’’اوئے میں نشٹ مار دیاں گا‘‘
لكهت:ایثار رانا
دیکھا ایک خواب تو یہ سلسلے ہوئے،دور تک بجٹ کے ہیں گل کھلے ہوئے،انج لگ رہیا اے کہ میں کوئی خواب ویکھ رہیا واں ایہ چمتکار ساڈی زندگی وچ روز روز نہیں ہوندے۔ بجٹ ہے یارو تے بچوں کو من پسند ٹافیاں دینے کا سلسلہ۔ گروتھ ریٹ اے کہ سنبھالے نہیں سنبھل رہیا۔ ایہ خان صاحب نے کہڑا انترمنتر پھوکیا سمجھ نہیں آ رہیا اسیں سعودی عرب نوں ملے خیرات وچ چالاں دے چکر وچ رہے تے ان صاحب اندرواندر گیماں پاندے رہے۔ سانوں پہلے دن توں رب دے حکم تے یقین اے کہ ہر مشکل دے بعد آسانی اے میرا یقین اے کہ اللہ تے اوہدے رسول پاکؐ ہوراں دے ناں تے بنے ملک وچ دیر ہو سکدی اے انھیر نہیں۔ خان صاحب تے اوہناں دی ٹیم مبارکباد دی حقدار اے پر ایہ ادھی خوشی اے اصل خوشی اودوں ہووے گی جدوں غریب دے گھر خوشحالی آوے گی‘ جدوں اوہدا مرجھایا چہرہ کھلے گا۔ سنتاسنگھ نے اپنے ملازم نوں کہیا میں رات نوں خواب ویکھیا توں میری بڑی خدمت کیتی ایہہ لے پنجی لکھ دا چیک‘ ملازم نے خوشی خوشی چیک لیا اوہدے تے دستخط نہیں سن اوہ بولیا مائی باپ ایہدے تے دستخط نہیں‘ سنتاسنگھ بولیا جدوں اگلے خواب وچ خدمت کرو گے تے دستخط وی کر دیواں گا۔ میرا یقین اے کہ ایس واری ساڈی واری تے گھگھو نہیں رووے گا۔ قوم نوں چیک مل گیا ایہدے تے دستخط وی موجود نیں۔ رہی گل بلاول بھانجے دی حیرانی دی تے میرا خیال اے کہ حیرانی توں ودھ اوہناں دی پریشانی بن دی اے۔ خان صاحب نے ایس بجٹ وچ گالھاں کڈھن تے آٹا گنھدے ہلن دی گنجائش وی نہیں چھڈی۔ بہرحال ایہ چنگا لگا کہ بلاول بھٹو جنے حیران سن اوہناں دے نال کھڑے شہبازشریف اونے پریشان نہیں سن۔ دور توں دوویں انج لگ رہے سن جیسے ہنسوں کی جوڑی،جیسے رات اور دن جیسے چن تے چکوری جیسے ٹچ بٹناں دی جوڑی۔ میں تے پہلے کہندا سی کہ مریم بی بی نے کھیڈاں گے نہ کھڈاواں گے وچ پسوڑی پاواں گے لا رکھی سی انکل شہباز تے بلاول نے اوہناں نال کٹی کر کے پیپلزپارٹی‘ شین لیگ وچ تھو مارا کرکے چنگا کیتا۔ کندھاں نال سر مارن دا کوئی فائدہ نہیں‘ کندھاں پنڈی دیاں ہون یاں اسلام آباد دیاں بہت سخت ہوندیاں نیں کیہ لوڑ اے کہ ایتھوں بندہ ٹکروٹکری ہو کے اپنے سر وچ گومڑے پاوے بھئی رَل مل کے کھیڈے‘ تے کہندے رہے کوکلا چھپاتی جمعرات آئی جے جہڑا اگے پچھے تکے اوہدی شامت آئی جے۔ ہن ویکھنا ایہہ وے کہ پارلیمانی تخت تے چھوٹے میاں صاحب پیر پسارن گے یاں بلاول اپنی مرضی نال جتھے چاہن گے منجھی ڈاہ لین گے۔ فقیر نے صدا دتی نویں نویلی ووہٹی باہر نکل کے بولی بابا معاف کر‘ فیر تھوڑا اگے گیا تے بوہے توں سس دی آواز آئی‘ اوہ خوشی خوشی واپس آیا تے سس بولی جا معاف کر‘ فقیر بولیا ایہ گل تے تیری بہو نے وی کیتی سی تے توں سد کے کیوں کہیا اوہ بولی بس ایہ دسنا سی کہ ایہ گھر اوہدے پیو دا نہیں گھر دی مالکن میں آں۔ ایمانداری دی گل اے پارلیمانی اپوزیشن اپارٹمنٹ ٹیکنیکلی میاں صاحب دا اے ایہدے اُتلے پورشن وچ یوسف رضا گیلانی نوں دھکو دھکی گھٹ کرائے تے دتا گیا اے ایس لئی چھوٹے میاں صاحب جدوں چاہن چھوٹی بہو نوں کہہ سکدے نیں کہ اوہ گھر دے مالک یاں مالکن نیں۔
صاحب ڈبیٹ توں نہیں تھپڑ توں ڈر لگدا اے کیوں جے میری پیاری آپا زبان چھٹ تے ہے ای نیں ہتھ چھٹ وی نیں۔ مظہرشاہ مرحوم دا ڈائیلاگ سی اوئے میں گشت کٹ کے آیا تے نشٹ مار دیاں گا۔ ساڈی آپا نوں پیپلزپارٹی توں ودھ کون جان دا اے ایس لئی جے اگر وہی پتے ہوا دینے لگیں جن پر آپ تکیہ کریں تے تہاڈی غلطی اے۔ بندہ اڈدے پتیاں دا کدی وساہ نہ کھاوے ایہ تکیے چڑیاں دا چنبہ ہوندے نیں کدی وی اڑ جاندے نیں۔ چلو جی جو وی ہویا میرے جاوید چوہدری دا تے رانجھا راضی ہو گیا میں تے اوہناں نوں بار بار کہہ رہیا واں کہ ونجھلی والڑیا توں تاں موہ لئی او مٹیار جنہے سی کدے نہیں منی ہار اکثر اوقات انسان جت کے وی ہار جاندا اے کجھ وی سی میرے پیارے جاوید چوہدری نوں بریک دوران ہون والی پانی پت دی آخری لڑائی کیپچر کرکے نہیں سی چلانی چاہیدی ریٹنگ نے ساڈے توں سب کجھ کھوہ لیا اے۔ سنتا سنگھ ڈاکٹر نوں بولیا میرا قد میرے وزن دے برابر نہیں میرے قد لئی کوئی دوا تجویز کرو‘ ڈاکٹر بولیا اوہ کیویں؟ بنتاسنگھ بولیا وزن دے مطابق میرا قد نو فٹ دس انچ ہونا چاہیدا اے بس ایتھوں فلم وچ کامیڈی شروع ہوندی اے۔ اسیں اپنا وزن ٹھیک کرن دی تھاں مصنوعی طریقے نال قد ودھان دے چکر وچ پے جانے آں۔
جاندے جاندے وزیراعلیٰ سردار عثمان بزدار اگے اک بینتی سی تن توپہ واروں من توپہ واروں بگڑی بنا دے توہے رو رو پکاروں۔ اللہ اللہ کرکے ساڈی قسمت وچ بناں بے ایمانی تے اضافی رشوت دے اک پلاٹ آیا اسیں تے ساڈے ورگے صحافی دس ورھیاں توں جرنلسٹس کالونی دے بی بلاک وچ قبضہ گروپاں دے سامنے مقبوضہ کشمیر تے فلسطین بنے بیٹھے آں۔ عالم پناہ دہائی اے دہائی۔ تہاڈے ہوندے قبضہ گروپ نے ایہ قیامت مچائی اے۔ برادرم ارشد انصاری نے اعلان بغاوت تے کیتا اے۔ مزا ایہہ وے کہ ہن اوہ بیک فٹ تے نہ جان۔ پریس کلب وچ اوہناں دی صدارت دا آئینی طور تے آخری ورھا اے ہن اوہناں دے سٹمپ ہون دا وی کوئی چانس نہیں۔٭٭
