کیہ حکومت ضمنی بجٹ نہ دیوے گی
سید صفدر رضا
جون دا مہینہ گرمی برساندا جھلساندا کیہ گھٹ سی کہ اسمبلی دے یخ بستہ ہال وچ بجٹ دی گرمی اپوزیشن دا شور شرابہ حکومتی غریب دوستی دعویاں دی گونج وچ ہر وار وانگوں شوگر کوٹڈ کونین دی گولی دتی گئی۔ لکھت پڑھت وچ شوکت ترین صاحب نے حکومتی اقدامات نوں غریب دوست پالیسی قرار دیندے ہوئے اپوزیشن دے شور شرابہ وچ اپنی بجٹ تقریر پوری کر کے فرائض منصبی انجام دے کے گویا پاکستان دی غریب عوام دے مسائل حل کر دتے پر ایس بجٹ دے اثرات تنور توں روٹی لیندے ویلے محسوس ہون گے۔ بجلی دا بل دین ویلے پتہ چلن گے سفر کردے تے دوائی لیندے ہوئے پتہ چلن گے۔ بجٹ دا تخمینہ تے حجم 8483 ارب روپئے رکھیا گیا اے جد کہ 3990 ارب روپئے بجٹ خسارہ دسیا جا رہیا اے جس نوں 382 ارب دے ٹیکس لا کے خسارے نوں گھٹ کرن دی تجویز وی دتی گئی اے جد کہ حکومت نے اک نواں ٹیکس فون کال دے 3 منٹ توں ودھ دورانیے اُتے وادھو ٹیکس لا دتا اے جد کہ واحد شے فون کال سی جس دے نرخ پچھلی 3 دہائیاں وچ ودھن دی بجائے گھٹ ہوئے نیں۔قارئین نوں یاد ہوئے گا 1990 وچ PCO اُتے لوکل کال دے نرخ پنج منٹ دی کال دے 5 روپئے سن تے ٹرنک کال دے ریٹ شہراں دے لحاظ نال وصول کیتے جاندے سن۔ 30 سال بعد ایہہ اعزاز ایس حکومت نوں حاصل اے کہ ذرائع ابلاغ دا ایہہ ذریعہ مہنگا کیتا۔ تے شنید اے کہ انٹرنیٹ اُتے وی پہلے وی ٹیکس لیا جا رہیا سی تے مزید لگن دا خدشہ اے کرونا وبا وچ غریب ملکاں دے قرضہ جات دو سال لئی موخر کر دتے گئے سن نجانے کنہاں قرضہ جات لئی 3060 ارب رکھے گئے نیں بجٹ وچ 16 فیصد پاک فوج دے رکھے گئے نیں جیہڑا بارڈر دے علاوہ ملک وچ اندرونی دہشت گرداں دا مقابلہ کر رہی اے ہن مسئلہ ایہہ وے کہ حکومت گڈیاں سستی کرن دا وڈا دعویٰ کر رہی اے پر پٹرولیم لیوی ودھا کے تے پٹرولیم دی مصنوعات اُتے ٹیکس لا کے حکومتی ذرائع اآمدن دا اہم ہتھیار اے۔جیہڑے لوک سفر کرن دا کرایہ بوجھ سمجھدے نیں اوہ پٹرول مہنگا ہون اُتے سفر مشکل سمجھ رہے نیں جدوں پٹرول مہنگا ہوندا اے کسے ضمنی بجٹ دی لوڑ نہیں ہوندی تے روٹی کمانا مشکل ہو جاندا اے۔ گڈی کتھوں خریدن گے ایہہ تے اوہ گل کہ روٹی مہنگی اے تے کیک کھا لوئو تے بجٹ لفاظی دے علاوہ کجھ نہیں غربت مزید ودھے گی ۔ احساس پروگرام یا انکم سپورٹ پروگرام دے پیسیاں نال کارخانے لائے جاندے تے قوم نوں بھیک دی بجائے باعزت روز گار مہینا کیتے جاندے صحت دے پروگرام تعلیمی پروگرام ودھائے جاندے سستے انصاف دی فراہمی دی اصلاحات فرمائی جاندیاں جس ریٹ اُتے اسمبلی کینیٹن اُتے کھانا ملدا اے ایس ریٹ اُتے کاش غریب نوں کھانا میسر اتاً بجلی دے نویں منصوبیاں لئی 118 ارب روپئے رکھے گئے نیں کاش بجلی غریب عوام نوں زیرو لوڈشیڈنگ میسر اآئے تے بلاں وچ وادھو چارجز بند کیتے جان شہری اآبادیاں وچ پنج لکھ دے بلاسود قرضے حقداراں تیکر اپڑائو تاکہ سیاسی پوائنٹ سکورنگ لئی استعمال نہ ہوئے تے جیہڑے پنڈاں وچ رہن والے غیر زراعت پیشہ ایس توں کیوں محروم رہن تے جیہڑے پہلے ای ریٹائرڈ نیں ایہناں بزرگاں دی رگاں توں وی خون چوسن دی صلاحیت وی ایس حکومت دی ای نظر اآئی اے جنہاں نے اپنی جوانی حکومتی اداریاں اُتے داری ایہناں دی قربانیاں دی سزا وی موجودہ حکومت مقرر فرما رہی اے تے صوبیاں وچ پانی دی تقسیم اُتے اختلاف اے ۔ فنڈز دی تقسیم کنج دے منصفانہ ہوئے گی مراعاتی طبقہ تے بوہت تھوڑا اے ملاں مشیناں دے پہییاں نوں رواں رکھن والے مزدور محنت کشاں دی تعداد وڈی اے ایتھوں قابل تے محنتی افراد پہلے ای دوجے ملکاں دا رخ کر چکے نیں ہن صوبیاں نوں اپنے بجٹ وچ غریب نوں مدنظر رکھ کر پالیسیاں بنانی چاہیدی اے نہیں تے سٹریٹ کرائمز ودھ جان گے۔ بھکھ جرم ول پہلا قدم اے جے حکومت ضمنی بجٹ نہ دیوے تے عوام کڑوی گولی وی نگل لین گے۔
