پِلاک لوک سٹوڈیو وچ نامور گلوکار مسعود رانا دی ورھے گنڈھ اتے مکالماتی نشست

سید علی قیصر

پنجاب انسٹیٹیوٹ آف لینگوئج، آرٹ اینڈ کلچر (پِلاک) دے زیر اہتمام پلاک لوک سٹوڈیو وچ ماضی دے نامور گلوکار مسعود رانا دی سالگرہ دے موقعے اُتے اک مکالماتی نشست دا انعقاد کیتا گیا۔ جس دی میزبانی خاقان حیدر غازی نے کیتی جد کہ معروف گلوکار انور رفیع نے بطور مہمان شرکت کیتی۔گلوکار مسعود رانا دی شخصیت تے فن دے حوالے نال انور رفیع نے کہیا کہ ایہناں دے گائے ہوئے گیت اج وی ساڈی سماعتاں نوں تازگی بخش دے نیں۔اگرچہ ایہناں دا تعلق کسے موسیقار گھرانے نال نہیں پر ایہناں دی اواز وچ اک انج دا جادو سی جیہڑا کہ سنن والیاں نوں اپنی گرفت وچ لے لیندا۔

ایہناں دے گائے ہوئے اکثر گانے زبان زد عام ہوئے مثلاً ’’ٹانگے والا خیر منگدا‘‘، ’’سجناں ایہہ محفل اساں تیرے لئی سجائی اے‘‘ تے ’’میرے دل کی ہے آواز کہ بچھڑا یار ملے گا‘‘ جہے کئی گانے بے حد مقبول ہوئے۔
ایس موقعے اُتے ڈاکٹر صغرا صدف نے کہیا کہ فن و ثقافت دے میدان وچ خدمات سرانجام دین والے جنہے وی فنکار نیں ایہناں دی صرف سالگرہ ای منانی چاہیدی اے کیوں جے اوہ اپنے فن پاروں اج وی لوکاں دے دلاں وچ زندہ نیں۔ صوفیہ بیدار نے کہیا کہ اج وی ایہناں دے گائے ہوئے گانے سن کے بندہ ماضی دے خوشگوار لمحات نوں محسوس کرن لگدا اے۔