پاکستان وچ یوٹیوب اُتے جہالت دا دھندہ

محمد اویس غوری

جے تسیں پاکستان وچ یوٹیوب دا کامیاب چینل بنانا چاہندے او یا اچھے خاصے پیسے کمانا چاہندے او تے ایس دا سدھا جہیا فارمولا ایہہ وے کہ پہلے بھارتی وزیراعظم نریندر مودی نوں سیشن کورٹ توں پھانسی دلوائو۔ فیر ہائیکورٹ توں ایس دے گلے وچ پھندا لگوائو، ایس دے بعد ایس دا کیس بھارتی سپریم کورٹ وچ لے جائو تے تاریخ ساز فیصلے دا شور مچا کے ایہنوں اک وار فیر پھانسی لگوائو۔ انڈیا دی عدالتاں ختم ہون تے ایہنوں عالمی عدالت انصاف دے کٹہرے وچ کھڑا کرو، اوتھوں وی ایہنوں جہنم واصل کرو تے فیر ایہنوں اقوام متحدہ وچ لے جا کے پوری دنیا دے مسلمان ملکاں تو ووٹنگ کرائو تے اک وار فیر پھانسی دلوائو۔
شدت حیرت نال میرا منہ کھلیا ہویا سی پر ایتھے سوال کرنا تے بن دا سی، سو میں حیرانی نال جسارت کیتی پر اقوام متحدہ توں کنج؟
پاکستان دے کامیاب ترین یوٹیوبر نے اپنے مسخنی جہے چہرے اُتے ہلکی جہی مسکراہٹ سجاندے ہوئے شاید میری بیوقوفی دا ماتم کیتا تے فیر الٹا سوال داغ دتا، تے کیہ باقی جیہڑی سب پھانسیاں کرائیاں نیں ایہناں دا کوئی وجود ہے؟ اسیں تے بس پاکستانی عوام دے جذبات نال کھیڈنا اے۔ ایہہ میرے لئی مزید حیرت دا مقام سی۔ کیہ مطلب، تسیں ایہہ سب کردے او تے کیہ پاکستانی عوام نوں پتہ نہیں چلدا کہ تسیں جھوٹ بول رہے او، ایہناں دی عقل دا مذاق اڑا رہے او، میرا ایہہ سوال وی بچگانہ جہیا سی پر ایس دا حیران کن جواب تہاڈے نال شیئر کرن توں پہلے میں تہانوں ایس شخصیت نال تے ملوا دیواں جنہاں نال ایہہ گل بات ہو رہی سی۔
میرے ساہمنے پاکستان دا چوٹی دا یوٹیوبر بیٹھیا ہویا سی، جی ہاں جے تسیں ایہناں دے چینل اُتے جائو تے اک اک ویڈیو اُتے کئی ملین ویوز نیں ایہناں دا ایہہ اک چینل ای اندازاً 10 توں 15 لکھ تے کئی وار ایس توں زیادہ ماہانہ کماندا اے۔ چینل دی ویڈیوز بوہت سادہ جہی ہوندی اے، اک وائس اوور چلدی اے تے سکرین اُتے تصویراں ایدھے اُودھے تیردیاں رہندیاں نیں۔ سکرپٹ وچ کوئی جان نہیں ہوندی، بولن والا اپنے انداز توں ای گھٹ تعلیم یافتہ تے سطحی جہیا انسان لگ رہیا ہوندا اے پر حیران کن طور اُتے پاکستان وچ ایس طرح دے یوٹیوب چینلز بوہت کامیابی نال چل رہے نیں تے اچھے خاصے پیسے کما رہے نیں ۔ جس صاحب نوں میں ملن آیا ایہہ میرے نال اک ٹی وی چینل وچ کم کردے سن، اوتھوں اوہناں نے یوٹیوب دا اک چینل بنایا فیر دو ہوئے تے ہن اللہ دے فضل و کرم نال ایہناں دے درجناں چینلز نیں تے ایہناں سارے چینلز اُتے ایہہ اک ای مواد ویچ رہے نیں اک ای سکرپٹ تھوڑے جہے ردو بدل دے نال سارے چینلز اُتے چلدا اے۔ وائس اوور تبدیل ہو جاندا اے تے اللہ دے سہارے نائو اے کہ چلدی جا رہی اے۔
میرا سوال سی کہ کیہ پاکستانی عوام اینی کند ذہن اے کہ ایہناں نوں پتہ ای نہیں ہوندا کہ تسیں جھوٹ بول رہے او، تسیں مودی نوں پھانسی اُتے پھانسی دے رہے او، ترکی دی فوجاں امریکہ بھجوا کے ایہنوں تباہ کر رہے او، اسرائیل دے ٹوٹے ٹوٹے کر رہے او، کرونا دے دناں وچ بھارت وچ بت توڑ رہے او تے ہندوئواں نوں دھڑا دھڑ مسلمان کر رہے او، کشمیر وچ بھارتی فوج دی ایسی تیسی کر رہے او، پاکستان دی خفیہ ایجنسی دے پوری دنیا وچ آئے دن کامیاب مشن کرائے جا رہے نیں۔ فلسطین دی فوجاں نوں اسرائیل وچ داخل کر کے درجناں فوجیاں نوں ہلاک کرا رہے او، مسلماناں دا نواں عالمی بینک بنا کے مغربی معیشت دی کمر توڑ رہے او یا انج دے ای ان گنت جھوٹ بول رہے او، پر پاکستانی عوام تہاڈی گل اُتے یقین کر رہی اے؟ یوٹیوبر صاحب دا فرمانا سی کہ پاکستانی عوام بوہت جاہل اے (میں اونج ایس توں اتفاق نہیں کردا) ایہناں نوں گھٹی وچ ایہہ گل دتی جاندی اے کہ انڈیا نوں تباہ کرنا اے، اسرائیل نوں نیست و نابود کرنا اے، ہندو ساڈے دشمن نیں، سائنس جھوٹ اُتے مبنی اے، پاکستان نوں سیاستداناں نے تباہ کر دتا اے تے ایس دے نال سونے اُتے سہاگہ ایہہ وے کہ پاکستانی عوام نوں کتاباں پڑھن دا کوئی شوق نہیں، عالمی سائنسی فتوحات نال ایہناں دا کجھ لینا دینا نہیں، تاریخ دا ایہناں نوں شدھ بدھ نہیں تے جو ایہناں نوں سینہ بسینہ ملیا اے ایہہ ایسے اُتے من وعن یقین کردے نیں ایہناں نوں تسیں کوئی وی سائنسی تھیوری دس دیو ایہہ ایس اُتے اکھاں بند کر کے یقین کر لین گے۔ ایہہ کوشش نہیں کرن گے کہ انٹرنیٹ اُتے جا کے ایس دی تصدیق کر لئے۔ ایس طرح پاکستانی عوام مذہب نال والہانہ لگائو رکھدی اے۔ کفار نال بے انتہا نفرت کردی اے تے علم نال ایہناں دا کوئی تعلق نہیں، ایہناں نوں تسیں کوئی وی مذہبی واقعہ یوٹیوب اُتے سنا دیو ایہہ ہزاراں دی تعداد وچ ایس اُتے سبحان اللہ کردے نظر آن، تسیں مودی نوں پھانسی لا دیو ایہہ ایسے اُتے ریاستی تے مذہبی نعرے لاندے نظر آن گے۔
یوٹیوبر صاحب نے کافی دا سپ لیندے ہوئے اپنا بیان جاری رکھیا، پاکستان وچ وزیراعظم عمران خان نے ایسے لئی تے تسبیح ہتھ وچ پھڑ لئی اے کہ اوہ ایس نوں وکھا وکھا کے ویلا پورا کر لین گے تے کوئی ایہناں توں صرف ایسے لئی سوال نہیں کرے گا کہ یار بندہ تے نیک اے، اسیں جدوں اپنے یوٹیوب چینل اُتے عمران خان دی تسبیح والی تصویر لانے آں تے پاکستانی عوام ایس نوں بوہت پسند کردے نیں تے ساڈے اُتے ڈالراں دی بارش ہوندی اے، پاکستانی عوام دا ایس گل اُتے یقین اے کہ سیاستدان چور ہوندے نیں ایس لئی اسیں سیاستداناں نوں جنہیاں وی گالھاں کڈ لیے، ایہناں دے جنہے وی جھوٹے سکینڈل ساہمنے لے آئیے ساڈے بینک بیلنس وچ وادھا ای ہوندا اے۔ اسیں عمران خان دا اک بیان لے کے جھوٹے کارنامے گنوانا شروع کر دینے آں تے پاکستانی عوام ساڈی لمبی لمبی جھوٹ اُتے مبنی ویڈیوز ویکھدی اے۔
یوٹیوبر ہن شاید گل ختم کرنا چاہ رہے سن، تسیں ویکھو کہ ساڈی ویڈیو اُتے ملینز وچ ویوز آندے نیں جد کہ تہاڈے جہے جنہے وی لوک پاکستان وچ ہسٹری اُتے، کرنٹ افیئرز اُتے ویڈیو بناندے نیں ایہناں دی ویڈیو اُتے شازو نادر ای ویوز لکھ توں اُتے جاندے نیں، تسیں لوک اک اک سکرپٹ اُتے کنہے دن محنت کردے او، یوٹیوب چینل لئی پوری ٹیم ہائر کردے او پر تہاڈا منجن پاکستان وچ وکن والا نہیں۔ اوہ تہانوں پی کے مووی دا سین یاد اے جس وچ عامر خان اک کالج دے باہر پتھر اُتے تلک لا کے مذہب دی دکان بنا لیندا اے تے فیر اوتھے مذہب دا دھندا چل نکلدا اے تے سٹوڈنٹ امتحان وچ کامیاب ہون لئی سجدے شروع کر دیندے نیں۔ بالکل ایسے طرح اسیں وی پاکستان وچ جہالت دا دھندہ شروع کر رکھیا اے اسیں جھوٹ بولدے جا رہے آں تے پاکستانی عوام ساڈے ساہمنے سر جھکائے ڈالراں دے ڈھیر لاندی جا رہی اے۔ رہے رب دا ناں۔

اپنا تبصرہ گھلو