کجھ چٹ پٹیاں گلاں

لكهت:سعد اللہ شاہ

لاکھ ملتے ہیں ہم بہانے سے
پیار چھپتا نہیں چھپانے سے
کچھ بھی باقی نہیں رہے گا
پھر تم نکالو ہمیں فسانے سے کیسی دلچسپ صورتحال پیدا ہو گئی اے کہ اوہ جہناں نوں اک ایس ایچ او دی مار کہیا جا رہیا سی کہن والا یقینا خفت محسوس کر رہیا ہووے گا بہرحال سانوںتے ایس صلح توں بڑا لطف آیا کہ ایہدے نال کئی بھولے بسرے شعر یاد آن لگ پئے۔
گلے سے لگتے ہی جتنے گلے تھے بھول گئے
وگرنہ یاد تھیں ہم کو شکائتیں کیا کیا
کوئی منے نہ منے سانوں تے ایہدا اندازہ سی کہ معاملہ بغاوت دا ہے ای نہیں ایہ وی چنگا ہویا کہ ن لیگ ٹریپ نہیں ہوئی نہیں تے اوہ واہوا خراب ہوندی۔ میاں شہبازشریف ایہنوں پی ٹی آئی دا اندرونی معاملہ کہہ کے طرح دے گئے یاں دامن بچا گئے نہیں تے ناسمجھ تے للچا رہے سن کہ بندھے بندھائے اینے سارے ممبران اسمبلی جھولی وچ آ پین گے۔ سچ مچ ایہ ہونا سی عمران خان دی انا اپنی تھاں قائم رہی پر اوہ جہناں نے بیٹھے بٹھائے یتیم ہو جانا سی کچے دھاگے نال بنھے آئے۔
جانا پڑا رقیب کے در پر ہزار بار
اے کاش جانتا نہ تری رہگزر کو میں
بڑیاں دلچسپ گلاں سنن وچ آئوندیاں ریہاں کہ اک صاحب کہہ رہے سن کہ جہانگیرترین کول تے دین لئی کجھ نہیں۔ ایس لئی جہڑے لوک اوہناں دے نال کھڑے نیں اوہ بڑے پرخلوص تے بے غرض نیں۔ انج جہانگیرترین کنگز میکر نیں تے اوہناں دا دسترخوان بڑا کھلا اے تے فیر دسترخوان تے صرف طعام ای نہیں ہوندا انعام وی ہوندا اے تاں ای تے سارے قیام کرنا پسند کردے نیں۔ اک گل تے جہانگیرترین دی ٹھیک سی کہ ساری چینی تے آٹامافیا سگوں دوائی مافیا نوں چھڈ کے اوہناں نوں ای ٹارگٹ کیتا جا رہیا سی۔ انج دی ای گل پاناما وچ نوازشریف تے اوہناں دے حواری کہہ رہے سن پر کیہ کریئے ہر بندہ تے ایس قابل نہیں ہوندا کہ اوہنوں عبرت یاں مثال بنایا جاوے۔ منیرنیازی نے وی امتیاز وکھایا سی:
مجھ میں ہی کچھ کمی تھی کہ بہتر میں ان سے تھا
میں شہر میں کسی کے برابر نہیں رہا
سچی گل ایہہ وے کہ سانوں تے جتھوں وی اجہی صورتحال مل جاوے کہ تفریح دا سامان ہووے تے اسیں خوش ہو جانے آں۔ تسیں تنقید نہ کرو بس لطف اٹھائو کہ بدلتا ہے رنگ آسماں کیسے کیسے‘ کسے نوں حرف آخر نہ سمجھو۔ ایہ سیاست اے سائنس نہیں۔ اجے اک ہور دلچسپ لڑائی مرادسعید تے قادرپٹیل وچکار ویکھ رہیا سی۔ انج پیپلزپارٹی دے قادرپٹیل ہے بڑے مزے دے آدمی نیں۔ اک تے اوہناں وچ سنس آف ہیومر وی بہت اے۔ بڑے بے لحاظ نیں‘ اوہناں دا خاص شکار مرادسعید نیں۔ قادرپٹیل دے اسمبلی وچ کیتے گئے اشارے لفظاں وچ بیان نہیں کر سکدا۔ انج وی پارلیمنٹ دی زبان و ادب ہور اے‘ بہرحال ہن دے قادرپٹیل دا ذوق سخن وی سامنے آ گیا۔ ہویا انج کہ مرادسعید نے قادرپٹیل نوں مقابلے دا چیلنج دے دتا تے بھیڑی طرح پھس گئے۔ قادرپٹیل نوں اللہ اجیہا موقع دیوے‘ ایہ انج وی لائٹ ویٹ تے ہیوی ویٹ دا مقابلہ بن جاندا اے جہڑا ٹھیک نہیں۔
میرا کپتان ساڈے اپنے دو صدارب ڈالر لیاوے گا۔ اک سو ارب ڈالر قرض دین والے ملکاں دے منہ تے مارے گا تے دوجا سو ارب لوکاں تے لاوے گا۔ کہندے نیں انسان دے اندر دا بچہ جلدی نہیں مردا۔ مزے مزے دیاں گلاں وچ ساڈے سامنے بوم بوم شاہد آفریدی دا اک دلچسپ سوال آ گیا۔ انج مینوں حیرت ہوئی کہ اوہناں دے بھولے پن وچ اک ذہانت کہ سادگی و پرکاری۔ اکثر اوقات سدھی جہی گل وچ کنے وَل ہوندے نیں شاہدآفریدی تے بڑے آرام نال پچھ لیا کہ جناب عمران بھائی! تسیں نواز تے زرداری نوں چھڈو‘ دسو تسیں کیہ کر رہے او ہن دسو خان صاحب ایس سوال دا کیہ جواب دین۔ اوہو جو منیرنیازی نے کہیا سی:
کسی کو اپنے عمل کا حساب کیا دیتے
سوال سارے غلط تھے جواب کیا دیتے
انج جدوں توں صحافیاں نے شاہدآفریدی توں سیاست وچ آن دا پچھیا اے اوہ کجھ کجھ محسوس کرن لگ پئے نیں تے اوہناں دی گل بات وچ طرحداری آ گئی اے۔ اوہناں نے اک ہور پیاری گل وی صاحب دے گوش گزار کیتی اے کہ بہتر اے پہلاں پاکستان ٹھیک کر لوو فیر نویں دا وی سوچیا جا سکدا اے۔ مزیدار گل ایہہ وے کہ مہنگائی دے مارے لوک پچھدے نیں ایہ کہڑا پاکستان اے؟ ایہ میرا پاکستان اے نہ تیرا پاکستان اے۔ بس اک واری فیر اپنے موضوع ول آئونے آں یعنی حکومت تے ہم خیال گروپ دی صلح۔ تسیں انج سمجھ لوو کہ دوویں ای ایہ ہجر برداشت نہیں سن کر سکدے۔ بھاویں وصال تے‘ اوہناں تے انگلیاں اٹھنیاں سن تے اوہ وی اٹھیاں پر اوہ لازم و ملزوم نیں۔ اوہناں دے گروپ نمائندیاں نوں آپ بزدار نال ملاقات کرنی پئی۔ ہن پرت کے آئے او تے گھر کیسا لگا اے۔ جو وی اے عثمان بزدار نے اوہناں دی گل غور نال سنی تے اوہناں دیاں ترقیاتی سکیماں نوں بجٹ منصوبے وچ شامل کرن دا پک کرایا اے۔ ایہدے تے عمل نہ ہویا تے فیر وی کجھ نہیں ہووے گا۔
آخر وچ وزیراعظم دی سچی گل کہ چین توں بدعنوانی خلاف سکھیا جا سکدا اے تے ایہ کہ 23ورھے لنگھ گئے نیب کرپشن تے قابو نہیں پا سکیا۔ پر اصل گل تے ایہہ وے کہ نیب بڑا کامیاب ادارہ اے کہ جس مقصد لئی بنیا اوہ مقصد تے ساریاں نے پورے کیتے۔ واری تے فیر ساریاں دی آئونی اے۔ دوجی گل ایہہ وے کہ چین توں کیہ سکھنا اے حضرت عمرؓ دا حوالا تے تسیں وی دیندے او۔ کسے دی کیہ مجال سی کہ کرپشن کر جاندا بہرحال خطرہ ٹل گیا اے۔ حکومت محفوظ ہتھاں وچ اے۔ اک شعر:
عمر گزری ہے دربدر اپنی
ہم ہلے تھے ذرا ٹھکانے سے

اپنا تبصرہ گھلو