اسرائیلی سیاست مقاصد تے نیتن یاہو دی بربریت!

تابندہ خالد

کرونا وائرس پاروں پوری دنیا وچ ایس ویلے عجیب جہی بے چینی دا عالم اے۔ خوف و غم دی فضا دے بیج سرائیل نہتے فلسطینیاں دی آبادیاں اُتے راکٹ ، مارٹر داغ رہیا اے۔ فلسطین وچ حالیہ کشیدگی دا پس منظر ایہہ وے کہ ناجائز ریاست اسرائیل نے 25 رمضان نوں مسجد اقصیٰ وچ نمازیاں نوں ہراساں ایس ویلے کیتا کہ جدوں پاک سعودیہ تعلقات استوار کیتے جا رہے سن۔ فلسطینی قتل و غارت دے نتیجے وچ حماس دے مزاحمتی جواب اُتے اسرائیلی وزیراعظم نیتن یاہو دا بلاخوف و خطر کہنااے کہ فلسطینی حملیاں وچ تیزی لیائی جائے چونکہ حماس نے کئی سالاں وچ پہلی وار یروشلم اُتے راکٹ فائر کر کے ’’سرخ لکیر‘‘ نوں عبور کیتا اے لہٰذا ایہہ تنازعہ کجھ عرصہ قائم رہ سکدا اے۔ قارئین بڑی افسوسناک گل اے کہ اسرائیل اوہ انٹرنیشنل کھلاڑی اے کہ جس دی تحویل وچ نیوکلیائی اسلحہ اے تے ایس نے مسلم علاقیاں اُتے اک عرصے توں غاصبانہ قبضہ وی کر رکھیا اے۔
کیہ تسیں نوٹ کیتا اے کہ گریٹر اسرائیل تے اکھنڈ بھارت دا خواب ویکھن والیاں دے کول الیکشن توں پہلاں اک چونکا دین والا رواج قرار پا چکیا اے۔ اوہ ایہہ کہ سیاسی ناکامیاں نوں لُکان لئی مقبوضہ مسلم علاقیاں وچ جنگی حالات ترتیب دے کے عوام دی توجہ و دلچسپی ایس پاسے مبذول کروا دتی جائے۔ ہنگامی حالات تے افراتفری دے عالم وچ الیکشن ہو جان۔ دوجے پاسے میڈیا دی حمایت وچ جعلی سروے کروایا جائے تے عوام نوں اعتماد وچ لیا جائے کہ اوہ امیدوار کہ جس نے سانوں دہشت گردی دے حملیاں توں محفوظ رکھیا اوہ ای قیادت ساڈے لئی مستقبل وچ موثر ہوئے گی۔ غور کرو کہ مودی تے نیتن یاہو دا سیاسی پینترا تقریباً اک ای اے۔ مودی نے الیکشن توں پہلاں پلوامہ ڈرامہ تے جھوٹی ایئر سٹرائیک دا دعویٰ کر کے تے بھارتی عوام دی اکھاں وچ دھول جھونکدے ہوئے الیکشن وچ واضح برتری حاصل کر لئی سی۔ کجھ ایسے طرح دی شاطرانہ حکمتِ عملی نیتن یاہو پچھلے 15 ورہے توں اپنائے ہوئے نیں۔ ماضی وچ الیکشنز وچ ایہناں دی فتح اصل وچ انج دے خاکے دی مرہون منت اے جس دے مطابق اوہ اسرائیل نوں مشرقِ وسطیٰ دی خطرناک فورسز توں محفوظ رکھ سکدے نیں۔ اوہناں نے فلسطینیاں لئی وی سخت پالیسی اپنائی رکھی تے ہمیشہ امن و آشتی دی بحث وچ سکیورٹی خدشات نوں سر فہرست رکھیا۔ نیز اوہ اسرائیل دی بقا نوں ایران توں لاحق خطرے دے حوالے نال وی گاہے بگاہے الرٹ کر چکے نیں۔ اک موقعے اُتے ایہناں نال لائیو سوال کیتا گیا کہ جے اوہ دوبارہ وزیراعظم بن گئے تے ایس دا مطلب ایہہ ہو سکدا اے کہ فلسطینی ریاست دے قیام دا خیال خارج کر دتا جائے گا؟ اوہناں نے ایس دا جواب فوراً عبرانی زبان وچ اک لفظ وچ ادا کیتا کہ ’’آچن‘‘ جس دا مطلب اے ’’بالکل…!‘‘۔

قارئین! ایہہ سب اوہ سیاسی مقاصد دے حصول تے اک مخصوص طبقے نوں خوش کرن لئی کہندے نیں کیوں نے نیتن یاہو اُتے الزامات نیں کہ اوہناں نے امیری کاروباری شخصیات توں تحفے تحائف وصول کرن دے علاوہ جانبدار میڈیا کوریج حاصل کرن لئی میڈیا انڈسٹری اُتے احسانات دی بارش کیتی۔ یاد رہوے کہ نیتن یاہو اُتے رشوت، فراڈ تے اعتماد نوں ٹھیس اپڑان جہے تن کیساں وچ فرد جرم عائد اے۔ ایس توں علاوہ پچھلے انتخابات وچ ایہناں نوں سابق امریکی صدر ڈونلڈ ٹرمپ دی وی بھرپور نصرت و تائید حاصل سی پر ہن وائٹ ہائوس وچ جوبائیڈن نیں تے نین یاہو نے بمشکل ای جوبائیڈن دا تذکرہ اپنی تقریراں وچ کیتا اے یعنی ہجے مربوط تعلقات معلق ای نیں۔ اسرائیلی ایگزیکٹ پول دسدے نیں کہ انتخابات وچ نیتن یاہو لئی اقتدار برقرار رکھن دے امکانات اینے قوی نہیں جنے پچھلے الیکشن وچ سن۔ کسے دے کول واضح اکثریت نہ ہون دی وجہ نال جے سیاسی جماعتاں وچ ڈیڈ لاک پیدا ہویا تے اسرائیل نوں پنجویں الیکشن ول جانا پئے سکدا اے۔ جیہڑا وی نیتن یاہو دا سیاسی کیریئر دھندلا نظر آ رہیا اے دلچسپ گل تے ایہہ وے کہ الیکشن وچ لیکوڈ جماعت نے سب توں زیادہ نشستاں جتیاں تاں نیتن یاہو دی بطور وزیراعظم بنن دے مخالفین زیادہ نیں پر اک مرکز اُتے سوچ رُکدی اے کہ مسلم، عیسائیت، یہودیت، ہندومت، بدھ مت، جین مت سکھ ازم ، تائوازم، سنتوازم وغیرہ ایہناں سب نوں بالائے طاق رکھ کے سوچیا جائے کہ انسانیت سب توں وڈا دھرم اے۔ ایہہ تے سر عام دہشت گردی اے کہ سیاسی عزائم لئی نہتے لوکاں، بالاں، بڈھیاں، اُتے بمباری کر کے جبر و بربریت دا فروغ دیندے ہوئے مٹھی بھر شدت پسنداں نوں خوش کیتا جائے۔ بلاتردد اسرائیل دی چیرہ دستیاں دی داستان بڑی لمبی اے۔ ستم ظریفی تے ایہہ وے کہ درندگی دا مظاہرہ کرن دے باوجود امن عالم دے نام نہاد ٹھیکیداراں( یو این او) تے انسانی حقوق دی تنظیماں دی اکھ دا تارا بنیا ہویا اے۔ سوال ایہہ پیدا ہوندا اے کہ اقوام متحدہ دی ناکامی دے بعد کیہ دنیا انساناں دی آماجگاہ بن جائے گی؟ اقوام متحدہ دی خاموشی یقینا تیجی عالمی جنگ دا بگل وجا دیوے گی تاں اقوام متحدہ نوں ہوش دے ناخن لین وچ مزید تاخیر دا ارتکاب نہیں کرنا چاہیدا۔