جمہوریت کفر اے

لكهت:اکرم شیخ

ایہ کوئی نویں گل نہیں ملائیت ہمیشہ ملوکیت تے حکمراناں دی چھترچھاویں رہی اے۔ دوویں اک دوجے دے فیدیاں دی رکھیا کردے رہے نیں گل صرف ساڈے مُلاں دی ای نہیں پادری تے پنڈت وی ایہو کجھ کردے رہے نیں پر فیر وی اسیں سب توں چنگے ہاں کیوں جے اسیں مسلمان ہاں۔ رب دی پسند کیتی قوم ہاں ساریاں جنتاں بھاویں اوہ کتھے نیں سب ساڈے لئی نیں ساریاں دوزخاں ہوراں لئی نیں کیوں جے اوہ کافر نیں۔ کافراں دے خلاف جہاد کرنا ہر مسلمان اُتے فرض اے۔ ایہو ای گل خاندان غلاماں دے دوجے بادشاہ التمش نوں مُلاں آکھی۔ ہندوئواں نوں زبردستی مسلمان کرن تے اوہناں دے مندر ڈھائون لئی آکھیا۔ اوہ تیار وی ہو گیا پر اوہدے اک وزیر دسیا اسیں بدیسی حکمران ہاں ایتھے ہندوئواں دی اکثریت اے بغاوت ہو گئی تے فیر ساڈے لئی قابو پانا اوکھا ہو جاوے گا۔ التمش نوں ایہ گل سمجھ وچ آ گئی اوہنے ایہ کم کرن توں اپنے آپ نوں روک لیا۔ ایہو ای صلاح کجھ چر مگروں علائوالدین خلجی نوں دتی گئی اوہنے من لئی ہندوئواں دے مندر ڈھائونے شروع کر دتے عوامی احتجاج نوں طاقت نال روکیا گیا ایہ وکھری گل اے کہ حکومت دے پیراں تھلیوں زمین نکل گئی۔
مجاہد اسلام تے فتاویٰ عالمگیری لکھن والے اورنگزیب جہڑا حلال دی روٹی کھان لئی قرآن پاک لکھدا تے ٹوپیاں سیندا سی جدوں اوہنوں ایہ مشورہ دتا گیا تے اوہنے اسلام دی پرچلتا لئی ہندوئواں دے سینکڑوں مندر ڈھائے لہور دی شاہی مسیت وی بنائی۔ اقتدار اپنے تن بھرا ای نہیں داراشکوہ قادری ورگے عالم فاضل‘ سرمد ورگے مست الست درویش نوں ای نہیں گوروتیغ بہادر نوں وی قتل کروایا جس اُتے بلھے شاہ وی اپنے ڈھنگ وچ احتجاج کیتا۔ حالاں ایہ وقوعہ اوہدے جمن توں وی پنج سال پہلوں 1675ء دا سی۔
کہوں منبر تے بہہ قاضی ہو
کہوں تیغ بہادر غازی ہو
تواریخ دا سچ تاں ایہہ وے کہ ایتھے افغانستان توں جہڑا وی حکمران آیا اے اوہ اسلام دے وادھے لئی آیا اے۔ جہڑا وی آیا اے اوہدے ناں نال ایسے لئی ’’دین‘‘ دا لاحقہ شامل سی۔ شہاب الدین غوری توں ظہیرالدین بابر تک… غوری چوتھے تے ظہیرالدین بابر پنجویں حملے وچ کامیاب ہویا سی۔ غوری توں مگروں جنے وی حملہ آور افغانی آئے مسلماناں دیاں حکومتاں ختم کر کے اپنی حکومت بنائی۔ اک دوجے نال لڑن والی فوج وی مسلمان سی تے مرن والے وی مسلمان ای سن۔ لہور اُتے 1184ء وچ حملہ کرن لئی سیالکوٹ دے ہندو راجے نال سانجھ کیتی تے فیر دوہاں نے رَل کے لہور اُتے قبضہ کیتا تاں جے اسلام نوں غالب کیتا جاوے۔ ہن اسیں ایہ گل نہیں کردے کہ… چھ سو سال دی ایس مسلم حکمرانی وچ سماج مسلمان کیوں نہیں بنیا؟ ایتھے اسلامی قدراں کیوں پروان نہیں چڑھیاں؟ بس ایناں ای ہویا کہ… ہندوستان بابری مسجد ڈھائی گئی تے اساں اسلامی جذبے دے وکھالے لئی ایتھے وی مندر ڈھائے تے اوہناں تھاواں اُتے قبضے کر لئے۔ ہندوئواں دا کہنا اے کہ… بابری مسجد ساڈا مندر ڈھا کے ظہیرالدین بابر نے بنوائی سی ایسے لئی اوہنوں بابری مسجد آکھیا جاندا سی۔ انج کیوں ہویا سی‘ اسیں کجھ کہہ کے اپنے اُتے کافری دا الزام نہیں لینا چاہندے سانوں اپنی تے اپنے بالاں دی زندگی پیاری اے۔
گل ذرا دور چلی گئی اے۔ سانوں ایہ کہانی ملائیت دے اک نمائندے مولانا طارق جمیل جہڑے اج دے حکمراناں نال بڑے ڈونگھے تعلق رکھدے نیں اوہناں دیاں ویاہواں وچ وی جاندے نیں اوہناں دے نکاح وی پڑھاندے‘ اوہناں نوں اسلام دی تبلیغ وی کردے نیں۔ اوہناں کولوں اپنے کاروبار دی رکھیا وی لیندے نیں نہ تے ایف بی آر اوہناں دی آمدن بارے پچھدا اے نہ ای محکمہ انکم ٹیکس نوں اوہناں ول ویکھن دی جرأت ہوندی اے۔ ٹی جے ناں دے گارمنٹس برانڈ سرعام وِکدے نیں کوئی پچھدا نہیں اوہ بنی گالہ وچ وی نظر آئوندے نیں تے ظہورالٰہی پیلس وچ وی وکھالی دیندے نیں۔ پچھلے دناں اوہناں عثمان بزدار دی حکومت تے وزارت لئی خاص دعاواں وی منگیاں نیں۔ ایہناں دعاواں مگروں اوہناں ایہ وی آکھیا اے جمہوریت ایس قوم لئی ٹھیک نہیں یعنی ایہدے اُتے ڈنڈے دی حکومت ہونی چاہیدی اے ایس سماج نوں صرف ’’بوٹ‘‘ ای صحیح کر سکدے نیں۔
ایہ کوئی نویں گل نہیں۔ ہر عہد وچ کوئی نہ کوئی مُلاں سامنے آئوندا اے تے حکمراناں دیاں خواہشاں دا احترام کردا ہویا اپنا وچار وکھالا کردا رہیا اے۔ جنرل ضیاالحق دے زمانے پاکستان دیاں شاہراہواں تے سڑکاں دوالے ایہ لکھیا گیا سی… جمہوریت کفر اے‘ یعنی ایہدے لئی عوام دی رائے یاں انتخابات دی کوئی لوڑ نہیں… ایس مُلاں نوں ایہدے بدلے وچ کیہ ملیا؟ ایہ کم وی ایف بی آر کر سکدا اے پر نہیں اوہدے کول ہور بڑے کم کرن والے نیں تے فیر جنرل مشرف دی بادشاہی وچ جدوں صدارت تے عسکری قیادت دے اک تھاں ہون دا جھگڑا پیا اک شیعہ عالم نے فتویٰ جاری کیتا خلافت راشدہ وچ وی ایہو کجھ ہوندا سی۔ خلیفہ حکمران وی ہوندا سی تے فوجی قیادت وی اوہدے کول ہوندی سی۔ ایہ شیعہ عالم سینٹ دے رکن وی بنے سن۔ گل ایتھے ای نہیں مُکی سگوں ایہ وی آکھیا کہ ریاست مدینہ دی سربراہی وی حضور نبی رحمتؐ ہوراں کول سی تے فوج دی قیادت وی اوہناں کول سی۔ سارے غزوے ایس طرح ہوئے… ایہ سچ اے ایس دا کون انکاری ہو سکدا اے۔ پر اصل گل تاں ایہہ وے اج اکیہویں صدی اے۔ سیکڑوں ہزار سال گزر گئے نیں انسانی سوجھ نے اک نویں دنیا آباد کر دتی اے۔ اج اوہ سماج تے اوہو قوم زندہ رہ سکدی اے جہڑی زمانے دے نال ٹرے گی۔ نہیں تے… آہو… مُلاں تے حکمران رَل کے اوہو کجھ کرن گے جو پہلوں کردے رہے نیں۔٭٭