پنجاب حکومت ولوں 48 سالاں وچ پہلی وار سب توں وڈے میزانیے دا بجٹ

بجٹ دی تیاری وچ بزدار حکومت دی بہترین حکمت عملی، ٹیکس وصولی دا آٹومیشن نظام سر فہرست،

احسن صدیق

پنجاب دا بجٹ کنج دا ہوئے گا، کنج دا ہونا چاہیدا اے، آئندہ مالی سال صوبہ تے عوام لئی کیہ آسانیاں لیائے گا، کیہ پنجاب وچ حقیقی ترقیاتی منصوبے بنن گے عوام نوں ایس بجٹ توں کیہ ملے گا پنجاب حکومت عام بندے دی بہتری لئی کیہ اقدامات کر رہی اے تے ایس نال ملدے جلدے بوہت سارے سوال بجٹ دی آمد دے نال ہر اک شہری تے دیہی علاقیاں وچ رہن والیاں دے ذہن وچ ابھردے نیں۔ پنجاب حکومت دے وزیر خزانہ مخدوم ہاشم جواں بخت نے پنجاب اسمبلی وچ مالی سال 2021-2022 دا بجٹ پیش کر دتا۔ حجم دے اعتبار نال پچھلے اڑتالی ورھیاں وچ پیش کیتے جان والے میزانیاں وچ سب توں وڈے میزانیے دا بجٹ اے جس وچ عام بندے لئی خوراک امن عامہ دی بہتری انفراسٹرکچر دی بنیاد وچ وسعت صحت تے تعلیم دے شعبیاں دے ترقیاتی منصوبیاں لئی بجٹ وچ ریکارڈ ایلوکیشن، انرجی ، زراعت تے دوجے سماجی شعبیاں وچ مختص کیتے جان والے فنڈز اک بہتر مستقبل دی نوید وکھائی دے رہے نیں جیہڑا کہ ایس حکومت دی بنیادی حکمت عملی وچ شامل اے۔ پنجاب وچ پی ٹی آئی حکومت ولوں پیش کیتا جان والا ایہہ چوتھا بجٹ اے۔ ایہہ بجٹ پچھلے تن پیش کیتے گئے بجٹس دے مقابلے وچ قدرے بہتر تے عوامی امنگاں دا آئینہ دار بجٹ اے کیوں جے پہلے دو سال پاکستان تحریک انصاف دی حکومت نوں پچھلی حکومت دی غلط پالیسیاں دی وجہ نال معیشت نوں درپیش چیلنجز دا ساہمنا رہیا۔ بزدار حکومت نوں ورثے وچ نہ صرف تباہ حال معیشت ملی بلکہ ماضی دے حکمراناں دے انج دے شاہانہ پراجیکٹس دا بوجھ وی چُکنا پیا جنہاں دا صوبہ متحمل نہ ہو سکدا سی جس دی واضح مثال اورنج ٹرین اے۔ انج دے کئی منصوبے شروع کیتے گئے جیہڑے ہن سفید ہاتھی بن چکے سن۔ سابق حکمراناں نے اپنے سیاسی مقصد لئی پاکستان دے معاشی ڈھانچے نوں بے دردی نال برباد کیتا۔ ایس سوال دا جواب اج تیکر نہیں مل سکیا کہ بھاری لاگت دے میگا پراجیکٹس دا آغاز کسے مالی منصوبہ بندی تے وسائل دی فراہمی دے بغیر کیوں کیتا گیا؟ ایہناں ساریاں بدانتظامیاں دے نتائج عوام نوں بھگتنا پئے۔ موجودہ حکومت نوں پہلے دو سال پچھلی حکومت ولوں مالی بدانتظامیاں دا ملبہ صاف کرن وچ لگے جد کہ تیجے سال کرونا دی وجہ نال ترقیاتی کم نہ ہو سکے۔ تاں اج بزدار حکومت دی بہتر حکمت عملی دی وجہ نال پنجاب مستحکم بنیاداں اُتے کھڑا اے تے نویں بجٹ وچ پنجاب دی تاریخ وچ ترقیاتی پروگرام وچ ریکارڈ ودھا کیتا گیا اے۔ ایس بجٹ دی اک خوبی ایہہ وی اے کہ پنجاب دی تاریخ وچ اک نویں روایت ہوئے گی کہ پنجاب دے جنوبی حصے دا الگ بجٹ ہوئے گا جس وچ سیاستداناں تے جاگیرداراں دی کرپشن پاروں محروم رہ جان والے علاقیاں نوں وی ترقی دی راہ اُتے پایا جائے گا۔
وزیراعظم پاکستان عمران خان نے جیہڑا وعدہ اہل پنجاب نال کیتا اوہ ضرور پورا ہوئے گا۔ نویں بجٹ وچ صحت دے شعبہ اُتے خصوصی توجہ دتی گئی اے تے صوبہ دے عوام نوں بہترین تے جدید طبی سہولتاں دی فراہمی لئی یونیورسل ہیلتھ کیئر دا پروگرام شروع کیتا گیا اے۔ ایس پروگرام دے تحت ایس ورہے دے آخر تیکر صوبہ پنجاب دے سارے خانداناں نوں صحت کارڈ فراہم کر دتے جان گے تے اوہ اپنی مرضی دے مطابق سرکاری و پرائیویٹ ہسپتالاں توں علاج کروا سکن گے۔ ایسے طرح صوبے وچ 5 نویں مدراینڈ چائلڈ کیئر ہسپتالاں دی تعمیر وی آئندہ مالی سال دے بجٹ دا اک نمایاں پہلو اے۔ کرونا نے جتھے پوری دنیا نوں متاثر کیتا اے ایس توں پاکستان وی محفوظ نہیںرہ سکیا، کرونا توں بچائو دی ویکسینیشن دا عمل جاری و ساری اے تے ایس مقصد لئی صوبہ بھر وچ 677 ویکسینیشن سنٹر قائم کیتے گئے نیں۔ حکومت نے واک اِن ویکسینیشن دا فیصلہ وی کیتا اے۔ حکومت دسمبر دے آخر تیکر پورے صوبے دے سارے شہریاں نوں ویکسین لان لئی پرعزم اے۔
حکومت پنجاب نویں بجٹ وچ تعلیم لئی خاطر خواہ فنڈز مختص کر رہی اے۔ حکومت پورے صوبے وچ انصاف سکول پروگرام لانچ کر رہی اے ایس دے علاوہ 30 ہزار سکولاں نوں اپ گریڈ کیتا جا رہیا اے جس لئی ارباں روپئے مختص کیتے جا رہے نیں۔40 لکھ بچے جیہڑے زیور تعلیم توں محروم نیں ایہناں نوں سکولاں وچ داخلہ کروایا جائے گا۔ صوبے وچ 8 نویں یونیورسٹیاں قائم کیتیاں جا رہیاں نیں تے ایہہ پسماندہ علاقیاں وچ قائم کیتیاں جان گیاں۔ حکومت کساناں نوں ریلیف فراہم کرن لئی وافر فنڈز مختص کر رہی اے۔ زرعی شعبے وچ ریسرچ اُتے خصوصی توجہ دتی جا رہی اے۔ حکومت تاریخ وچ پہلی وار پورے صوبے وچ یکساں ترقی دا منصوبہ لے کے آ رہی اے تے سارے ضلعیاں لئی ڈسٹرکٹ ڈویلپمنٹ پروگرام شروع کیتا جا رہیا اے تے پہلی وار سارے 36 ضلعیاں لئی ترقیاتی فنڈز رکھے جا رہے نیں۔ ایہناں ضلعیاں وچ عوامی نمائندیاں تے معززین علاقہ دے علاوہ ضلعی انتظامیہ دی مشاورت نال ترقیاتی سکیماں تیار کیتیاں جا رہیاں نیں۔ پنجاب وچ سڑکاں دی مرمت و بحالی دا پروگرام لیایا جا رہیا اے۔ وزیراعلیٰ پنجاب سردار عثمان بزدار دی ہدایت اُتے نویں سڑکاں دی تعمیر دے نال پہلے توں موجود ہزاراں کلومیٹر سڑکاں دی مرمت و بحالی لئی ارباں روپئے رکھے جا رہے نیں جنہاں وچ فارم ٹو مارکیٹ تے انٹرڈسٹرکٹ شاہرات شامل نیں۔
ورھیاں بعد پی ٹی آئی دی حکومت اک انج دا بجٹ لے کے آ رہی اے جس دی سب توں اہم خصوصیت ایہہ وے کہ ایہہ ٹیکس فری ہوئے گا تے کوئی ٹیکس نہیں لایا جا رہیا۔ سرکاری ملازمین دی تنخواہواں تے پنشن وچ وادھا کیتا جا رہیا اے۔ وفاقی حکومت دی گروتھ پالیسی دا مظہر، پنجاب بجٹ صوبے دے معاشی افق اُتے نویں کامیابیاں لے کے آئے گا۔ وزیراعظم عمران خان نے وعدے دے مطابق پی ٹی آئی حکومت دا تیجا سال واقعی معاشی ٹیک آف دا سال ثابت ہویا اے۔ وفاقی حکومت وانگوں پنجاب نے وی پی ٹی آئی حکومت نے سخت مالیاتی ڈسپلن دا مظاہرہ کردے ہوئے اپنے معاشی اہداف حاصل کیتے تے عوام نوں مشکلات تے مہنگائی دے چنگل توں کڈن لئی مضبوط معیشت دی بنیاد رکھ دتی اے۔ وفاقی حکومت دے نقش قدم اُتے چلدے ہوئے پنجاب حکومت وی حقیقی عوام دوست بجٹ پیش کر چُکی اے۔ ایہناں تن ورھیاں وچ حکومت دی شبانہ روز محنت نال پاکستانی خزانہ بھر گیا اے۔ ماضی وچ حکومت و چ شامل بندے بجٹ آن توں پہلے ای ایہناں سیکٹرز وچ انویسٹمنٹ کر لیندے سن جنہاں اُتے حکومت ٹیکس چھوٹ دین دا ارادہ رکھدی سی۔ ایس طرح ایہناں نوں ناجائز مال قانونی طریقے نال ہضم کرن دا موقع مل جاندا سی۔ موجودہ حکومت نے ایس ریت نوں بدل دتا اے۔
صوبائی وزیر خزانہ ہاشم جوان بخت دا کہنا اے کہ ٹیکس وچ ریلیف دا سلسلہ ایس بجٹ دے بنیادی مقصد وچوں اک اے۔ انفراسٹرکچر ڈویلپمنٹ سیس دا خاتمہ سٹڈی دے نتائج توں مشروط ہوئے گا۔ کساناں نوں سبسڈی تے دیگر مراعات دی فراہمی لئی کسان کارڈ دے دائرہ کار نوں وسعت دتی جا رہی اے۔ بجٹ پروبزنس اے۔ کارپوریٹ سیکٹر دی ایگری بزنس وچ دلچسپی ودھان لئی 16 فیصد ٹیکس نوں اک فیصد کر دتا گیا اے۔ ایکسپورٹ نوں ودھان لئی مزید اقدامات کیتے جا رہے نیں۔ اوور ریگولیٹر سسٹم نوں ختم کیتا جا رہیا اے۔ وزیراعظم پاکستان کنسٹرکشن توں زیادہ فوکس زراعت اُتے کر رہے نیں۔ بجٹ وچ زراعت دی ترقی لئی کساناں نوں ریلیف دتا گیا اے۔ معیاری بیج دی دستیابی لئی وفاقی حکومت اقدامات کر رہی اے۔ اوہناں نے توقع ظاہر کیتی کہ موجودہ سال وچ زراعت دا بجٹ سو فیصد توں زیادہ ودھ جائے گا۔ پچھلے مالی ورہے وچ پنجاب حکومت نے 56 ارب روپئے دا ٹیکس ریلیف دتا۔ اسٹیمپ ڈیوٹی وچ وڈا ریلیف دتا گیا۔ 22 سیکٹرز نوں ٹیکساں وچ دتی گئی چھوٹ دے باوجود پنجاب ریونیو اتھارٹی دی کارکردگی مثالی اے۔ جس لئی حکومت دی پالیسیاںدا تسلسل برقرار رکھنا ہوئے گا۔ ٹیکس اکٹھا کرن لئی صوبائی ایجنسی تے ٹیکساں دی شرح وچ ہم آہنگی ضروری اے جس سیکٹر نوں ایف بی آر Zero Rated کرے گا۔ پنجاب وچ اوہ سیکٹر خود بخود Zero Rated ہو جائے گا۔ وزیر خزانہ نے کہیا کہ پنجاب حکومت دا 2021-22 دا صوبائی بجٹ عوامی امنگاںدا عکاس تے کاروبار دوست اے۔ پنجاب وچ روزگار پروگرام لئی تن ارب مختص کیتے گئے نیں ایس دے ذریعے وی قرض حاصل کیتے جا سکدے نیں۔ کرونا توں بحالی لئی اختیار کیتی گئی ۔ کامیاب معاشی پالیسیاں نوں آئندہ مالی سال وچ وی جاری رکھیا جائے گا۔
نکے کاروباراں دے تحفظ تے معاشی سرگرمیاں دے فروغ ء ٹیکسز وچ دتی گئی رعایت برقرار رکھی گئی اے۔ آئندہ بجٹ وچ صنعتکاراں دے مسائل دے حل تے عالمی سطح اُتے دستیاب سہولتاں دی فراہمی لئی 10 ارب روپئے دا وادھا پیکیج متعارف کروایا جا رہیا اے۔ انفراسٹرکچر سیس متعلق سفارشات اُتے عمل درآمد لئی فزیبیلٹی رپورٹ تن مہینے وچ مکمل کر لئی جائے گی۔ سیس دے خاتمے دا فیصلہ ایس دی افادیت توں مشروط ہوئے گا۔ وسائل وچ وادھے لئی ٹیکس دی شرح وچ وادھے دی بجائے ٹیکس نیٹ دے پھیلائو دی حکمت عملی برقرار رکھی جائے گی۔ صوبائی وزیر نے کہیا کہ ٹیکسز وچ ریلیف دے باوجود پنجاب ریونیو اتھارٹی نے اپنا ہدف پورا کیتا جس وچ ادارے دی کارکردگی دے نال کاروباری برادری دا تعاون شامل اے۔ واسا دے ٹیرف دے حوالے نال صوبائی وزیر دا کہنا سی کہ لہور وچ زیر زمین پانی دی سطح وچ کمی تے پانی دی تقسیم لئی موزوں پالیسی دا فقدان اے۔ صوبائی وزیر نے کہیا کہ لہور وچ فوڈ اینڈ ڈرگز ٹیسٹنگ لیب اُتے وی کم جاری اے۔پیکیج دے تحت صنعتکاراں نوں لیبارٹریز دی سہولت وی مہیا کیتی جائے گی۔ حکومت صنعت کاراں تے تاجراں دی آسانی لئی فرسودہ قوانین دے خاتمے نوں یقینی بنا رہی اے۔ ٹیکس وصولیاں دا آٹومیشن نظام صوبائی حکومت دے ٹاپ ایجنڈہ دا حصہ اے۔
لہور چیمبر آف کامرس اینڈ انڈسٹری دے نائب صدر طاہر منظور چودھری نے کہیا کہ ٹیکس وصولیاں وچ وادھے دا کریڈٹ بزنس کمیونٹی نوں جاندا اے جیہڑے ملک دی تعمیر و ترقی وچ اہم کردار ادا کر رہے نیں ایس دی صوبے وچ بہترین مثال پنجاب ریونیو اتھارٹی اے۔ پچھلے مالی سال دی اینی مدت دے دوران 99ارب روپئے دے سیلز ٹیکس دے مقابلے وچ 29.5 فیصد زائد ٹیکس وصول ہوئے۔
سروسز اُتے عائد سیلز ٹیکس دی مد وچ مئی دے دوران 11 ارب 25 کروڑ روپئے دی ٹیکس وصولی کیتی گئی جد کہ رواں مالی سال دے دوران 125ارب روپئے دا ہدف دتا گیا سی تے مئی وچ ای مقررہ ہدف توں ودھ ٹیکس وصولی اُتے حکومت پنجاب نے نظر ثانی کر کے ایہہ ہدف 141 ارب 15 کروڑ روپئے مقرر کر دتا۔ اوہناں نے کہیا کہ سٹیک ہولڈرز نوں آگاہی دین نال ٹیکس وصولی وچ نمایاں بہتری آئی جد کہ کرونا وبا وچ ٹیکس گزاراں دی سہولت لئی 25 سروسز اُتے ٹیکس ریٹ گھٹ کرن دے باوجود اتھارٹی نے اہداف پورے کر لئے۔ فیڈریشن پاکستان چیمبر آف کامرس اینڈ انڈسٹری دے سینئر نائب صدر خواجہ شاہ زیب نے کہیا کہ کاروبار وچ آسانیاں پیدا کرن نال ای کاروبار نوں فروغ حاصل ہو سکدا اے اوہناں نے چیف آف آرمی سٹاف جنرل جاوید باوجوہ توں صنعتکاراں تے تاجراں نال ملاقات دے حوالہ نال کہیا کہ بزنس کمیونٹی نے ایہناں دی ملک دی معاشی پالیسیاں وچ بہتری لیان لئی ہر ممکن تعاون دا یقین دلوایا اے۔ وفاقی تے صوبائی سطح اُتے حکومتاں نے جیہڑے میزانیے پیش کیتے نیں ایس نال ملکی پیداوار تے دولت ودھے گی۔ دونواں حکومت دے میزانیاں وچ گروتھ ودھان دے اقدامات کیتے گئے نیں جس دے نتیجے وچ تسلسل دے نال پالیسیاں نال معاشی حالات نوں بہتر بنایا جا سکدا اے۔