بچے پارلیمانی گفتگو توں پرہیز کرن
سید صفدر رضا
سگریٹ دے پیکٹ اُتے بے معنی لکھیا ہویا جملہ خبر دار تمباکو نوشی صحت لئی مضر اے ایس دی طرح دوائی دے بارے وچ کہیا جاندا اے بچیاں نوں دوائی توں دور رکھو گڈیاں دے پچھے لکھیا ہوندا اے فاصلہ رکھو، ہن ٹی وی اُتے اسمبلی دے اجلاس دے بارے وچ خبر نشر تے کاروائی نشر کردے ہوئے اعلانیہ جاری کرو، خبردار بچے اسمبلی دی کاروائی نہ ویکھن تے اخلاقیات دی تعلیم دیندے ہوئے سمجھایا جائے اسمبلی دی زبان وچ گل بات کرن توں گریز کرن کیوں جے پارلیمانی زبان وچ گل بات نہ کرن پہلے ای مہنگائی نے روٹی دا نوالہ کھوہ لیا اے ہن پارلیمان وچ ہون والی کاروائی جس شائستہ انداز وچ جاری اے ایس توں اسیں قوم دی کیہ خدمت کر رہے آں بچے پچھدے نیں جدوں اسیں سکول وچ اپنے تعلیمی دن دا آغاز اسمبلی توں کرنے آں تے اوتھے تے کدی انج دی صورت حال والی اسمبلی نہیں ہوئی تے اسمبلی ارکان جیہڑے کسے قوم دا سافٹ امیج پیش کردے نیں اوہ ایس انداز وچ گل بات فرما رہے سن جس انداز تکلم نوں سن کے نہ صرف ساڈے سر بحیثیت قوم شرم نال جھک گئے ایہناں لوکاں نوں شاہ توں زیادہ شاہ دے مصاحب بن دے ویکھ کے حیرانی ایس اُتے سی کہ قانون ساز اسمبلی دے اراکین نے تہیہ کر لیا اے کہ قانون سازی دے علاوہ ہر رستہ ایس اسمبلی وچ اپنایا جائے گا قوم دا پیسہ اسمبلی اراکین کس اہم انداز وچ خرچ کر رہے نیں اللہ دے ناں ایہناں دے سر اُتے چھت تے لکھے ہونا وی ایہناں لوکاں نوں جھوٹ بدتمیزی بدتہذیبی عروج اُتے پیش فرماندے ہوئے ویکھیا جا سکدا اے۔ جیہڑا اسمبلی وچ پرتشدد رویہ ویکھیا جا رہیا اے ایس توں پہلاں ویکھن نوں نہیں ملیا ایہہ ہون والی تبدیلی ایس واراکین اسمبلی دے انتہائی محنت، شفقت نال مہنگائی تے کرونا دے پرفتن ماحول وچ انتہائی مشکل توں ممکن ہو سکی، اسیں اپنی قوم دے دکھاں دا مداوا کرن دی بجائے تے اختلاف رائے دی بجائے دشمنی وچ تبدیل کر کے احسان عظیم فرما رہے نیں۔ ایس اسمبلی وچ اراکین دی گالی گلوچ ایس عروج اُتے سی گویا PHD کر رکھی اے تے ایس حمام وچ سب ننگے نظر آئے کجھ لوکاں دے رویاں نے حکومتی اراکین تے اپوزیشن اراکین کیہ مرد کیہ خواتین سب اک نظر آئے خدا دا واسطہ جے اپنے رویاں دی اصلاح فرمائو اپنی قوت برداشت نوں ودھائو صبر و تحمل نوں اپنا کے ایہہ دسو کہ ساڈا تعلق۔ پیغمبر امن دی امت نال اے جنہاں دی تعلیمات سانوں دشمناں دے نال رویاں دا درس دیندی اے فتح مکہ دے موقعے اُتے اپنے چچا دا کلیجہ چبان والی ہندہ تے ایس ویلے دے کفر و شرک دی ہر جنگ وچ حضور اکرم ﷺ دے مقابل آن والے نوں معاف فرمایا بلکہ فتح مکہ دے موقعے اُتے عام معافی دا اعلان فرمایا اسیں جس نبی اکرم دے امتی آں اسیںتے مدینہ دی ریاست دے دعویدار آں اپنے عمل تے رویے نوں ثابت فرمائو تے ایس مقدس ایوان دے تقدس نوں ملحوظ خاطر رکھو۔
