ایل ڈی اے دی دو سالہ کارکردگی، وائس چیئر مین ایس ایم عمران وَلوں تفصیلی میڈیا بریفنگ
پچھلے دو سال وچ ادارے وچ کئی انقلابی اصلاحات نافذ کیتیاں گئیاں، شہر لہور وچ اہم ترقیاتی منصوبے مکمل کیتے گئے
رپورٹ: آفاق بٹ
لہور ڈویلپمنٹ اتھارٹی دے وائس چیئر مین ایس ایم عمران نے کہیا اے کہ پچھلے دو ورھے وچ لہور ڈویلپمنٹ اتھارٹی وچ انقلابی اصلاحات لیائیاں گئیاں۔ سزا تے جزا دا نظام نافذ کیتا گیا جس نال ادارے وچ بہتری آئی اے۔ فروزن روڈ دا فیصلہ کرن لئی سروے اگلے ہفتے ختم ہو جائے گا ۔ غیر قانونی تعمیرات تے ہائوسنگ سکیماں نوں روکن لئی جامع حکمت عملی بنائی۔ جیہڑی سوسائٹی تن ورہے وچ منظور نہیں ہوندی، اوہ ہُن 40 دن وچ منظور ہو رہی اے۔ عوام نوں لُٹن توں بچان لئی سکیماں دا پی پی پی بند کر دتا گیا۔
اوہ پچھلے دن ایل ڈی اے دی دو سالہ کارکردگی اُتے ایل ڈی اے سپورٹس کمپلیکس جوہر ٹائون وچ اہم پریس کانفرنس وچ گفتگو کر رہے سن۔ ایس موقعے اُتے معاون خصوصی برائے اطلاعات فردوس عاشق اعوان، وزیر ہائوسنگ میاں محمود الرشید، وائس چیئر مین واسا شیخ امتیاز محمود، ایم پی اے سعدیہ سہیل رانا تے چیئر مین ڈویلپمنٹ سکروٹنی کمیٹی عامر ریاض قریشی وی موجود سن۔
وائس چیئر مین ایس ایم عمران نے کہیا کہ وزیراعظم عمران خان دے وژن تے وزیراعلیٰ عثمان بزدار دی ہدایت دے مطابق شہر لہور وچ تیزی نال ترقیاتی منصوبیاں اُتے کم جاری اے۔ شہر لہور وچ کثیر المنزلہ عمارتاں دا ٹرینڈ متعارف کروایا گیا۔ لہور وچ 586 غیر قانونی سکیماں نیں۔ مالکان دے خلاف نیب تے دیگر ادارے کاروائی کر رہے نیں۔ جیہڑے شہری پلاٹ خرید چکے نیں ایہناں دی سہولت لئی اک کمیٹی بنا دتی گئی اے۔ متعدد غیر قانونی رہائشی سکیماں دے خلاف ایف آئی آر ز درج کروائیاں گئیاں نیں۔اک سال وچ 24 رہائشی سکیماں دی منظوری دتی گئی۔ پرائیویٹ سکیماں دی منظوری دا پراسیس آسان بنا دتا گیا اے۔ رفاہی اداریاں تے این جی اوز دے نال خصوصی تعاون کیتا گیا تے ایہناں نوں واجبات وچ 50 فیصد چھوٹ دتی جا رہی اے۔
اوہناں نے دسیا کہ نقشیاں دی منظوری دا پراسیس آسان کر دتا گیا۔ ہن 30 دناں وچ گھراں دے نقشے منظور کیتے جا رہے نیں۔ ایسوسی ایشن آف بلڈرز (آباد) دے تعاون نال لینڈ یوزرولز بنائے گئے نیں۔ ہن دیگر ضلعیاں دی ڈویلپمنٹ اتھارٹیز نوں وی پنجاب حکومت نے ایل ڈی اے دے رولز لاگو کرن دی ہدایت کیتی۔ ون ونڈوسیل اُتے کیو آر کوڈ نافذ کر دتا گیا جس نال شہریاں نوں بوہت آسانی ہو رہی اے۔ نادرا دے اشتراک نال ایف آر سی دی مدد نال پلاٹاں دی ٹرانسفر دا پراسیس آسان کر دتا گیا اے۔ماحول نوں بہتر بنان لئی گھراں اُتے روف ٹاپ گارڈننگ نوں ضروری قرار دتا گیا اے۔ نقشیاں دی منظوری لئی گھراں اُتے روف ٹاپ گارڈننگ تے درخت لانا ضروری قرار دتا گیا اے۔ ایرینا پلازہ اُتے کم نیب نوٹس دی وجہ نال بند پیا سی۔ بوہت جلدی شروع کر دتا جائے گا۔ ون ونڈو سیل اُتے روزانہ 250 درخواستاں موصول ہوندیاں نیں تے ساری درخواستاں نپٹا دتیاں جاندیاں نیں۔ کرونا وبا نے ساری دنیا نوں ہلا کے رکھ دتا اے۔ حکومت دی بہترین حکمت عملی نال ایس اُتے قابو پایا گیا۔ کرونا وبا دے باوجود ترقیاتی منصوبیاں اُتے کم جاری رہیا۔ ایونیو ون دے باقی سارے متاثرین نوں دو ہفتے دے اندر پلاٹ الاٹ کر دتے جان گے۔ ایونیو ون متاثرین سنے مصطفی ٹائون تے جوبلی ٹائون دے مسائل وی حل کیتے جا رہے نیں۔ ایل ڈی اے دے پلاٹاں دی شناخت لئی جیوٹیکنگ کیتی جا رہی اے۔
اوہناں نے کہیا کہ ماسٹر پلان 2050ء اُتے دارلہندسہ نے کم کیتا اے۔ جس دی سب نے تعریف کیتی اے۔ ایل ڈی اے سٹی وچ 10 ہزار الاٹیاں نوں الاٹمنٹ لیٹر دتے جا چکے نیں۔ ایل ڈی اے سٹی نیا پاکستان اپارٹمنٹس اُتے کم ایسے مہینے وچ شروع کر دتا جائے گا۔ ایل ڈی اے سٹی نیا پاکستان اپارٹمنٹس دے متعلق انج دا سسٹم بنا دتا اے کہ جیہڑی وی حکومت ہوئے گی ایہہ کم چلدا رہوے گا ایل ڈی اے سٹی نیا پاکستان اپارٹمنٹس دے کامیاب امیدواراں نوں نیفڈا ولوں تن لکھ روپئے سبسڈی دتی جا رہی اے۔ باب لاہور، انصاف پورٹل، آن لائن پورٹل جہے منصوبیاں اُتے کم مکمل کیتا گیا۔ فردوس مارکیٹ انڈر پاس سنے متعدد وڈے منصوبے مکمل کیتے گئے۔ ترقیاتی منصوبیاں دے عمل نوں شفاف بنان لئی ای ٹینڈرنگ دا نظام رائج کر دتا گیا اے۔ ماحول دی بہتری لئی میاوا کی جنگل لایا گیا اے جس دی سب نے بوہت تعریف کیتی اے۔ بلڈنگ اینڈ زوننگ ریگولیشنز تے ایکسرو اکاؤنٹ دے ریگولیشنز بنائے گئے ۔ پارکنگ رائٹس ریگولیشنز، جوائنٹ وینچر رولز بنائے گئے ۔ 8387 رہائشی، 102 کمرشل نقشے پاس کیتے جا چکے نیں۔ تعمیرات وچ آسانیاں پیدا کر کے 460 ارب روپئے دی تعمیراتی سرگرمیاں شروع ہوئیاں۔ ایہناں تعمیرات دی منظوری نال 75 ہزار نوکریاں پیدا ہوئیاں۔ پاکستان وچ پہلی وار لارنس روڈ زیر زمین واٹر ٹینک تعمیر کیتا گیا۔ اوہناں نے کہیا کہ بابو صابو دے مقام اُتے گندا پانی صاف کرن لئی ویسٹ واٹر ٹریٹمنٹ پلانٹ لایا جائے گا۔ شہر وچ زیر تعمیر اورنج لائن میٹرو ٹرین منصوبہ مکمل کیتا۔ وزیراعلیٰ پنجاب نے پنج میگاپراجیکٹس شروع کرن دی منظوری دتی۔ شہر وچ تن منصوبیاں اُتے کم دا آغاز کر دتا گیا اے۔ اوورسیز پاکستانیاں لئی سہولت ڈیسک دا قیام عمل وچ لیایا گیا۔ انسداد تجاوزات لئی ہاٹ لائن متعارف کروا رہے نیں۔ جی آئی ایس میپنگ دا آغاز کیتا، ایس نال ایل ڈی اے دی پوشیدہ املاک وی منظر عام اُتے آئیاں۔
