سارا قصور ای نوازشریف دا اے

حناپرویزبٹ

سویلین حکومت دے سرنڈر کرن توں انکار تے عوامی سطح تے غیراعلانیہ جد کہ اقتدار دی راہداریاں وچ علانیہ طور تے وطن عزیز وچ اپنی حاکمیت قائم کرن دا اعلان کر دتا گیا سی جہدے نتیجے وچ وطن عزیز سیاسی طور تے تباہی دے کنڈھے تے اپڑ چکیا اے۔ تحریک انصاف دے ہمنوا اپنے کٹھ پتلی ہون دا فخریہ اعلان کردے نیں۔ نوجواناں نوں اپنا ہم نوا بنان لئی پب جی گیم تخلیق کیتی گئی تخلیق کاراں نے بڑا پرکشش ٹائٹل‘ مرحلے تے نعرے ترتیب دتے کہ بلاامتیاز جنس و عمر ناپختہ و پختہ ذہن رکھن والے وی تبدیلی دے ترانے توں گمراہ ہو گئے تسلی دے نعریاں پاروں لوک ہر دن اک نویں ٹریپ وچ پھس جاندے۔ ایہ پب جی گیم وانگوں ای اے جہدے وچ واپسی دا کوئی راہ رکھیا ای نہیں گیا یعنی جدوں کوئی گیم دے مخصوص زون وچ داخل ہو جاندا اے تے واپسی دا امکان ختم شد۔
تن ورھے تک کٹھ پتلی بھاویں بناں آسرے چل سکدے نیں پر فیڈڈ پروگرام توں علاوہ اوہنوں کجھ نہیں کرنا آئوندا‘ اعلان کیتا گیا سی کہ نوازشریف سانوں قبول نہیں کیوں جے اوہ لوکاں نوں مصنوعی طور تے 35روپیے کلو آٹا‘ 50روپیے کلو چینی‘ 120روپیے کلو گھیو‘ 150روپے فی کلو مرغی دین تے اڑیا اے۔ پراپیگنڈا کیتا گیا کہ مسیحا دا روپ ختم کر کے نوازشریف نوں کرپٹ وزیراعظم ڈکلیئر کیتا جاوے۔ نوازشریف انفراسٹرکچر دے میگا منصوبیاں نوں یک جنبش قلم شروع کر دیندا اے ایس لئی اوہ کرپٹ اے۔ کہیا گیا نوازشریف جاہل وزیراعظم اے اوہنوں معیشت دا کیہ پتہ‘ اوہ تے کمیشن بنان لئی روزگار تے کاروبار ودھان دیاں پالیسیاں بناندا اے۔ ایسے لئی پناہ گاہواں تے لنگرخانے بنا کے قوم نوں بیکار بنان دی پالیسی دا اجرا کیتا گیا۔ بالکل انج ای جیویں گورباچوف نوں ملک کمزور کرن لئی روس دا صدر بنایا گیا سی۔ جھوٹ پھیلایا گیا کہ ہریسہ کھان والے نوازشریف دا دماغ کم نہیں کردا کیوں جے اوہنے بناں سوچے سمجھے ٹرانسپورٹ نظام دی بہتری لئی تے نوجواناں نوں قرضے دین دیاں فضول سکیماں شروع کیتیاں جد کہ سلیکٹڈ نے اوہو سکیماں نوی ںناں توںفیر شروع کر دتیاں۔
ایہ وی اعتراض کیتا گیا کہ نوازشریف دی ہدایت تے شہبازشریف نے ذہین تے قابل بچیاں نوں بیرون ملک دے دورے کروائے اوہناں نوں لیپ ٹاپ دتے جو دنیا دا سب توں وڈا ظلم سی۔ ایہدے نال جواناں وچ تعلیم دے حصول لئی محنت کرن دا جہڑا جذبہ اجاگر ہویا اوہ ملک لئی بڑا خطرناک سی۔ اعتراض تے ایہ وی چکیا گیا کہ نوازشریف نے چھ ایٹمی دھماکے کرکے ارباں امریکی ڈالر وصول کرن دا سنہری موقع کھو کے معیشت کمزور تے ملک نوں بدنام کر دتا۔ نکتہ چینی تے ایہ وی کیتی گئی کہ آئی ایم ایف چوں نکلن دا معاملہ ہووے یاں بھارت ول دوستی دا ہتھ ودھان دی گل‘ گوادر نوں عالمی سطح دا یونٹ بنان دا منصوبہ ہووے یاں نگ روڈز دی تعمیر وچ تسلسل لیان دی پالیسی‘ نوازشریف سویلین ہو کے وی ڈکٹیشن نہیں لیندا سگوں اپنی مرضی نال کم کرنا چاہندا اے ہور تے ہور اوہدا چھوٹا بھائی شہبازشریف پنجاب سپیڈ بن کے دن رات نیک نامی کمان وچ لگا رہندا اے رات دے کسے پہر وی ترقیاتی منصوبے تے اپڑ کے ٹائم لائن دی آپ نگرانی کردا اے۔
شریف برادران دی نیک نامی قابل قبول ای نہیں سگوں ناقابل برداشت اے انج نہ ہو کے اوہ اینے طاقتور بن جان کہ ہٹانا ناممکن ہو جاوے جبر تے طاقت دے سارے داء کھیڈن دے باوجود نوازشریف دی مقبولیت پہلے توں کئی گنا ودھ چکی اے۔ حکمراناں نے تن ورھیاں وچ نیب‘ ایف آئی اے وچ مقدمیاں وچ الجھان تے گرفتار کرن دے باوجود اپوزیشن تے اک پیسے دی کرپشن وی ثابت نہیں کیتی۔ کٹھ پتلی وزیراعظم تے اوہدے ہمنوا آپ ای عدالت بن کے انکوائریاں دا اعلان کر رہے نیں۔ تاں ای تے ظفرمرزا‘ خسروبختیار‘ جہانگیرترین سارے سکینڈل دے باوجود وی حاجی قرار دے دتے گئے۔ شاید آٹا سکینڈل وچ آٹا شہبازشریف کھا گیا ہووے تے چینی سکینڈل وچ گنے دا جوس نوازشریف ای پی گیا ہووے۔ عوام جان چکے نیں کہ سارا قصور ای نوازشریف دا سی اوہ ایناں ضدی سی کہ سستے نان روٹی‘ سبزی‘ دالاں‘ گیس‘ بجلی‘ پانی دے کے بھارت نوں خوش کردا سی جد کہ شہبازشریف دن رات ترقیاتی کم مکمل کر کے امریکہ تے اسرائیل نوں خوش کردا سی۔ اوہناں نوں روکن لئی آمدن توں ودھ اثاثیاں‘ منی لانڈرنگ تے غداری دے مقدمے درج کرنا ضروری سن پر عوام جان گئے نیں کہ ہسپتال نوں پنجاہ کروڑ روپیے نقد دین والے کجھ کروڑ دے فلیٹس برطانیہ وچ کیوں نہیں خرید سکدے سن جد کہ برطانوی عدالت نے وی فلیٹاں دی خریداری دی ٹرانزیکشن نوں ٹھیک تے قنونی قرار دے دتا اے۔٭٭