کرونا دیاں راتاں‘کرونا دے دن!
لكهت:ابرار ندیم
اک سردار دے گوانڈھی دی مجھ دے سنگھ بڑے وڈے سن۔ سردار جدوں وی اوہدے کولوں لنگھدا تے کھلو کے سوچن لگ پیندا جے میریاں لتاں ایہناں سنگھاں وچ پھس گئیاں تے کیہ ہووے گا۔ آخر اک دن اوہنے آپ ای سنگھاں وچ اپنیاں لتاں پھسا دتیاں۔ مجھ نے اوہنوں گھما گھما کے تھلے سٹیا جہدے نال سردار دیاں دوویں لتاں ٹُٹ گئیاں۔ مجھ دا مالک سردار نال ہسپتال وچ افسوس کرن گیا کہ میری مجھ نے تہانوں ماریا جہدی وجہ نال تہاڈیاں لتاں ٹُٹ گئیاں۔ سردار بولیا چھڈو جی لتاں دی خیر اے ٹینشن تے مُک گئی ناں کہ لتاں پھسیاں تے کیہ ہووے گا۔ سوشل میڈیا تے ایہ لطیفہ ممکن اے تسیں وی پڑھیا ہووے پر ایس توں پہلاں کہ تسیں اپنے کسے گرجھ وچ ایہنوں ساڈے ایتھے کسے سیاسی صورتحال نال جوڑ دیو میں ایہ وضاحت کر دیواں کہ ایہ مماثلت صرف اتفاقیہ ہو سکدی اے جہدے لئی ادارہ تے راقم الحروف دوویں ذمہ دار نہیں۔ انج وی ایہ لطیفہ پڑھ کے جس ٹینشن ول تہاڈا ذہن جا رہیا اے اوہ ٹینشن اجے اپنے عروج اُتے اے تے خیر نال اجے ہور کجھ عرصہ ایہدے ختم ہون دے کوئی امکانات وی وکھائی نہیں دے رہے۔ ایس لئی ایہ سوچنا کہ میں کالم وچ ایس لطیفے دی آڑ لے کے کسے مخصوص سیاسی ٹینشن یاں بیماری نوں نشانہ بنایا اے تے ایس حوالے نال میں کہواں گا کہ ایہ میرے ورگے سدھے سادے تے غیرسیاسی بندے تے بے تُکی اک تہمت ہووے گی۔
اصل گل ایہہ وے کہ میں لطیفہ کرونا دی وباء تے ایہدے نال پیدا ہون والی ٹینشن دے حوالے نال لکھیا اے جہدا شکار اسیں دوویں میاں بیوی پچھلے ورھے رہ چکے آں۔ بھاویں کرونا دی دہشت وچ اج وی کوئی زیادہ کمی نہیں آئی پر ایس ویلے ایس بیماری دا فل ٹہکا سی۔ ٹی وی چینلاں تے اخبارات وچ جس اہتمام دے نال ایس بیماری وچ مبتلا بندیاں دی گنتی تے ایس بیماری نال فوت ہون والیاں دے اعدادوشمار مرچ مصالحہ لا کے پیش کیتے جاندے سن اوہناں نوں پڑھ‘ ویکھ تے سن کے چنگا بھلا بندہ وی سُن ہو جاندا سی جہدے بعد میرے ورگے کمزور دل تے کمزور ایمان دے بندے نوں انج محسوس ہوندا سی جیویں جی دا جانا ٹھہر گیا اے صبح گیا یاں شام گیا۔ ایس ویلے دوجیاں دا تے پتہ نہیں پر گھٹو گھٹ میرے لئی کرونا بالکل انج ای ٹینشن سی جیویں اپنیاں دوویں لتاں تڑوان توں پہلاں مجھ دے وڈے وڈے سنگھ ویکھ کے سردار صاحب نوں لاحق ہوندی سی۔ اٹھدے بیٹھدے تے جاگدے سوندے ہر ویلے ایہو ٹینشن ستاندی سی کہ جے مینوں یاں میری فیملی دے کسے بندے نوں کرونا ہو گیا تے کیہ ہووے گا پر ایس ساری پریشانی تے احتیاطی تدبیراں دے باوجود اوہو ہویا جو اللہ نوں منظور سی۔ سانوں دوہاں میاں بیوی نوں تقریباً اکٹھے ای کرونا ہو گیا۔ ایس عرصے وچ سانوں جس اذیت چوں گزرنا پیا اوہ ساری اپنی تھاں پر ایس بیماری دے بعد ایہ ہویا کہ سردار صاحب وانگوں میری وی ایہ ٹینشن ختم ہو گئی کہ جے کرونا ہو گیا تے کیہ ہووے گا۔ پر ایس بیماری دوران میں اپنی بیگم دے نال تقریباً اک مہینہ کسے وقفے دے بناں جہڑے اوکھے حالات وچ گزاریا تسیں ایہدا اندازہ انج لا سکدے او کہ ایس دوران مینوں اپنی نانی دے نال نال مرزا غالب د ا شعر
حد چاہیے سزا میں عقوبت کے واسطے
آخر گنہگار ہوں کافر نہیں ہوں میں
بڑی شدت نال یاد آئوندا رہیا۔ جتھوں تک خالصتاً کرونا دا معاملہ اے تے ایہ گل ہن تک دی ریسرچ توں ثابت ہو چکی اے کہ مناسب احتیاط‘ دوادارو تے دعا دے نال ویلے سر کرونا ویکسی نیشن دے استعمال نال نہ صرف ایس بیماری توں چھٹکارا پایا جا سکدا اے سگوں ایہدے ہون دا فائدہ چک کے ایس افراتفری تے نفانفسی دے دور وچ وی اک اجہی گوشہ نشینی دا لطف لیا جا سکدا اے جتھے اپنا پرایا مہرباں نامہرباں کوئی نہ ہووے۔ کرونا دا سابق مریض ہون دی حیثیت نال جے مختصر لفظاں وچ اپنا تجربہ بیان کراں تے صرف ایناں ای کہواں گا کہ
ساتھ بیوی اگر نہ ہو سالک
یہ کرونا ہزار نعمت ہے
میرے دل وچ ایہ خیال اوس ویلے توں زیادہ تقویت پھڑ گیا اے جدوں میں میوہسپتال وچ استاد محترم عطاء الحق قاسمی نوں اپنیاں گنہگار اکھاں نال کرونا انجوائے کردے ویکھیا اے۔ اودوں توں دل وچ اک خلش جہی پیدا ہو گئی اے کہ کاش میں وی اپنے حصے دا کرونا گھر دے اندر بیگم نال بامشقت بھگتن دی تھاں قاسمی صاحب وانگوں کسے کھلی ڈلھی فضا وچ گزاریا ہوندا۔ حالاں کہ سرکاری ہسپتال وچ قاسمی صاحب نوں جو پرائیویٹ کمرہ دستیاب سی اوتھے اوہناں دی دیکھ بھال لئی سٹاف وچ سوائے اک ادھ نرس دے زیادہ تر گنتی سسٹرز تے برادرز دی سی۔ رہی سہی کسر حاجی عزیز احمد گڑھی شاہو نے پوری کر دتی جہناں دے متواتر ہسپتال آن جان نال اوہناں دی بیباکانہ تے والہانہ نظراں دی تاب نہ لا کے نرساں تے سسٹرز دے نال نال خاکروباں نے وی پردہ شروع کر دتا سی۔ اینی سوہنی کمپنی دے باوجود مینوں حیرت اے قاسمی صاحب ہسپتال وچ اجہے ریلیکس وکھائی دتے جیویں اوہناں دا پرائیویٹ کمرہ ہسپتال وچ نہیں بھوربن دے کسے فائیوسٹار ہوٹل وچ بک ہووے۔ اوہ لوک جہڑے کرونا نوں ہن تک ذاتی طور تے انجوائے کر چکے نیں اوہ میری ایس گل دی ضرور تائید کراں گے کہ جے کرونا توں فوت ہون دا خطرہ کڈھ دتا جاوے تے نفسانفسی تے خواہ مخواہ دی مصروفیت دے ایس دور وچ کرونا پازیٹو توں وڈی کوئی عیاشی نہیں جہدے نتیجے وچ تہانوں گھٹو گھٹ دنیا بھر دی منافقت تے فضولیات توں چھٹکارہ مل جاندا اے جہدے وچ جے اللہ توفیق دیوے تے تسیں اپنا تزکیہ نفس وی کر سکدے او۔٭٭
