17 جون ۔۔۔ 14 خون

شہدائے ماڈل ٹائون ، لاہور دی 7ویں برسی

وقار احمد وقار

شہدائے ماڈل ٹائون ، لاہور دی 7ویں برسی منائی جا رہئی اے۔ منا کون رہئے نیں ؟
قتل ہو جان والیاں دے اصل وارث تے تحریکِ منہاج القرآن تے پاکستان عوامی تحریک دے نال جڑے اپنی دھرتی ماں نال مخلص تے وفادار اوہ طالبانِ عبادت و شہادت جنہاں ایہ فرسودہ نظام جڑوں اکھاڑ کے مصطفوی ؐ انقلاب دی سویر طلوع ہون تک چل سو چل کیتی رکھن دی قسم کھاہدی ہوئیی اے۔
حق تے ایہ سی کہ پاکستان وچ انقلاب تے تبدیلی لئی منہاجیاں جس پارٹی دا ساتھ دِتا سی اج ایہ برسی اوہناں دی سیاسی جدوجہد وچ نال شامل تے اوہناں دے ووٹ پان پوان پاروں اقتدار تے حکومت دے مزے لین والی پارٹی آپ مناندی کہ سیاسی کزن اکھوان بعد منہاجیاں ایہ تعلّق نبھاون وچ اخیر کر چھڈی سی نہئیں تے منہاجیاں تے پاکستان عوامی تحریک دے سیاسی ساتھ دے بغیر دُنیا جاندی اے کہ کہڑے دھرنے ، کہڑے جینے تے کہڑے مرنے؟؟؟
الیکشن کمپین دوران عمران خان توں لے کے شیخ رشید تک تے ہر یبلو ببلو سانحہ ماڈل ٹائون ، لاہور دا ذکر کرن دے بہانے لبھدا سی تے پاکستان عوامی تحریک والے خوش ہو ہو جاندے ساہن تے تحریکِ انصاف دے اپنے کزناں دا سیاسی میدان وچ ساتھ دین لئی اپنا اخلاص ہور ودھا لیندے ساہن پَر اوہناں نوں کیہ پتا سی کہ تحریکِ انصاف حکومت وچ آن دے فوری بعد ای ایہ ساری خوشی وائو معدولہ بن جانی اے کہ جس دا کسے لفظ وچ ہونا وی نہ ہون برابر شمار ہندا اے۔
ن ۔ لیگ دا کدی وی کوئی سیاسی مستقبل نہئیں رہئیا ۔ اوہ جنی دیر وی سیاسی طور منظرِ عام تے رہئی اوہدے وچ اوہدی سیاسی جمہوری قابلیّت توں زیادہ ضیاء الحق دی آمرانہ نیّت شامل تے مددگار رہئی اے تے باقی کرپشن دے پیسے دا عمل دخل ۔۔۔ بس ، ہور کجھ وی نہئیں!!!
پاکستان دے سیاسی نظام وچ کرپشن ، قتل و غارت بدتمیزی ، کردارکشی تے غنڈہ گردی متعارف کران والی ن ۔لیگ ای تے سی جہڑی اج اپنے سیاسی انجام نوں اپڑی بیٹھی اے۔
نوازشریف ، شہباز شریف ساری عمر گلو بٹ تے رانے ثناء اللہ ورگے کردار ای تے پیدا کیتے تے پالے نیں تے قابلیت دا اندازہ ہر اوس حقیقت پسند پاکستانی نوں ہے جس اوبامہ ساہمنے نوازشریف نوں پرچی ہتھ وچ پھڑ کے وی پسینو پسینی ویکھیا اے۔
طاھرالقادری صاحب ایہناں دی خباثتاں توں اوس ویلے توں واقف ساہن جدوں اوہ میاں شریف صاحب دے مختلف معتبر حوالیاں نوں استعمال کر کے ایہناں نوں اتفاق جامعہ مسجد ماڈل ٹائون ، لاہور وچ خطبہء جمعہ لئی مجبور کرن وچ کامیاب ہو گئے ساہن تے گل وگڑی اوس ویلے جدوں جمعے دے خطاب دی مجبوری دے علاوہ طاھرالقادری صاحب کدی وی کوئی ہور ناجائز مجبوری قبول نہ کیتی۔
میں پہلے کئی وار کیتیاں پرانیاں گلاں نئیں دہرانا چاہندا کہ ہر ذی شعور جاندا اے کہ کس دا کیہ کردار رہئیا اے۔ اک گل ضرور کراں گا کہ تحریکِ انصاف اک وار دھوکا دے کے چکر بازی نال الیکشن کمپین وچ سانحہ ماڈل ٹائون ، لاہور دا کارڈ استعمال کرکے پاکستان عوامی تحریک دا ووٹ بینک اپنے حق وچ استعمال کر کے حکومت بنا بیٹھی اے پَر اگوں ایہ کم شاید انج نہ ہووے کہ ضمنی انتخابات وچ پاکستان عوامی تحریک دا ساتھ نہ دینا تے بدترین ناکامی بھگتنا سبھ دے ساہمنے اے۔ ملک وچ کدی وی اصل شفاف الیکشن نہئیں ہویا جو وکھایا جاندا رہئیا اے حقیقی منظر اوس دے اُلٹ اے۔
طاھرالقادری دی شخصیت اک سمندر وانگ اے جس دی خاموشی وی ایس غلیظ نظام دے محافظاں لئی کسے وقت وی فیر نویں سر درد بن سکدی اے تے ایہ سبھ کجھ ماضی وچ ثابت ہو چکیا اے۔
جہڑے ورکر تے کارکن اپنے قائد دی دسّی راہ تے چلدیاں اپنے مشن لئی جان دے سکدے نیں اوہ کسے اشارے پاروں سبھ کجھ تہس نہس کرکے جان لے وی سکدے نیں تے ماورائے عدالت قتل پاکستان وچ کنّے سوکھے نیں ایہ نواز شریف تے شہباز شریف توں ودھ کہڑا جاندا اے۔
سانحہ ماڈل ٹائون لاہور دا کیس عدالت وچ اٹھ یا ایس توں وی زیادہ جگہ تے مختلف انداز وچ زیرِ سماعت قاتلاں نوں ہرصورت بچان لئی ٹال مٹول دی نذر اے ورنہ ایس قوم دا بچہّ بچّہ قاتلاں نوں جاندا وی اے تے سیہاندا وی۔ دو شعراں راہئیں اشارہ کردیاں گل بات ختم کرنا چاہواں گا کہ عقلمند لئی اشارہ کافی ہندا اے ۔۔۔۔۔۔ کہ
٭٭٭
تمہاری مرضیاں سب ختم ہو جائیں گھڑی بھر میں
تمہاری عرضیاں ہوں گر اِشارہ ہو جو طاہر ؔ کا
نہ مجبوری رہے پھر عدل لینے کی عدالت سے
تمہاری برسیاں ہوں گر اِشارہ ہو جو طاہر ؔ کا
٭٭٭