سائبان ویلفیئر سوسائٹی تے روزوار بھُلیکھا دی سانجھ نال 4 کتاباں دی تقریب پذیرائی
پروگرام دا پربندھ شیخ دین محمد لائبریری گوجرانوالہ وچ کیتا گیا
رپورٹ: آفاق بٹ
سائبان ویلفیئر سوسائٹی تے روزوار بھلیکھا دی سانجھ نال شیخ دین محمد لائبریری شیرانوالہ باغ وچ چار کتاباں دی تقریب پذیرائی کیتی گئی ۔سب توںپہلے مسیحا دی اُڈیک جو کہ محترمہ ثروت سہیل ولوں سموئل بیکٹ دے ایوارڈ یافتہ انگریزی ناول ترجمہ اے۔ ایس دے علاوہ ثروت سہیل صاحبہ دی ای لاک ڈائون وچ لکھی شاعری دی کتاب دل آزاریاںاُتے گل بات ہوئی ۔دل آزاریاں نے حاضرین نوں قہقہے لان اُتے مجبور کیتا۔
ایس دے علاوہ پروفیسر ریاض گوہر دی صاحبزادیاں فاطمہ گوہر دی A Journey of Fragrance تے عائشہ گوہر دی کتابMiles n Smiles نوں خوب سراہیا گیا۔ تقریب دی نظامت عتیق انور راجہ جد کہ صدارت نامور معتدل خطیب سعید احمد تاج نے کیتی۔ مقررین نے کہیا عتیق انور راجہ تے ایہناں دے ساتھی معاشرتی رویاں وچ بہتری تے نوجواناںدی صلاحیتاںنوں نکھارن وچ واقعی سائبان دا کردار ادا کر رہے نیں۔
ایس تقریب نوں رونق بخشن والیاں وچ شہر دے معتبر ناں جنہاں وچ موٹیویشنل سپیکر عثمان اشرف تے ماہر تعلیم سجاد وڑائچ،صدر کالم نگار گوجرانوالہ ملک توصیف احمد،عاصم گجر، غلام عباس،خرم بھٹہ یسین گجر ریاض گوہر نامور شاعرہ روبینا ناز،سونیا جی،یاسر مشتاق، شیخ انعام چاندی والا، مسسز ریاض گوہر و دیگر شامل رہے۔
