہور لئی اشک ریزی نہیں کیتی سی۔ آپ نے خود اپنے وصیت نامے وچ فرمایا اے، پرسکون دل، مطمئن قلب، شاد روح تے پرامید ضمیر دے نال خدا دے فضل و کرم نال بھیناں تے بھراواں دی خدمت نال رخصت ہونا واں تے ابدی منزل ول سفر کرنا واں تے آپ لوکاں دی مسلسل دعاواں دا محتاج واں تے خدائے رحمن و رحیم نال دعا کرنا واں کہ جے خدمت کرن وچ کوئی کمی رہ گئی ہوئے تے مینوں معاف کر دیوے تے قوم توں وی ایہو امید کرنا واں کہ اوہ ایس سلسلے وچ کوتاہی تے کمی نوں معاف کرے گی تے پوری قوت، تے عزم و ارادے دے نال اگے دی سمت قدم ودھائے گی۔

آخری ویلے وچ آپ دے ہونٹ مسلسل ذکر خدا وچ متحرک سن۔ زندگی دی آخری راتاں وچ تے ایس ویلے جدوں آپ دے کئی اپریشن ہو چکے سن تے عمر وی 87 ورہے دی سی ہتھاں وچ گلوکوز دیاں بوتلاں لگیاں ہوئیاں سن اودوں وی آپ نماز شب بجا لیاندے تے قرآن دی تلاوت کردے رہے۔ عمر دے آخری لمحات وچ آپ دے چہرے اُتے غیر معمولی تے روحانی و ملکوتی اطمینان و سکون سی تے انج معنوی حالات وچ آپ دی روح نے ملکوت اعلیٰ ول پرواز کیتی۔ جدوں رحلت جانگداز دی خبر نشر ہوئی۔ لوکاں وچ ضبط نہ رہیا تے پوری دنیا وچ اوہ لوک جیہڑے حضرت امام خمینی رحمۃ اللہ علیہ نال محبت کردے سن سب رو پئے۔ ایرانی عوام تے انقلابی مسلمان غم و اندوہ دے ایس طرح دے جذباتی مناطر خلق کر رہے سن۔ اپنے رہبر و قائد نوں آخری رخصت تے ایہناں نوں الوداع کہن لئی سوگواراں دا امڈدا ہویا اینا وڈا سیلاب تاریخ نے اپنی اکھاں نال کدی وی نہیں ویکھیا سی۔ لوکاں دا محبوب قائد، مرجع تقلید تے حقیقی اسلام دا منادی ایہناں توں جدا ہو گیا سی۔ حقیقت وچ ایران دے عوام حضرت امام خمینیؒ دے عاشق سن۔

5 جون 1989 دے دن رات تہران تے ایران دے دیگر شہراں تے قصبیاں تے پنڈاں توں آئے ہوئے لکھاں سوگواراں دا اک سیلاب سی جیہڑا تہران دے مصلائے بزرگ (عید گاہ) وچ ٹھاٹھاں مار رہیا سی۔ لوک ایس عظیم مرد مجاہد نوں جس نے اپنی تحریک تے انقلاب نال ظلم و ستم دے سیاہ دور وچ انسانی اقدار و شرافت دی خمیدہ کمر نوں استوار کر دتا سی تے دنیا وچ خدا پرستی تے انسانی فطرت ول واپسی دی تحریک دا آغاز کیتا سی الوداع کہن لئی آئے سن۔
یکم فروری 1979 نوں حضرت امام خمینی ؒ دی فاتحانہ وطن واپسی تے ایہناں دے استقبال وچ شاندار و عدیم المثال اجتماع تے فیر آپ دی آخری رسومات وچ سوگواراں دا ایس توں وی عظیم اجتماع تاریخ دے حیران کن واقعیاں وچوں نیں۔ خبر رساں ایجنسیاں نے حضرت امام خمینی رحمۃ اللہ علیہ دی وطن واپسی دے موقعے اُتے عاشقاں تے انقلابیاں دی تعداد 60 لکھ دسی سی تے آپ دے جنازے وچ شریک سوگواراں دی تعداد 90 لکھ دسی۔
انج حضرت امام خمینی رحمۃ اللہ علیہ دی رحلت وی ایہناں دی حیات مبارک دی مانند اک ہور بیداری و تحریک دا سرچشمہ ثابت ہوئی تے ایہناں دی یاد تعلیمات و افکار تے ایہناں دا مشن زندہ جاوید بن گیا کیوں جے اوہ اک حقیقت سن تے حقیقت ہمیشہ زندہ و لافانی ہوندی اے۔