’’خدمت آپکی دہلیز پر ‘‘ عوام نوں سہولت فراہم کرن لئی وڈا پروگرام شروع

جاوید یونس

مسلسل مشکلات دا ساہمنا کرن تے سیاسی لُکن میٹی دے بعد وزیراعلیٰ پنجاب سردار عثمان بزدار اہن پہلے توں کدھرے زیادہ اعتماد دے نال عوام دی خدمت لئی اگے ودھدے نظر آ رہے نیں۔ ماضی وچ نظر انداز کیتے گئے گھٹ ترقی یافتہ علاقیاں خاص طور تے جنوبی پنجاب نوں اپنے عملی اقدامات نال احساس دلوایا کہ تحریک انصاف دی حکومت پنجاب بھر نوں اک ای سطح اُتے ترقی نال ہم کنار ویکھنا چاہندی اے۔ وزیراعلیٰ نے زراعت، تعلیم، صحت، سیاحت دی سی این ڈبلیو سنے زندگی دے سارے شعبیاں دی بہتری لئی عملی اقدامات کیتے۔ ایس دے علاوہ کئی میگاپراجیکٹس اُتے کم شروع کروایا تے انج وزیراعظم عمران خان دے ویژن نوں ساہمنے رکھ کے عوام دا اعتماد حاصل کیتا۔ ہن اوہناں نے پورے پنجاب دے عوام نوں درپیش مسائل دے حل لئی اک نویں نعرے دے نال تیاری پھَڑ لئی اے۔ ایہہ نواں نعرہ اے ’’خدمت آپ کی دہلیز پر ‘‘ ایس نعرے دے تحت عوام دی خدمت دے جیہڑے شعبے تجویز کیتے گئے نیں ایہناں وچ گلیاں، سڑکاں دی صفائی، نکاسی آب تے سرکاری عمارات دی صفائی ، ستھرائی شامل اے۔ صوبے دے سب توں وڈے سرکاری افسر یعنی چیف سیکرٹری پنجاب نوں براہ راست ایس نویں مہم دی ذمہ داری دتی گئی اے تے اوہ سارے کمشنرز، ڈپٹی کمشنرز تے مختلف شعبیاں دے سربراہواں دے ذریعے عملی طور اُتے ایس نعرے اُتے عملدرآمد کروان گے۔
ایس پروگرام دے آغاز توں پہلے تیاریاں دا جائزہ لین لئی پنجاب دے چیف سیکرٹری دی صدارت وچ اعلیٰ سطحی اجلاس ہوئے جس وچ ایڈیشنل چیف سیکرٹری بلدیات تے اطلاعات دے سیکرٹریاں جد کہ ڈویژنل کمشنرز، ڈپٹی کمشنرز تے افسران نے ویڈیو لنک دے ذریعے شرکت کیتی۔ اجلاس وچ پہلے تن ہفتیاں دے پروگرام نوں حتمی شکل دتی گئی۔ لوکاں نوں ایہناں دی دہلیز اُتے پبلک سروسز دی فراہمی ، سرکاری مشینری نوں متحرک کرن تے لوکاں تیکر ایہناں دے ثمرات اپڑان لئی ’’خدمت آپکی دہلیز پر ‘‘ دا تن ہفتیاں اُتے مشتمل اک جامع پروگرام تشکیل دتا اے۔ پہلا ہفتہ صفائی دا ہوئے گا جس وچ کوڑا کرکٹ تے گندگی و فضلہ دی نشاندہی کر کے ایس نوں ہٹایا جائے گا۔ ایس طرح شاہراہواں دے اطراف توں ملبہ تے تعمیراتی میٹریل نوں ٹھکانے لان دے علاوہ ایس ہفتے دیواراں توں وال چاکنگ تے درختاں و بجلی دے کھمبیاں توں پہلے بینرز تے سٹیمرز اتارن و غیر فعال سٹریٹ لائٹس نوں مرمت تے تبدیل کیتا جائے گا۔ دوجا ہفتہ نکاسی آب دا ہوئے گا جس دے دوران سڑکاں تے میداناں توں دلدل دی نشاندہی کر کے ایس نوں اٹھایا جائے گا۔ سیوریج تے پائپ لائناں دی صفائی دے نال نال گٹراں اُتے مین ہول دے ڈھکن لائے جان گے تے صوبہ بھر دی ساری پبلک ٹوائلٹس دی صفائی کیتی جائے گی۔ تیجا ہفتہ سرکاری عمارتاں دی صفائی و ستھرائی اُپر مشتمل ہوئے گا۔ سرکاری دفتراں، سکولاں تے دیگر سرکاری عمارات دی وائٹ واش کیتی جائے گی۔ پارکس، گرین بیلٹس، رائونڈ ابائوٹ تے چوکاں دی تزئین و آرائش ، دیہی مراکز صحت تے بنیادی مراکز صحت تے سرکاری دفتراں دی صفائی کیتی جائے گی۔ ایس صفائی دے پروگرام وچ بنیادی کردار محکمہ تعلقات عامہ، محکمہ بلدیات، ہائوسنگ واربن ڈویلپمنٹ، پبلک ہیلتھ انجینئرنگ ڈیپارٹمنٹ، پرائمری اینڈ سیکنڈری ہیلتھ، پی ایچ اے، کمشنرز و ڈپٹی کمشنرز ہون گے۔
چیف سیکرٹری نے ہدایت کیتی کہ پروگرام دی کامیابی لئی ساری حکومتی مشینری متحرک انداز وچ کم کرے۔ اوہناں نے کہیا کہ سارے افسران تے محکمہ پروگرام اُتے ایس دی روح دے مطابق عملدرآمد کران۔ سرکاری معمولات دے علاوہ ہر ہفتے اک تھیم دے تحت کم ہوئے گا عوامی خدمات دے پروگرام دا مقصد لوکاں دے مسائل ایہناں دی دہلیز اُتے حل کرنا اے، لوکاں نوں یقین ہوئے کہ حکومت ایہناں لئی آسانیاں پیدا کر رہی اے۔ ہر ہفتے دِتے گئے ٹارگٹس اُتے عوام توں براہ راست فیڈ بیک لیا جائے گا تے فیلڈ سرگرمیاں دی ایپ دے ذریعے مانیٹرنگ کیتی جائے گی۔ پروگرام وچ کارکردگی دے لحاظ نال ضلعیاں دی درجہ بندی کیتی جائے گی۔ چنگی کارکردگی اُتے انعام جد کہ ناقص کارکردگی اُتے باز پرس ہوئے گی۔
وزیراعلیٰ پنجاب سردار عثمان بزدار نے ’’خدمت آپ کی دہلیز پر ‘‘ پروگرام دا باقاعدہ افتتاح کر دتا اے تے لوکاں نوں اپنے گھر دا مالک بنان دے پروگرام وانگوں ایس پروگرام اُتے وی فوری طور اُتے عمل شروع کر دتا گیا اے۔ ایس سارے پروگرام دا بنیادی نقطہ صفائی اے جنہوں اسلام وچ نصف ایمان دا درجہ دتا گیا اے تے عملی طور اُتے وی ایس دا تعلق صحت تے پرسکون زندگی نال جڑیا ہویا اے۔ پوری دنیا وچ ترقی دی اک علامت اوتھے دی گلیاں، سڑکاں تے عوامی مقامات دی صفائی قرار دتا جاندا اے لوک اپنے گھراں دے اندر دے حصے نوں صاف ستھرا رکھن نوں ترجیح دیندے نیں تے جدوں باہر دے مناظر وی صاف ستھرے ہون گے تے ایس دا اثر براہ راست ساڈی زندگی اُتے عمومی رویاں اُتے پئے گا۔ صفائی بنیادی طور اُتے اک اجتماعی عمل نال ممکن ہوندی اے جدوں حکومت ولوں اک تحریک دی صورت وچ بھرپور مہم چلان دا آغاز کیتا گیا اے تے یقینی طور اُتے عوام وی اپنے حصے دا کردار ادا کرن تے صفائی نصف ایمان دے دینی فریضے وچ حکومت دے نال قدم نال قدم ملا کے چلن۔
ایس وچ کوئی شک نہیں کہ پوری دنیا وانگوں پاکستان دے عوام وی کرونا تے ایس نال جڑے معاشی مسائل، مہنگائی تے پابندیاں وچ جکڑے ہوئے نیں پر پاکستان وچ حکمران تے باہمت قیادت نے چنگے فیصلیاں نال اپنے عوام نوں باقی دنیا دے مقابلے وچ بوہت سارے مسائل توں بچا لیا اے تے کرونا وبا دا دبائو وی گھٹ ہو رہیا اے ایسے وجہ نال وفاقی حکومت دے نال پنجاب دی حکومت نے وزیراعلیٰ عثمان بزدار دی قیادت وچ عوام نوں چنگی زندگی دی زیادہ توں زیادہ سہولتاں دی فراہمی نال قصبیاں، شہراں نوں ترقی یافتہ ملکاں دے ہم پلہ صاف ستھرا بنان لئی عملی اقدامات دا آغاز کیتا اے۔ بزدار حکومت نے عوام نوں ایہناں دی دہلیز اُتے سہولتاں دین لئی وڈا پروگرام لانچ کر دتا اے۔ وزیراعلیٰ آفس وچ ’’خدمت آپ کی دہلیز پر ‘‘ پروگرام دی افتتاحی تقریب منعقد ہوئی ۔ وزیراعلیٰ نے خدمت ایپلی کیشن دا وی افتتاح کیتا۔ چیف سیکرٹری ایڈیشنل چیف سیکرٹری، کمشنر لہور ڈویژن تے سیکرٹری بلدیات نے وزیراعلیٰ عثمان بزدار نوں ’’خدمت آپ کی دہلیز پر ‘‘پروگرام دے اہم خدوخال دے بارے بریفنگ دتی۔ وزیراعلیٰ عثمان بزدار نے تقریب نال خطاب کردے ہوئے کہیا کہ ’’خدمت آپ کی دہلیز پر ‘‘ عوام دی خدمت لئی شاندار پروگرام اے۔ ایس پروگرام نال نچلی سطح اُتے سروس ڈلیوری وچ بہتری آئے گی تے عوام نوں ایہناں دی دہلیز اُتے بنیادی سہولتاں ملن گیاں۔ ایہہ صرف پروگرام نہیں بلکہ گورننس دا منفرد ماڈل اے جس نال صوبے دی عوام دا فائدہ ہوئے گا۔ اوہناں نے کہیا کہ ’’خدمت آپ کی دہلیز پر ‘‘ پروگرام ابتدائی طور اُتے 3 ہفتیاں اُتے مشتمل ہوئے گا۔ پہلے ہفتے وچ گلیاں، بازاراں تے محلیاں نوں صاف کیتا جائے گا۔ سڑکاں دے کناریاں توں تعمیراتی میٹریل تے خراب سٹریٹ لائٹس نوں ٹھیک کیتا جائے گا۔ دوجے ہفتے وچ فراہمی و نکاسی آب دیاں سہولتاں وچ بہتری لیان اُتے توجہ دتی جائے گی۔ سیوریج پائپ صاف کیتے جان گے تے کھلے مین ہول اُتے ڈھکن نصب کیتے جان گے جد کہ تیجے ہفتے وچ سرکاری دفتراں، سکولاں تے دیگر عمارتاں اُتے رنگ و روغن تے صفائی ہوئے گی پارکس، گرین بیلٹس، رائونڈ ابائوٹس تے چوکاں دی بیوٹیفکیشن اُتے توجہ دتی جائے گی تے دیہی بنیادی مراکز صحت نوں صاف ستھرا کیتا جائے گا۔ اوہناں نے کہیا کہ ’’خدمت آپ کی دہلیز پر ‘‘ پروگرام وچ سول سوسائٹی، مقامی افراد تے ٹائیگر فورس نوں شریک کیتا جائے گا۔ عوام توں براہ راست فیڈ بیک لیا جائے گا تے فیڈ بیک سرگرمیاں دی ایپ دے ذریعے پروگرام دی مانیٹرنگ کیتی جائے گی۔ کارکردگی دے لحاظ نال ضلعیاں دی درجہ بندی ہوئے گی۔ اوہناں نے کہیا کہ عوام دی خدمت پاکستان تحریک انصاف دے منشور دا بنیادی جزو اے۔ عوام دی فلاح و بہبود تے خدمت ساڈا نصب العین اے۔ عوام دے مسائل دے فوری ادراک تے فوری حل کسے وی فلاحی ریاست دا فرض اے تے حکومت پنجاب اپنے ایس فرض توں غافل نہیں۔ حکومت عوام دی خدمت دے عزم نوں پورا کرن لئی ساری سروس نوں عوام دی دہلیز اُتے لے جا رہی اے۔ پروگرام نوں عملی جامہ پہنان لئی ’’اے سی کارکردگی ایپ ‘‘ تے صوبائی حکومت نے ’’خدمت آپ کی دہلیز پر ‘‘ دے ناں توں ایپ تیار کر لئی اے۔
شہری ایپ پلے سٹور توں ڈائون لوڈ کر سکدے نیں۔ عوام دی شکایتاں لئی ڈیش بورڈ وی تیار کیتا گیا اے۔ ڈیش بورڈ اُتے درج شکایات دے ازالے لئی اقدامات نال کسے وی ضلع یا ڈویژن دی انتظامیہ دی کارکردگی دا تعین کیتا جائے گا تے ایس ضمن وچ شہریاں دے فیڈ بیک نوں بنیادی اہمیت حاصل اے۔ ’’خدمت آپ کی دہلیز پر ‘‘ پراجیکٹ دے آغاز دا مقصد عوام دے مسائل نوں ایہناں دی دہلیز اُتے حل کرنا اے۔
’’خدمت آپ کی دہلیز پر ‘‘ متعلق ساری سرگرمیاں پنجاب انفارمیشن ٹیکنالوجی بورڈ ولوں تیار کیتی گئی ’’ایپ ‘‘ دے ذریعے کیتیاں جان گیاں۔ اک ہور ایپ تیار کیتی گئی اے جس اُتے شہری اپنی شکایات اپ لوڈ کرن گے۔ گندگی والے مقام دی جیوٹیکنگ دے علاوہ شہری شکایتاں دور ہون یا نہ ہون دے بارے وچ فیڈ بیک دین گے۔ڈیش بورڈ ساری سرگرمیاں نوں ٹریک / مانیٹر کرن وچ مدد دیوے گا۔ ’’خدمت آپ کی دہلیز پر ‘‘ پروگرام نوں کامیاب بنان وچ محکمہ تعلقات عامہ دا کردار نمایاں اے۔ پرنٹ، الیکٹرانک تے سوشل میڈیا اُتے ایس دی بھرپور کوریج لئی ڈی جی پی آر ثمن رائے دی متحرک قیادت وچ اک جامع میڈیا پالیسی و لائحہ عمل مرتب کیتا گیا اے۔ پورے صوبے دے انفارمیشن دے سارے ڈویژنل و ضلعی دفتراں نوں متحرک کیتا گیا اے۔ سارے کمشنرز ، ڈپٹی کمشنرز دے علاوہ فنکاراں، کھلاڑیاں اہم شخصیات، وزرا دے پیغامات نوں ریکارڈ کر کے ’’فیس بک ‘‘، ’’ٹویئٹر‘‘، ’’ یوٹیوب ‘‘ اُتے اپ لوڈ کر دتا گیا اے۔ ایس دے نال نال ساری سرگرمیاں دی کوریج کیتی جا رہی اے تے روزانہ دی بنیاد اُتے پرنٹ و الیکٹرانک تے سوشل میڈیا اُتے خبراں دی تشہیر کیتی جا رہی اے۔ چیف سیکرٹری پنجاب جواد رفیق دی سربراہی وچ منعقدہ اجلاس وچ محکمہ تعلقات عامہ پنجاب دی کارکردگی نوں سراہیا گیا اے تے کہیا گیا اے کہ کجھ دناں وچ ڈی جی پی آر ولوں بنایا گیا ’’ہیش ٹیگ‘‘ (#خدمت آپ کی _ دہلیز_ پر) ٹوئیٹر اُتے ٹاپ ٹرینڈ بن گیا اے تے 60 لکھ توں ودھ لوک ایس نوں ویکھ چکے نیں۔ ایس دے علاوہ Khidmat@dehleez موبائل ایپ نوں 15 ہزار توں ودھ لوک ڈائون لوڈ کر چکے نیں۔ یقینا ایس دا سہرا سیکرٹری اطلاعات و ثقافت راجہ جہانگیر انور، ڈی جی پی آر ثمن رائے دے بعد ڈویژنل و ضلعی افسران تے وزراء دے پی آر اوز نوں جاندا اے جنہاں نے دن رات محنت کر کے ایس پروگرام دی کامیابی لئی خدوخال تیار کیتے نیں۔ ایس وچ کوئی دورائے نہیں کہ اجلاس دے اختتام اُتے دیگر محکمیاں دے افسران اپنے گھراں نوں چلے جاندے نیں پر ایس دے بعد ڈی جی پی آر دے افسران دا کم شروع ہو جاندا اے یعنی ایس دی خبر تیار کر کے پرنٹ و الیکٹرانک میڈیا نوں جاری کرن دے علاوہ سوشل میڈیا دے مختلف ایپلی کیشنز اُتے اپ لوڈ تے شہریاں دے فیڈ بیک نوں وی سرکاری حکام تیکر اپڑانا اے تے ڈی جی پی آر ایس اہم ذمہ داری نوں بخوبی سرانجام دے رہیا اے۔ ہن ایہہ عوام دی وی ذمہ داری اے کہ اوہ ایس پروگرام وچ بھرپور شرکت کرن تے اپنے اپنے علاقیاں وچ گندگی دے ڈھیر یا سیوریج دی بندش متعلق اپنی شکایتاں ایپ اُتے اپ لوڈ کرن۔ ایس دے علاوہ اپنے علاقیاں دی صفائی نوں برقرار رکھن لئی اپنا کردار ادا کرن۔ شہریاں نوں چاہیدا اے کہ اوہ اپنے گھر دے نال نال اپنے گلی محلیاں وچ کوڑا کرکٹ سٹن دی بجائے ایس نوں اک ٹوکری وچ پان تاکہ خاکروب آسانی نال چُک کے لے جائے۔ ایس دے نال حکومت نوں چاہیدا اے کہ اوہ ایس مہم وچ منبر و محراب نوں وی استعمال کرے۔ علماء کرام نوں چاہیدا اے کہ اوہ جمعہ دے خطبات وچ اسلام دی روشنی وچ صفائی ستھرائی دی اہمیت نوں اجاگر کرن۔ حکومت ولوں شروع کیتے جان والے ایس پروگرام دے نتیجے وچ ماحولیاتی آلودگی وچ کمی واقع ہوئے گی۔